පෙර පාසල් අවධිය යනු, අභියෝග රැසකින් සමන්විත, වෙහෙසජනක හා කෝපය උපදවන, කලබලකාරි බවින් යුත් තීරණාත්මක කාලයකි. සමහර අවස්ථාවන්හි දී, තාර්කික හේතූන් මත තීරණ ගැනීම අසාර්ථක විය හැකි අතර, එය ඔබව ප්‍රහේලිකාවට හා ව්‍යාකූල බවට පත් කිරීමට ඉඩ ඇත.
මෙම මුල් ළමා අවධිය දෙමාපියන් හට ආතතිය උපදවන, අභියෝගාත්මක කාලපරිච්ඡේදයකි. හැඟීම් වල උච්චතම අවස්ථාවන් මව් පිය පාර්ශවය වන ඔබට පෙර පාසල් අවධියේදි අත් විඳිය හැක. ආවේගශීලිබව, සංතුෂ්ටිය හා සෙනෙහස උපරිමයෙන් මෙම කාලයේදි ඔබට දැනිය හැක.
පෙර පාසල් අවධියේ පසුවන දරුවන් තුල දක්නට ලැබෙන ගති ලක්ෂණ දහයක් පහත දැක්වේ. මෙය දෙමාපියන්ට තම දරුවන්ගේ ස්වභාවය මනා ලෙස තේරුම් ගැනීමටත්, ඔවුන්ගේ කලහකාරි හැසිරීම් රටාවන් සමඟ නිසි ලෙස කටයුතු කිරීමටත් මඟ පාදනු ලැබේ.
සෑම මොහොතකම උද්යෝගයකින් පසුවීම.
පෙර පාසල් දරුවන්ට කිසිදු බාහිර බාධාකිරීමකින් තොරව වත්මන් මොහොත උද්යෝගයෙන් අත්විඳිමේ විශේෂ හැකියාව ඇත. වැඩිහිටියන් මෙන් නොව , මෙම වයසේ පසුවන දරුවන්ට තම අනාගතය පිළිබඳ වද වීමේ හෝ අතීතය ගැන සිතමින් පසු තැවීමේ අවශ්‍යතාවක් ඇති නොවේ. ඔවුහු තාත්ත්වික ලෝකයෙන් බැහැරව ඔවුන්ගේ ළමා ලොවට ගොස් එලඹෙන සෑම මොහොතක්ම හැකි උපරිමයෙන් අත්විඳින්නට ඇල්මක් දක්වති. ප්‍රියතම සෙල්ලම් බඩුව, පොත පත, පාසල හා හැඟිම් ඇතුලු තමා සතු සියලුම දේවල් වලින් පෙර පාසල් දරුවාගේ ලෝකය ගොඩ නැඟේ.
අනන්ත අවස්ථා.
මෙම අවධිය පෙර පාසල් දරුවාට අනන්ත අවස්ථාවන් ලබා දේ. සෑම දිනක්ම, නව අභියෝග ජය ගැනීම හා ඉලක්ක සපුරා ගැනීම සහ අලුත් සොයා ගැනීම වැනි අරමුණු වලින් සමන්විත වේ. වැඩිහිටියෝ සාමාන්‍යයෙන් දැඩි තීරණ ගැනීමට හා ඒකාකාරි ජීවිතයක් ගත කිරීමට නැඹුරුවක් දක්වති. දරුවෙකුගේ ඇසින්, වැඩිහිටියෙකු ලෝකය දෙස බලන්නට පුරුදු වුවහොත්, අප ජීවත් වන ලෝකය නියත වශයෙන්ම සුන්දර ප්‍රදේශයක් වනු ඇත.
නිර්මාණාත්මක හැකියාව
පෙරපාසල් දරුවන් සිතන්නේ වෙනස් ආකාරයකටය. ඔවුන් කිසිදු නීති මාලවක් අනුගමනය නොකරයි. මෙම වයස් කාණ්ඩයට අයත් දරුවන්ගේ සිත් නිර්මාණාත්මක බවින් පිරී පවතින අතර ඔවුහු තාර්කික බුද්ධිය මත තීරණ නොගනිති. දරුවා විසින් අඳින ලද චිත්‍රයක් මනාව අධ්‍යයනය කරන්න. ඔහු හෝ ඇය තම මවාගත් යහලුවා සමඟ කරන කතා බහට හොඳින් ඇහුම්කන් දෙන්න. කොල කෑල්ලක අඳින ලද ඉරි කෑලි ටිකක් වැඩිහිටියෙකුට නිකං කුරුටු බලි ලෙස පෙනුනත් එය පෙර පාසල් වියේ දරුවා දකින්නේ තමා විසින් නිර්මාණය කරන ලද අනර්ඝ සිතුවමක් ලෙසිනි.
ධාරණ ශක්තිය.
පෙර පාසල් දරුවාගේ මොළය ඉතා සක්‍රීය මට්ටමක පවතියි. දිනපතා අලුත් නිපුණතා ජීවිතයට එකතු කර ගැනීම හේතුවෙන් මොළය නව අත්දැකීම් හා දැනුම අවශෝෂණය කර ගැනීම සඳහා හැඩ ගැසේ. පෙර පාසල් දරුවන් කිසියම් දෙයක් ඉගෙන ගන්නේ කිසිදු පෙරහුරුවක් හෝ සූදානම් වීමකින් තොරවයි. පෙර පාසල් දරුවන්ගේ ඉගෙනීම් රටාව බොහෝ වැඩිහිටියන්ට ඉතා වැදගත් වන්නේ මේ නිසාවෙනි.
තහංචි හා සීමාවන් නොමැති වීම
පෙර පාසල් දරුවන් හට තම හැඟීම් ප්‍රකාශ කිරීමේදි කිසිදු සීමාවක් නැත.මෙම වයසේ පසුවන ළමයින් ගේ අදහස් විටෙක ඔබව ලැජ්ජාවට පත් කල හැකි සේම සිනා සාගරයක්ද ගෙන දිය හැක. ඔවුන් තම හැඟීම් හා අදහස් ප්‍රකාශ කරන්නේ හිතැඟි පරිදිය.
සමාව දීම.
මෙම වයසේ පසුවන දරුවෝ සමාව දීමට මැලි කමක් නොදක්වති. ඔවුන් තරහ මරහ සිතේ තබා නොගන්නා අතර සැණෙකින් අඬන මොහොතක සිට සිනාසෙන මුහුණකට අවතීර්ණ වේ. පෙර පාසල් දරුවන් තුල කාරුණික හදවතක් සහ අනුකම්පා සහගත ගති පැවතුම් දක්නට ලැබේ.
අවංක හා ඍජු බව.
පෙර පාසල් දරුවන් තම අදහස් ඍජු ලෙස සමායට ප්‍රකාශ කරයි. වෙනත් ආකාරයකින් කිව හොත්, ඔවුන් හරිම අවංක වේ. මෙහි ප්‍රතිඵලයක් ලෙස මේ වයසේ පසුවන ළමයින් වැඩිහිටියන්ගේ කතා බහට බාධා කිරීමට ද ඉඩ ඇත.
උදාහරණයක් ලෙස, දෙමාපියකු ” මට යකෙක් කන්න බඩගිනියි” යැයි පැවසුවහොත් , ඊට දරුවා මෙලෙස පිළිතුරු දිය හැක ” අම්මිට යක්කුත් කන්න පුලුවන්ද?”
සෙනෙහස
මෙම වයසේ දරුවන් බදා ගැනීම, සිප ගැනීම, කිති කැවීම හා තුරුල් වීම වැනි සෙනෙහස පාන හැසිරීම් තම දෙමාපියන්ගෙන් බලාපොරොත්තු වෙයි. අනපේක්ෂිත අන්දමට තමාට ලැබෙන සෙනහසට ඔවුහු ඇල්මක් දක්වති. මෙය දෙමාපියන්ගේ ආවේගශීලි හැඟීම් පාලනය කිරීමට උපකාරි වේ.
අගය කොට සැලකීම.
දෙමාපියන්ගේ දවස කෙතරම් කාර්යබහුල හෝ වෙහෙසජනක වුවත්, පෙර පාසල් දරුවා තමාව රැකබලාගන්නා මූලික පුද්ගලයින් දෙපල ලෙස දෙමාපියන්ගේ සේවය අගය කොට සලකයි. කායික හා මානසික යන දෙයාකාරයට සෙනෙහස පාමින්, දරුවන් දෙමාපියන්ගේ වටිනාකම අගය කරයි. වේදනාවකදී, මව හෝ පියා සොයා හැඬීම, ප්‍රිතිමත් මොහතකදී දෙමාපියන් අසලට වී සිටීමට ඇල්මක් දැක්වීම වැනි හැසිරීම් මීට උදාහරණ ලෙස දැක්විය හැක.
පෙර පාසල් දරුවාගේ ජීවිතය හරිම සරලය, කෑම , බීම, විනෝදවීම හා කලින් නින්දට යාමෙන් ඔවුන්ගේ දින චර්යාව සම්පූර්ණ වේ. සමහර අවස්ථාවලදී, ඔවුන් කෙලි සෙල්ලමෙහි යෙදී විනෝද වීම සඳහා කෑම වේල හෝ නින්ද කැප කිරීමට කැමත්තක් දක්වයි.
