උසස් පෙල විභාගය දැන් අවසානයි. දරුවන් වගේම අම්මලාටත් අස්වැසිල්ලක් ලැබුනත් දැන් තිබෙන්නේ ඉතාම සංක්‍රාන්ති කාලයක්. හොඳින් විභාගයට මුහුණ දුන් දරුවන් විශ්ව විද්‍යාලය වෙනුවෙන් සිහින මවන අතර තමන්ට විභාගය ගැන ආත්ම විශ්වාසයක් නැති දරුවන් දෙවැනි වතාවට විභාගය වෙනුවෙන් සූදානම් විය යුතුය යන චකිතයෙන් පසුවෙනවා.
මේ අතර වූ දෝලනය වෙන සංක්‍රාන්ති කාලය වෙනුවෙන් දෙමව්පියන්ගේ අවධානය දැක්වීම ඉතාම වැදගත්. විභාගය වෙනුවෙන් වෙහෙසකර කාලයක් ගෙවා අවසානයෙන් පසු දරුවන්ට යම් විවේකයක් ලැබීම අත්‍යවශ්‍යයි. මේ විවේකය තුල ඇති වෙන හැලහැප්පීම්ද බහුලයි. දරුවන්ට සතුට ලබා ගැනීමේ මාධ්‍ය එක් එක් දරුවාට සාපේක්ෂව බොහොම වෙනස්. පිරිමි දරුවන් ගේ විනෝදකාමි බව ගැහැණු දරුවන්ට වඩා වෙනස්. ඒ තත්වය තුල ඇති වෙන අනතුරුත් බහුලයි. බොහෝ පිරිමි දරුවන් විනෝද චාරිකාවන් වෙනුවෙන් සහභාගී වී බීමත්ව දියනෑම් වැනි කටයුතු නිසා ජීවිතය පවා අහිමි කර ගන්නා තරමටම කනගාටුදායක තත්වයක්. ඒ නිසා පිරිමි දරුවන්ගේ චාරිකාවන් පිලිබඳව ඔවුන්ට දැනුවත් බවක් ලබා දීම අවශ්‍යයි.
ඔබේ දරුවා ඉතා යහපත් චරිතයක් බව සැබෑ වුනත් මෙවන් චාරිකාවන්හිදී දරුවා නොමගට යවන්නනට ඇදෙන්නටත් අවදානමක් තිබෙනවා. ඒ නිසා විභාගය අවසානයේදී විනෝද වෙන්නට සිදු වෙන සැලසුම් පිලිබඳව දෙමව්පියන්ද අවධානයෙන් සිටීම ඉතා වැදගත්.
අද ගැහැණු දරුවන්ද බොහෝ සේ විනෝදයට බරයි. ඔවුන්ද කණ්ඩායම් වශයෙන් විනෝදගමන් සූදානම් කරන ගන්නා නිසා ඒ ගැනත් මව්පියන්ගේ අවධානය දැක්වීම වැදගත්. ඔවුන් චාරිකා වෙනුවෙන් සූදානම් කර ගන්නා ස්ථාන ගැනත් දැණුවත් වීම අවශ්‍යයි. ඇතැම් තැන් විනෝදයට ගැලපෙන බව ඇත්ත වුනත් ගැහැණු දරුවන්ට තනිපංගලමේ චාරිකාවේ යෙදෙන්නනට තරම් සුදුසු ස්ථාන නොවෙයි. ඒත් වයසේ වැරැද්දදට හෝ දැරියන් ඒ ගැන නොදන්නා බව සැබෑ වුනත් දෙමාපියන් විදිහට මේ පිලිබඳව පෙර විපරම් කොට එහි ගැලපෙන හෝ නොගැලපෙන බව ඔවුන්ට තේරුම් කර දීම ඉතාම වැදගත්ය.
- දරුවන් චාරිකාවක යෙදෙන්නේ නම් ඒ යන පිරිස ගැන අසා දැනගන්න.
- ඔවුන්ගේ දෙමව්පියන් සමග සාකච්ඡා කරන්න.
- ගමනට සම්බන්ධ සෑම දුවකගේම දුරකථන අංකය ලබා ගන්න.
- යන එන ස්ථානයන්හි තිබෙන අනතුරු ස්ථාන ගැන කියා දෙන්න.
- ඔවුන්ගේ මාර්ග සිතියම ඔබද ලබා ගන්න.
- ගැහැණු දරුවන්ගේ චාරිකාව නම් එක් දිනකට පමණක් සීමා කිරීම වඩාත් වැදගත් වන්නේ රාත්‍රි ලැගුම් ගැනීමේදී පවා ඇති විය හැකි අප නොසිතන අන්දමේ අනතුරු බොහෝ ඇති නිසාය.
- දරුවන්ගේ ඥාතීන්ගේ නිවෙසක වුනත් අද එතරම් ආරක්ෂාවක් ඇතැයි අපට සහතික විය නොහැකියි.
- ඔවුන්ගේ විනෝදයට බාධා නොවන සේ අම්මා කෙනෙක්වත් මේ ගමනට සම්බන්ධ වීමට හැකි නම් වඩාත් යෝගයයි. සමවයස් දැරියන්ට යම් යම් අන්පේක්ෂිත අවස්ථාවන්හිදී මුහුණ දෙන අන්දම ගැන තිබෙන නොදැනුවත් බව වගේම එවන් අවස්ථාවකදී මේ කන්ඩායමටම විශාල ශක්තියක් වැඩිහිටි මවගෙන් ලැබෙනු ඇත.
පාඨමාලාවක් හදාරන්නේ නම්
උසස් පෙල අවසානයේ පටන් ප්‍රතිඵල එන තෙක් ඇති සංක්‍රාන්ති කාලය ඉතා හොදින් සැලසුම් කර ගැනීමට දැන් ඔබට පුලුවන්ය. ජීවිතයේ නැවත කිසිම දිනක මේ ගෙවෙන කාලය උපයා ගත නොහැකියි. ඒ නිසා අනාගතයට ගැලපෙන පාඨමාලාවක් ගැන සිතන්න. කරන අය පසු පසු යමින් පාඨමාලාවන් කරනු වෙනුවට ඔබ දැනට ඉලක්ක කර ගෙන සිටින අරමුණට ගැලපෙන අන්දමින් පාඨමාලාවක් තෝරා ගන්න.
භාෂාවක් ඉගෙණුම ඉතාම වැදගත්
මෙතෙක් විභාගය මතම යැපුන ඔබට දැන් අතිරේක භාෂාවක් ඉගෙනුම වෙනුවෙන් කාලය ලැබී ඇත. භාෂාවක් ඉගෙනීම මගින් මොළය වඩාත් තිරිහන්වෙන බව මනෝ වෛද්‍ය විශේෂඥයන්ගේ අදහසයි. අපි මෙතෙක් වැඩි අවධානයක් දක්වන ලැබුවේ ජාත්‍යන්තරයේ පිලිගැනීම ඇති ඉංග්‍රිසි භාෂාවට පමණක් වුනත්, හින්දි, ප්‍රංශ, ජර්මන් වැනි විවිධ භාෂාවන් වෙනුවෙන්ද දැන් අවශ්‍යතාවය ගොඩ නැගෙමින් පවතී. ගෝලීයකරනය තුල අද බොහෝ දරුවන් මෙම රටවල් සමග සම්බන්ධතාවයන් ගොඩ නගා ගැනීමේ අනාගත ඉලක්ක ඇති නිසා මේ ලැබී තිබෙන කාලය එවන් වූ භාෂා ඉගෙණුමක් වෙනුවෙන් යොමු කල හැකිය. ඒ අතරම දෙමළ භාෂාව වෙනුවෙන් දැන් විශේෂ වටිනාකමක් ලැබී ඇත. රාජ්‍ය සේවයේ පවා දෙමළ භාෂාව වෙනුවෙන් ප්‍රවීනතාවය ලබා ගැනීම අත්‍යවශ්‍ය බැවින් මේ ලැබී ඇති කාලයේ එවන් වූ වැදගත් ඉගෙණුම් අවස්ථාවක් ඔබට උපයා ගත හැක.
නිවසේ අලංකාරය වෙනුවෙන් කාලය දැන් තිබෙනවා
වසර තුනක් පමණ කාලයක් නිවසේ කටයුතු වෙනුවෙන් සම්බන්ධ නොවී තමන්ගේ ඉගෙණුම අරමුණ මතම යොමුව සිටි දරු දැරියන්ට දැන් තමන්ගේ කාමරය, නිවස සහ වටපිටාව පිරිසිදුව සහ අලංකාරව තබා ගැනීමට අවස්ථාව ලැබී ඇත. කාමරය වර්ණ ගැන්වීම, මල්පැල හෝ එලවලු පැල සිටුවීම, දැනට තිබෙන පරිසරය අලංකාර කිරීම වැනි කටයුතු වෙනුවෙන් යොමු වීම නිසා මානසිකව ලැබෙන තෘප්තිය වගේම මව්පියන්ටත් සහයෝගයක් ලබා දීමට මේ සංක්‍රාන්ති කාලය යොදා ගත හැකියි.
ඇඳුම් මැසිම, ඉවුම් පිහුම් කටයුතු
අද ගැහැණු දරුවන් එදා වගේ බාලේ පටන්ම මුලුතැන්ගෙයි කටයුතු වෙනුවෙන් සම්බන්ධ කර ගැනීමට උනන්දු දෙමව්පියන්ගේ එකම ඉලක්කය දරුවාගේ අධ්‍යාපනය නිසාය. දැන් ඔවුන්ගේ ඉගෙණුම් කාර්යයයේ එක් අදියරක් අවසානය. යම් කඩඉමක නැවතී ඇත. මේ කඩඉමෙන් ජයගත් විට උසස් අධ්‍යාපනයටත් කඩඉම සිතන තරම් ජයග්‍රාහී නොවුන විට නැවත විභාගය වෙනුවෙන් සූදානම් වීම වැනි අවස්ථා දෙකක් ඇත. එහෙත් ප්‍රතිඵල එන තෙක් නැවතී සිටින මේ කාලය උපරිම ලෙසින් ප්‍රයෝජන ගත යුතුය. ඒ නිසා ආහාර පිසීම සහ තමන්ට ගැලපෙන අන්දමින් ඇදුම් මසා ගැනීම වැනි කටයුතු සඳහා මේ කාලය දරුවන්ට යොදා ගත හැකි අතර ඒ වෙනුවෙන් අවශ්‍ය සහයෝගය දෙමව්පියන් විදිහට ඔබ ලබා දෙන්න.
අතිරේක කියවීමට කාලය දැන් වේලාව ඇත
මෙතෙක් විෂය දැණුම වෙනුවෙන්ම වූ පොත් පත් මතම යැපුන ඔබට දැන් දැනුම සහ විනෝදය වෙනුවෙන් කියවීමට අවස්ථාව ලැබෙනු ඇත. ඒ නිසා මහජන පුස්තකාලයක සාමාජිකත්වය ලබා දී අවශ්‍ය පොත් පත් කියවා දැණුම සහ විනෝදය ලබා ගැනීමට දරුවන් පොත පත සමග සම්බන්ධ කිරීමට හොඳම කාලය දැන් එළැඹ තිබේ.
