මාස නවයක් අම්මාගේ කුසේ සැතපිලා සිටිය පුංචි වස්තුව දැන් අම්මාගේ තුරුලට ඇවිත්. හැබැයි තවම එයා හිතා ගෙන ඉන්නේ අම්මාගේ බණ්ඩියේ ඉන්නවා කියලයි. ඒ හින්දා රැයක් ,දවාලක් ගැන වෙනසක් නැහැ.පැටියා දවල්ටත් නිදියනවා..රෑට ඇහැරගෙන ඉන්නවා . ඒ නිසා අම්මාටත් ඇහැ පියාගන්න නැහැ. හරිම වෙහෙසයි.
පැටියාට වෙනස තේරුම් ගන්න කාලයක් අවශ්‍ය වෙනවා..
අම්මාගේ බණ්ඩියේ වෙනසයි..දැන් පැටියා ජීවත්වෙන සැබෑ ලෝකය අතර වෙනසයි තේරුම් ගන්න මාස තුනකවත් කාලයක් අවශ්‍ය වෙනවා.ඉතින් මේ මුල් මාස තුනක කාලයේදීම පැටියාට රාත්‍රිය ගැන වෙනසක් නැහැ. පුංචි බන්ඩියට සැරින් සැරේ බඩගිනි දැනෙනවා. ඇහැරිලා අඬනවා.ඉතින් අම්මාටත් නින්දක් නැහැ.
අම්මාටත් මේ තත්වය එතරම් සුදුසු නැහැ…
පුංචි පැටියෙක් ලෝකයට දායාද කිරීමත් පහසු කාර්යක් නොවේ. නව මාසයක වෙහෙස පැටියාගේ මුහුණ දුටු සැනින්ම අවසානයි.එතැන් පටන් ඇති වෙන සෑම අපහසුතාවයක්ම අම්මාට නම් වෙහෙසක් විදිහට දැනෙන්නේ නැහැ. ඒ තරමටම පැටියාට තිබෙන ආදරය බොහොම විශාලයි.හැබැයි අම්මාගේ ප්‍රතිශක්තියත් දැන් ටිකක් අඩු වෙලා. ඒ වගේම හෝර්මෝන මට්ටම අසමතුලිත වීම නිසාත් අම්මා ගේ මානසික අසමතුලිතාවයන් ඇති වෙන්නත් පුලුවනි. ඒ නිසා අම්මාටත් හොද නින්දක් අවශ්‍ය වෙනවා.
පැටියා නිදි….වැඩ ටික ඉවර කරන්න ඕන..
බොහොමයක් අම්මලා පුරුදු වෙලා ඉන්නේ පැටියා නිදාගත්ත වෙලාවට ගෙදර වැඩ කටයුතු අවසාන කර ගන්න. ඒ නිසා පැටියා නිදාගන්න වේලාවේ අම්මා ගෙදර වැඩයි..පැටියාගේ වැඩයි සේරම අවසාන කර ගන්න උනන්දු වෙනවා. ඒ නිසා අම්මා දවල් කාලයටවත් නිදා ගන්නේ නැහැ.
හැබැයි අම්මාට නිදා ගන්න පුංචි අවසරයක්..
ඉතින් අම්මෙක් විදිහට ඇහැ පියවා ගන්න අවසරයක් නැතුව සිටීම එතරම් ගුණදායක නැහැ. ඒ නිසා පැටියා නිදා ගන්න දවල් කාලයට ඔබත් ටිකක් නිදා ගන්න.නිදා ගන්න වෙලාවට ජංගම දුරකථනයත් පැත්තකින් තියන්න. එහෙම නැකුව ජංගම දුරකථනය අතට ගත්තොත් නිදා ගන්නවා කියන්නේ බොරු.නිවසේ තව අයෙතු සිටිනවා නම් ලැබෙන ඇමතුම්වලට උත්තර දීමත් එයාලට පාර කරලා පුංචි නින්දක් ලබා ගන්න.
වැඩ පහසු කරන මෙවලම් ගැනත් හිතන්න
දැන් වැඩ පහසු කරන ලෝකයක් නිසා අම්මාගේ නින්දට බාධා නොවන විදිහට සැලසුම් සකස් කර ගන්නත් පුලුවනි. පැටියා වෙනම baby cot,එකක තියලා baby monitor මගින් අවධානය දක්වන්නත් පුලුවනි.ඒ වගේම අම්මාට නින්ද ගියත් පැටියාගේ කිරි වේල නොවරදින විදිහට breast pump, bottles මෙවලම් භාවිතා කරන්න පුලුවනි.අම්මට නින්ද අවශ්‍ය නම් Breast pump එකකට කිරි දොවලා පැටියාට ඇහැරුනාම දෙන්න කියල නිදා ගන්න පුලුවනි. එහෙම වුනොත් අඩුම වශයෙන් නිදා ගන්න වෙලාවටවත් අම්මාට නොකැඩී නිදා ගන්න පුලුවනි.
ඒ වගේම පැටියාගේ මල, මුත්‍ර අවශ්‍යතාවයන් නිසා විටින් විට අවදි වීම වෙනුවට රාත්‍රි කාලයේදී ඩයපර් පාවිච්චි කරන්න පුලුවනි.
දැන් නම් අමුත්තෝ අඩුයි
කොවිඩ් 19 වසංගත තත්වය නිසා පැටියා බලන්න එන අමුත්තෝ නැති වුනත් හැමදාමත් කොවිඩ් තියෙන එකක් නැහැ. පැටියාට මාස තුනක්වත් ගෙවෙනකම් අමුත්තන්ගේ පැමිණීම පැටියාටත්..අම්මාටත් වෙහෙසයි.අමුත්තන්ට සංග්‍රහ කරන්න….කථා බහ කරන්න අම්මා සම්බන්ධ වෙන අතර නෑ හිත මිතුරන් තේ සුහද කතා බහ සිනාවන් නිසා පැටියාගේ නින්දටත් බාධාවක්.ඒ නිසා ඔබ කාගේ හෝ අලුත් පැටියෙක් බලන්න යන අදහස තිබෙනවා නම් එය මාස තුනකට ප්‍රමාද කරන්න.එය ඔබේ නෑ හිතවතුන්ට කරන උදව්වක්
තාත්තාගේ උදව් ගන්න
අපේ සමාජයේ ආකල්පය අනුව අම්මා දරුවන් වෙනුවෙන් කැප වෙන බව ඇත්ත. ඒත් අම්මාගේ ශාරිරික සහ මානසික සෞඛ්‍ය වෙනුවෙන් තාත්තා වගේම නිවසේ සිටින දෙමව්පියන්, සහෝදරියන්ටත් උදව් වෙන්න පුලුවනි.එය පැටියාගේ නැපි ටික තාත්තා හේදුවොත් එය ලැජ්ජාවට කරුණක් නොවෙයි.
කාමරයේ පිලිවෙල සහ පිරිසිදුබව
පැටියෙකු වෙනුවෙන් එයාගේ කාමරය පිරිසිදුව තබා ගැනීම ගැන නම් කියන්න අවශ්‍ය නැහැ. ඒ ගැන දැන් දෙමව්පියන් හොදින්ම දැණුවත්.හැබැයි මේ කාමරයේ අනවශ්‍ය විදිහට භාණ්ඩ පුරවන්න එපා. පැටියාගේ වුනත් සෝදන රෙදි ඉක්මනින්ම කාමරයෙන් ඉවත් කරන්න.අනවශ්‍ය අන්දමින් ලී බඩු වගේම වෙනත් උපාංඟ කාමරයෙන් ඉවත් කරන්න.
කාමරයේ ආලෝකය
කාමරයේ ආලෝකය නින්දට බාධා කරනවා. පමණට වඩා ආලෝකය නිසා මෙලටොනින් හෝමෝනය නිපදවීම අඩු වෙනවා. එවිට නින්ද පිලිබඳ ගැටලු ඇති වෙනවා.ඔන්න දැන් ඔබට මතක ඇති රූපවාහිනිය, ජංගම දුරකථන, ටැබ්,ලැප් මෙකී නොකි විද්‍යුත් උපාංගයන් අක්‍රිය කිරීමන් පසුව නින්දට යන්න උපදෙස් ලැබෙන්නේ මේ නිසයි. නිදන කාමරයේ ඇති ස්වභාවික වගේම කෘතිම ආලෝකය /නිල් එලිය විහිදුවන සියළුම උපකරණ සම්පූර්නයෙන්ම අක්‍රිය කරන්න.
මානසික විවේකය
පැටියා ලැබුන පසුව අම්මාට මානසික විවේකය වැදගත්. දැන් වෙනදා වගේ බාහිර ලෝකය සමග පවත්නා සම්බන්ධතාවයන් බොහෝ දුරට සීමිත නිසා කුමන හෝ විනෝදාංශයක් අම්මාට වෙනවා.පොතක් පතක් කියවන්න, පැටියාට ඇඳුමක් මහන්න වගේ විනෝදාංශයක් තෝරා ගන්න පුලුවනි.
ව්‍යායාම අවශ්‍යයි.
පැටියා වෙනුවෙන් කරන මේ වැඩ කන්දරාවෙන් ලැබෙන ව්‍යායාම හොදටම ඇති කියල හිතන්න එපා.දරුවා ලැබුනාට පසුව සිදු කළ හැකි සහ කළ යුතු ව්‍යායාම ගැන ඔබ දැණුවත් ඇති. ඒ නිසා වයායාම ගැනත් උනන්දු වෙන්න.
අලුත් අම්මාගේ නින්ද ගැන ඇත්තටම නොසලකා සිටිය යුතු නැහැ. අද බොහෝ මව්වරුන් පසු ප්‍රසව විශාදය තත්වයට පත් වෙන්නේ මේ කාලයේදී ඇති වෙන මානසික අසමතුලිතාවය නිසයි.ඒ නිසා අලුත් අම්මාට සුවදායක නින්දක් ලබා දෙන්න කාගේ කාගේත් සහයෝගය ඉතාම වැදගත්.
