අද කාලයේ පුංචි දරුවන් ගැන දෙමව්පියන්ගේ හිතේ ගැටුමක් නැති වුනත් නව යොවුන් වයසේදී දරුවන්ගේ හැසිරීම ගැන නම් ඒ තරම් මනාපයක් නැහැ.පන්සලකට, පල්ලියකට යන්නේ නැහැ. ආගමක් දහමක්..පින් අතේ වැඩකට කිසිම කැමැත්තක් නැහැ. මේ වගේ සිතුවිලිවලින් දෙමව්පියන් නොදැනීම දරුවන් සමග නොමනාපයෙන් පසු වෙනවා.නමුත් පින්වන්ත හෙවත් යහ ගුණ පිරුන දරුවෙක් ගැන ඔබත් සිහින මවනවා නම්…ඔබේ දරුවා මේ විදිහට හැඩ ගසන්න.
ආගමික පරිසරය නිවසේ ඇති කරන්න…
දරුවන් මුල් කර ගත් ආගමික පරිසරය නිවසේදීම ගොඩ නගන්න ඔබට පුලුවනි. කොටින්ම දරුවන්ගේ හිත පන්සලක් කරන්න ඔබට හැකියාව තිබෙනවා.ඒ නිසා ඔබ කුමන ආගමක වුනත් නිවස තුළ ආගමික හැදියාව ගොඩ නගන්න. සෑම ආගමක් තුළින්ම උගන්වන මිනිසෙකු ලෙසින් ජීවත් වීමේ පාඩම ඔබේ දරුවාටත් කියා දෙන්න.
දවස පටන් ගැනීමේදී…සහ දවස අවසානයේදී..
ඔබේ දරුවාගේ දවස ආරම්භයේදී ආගමික වත් පිළිවෙත් අනුව ආශිර්වාදය ලබා ගැනීමට හුරු කරන්න. එය දරුවාගේ ජීවිතයේ එක් අනිවාර්ය අංගයක් බවට පත් කරන්න.දවස අවසානයේදීත් ආගමික වත් පිලිවෙත් පවත්වා ආගම සිහිපත් කර ගෙන නින්දට යැමේ වටිනාකම දරුවාට කියා දෙන්න.මේ අන්දමින් දරුවාගේ හිත තුළ ගොඩ නැගෙන ආගමික සංකල්ප නිසාම ඔබටත් නොදැනීම දරුවාගේ හිත පන්සල් මලුවක් බවට පත් විය හැකියි.
සතුන්ට කරුණාවන්ත වීම
අද සෑම නිවසකම වාගේ සුරතල් සතෙකු ඇති දැඩි කිරීම සාමාන්‍ය රටාවක්. මේ සතුන්ට හිරිහැර කරන දරුවනුත් ඒ අතර සිටින්න පුලුවනි. දරුවන්ගේ හිතට කරුණාව ඇති කිරීමේ සරලම ක්‍රමය සතුන්ට කරුනාව දැක්වීමෙන් පටන් ගන්න පුලුවනි.
ගෙදර සිටින සුරතල් බළලාගේ වලිගයෙන් ඇද රිදවන මානසිකත්වයක් ඇත්නම් එයින් බලල් පැටවාට රිදෙන බැව් දරුවාට කියා දෙන්න. පින් පව් ගැන අවබෝධයක් ලබා දීමේ සරලම පාඩම මෙතැනින් පටන් ගන්න.
සහකම්පනය…
දෙමව්පියන් ලෙස ඔබ දරුවාට සහකම්පනය කියා දෙන්න. අසරණයන්ට පිහිට වීමේ ගුණය..අනුන්ගේ දුකක් ඉදිරියේ සංවේදී වීමට දරුවාට කියා දෙන්න.
අසරණ පුද්ගලයෙකු පැමිණෙන විට ගේට්ටුව වැසීමට..බල්ලන් ලිහන බැව් කීමට දරුවන් යොදා ගැනීම කිසිසේත්ම නොකල යුතුය.අසරණ පුද්ගලයෙකුගේ අසරණබවට ඔබට පිහිට වීමට අපහසු වුනත් අවස්ථාවේ හැටියිට යම් පිහිටක් වෙන්න. අඩුම වශයෙන් ඒ වෙනුවෙන් සංවේදී වීමටවත් කියා දෙන්න.
සොබා දහමට ආදරය කරන්න
දරුවාගේ ලෝකයේ ජීවත්වෙන මව්පියන් , හිත මිතුරන් ,ඤාතීන් සහ සුරතල් සතුන් මෙන්ම සොබා දහමටත් ප්‍රාණයක් ඇති බැවි කියා දෙන්න. ගහකොළ ,මල්වැලට ආදරය කරන අන්දම කියා දෙන්න. පරිසරය පූජණීය බැව් දරුවාගේ හදවත ස්පර්ශ කරමින් කියා දෙන්න.
වෙසක් මාසය හොඳම කාලයයි..
මේ වෙසක් මාසයේදී දරුවාට බොහෝ පාඩම් කියා දීමට අවස්ථාව ලැබී තිබෙනවා. බුදුරජාණන්වහන්සේ බුදුබව ලබා බුද්ධත්වයට පත් බෝධින් වහන්සේට පවා ඇසි පිය නොහෙලා බලා සිටිමින් කෘත ගුණ දැක්වූ ආකාරය ගැන කියා දෙන්න. බෝසත් උපත , බුදුවීම සහ පිරිනිවන් පෑම පරිසරය මුල් කර ගෙන සිදු වුන අන්දම කියා දෙන්න. මේ සියල්ල තුළ බුදුරජාණන්වහන්සේ පරිසරයට දැක්වූ ආදරය ගැන පනිවිඩ දරුවාටත් ලබා දෙන්න.
වෙසක් පිංකම් වලට දරුවන්ගේ සහභාගීත්වය
වෙසක් මාසය මුල් කර ගෙන සිදු කරන ආමිෂ සහ ප්‍රතිපත්ති පූජාවන් ගැන දරුවාට කියා දෙන්න.ඒ නිසා වෙසක් මුල් කර ගෙන විනෝද සැනකෙලි නොව ආමිෂ සහ ප්‍රතිපත්ති පූජාවන්ට මුල් තැන දිමේ වැදගත්කම කියා දෙන්න.
වෙසක් සැරසිලි..
ඔබේ අතීතය සිහිපත් කරන්න. වෙසක් මුල් කර ගෙන විවිධ සැරසිලි කළ ආකාරය සිතට නැගේවි.අද දවසේ ඔබේ දරුවාටත් ඒ අත්දැකීම ලබා දෙන්න.වෙසක් සැරසිලිවලදී ඔබේ සහයෝගය දරුවාට ලබා දෙන්න. මේ නිසා දරුවාගේ නිර්මානශිලිත්වය අවදි වෙන අතරම නිවසේ යම් සාමුහිකත්වයක් ඇති වෙනවා.කොටින්ම වෙසක් පිංකම් මුල් කර ගෙන නිවස තුළ කන්ඩායම් ක්‍රියාවලියක් ගොඩ නැගෙනවා.
ආගමික ස්ථාන වෙත යන්න
දෙමව්පියන් ලෙස ඔබට නිතරම ආගමික ස්ථාන වෙත යෑමට හැකියාවක් නැතැත් අවස්ථාව ලද විටෙකදී දරුවන් සමග ආගමික ස්ථාන වෙත යෑම ඉතා වැදගත්. විශේෂයෙන් පසලොස්වක වැනි පොහොය දිනයන්හිදී දරුවන් සමග ආගමික මධ්‍යස්ථාන වත යෑම නිසා දරුවාට ආගමික ස්ථානයකට යෑම. ඒ තුළ හැසිරීම වැනි පුරුදු ගොඩ නැගෙනු ඇත.
භාවනාව
භාවනාව සිතේ සන්සුන්බව, සැහැල්ලුව සහ සතිමත් බව ඇති කරන ක්‍රියාවලියක් නිසාම අද බටහිර ලෝකයේ පවා භාවනාවට වැදගත් තැනක් ලැබී තිබෙනවා. ඒ නිසා ඔබේ දරුවාට දිනකට සුලු වේලාවක් හෝ භාවනා කිරීමට උනන්දු කරන්න.එතැනින් දරුවා ලබන පුහුනුව මගින් අනාගතයේදී සන්සුන් මානසිකත්වයක් ගොඩ නැගීමට අවශ්‍ය පසුබිම අද දිනයේ පටන්ම නිර්මානය වීමට ඉඩ තිබේ.ඒ නිසාම පාල කාලයේදී පටන්ම දරුවාගේ හිතේ සතිමත් බව පුහුණු කිරීම වෙනුවෙන් සුලු වේලාවක් හෝ භාවනා කිරීමට දරුවා උනන්දු කිරීම ඉතාම වැදගත්.
