ගැබිනි සමය බොහොමයක් දේ සඳහා සීමා පනවන කාලයක් විදියට ඇතැම් කාන්තාවන් හඳුන්වනවා කොතෙකුත් අසන්නට ලැබෙනවා. ඒ දැනෙන අපහසුතා සමග පෙර ගෙවූ නිදහස් ජීවිතය ගෙවීමට ඇති බාධා නිසා විය යුතුයි. ගැබිනි සමයේ මුල් කාලය තුළ වමනය, ඔක්කාරය, කෑම අරුචිය නිසා අපහසුතාවයට පත්ව සිටින කාන්තාවන් කාලය ගත කරන්නේ කළකිරුණු ස්වභායෙන් වෙන්නත් බැරි නැහැ. ඒ කොහොම වුණත් ගැබිනි සමයේ ලිංගික සබඳතා පැවැත්වීම දරුවාට යම් බලපෑමක් ඇති කරනවාද කියා දැන ගන්න අවශ්‍ය හැම කෙනෙක්ම වෙනුවෙන් මේ ලිපිය සකස් කරන්න අපි හිතුවා.
මවගේ කුස තුළ වැඩෙන දරු පැටියා එහිදී ආරක්ෂා වන්නේ කලලය වටා පිහිටි වැදෑමහ/අපරාව (Placenta) තුළ ඇති උල්බ තරලය (Amniotic fluid) හා ගර්භාෂ පේශී මගිනි. වෛද්‍ය අදහසට අනුව නම් සාමාන්‍ය තත්ත්වයේ සිටින ගැබිනි මවකට ලිංගික සබඳතා පැවැත්වීමේ ගැටලුවක් නැහැ වගේම එමගින් ගැබිනි මවට වාසි සහගත වටපිටාවක් සැලසෙනවා.
ගැබිනි සමයේ ලිංගික සබඳතා පැවැත්වීමේ වාසි
- සහකරු හා සහකාරිය අතර බැඳීම වර්ධනය වේ
- ශාරීරික සෞඛ්‍ය සඳහා වැදගත් වේ (එක් මිනිත්තු 30 ක ලිංගික සංසර්ගයක් මගින් කැලරි 50 ක් දහනය වේ)
- වේදනාව, අපහසුතා අඩුවේ.
- සුරාන්තයේදී ඔක්සිටොක්සින් හෝමෝනය නිදහස් වීම මගින් කොන්දේ වේදනාව හා ගර්භණීභාවය හා බැඳුණු අනෙක් වේදනාවන් දරාගැනීමේ හැකියාව වර්ධනය වේ.
- නින්ද වැඩිදියුණු කරයි.
- ගර්භණීභාවය පිළිබඳව අධික බියක් පවතී නම් කරදරකාරී හෝමෝන මගින් කාංසාව, අධෛර්යමත් බව ඇති කරයි. නමුත් ලිංගික කටයුතුවල යෙදීමේදී ඔක්සිටොක්සින් හෝමෝනය මගින් ආදරය, සතුට පිළිබඳව හැඟීම වැඩි කරවයි.
- ප‍්‍රසවයට ආසන්නයේ සිටින මවකට නම් ලිංගික සංසර්ගය නිසා ප‍්‍රසවය පහසු වේ. සුරාන්තයට පෙළඹ වීමෙන් ගර්භාෂය සංකෝචනය වේ. දරුවා බිහි කිරීමට සූදානම් ආසන්නතම අවස්ථාවේ සිටින මවක් සාමාන්‍ය ප්රසූතියට මෙය උදව් වේ.
- ලිංගේන්ද්‍රිය සඳහා රුධිරය ගලා ඒම වැඩිවන නිසා ගැබිනි මව අවස්ථා කිහියක් සුරාන්තයට පත් වේ.
- ලිංගික කාර්ය මගින් ප‍්‍රතිශක්තීකරණ පද්ධතියේ IgA ප‍්‍රතිදේහ වැඩි කරවන අතර ඉන් සෙම්ප‍්‍රතිෂ්‍යාව හා වෙනත් ආසාධන වලින් ආරක්ෂා වේ
ගැබිනි සමයේ ලිංගික සබඳතා වෙනුවෙන් වෛද්‍ය උපදෙස් පැතිය යුතු අවස්ථා
- ගැබ්ගෙලෙහි ගැටලු සමග ගබ්සා වීම හෝ ඉක්මන් ප‍්‍රසවයක් සඳහා යා හැකි වීම
- නිවුන් දරු පිළිසිඳ ගැනීමක් ඇති වීම
- සම්පූර්ණ හෝ අර්ධ ලෙස අපරාව මගින් ගැබ්ගෙල වැසී ඇති බව වෛද්‍යවරු පැවසීම
- ගැබ්ගෙල (Cervical incompetence) නොමේරූ දරු උපත් සඳහා විවෘත වීමට අවධානමක් පැවතීම
- කලින් නොමේරූ දරු උපත් ඇති වූ බවට ඉතිහාසයක් තිබීම
- උල්බ තරලය කාන්දු වීමක් (වෝටර් බෑගය කැඩීම) ඇත්නම්. මෙහි ආසාධන ඇති වීමේ අවදානම වැඩි බැවිනි
- යෝනි රුධිර වහනයක් හෝ අසාමාන්‍ය යෝනි ශ‍්‍රාවයක් පැවතීම
විශේෂයෙන් ගර්භනීභාවයේ දෙවන ත්‍රෛමාසිකයේ ලිංගික සංසර්ගයේදී හෝමෝන නිදහස් වීම ඉක්මන් වේ. මෙම හෝමෝන මගින් ලිංගේන්ද්‍රියට එන රුධිර සැපයුම වැඩිවීමෙන් ලිංගික සංසර්ගයට ඇති කැමැත්ත වැඩි වේ. සමහර කාන්තාවන්ට හෝමෝනවල සිදුවන අඩු වැඩි වීම් නිසා ලිංගික කාර්යයට ඇති කැමැත්ත අඩු කරයි. තවද අපහසුතා ඇති වේ. ශක්ති මට්ටම පහළ යන අතර ශාරීරික වේදනා ඇති කරයි. සමහර අවස්ථාවලදී වේදනාව, පීඩාකාරී බව ලිංගික කටයුතුවලට ඇති කැමැත්ත අඩු කරයි. ලිංගික සංසර්ගය පිළිබඳව දෙදෙනාම කතා කළ යුතු අතර එය දෙදෙනාටම සුවපහසුව, සතුට ගෙන දෙන අවස්ථාවක් විය යුතුය.
ලිංගික සබඳතා මගින් ප‍්‍රසවය උත්තේජනය
- පියයුරු පුඩුව හා ලිංගේන්ද්‍රිය උත්තේජනය නිසා ඔක්සිටොක්සින් හෝමෝනය අපර පිටියුටරියෙන් ශ‍්‍රාවය වේ. ඉන් ගර්භාෂය සංකර්ෂණය කරයි.
- ගැබ්ගෙලෙහි ඇතිවන යාන්ත‍්‍රික උත්තේජනය මගින් Prostaglandin නිදහස් වේ. එමගින් ගැබ්ගෙල දරු ප්රසූතියට සූදානම් වේ.
- ශුක‍්‍ර තරලයෙහි ඇති ප්‍රොස්ටොස්ලැසිස් මගින් ගැබ්ගෙල දරු ප්රසූතියට සූදානම් කරයි.
ගැබිනි සමයේ ලිංගික සංසර්ගය සඳහා සුදුසු ස්ථාපිත
ගැබිනි සමයේ අවසාන මාසවලදී ගර්භණී උදරයට පීඩනයක් ඇති නොවන ස්ථාපිත තෝරාගත යුතුය.
- ගර්භණී කාන්තාව සහකරු මත සිටීම
- දෙදෙනාම පැත්තකට හැරී සිටීම
- ඇඳෙහි කෙලවර වාඩි වීම
- මුඛ හා ගුද සංසර්ගය
මෙහිදී මුඛ සංසර්ගය ගර්භණී කාලය පුරාවටම භාවිත කළ හැකි ආරක්‍ෂිත ක‍්‍රමයකි. එසේ නමුත් සහකරු ගර්භණී කාන්තාවගේ යෝනි මාර්ගය තුළට වාතය (හුලං) පිඹීමෙන් වැළකිය යුතුය. එසේ වුවහොත් වායු නික්ඛිත්තයක් (air embolism) ඇති වී රුධිර වාහිනී අවහිර වේ. කලාතුරකින් මෙය මවට හා දරුවාට හානිකර විය හැක. ගුද මාර්ගයද භාවිතා කළ හැකි අතර ඒත් සමගම නැවත යෝනි මාර්ගය භාවිත කළ විට බැක්ටීරියා ආසාධන ඇති විය හැකිය. එවැනි කරුණු පිළිබඳව සැලකිලිමත් වීම ඉතා වැදගත් වේ.
විශේෂඥ මතය, අදහස සහ මූලික සටහන:
ක්‍රිෂාන්ති ගංගා කුමාරිහාමි මහත්මිය හෙද නිලධාරිනි (1 ශ්‍රේණිය)
පළාත් මහා රෝහල, කුරුණෑගල
