අද වෙනකොට අපේ අම්මලා බොහොම කාර්ය බහුලයි. මොකද රැකියාව, ගෙදර වැඩ කටයුතු, ඒ වගේම දරුවන්ගේ වැඩ කටයුතු එක්ක වෙනත් දෙයක් කරන්න නම් වෙලාවක් නැති ගානයි. ගෙදර ආච්චි, සීයා හිටියත් විදුලි වේගෙන් එහෙට මෙහෙට දුව පනින මේ පුංචි පුංචි විසේකරයන්ව බලාගන්න තරම් ශක්තියක් ඔවුන්ට දැන් නැ. ඉතිං ආච්චි සීයාගේ අධීක්ෂණය යටතේ අම්මා ඔෆිස් ගිහින් එනකන් දරුවාගේ වැඩ කටයුතු ටික කරගෙන ඉන්න සහයිකාවක් හිටියොත් කාටත් ලේසියි. ඒත් සමහ නිවෙස්වල දරුවයි සහයිකවයි පමණයි දහවල් කාලයේ නිවසේ රැදෙන්නේ. අන්න ඒ නිසාම ඔබේ නිවසට සහයිකාවක් තොරගනිද්දී ඔබ මෙන්න මේ කරුණු ගැන සැලකිලිමත් විය යුතුමයි.
ඔබේ සහායිකාව ලෙස ශක්තිමත් නිරෝගී කාන්තාවක් තෝරාගන්න
ඔබ තෝරාගන්න කාන්තාව ශාරීරිකවත් මානසිකවත් උසස් තත්ත්වයක සිටීම බොහොම වටිනවා. ඇය ගැන හොදින් සොයා බැලීම වැදගත් වන්නේ ඇයගේ හැසිරීම, ඇය ඇගේ වගකීම ඉටු කරන ආකාරය දරුවාගේ ශාරීරික හා මානසික සංවර්ධනයට බෙහෙවින්ම බලපාන නිසයි. ඒ නිසා දරුවා සමග සිටින්නට තෝරාගන්නා කාන්තාව උසස් මානසික මට්ටමක සිටීම වැඩ වැදගත් වේ. පසු ගිය කාලයේ එහෙන් මෙහෙන් අසන්නට දකින්නට ලැබුණු භයානක පුවත් ඔබේ මතකයේ ඇති, දරුවාට හිරි හැරයක් කරදරයක් නොවන ආකාරයේ කාන්තාවක් තෝරාගැනීම ඔබේ වගකීමක් බව සිහි තබාගන්න.
අවධානයඑසේම සහයිකාව දද, කුෂ්ඨ, අළුහම් වැනි සමේ රෝගවලින් තොර අයෙක්ද යන්න සැක හැර දැනගන්න. එසේම වලිප්පුව, හදවත් රෝග, අධි රුධිර පීඩනය, ඇදුම හෝ දියවැඩියාව වැනි තත්ත්වයන්ගෙන් පෙලෙයි නම් වෛද්‍ය උපදෙස් අනුව නිසි කලට ප්‍රතිකාරවෙත යොමුකරන්න.
ඒ විතරක් නෙවෙයි, ඔබේ සහයිකාවට හොඳ පෙනීමක් මෙන්ම ඇසිමක්ද තිබීම අත්‍යවශ්‍යයි. දරුවාට කෑම කවද්දී ඉවත්කළ යුතු දේ ඇය දැකිය යුතුයි. ඒ වගේම දරුවා ඇහැරී හඩද්දී හෝ වෙනත් අවස්ථාවකදී දරුවාගේ හඬ ඇයට ඇසිය යුතුයි.
ඔබේ සහායිකාව සිය පිරිසිදුකම පිළිබඳව අවධානය යොමු කරනවාදැයි සොයා බලන්න
දවස මුළුල්ලේ ඇය ඔබේ දරුවා අසල රැඳී සිටින නිසා ඇය පිරිසිදුව සිටීද යන්න පිළිබඳව ඔබ සැලකිලිමත් විය යුතුය. ඇය උදැසන අවධි වූ පසු හොඳින් දත් මැද පිරිසිදු වී දරුවා වෙත පැමිණිය යුතු බව මුල සිටම ඇයට කිව යුතුය. ඇගේ නිය පෙළ, ඇඳුම් පිරිසිදු ඒවාද යන්න සොයා බැලිය යුතුය. වැසිකිලි යාමෙන් පසු, දරුවාට ආහාර කැවීමට පෙර සබන් යොදා අත් සේදීමට ඇයට උපදෙස් දිය යුතු අතරම ඒවා ඒ ආකාරයෙන්ම සිදුවෙනවදැයි සොයා බැලිය යුතුය.
ඔබේ සහායිකාව දරුවා වෙත පූර්ණ අවධානය යොමු කරනවා දැයි සොයාබලන්න
අහලා තියෙනවනේ කතාවටත් කියනවා ළමයින්ට අලින්ටයි නලියන්නමයි හිත කියලා. පුංචි දරුවෝ පොඩ්ඩක් විතර දඟ වැඩ කරනවා. එහෙම නැතිව බෑනේ. ඉතින් අපිට තියෙන්නේ කෑ කෝ ගහල දරුවා මෙල්ල කරන එක නම් නෙවෙයි. දරුවාව පරිස්සම් කරගන්න එක. ඉතින් ඒකට දරුවා බලාගන්න කාන්තාවට හොඳ ඉවසීමක් වගේම වැඩි අවධානයක් තියෙන්නම ඕනේ. දරුවෙක් බලා ගන්නවා කියන්නේ ලොකු වගකීමක් කියන්නේ ඒක නිසයි. ඒ වගේම බිම තියෙන පුංචි පුංචි දේවල් අරගෙන කටේ ඔබා ගන්නත් දරුවෝ හරිම දක්ෂයි. ඉතිං අවධානය වගේම හොඳ පෙනීමකුත් ඔබේ සහයිකාවට තිබීම වැදගත්.
මෙන්න මේ උපදෙස් ඔබේ සහයිකාවට ලබාදෙන්න,
- වෙනත් අයෙක් නිවසේ නැතිනම් දරුවා නෑවීම නොකරන්න
- කෑම කැවීමට පෙර අත් හොඳින් පිරිසිඳු කරගන්න
- කෑම හොඳින් පොඩිකර කෑමට පහසු ආකාරයට දරුවාට ලබාදෙන්න
- බිය ගන්වා දරුවා කැවීමෙන්/නිදි කිරීමෙන් වලකින්න
- ඇය ආහාර ගන්නා විට ඇගේ පිගානෙන් දරුවට කැවීම පුරුද්දක් නොකරගන්න
- සැමවිටම දරුවාට උණුකර නිවාගත් පිරිසිදු ජලය පමණක් ලබාදෙන්න
- දරුවාගේ කවන පොවන භාජන හොඳින් පිරිසිදු කර තම්බා පාවිච්ච්යට ගන්න
- හැම නිතරම දොරවල් අගුළුලා ආරක්ෂිතව සිටින ලෙස උපදෙස් දෙන්න
මෙන්න මේ කරුණු දෙමාපියන්ගේ අවධානය පිණිසයි
ඔබ නිවසට පැමිණීමට පෙර දරුවා බලා ගන්නවාට අමතරව ඇයට නිවසේ වැඩ කටයුතුත් පවරනවා නම් ඔබ ඒ පිළිබඳව වැඩි අවධානයක් යොමු කළ යුතුය. වඩාත් උචිත වන්නේ ඔබ නිවසේ නැති කාලය තුළ සහායිකාවට වෙනත් කාර්යයන් පැවරීමෙන් වැළකීමයි. මන්ද ඇය ඇයගේ වැඩ කොටස අවසන් කිරීමේ අරමුණෙන් දරුවා පසෙකලා ඒවා කිරීමට යාමෙන් යම් යම් අනතුරුවලට මුහුණ දීමට දරුවාට සිදු විය හැකියි. ඒ නිසාම දරුවා ළඟ/දුරක තබා වෙනත් කටයුතුවල නිරතවීමෙන් වලකින ලෙසත් දරුවා උඳුන අසලට ගෙන යාමෙන් වලකින ලෙසත් ඇයට උපදෙස් දෙන්න. ඔබ නිවසට පැමිණෙන තුරු ඇයට වෙන රාජකාරි පැවරීමෙන් වැලකීම මෙහිදී වඩාත් උචිත් බව සිහි තබාගන්න.
නොදන්වා වෙනදා නිවසට පැමිණෙන වෙලාවට පෙර පැමිණ ඇය දරුවා සමග කටයුතු කරන ආකාරය පිළිබඳව සොයා බලන්නත් ඔබට පුළුවන්. ඒ වගේම නිවාස තුළ කැමරා පද්ධතියක් සවි කරන්නත් ඔබට පුළුවන්. තාක්ෂණයේ දියුණුවත් සමගින් අද වනවිට පැමිණ ඇති බොහොමයක් උපකරණ ඔබට සහය වනු ඇති. අන්තර්ජාලය හරහා නිවසේ සිදුවන දේ පරික්ෂා කිරීමට හැකි උපකරණ අද වන විට නිපද වී ඇති අතරම ඔබ ආර්ථික අතින් ශක්තිමත් නම් එවැනි ක්‍රමයක් භාවිත කිරීමටද ඔබට හැකියි.
කෙසේ වුවද අද සමාජය තුළ අහන්නට දකින්නට ලැබෙන දේවල්වලට අනුව දරුවෙකු තනිව සහයිකාවකට පමණක් දමා යාම අනුමත කළ නොහැක. දිවා කාලය පුරා දරුවාට සිදුවන දේ පැවසීමට තරම් කුඩා දරුවෙකුට හපන්කම් නැත. ඒ නිසා, විශ්වසනීය පවුලේ හිතවත් අයෙක්ද නිවසේ සිටීම වඩා උචිතය.
