හැම දෙමව්පියෙකුගේම එකම බලාපොරොත්තුව තමන්ගේ දරුවා ඉක්මනින් උස් මහත් කර ගැනීම වගේම සෞඛ්‍ය සම්පන්න පුද්ගලයෙක් විදිහට සමාජයට දායාද කිරීමයි. ඒ නිසාම දරුවාගේ ආහාරපාන ගැන දෙමව්පියන් මහත් සේ වෙහෙසෙනවා. ඒත් පුංචි පැටියා අම්මා , තාත්තාගේ උනන්දුවට සරිලන අන්දමින් ප්‍රතිචාර දක්වන්නේ නැහැඒ නිසාම හැම නිවසකම දරුවන්ට ආහාරපාන ලබා දීමේ ඇති වෙන ගැටුම් අඩුවක් නැහැ.ඒත් අපේ හිත වගේම දරුවාගේත් හිත පිනන අන්දමින් කටයුතු කරන්නේ කොහොමද…?
එකාකාර ආහාර රටාවෙන් දුරස් වෙන්න…
නිතර දෙවේලේ දකින කුකුලාගේ කරමල සුදු පාටට පේනවා වගේ හැමදාම එකම විදිහට ආහාරපාන සකස් කරන විට දරුවාටත් ඒ ගැන ප්‍රියතාවයක් ඇති වෙන්නේ නැහැ. පුංචි කාලයේ පුංචි පැටව් උස් මහත් කරගන්න කාබොහයිඩ්ඩ්‍රෙට ආාහර වැඩි පංගුවක් ලබා දෙන්න අම්මා උත්සාහ කරන බව ඇත්ත. නමුත් මෙතැනදී එකාකර රටාවෙන් ටිකක් දුරස් වුනොත් දරුවාටත් ආහාර ගැන ප්‍රියාවයක් ඇති වෙනවා.උදාහරණයක් විදිහට හැමදාම එකම විදිහට බත් සහ එළවලු වෙනුවට එළවලු මිහ්‍ර බතක්, කහ බතක් , එහෙමත් නැත්නම් වර්ණවත් විදිහට බත සකස් කිරීමෙන් ඇසට වගේම දිවටත් අලුත් රසයක් දැනේවි.
ආහාර වේලක් මග හරින්න එපා…
අද කාලයේ බොහෝ දරුවන් උදේ ආහාර වේල , එහෙම නැත්නම් රාත්‍රි ආහාර වේල මග හරිනවා. අම්මාගේ කාර්යබහුල ජීවිතය සමග දරුවාට පාසල් යන්න ප්‍රමාද වෙන නිසා උදේ ආහාරය මග හැරෙන්න පුලුවනි. ඒ වගේම කන්තෝරු ඇරිලා නිවසට පැමිණීමෙන් පසුව රාත්‍රි ආහාරය පිලියෙළ කරන විට දරුවා නින්දට ගිහින්. ඉතින් මේ වගේ පුංචි ප්‍රමාදයන් නිසා දරුවා ආහාරවේලක් මග හරින රටාවට හුරු පුරුදු වුනොත් එය දරුවාගේ වර්ධනයටත් බාධාවක්.
පැණිරස පමණට වඩා එපා..
පුංචි පැටවුන් පැණිරසට ප්‍රිය බව ඇත්ත. නමුත් දරුවාගේ දිව පැනිරසට හුරු කරන්නේ අපේම වැඩිහිටියෝ බවත් අමතක කරන්න එපා. ටොෆි, චොකලට් වෙනුවෙන් දරුවාගේ දිව බාල කාලයේ පටන් අපි පුරුදු කරනවා. සමහර විට එය අල්ලසක් බවටත් පත් වෙනවා. බත් කෑවොත් ටොපියෙක් දෙනවා. මේ වගේ පුරුදු නිසා දරුවා නොදැනීම පැණිරසට හුරු වෙනවා.දරුවන්ට පැණිරස තහංචි නැහැ. ඒ වුනත් අනවශ්‍ය අන්දමින් පැණිරසට යොමු වීම නිසා දරුවා තුළ පැණිරසට ඇබ්බැහි වීමක් ඇති වෙනවා. ඒ නිසා බාලකාලයේ පටන්ම ප්‍රමාණය ඉක්මවා පැණි රස ලබා දීමෙන් වලකින්න.
පැනිරස වැඩියෙන් දීම නිසා ඇති වෙන සෞඛ්‍ය තර්ජනත් තිබෙනවා. දරුවන්ගේ මුඛ සෞඛ්‍ය පිරිහෙන්න වගේම දෙවැනි වර්ගයේ දියවැඩියාව ඇති වීමටත් අධික පැණිරස හේතු වෙනවා. ඒ නිසා ප්‍රදාන ආහාර වේලකින් පසුව වගේම පැණිරස ලබා දුන් හැම අවස්ථාවකදීම දත් මැද මුඛය පිරිසිදු කර ගැනීමේ පුරුදු දරුවා තුළ ගොඩ නැගීමත් ඉතාම වැදගත්.
පෝෂණය ගැන උනන්දු වෙන්න..
අපි පෝෂණය ගැන උනන්දු වුනත් ගුණයි කියන ආහාරයක් කවන්න පොවන්න බැහැ කියලා ඔබ දුක්ගැනවිලි කියන්න පුලුවනි. ඒක ඇත්ත. එය දරුවන්ගේ ස්වභාවයක්. නමුත් පෝෂන ප්‍රභව උපයා ගත හැකි ආහාර දරුවා ප්‍රතික්ෂෙප කරනවා නම් ඒ වෙනුවෙන් පුංචි උපායන් සොයා ගන්න. බිත්තර ප්‍රතික්ෂෙප කරනවා නම් නූඩ්ල්ස්, පැස්ටා සමග බිත්තර එකතු කරන්න. බෝංචි කඩල වැනි දේ එපාම කියනවා නම් සුප් පිලියෙළ කරන විට එකතු කරන්න. ඕට්ස් වැනි ආහාරත් සමහර විට අප්‍රිය කරනවා නම් කැඳක් ලෙසින් හෝ ඔම්ලට් විදිහට සකස් කර ගත්තොත් පැමිණිලි නැතුවම දරුවා ඒවා ආහාරයට ගනිවි.
පළතුරු ගැනත්…
දරුවන්ගේ වර්ධනයට අවශ්‍ය විටමින්, කැල්සියම්, තන්තු සපුරා ගැනීමට නම් පළතුරුත් ආහාරයට ලබා දීම ඉතා වැදගත්.ඔවුන්ගේ මළපහ පිලිබඳවත් අපි උනන්දු වීම අවශ්‍යයි. මලබද්ධය වගේම බඩ වියලීමේ පිඩාවෙන් දරුවා ආරක්ෂා කර ගැනීමට නම් පැපොල්, කෙසෙල් වැනි පළතුරු ලබා දීම වැදගත්. ඒ වගේම විටමින් ”සී ” වෙනුවෙන් දරුවාට දොඩම්, ලෙමන්, පේර වැනි පළතුරු ලබා දෙන්න හැකියාව තිබෙනවා. මේවා ඉතා පහසුවෙන් සොයා ගැනීමටත් හැකියාව තිබෙනවා.නමුත් අපේ දෙමව්පියන් ගෙවත්තේ තිබෙන පේර, දෙලුම් ගෙඩියට වඩා ආනයනය කරන මිදි, ඇපල් ගැන වෙහෙසෙනවා.ඒ වුනත් ගෙවත්තේ හැදෙන වස විස නැති පළතුරක් ලබා දීමට හැකි නම් ඔබ සැබෑම වාසනාවන්ත මවක් පියෙක් බැව් කියන්න හැකියාව තිබෙනවා.
දරුවාට ප්‍රමාණවත් පරිදි ජලයත්…
දරුවාගේ බඩ පිරෙන්න වගේම දෙමව්පියන්ගේ හිත පිරෙන්න බත් කැව්වාට බොහෝ දෙමව්පියන් දරුවාට ප්‍රමාණවත් තරම් ජලය ලබා දීමට නම් එතරම් උනන්දු නැහැ. ආහාරයෙන් පසුව වගේම විටින් විට ජලය සහ කැඳ, පළතුරු යුෂ වැනි පානවර්ගත් දරුවාට ලබා දෙන්න.
තර්ජන එපා…
දරුවාට බත් කවන විට එය තර්ජනයක් බවට පත් කරන්න එපා. බත් පිගාන සමග වේවැල නොව ආදරය ළං කර ගන්න.දරුවාගේ පුංචි බණ්ඩියටත් දරා ගත හැකි ප්‍රමාණයක් තිබෙනවා. ඒ නිසා දරුවාගේ රුචි අරුචි බව, වගේම බඩගින්නේ තරම ගැනත් යම් ඉවක් අවශ්‍යයි. ප්‍රධාන ආහාර වේලට ආසන්නව අතිරේක යමක් ආහාරයට ගත් විටෙක දරුවාගේ කුසගින්න නැති වෙන්න පුලුවනි. එවැනි අවස්ථාවක දරුවා ආහාර ප්‍රතක්ෂෙප කිරීම ඔවුන්ගේ පැත්තෙන් සාධාරණයි. ඒ නිසා දෙම්විපයන් විදිහට නිතර ප්‍රධාන ආහාර වේලට ආසන්නව අතිරේක ආහාර ලබා දම නොකල යුතුයි. එවැනි යමක් ඇත්නම් ප්‍රධාන ආහාර වේලට යම් කාල අන්තරයක් ඇතුව ලබා දීම ඉතාම වැදගත්.
