අනිවාර්්‍යයෙන්ම ඔබේ සාමාන්‍ය දෛනික ජීවිතය වෙනසකට ලක්ව ඇති. වෙනදාට වඩා ඉක්මණින් ගෙදර යාමේ අවශ්‍යතාවය දැනෙනු ඇත. ඔබේ අලුත් අමුත්තා සුරතල් කරන්නට ආදරය කරන්නට ඔබට ඉස්පාසුවක් නැතිව ඇති. නිදන මේ හුරතලා සිහිනයෙන් හඬන විට හිනැහෙන විට සිත පුරා මෝදු වන ආදරය හරිම සුන්දරයි නේද? එහෙත් පළමු දින කිහිපය තුල බිරිඳ කොයි මොහොතේ බැලුවත් අලුත් අමුත්තා සමඟම නව බැඳීමක් ගොඩ නඟන විට තනියක් වගේ හිතට දැනේවී.
“දරුවට මාව අවශ්‍ය නැහැ. එයාට අම්මා හිටියම ඇති “යැයි ඔබට සිතෙන එක නිවැරදිද?
නැහැ කොහෙත්ම නැහැ, ඔබව දරුවාට ඉතා වැදගත්. දරුවාගේ මොළය වර්ධනය වන්නට නම් දරුවන්ගේ ඉන්ද්‍රියයන් උත්තේජනය කරන්නට අවශ්‍යයි. ඒ කාර්්‍යයට ඔබටත් සම්බන්ධ විය හැකිය. දරුවා වඩා ගැනීම, නැළවීම, බිළිඳු බසින් දරුවා හා කථා කිරීම දරුවා හා ඔබ අතර බැඳීම වර්ධනය කරනු ඇත. ඔබ දරුවා බලා ගැනීම එක් අතකින් ඔබේ බිරිඳට කරන උදව්වකි. වැදගත් කාරණය දරුවා ඔබ බලාගතයුත්තේ ඔබේ ස්මාර්ට් ෆෝනය, පරිඝණකය , රූපවාහිනිය ක්‍රියාවිරහිත කරල නම් බෙහෙවින්ම හොඳය. නැති නම් ඔබේ අවදානය වෙනත් දෙයකට යොමු වූ විට දරුවාට නිසි ලෙස අවදානය යොමු කිරීමට ඔබට නොහැකිවේ.
“තාත්තලාට දරුවන් හරියට බලා ගන්න බැහැ” යන මතයෙ ඔබ සිටිනව නම් වහාම ඒ මතය වෙනස් කර ගන්න. දරුවා සමඟ සමීපව කටයුතු කරන විට දරුවාගේ හැඟීම් දැනීම් වලට ඔබ නිරායාසයෙන්ම හුරු වනු ඇත. එය ඔබේ බිරිඳටද මහත් අස්වැසිල්ලක් වනු නොඅනුමානය. එසේම දරුවන් හා ඔබ අතර ඇති වන ආදරණීය බැඳීමට වඩාත්ම ආදරය කරන්නේ ඔබේ බිරිඳය. එය පවුලේ සාමය සතුට සඳහා ද ඉවහල් වනු ඇත.
දරුවාගේ අපවිත්‍ර ඉවත් කිරීමද ඔබට මුල් අවදියේදී යම් අපහසුතාවයක් ගෙනෙනු ඇත. එහෙත් ඒ ඔබගේ දරුවාය.දරුවන්ගේ ජීවිත වලට වගකිව යුත්තා ඔබය . එවන් සුවිසල් වගකීමක් දරන ඔබට දරුවාගේ අපවිත්‍ර ඉවත් කිරීම නොකලහැක්කද?
දරු ප්‍රසූතියෙන් පසු ඔබගේ බිරිඳගේ මානසිකත්වය වටහා ගැනීම ඉතාමත් වැදගත්ය. වේදනාබර ප්‍රසූතියත් සමඟම ඇගේ හෝමෝන අතිධාවනයක යෙදී ඇත. ඇයට සැනසීමෙන් එක දිගට නින්දක් ලැබෙන්නේ ද නැත. ඇය යම් වික්ෂිප්තබාවයකින් පසුවනවා විය හැකිය. එසේම ඇතැම් විට ඇය කරන කියන දේවල් පවා ඇයට නිනව්වක් නැතිවන්නට හැකිය. ඔබගේ අවදානය ඇයට නිතැතින්ම ඇවසිවන්නේ එහෙයින්ය.
අලුත් සිඟිත්තා ඇතැම් විට හඬන විට” ඇයි මේ දරුවා අඬන්නේ ? ” කියා ඔබ බිරිඳගෙන් විමසුනු ඇත. එහෙත් ඔබ මෙන්ම ඇයත් හැඬිමට කාරණය නොදන්නවා විය හැකිය. ඔබ එසේ අසන විට ඇය තව දුරටත් කළබලයට පත්වෙයි. දරු ප්‍රසූතියෙන් පසු කාන්තාවකගේ මානසිකව දරා ගැනීමේ ශක්තිය දින කිහිපයක් පමණ දුර්වලවන බව මා විශ්වාස කරමි. මේ සෑම අවස්ථාවකම ඇයට අවශ්‍ය වන්නේ සහයට කෙනෙක් බැවින් ඒ පිළිබඳව සිතන්න.
දරුවා ලැබෙන්නට පෙර ඔබ අසලම දැවටුන බිරිඳ දැන් ඔබ අසලට එන්නෙත් අවශ්‍යතාවයකට පමණය. එසේම වෙනදා සිදු කර දුන් ඔබේ වැඩ කටයුතු පවා ඇය අතින් අත පසු විය හැකිය.” දරුවා ලැබුනට පස්සෙ එයා වෙනස් වෙලා” යැයි නිතැතින්ම ඔබේ සිතට වද දෙනු ඇත. ඇත්තටම ඇය වෙනස්ව ඇත. පෙර නොවූ නව වැඩ කටයුතු රාශියක් දැන් ඇයට සිදුකරන්නට සිදුවේ. එහෙයින් ඇයගේ වැඩ පහසු කරගන්නට ඇයට උදව්වන්න.
දැන් ඔබට පවුලක් තිබේ. දරන්නට වගකීම් රාශියක් ඇත. ඉතින් ඔබට ඉස්සරෝම දවස් වල මෙන් ජීවිතය දෙස සැහැල්ලුවෙන් දකින්නට නොහැකිය. එහෙත් ඔබට ජීවිතය විඳින්නට හැකිය.
නිදන නුඹෙ දෙතොල් මත
ඇඳෙන කිරි සිනහව ළඟ
සිහින් හැඬුම ළඟ
මගේ මුළු ලෝකයම නැවතිලා…
මේ තරම්ම හිත උණුහුම් කර
ස්නේහයේ හැඟුමන් පුපුදා
මා විශ්මයට පත් කරන්නට
නුඹට හැකිවූ අපූරුව…
පීතෘත්වයේ කිරුළ
මගේ හිස මත පැළැන්දුව නුඹට
ආදරෙයි මහ හුඟක් මම…
