ඉතිරි කිරීමේ පුරුද්ද දරුවන් තුල වර්ධනය කරන්නේ කෙසේද?

ඉතිරි කිරීමේ පුරුද්ද දරුවන් තුල වර්ධනය කරන්නේ කෙසේද?

දරුවන්ට ඉතිරි කිරීමේ පුරුද්ද ආරම්භ කිරීම සඳහා සුදුසුම වයස කුමක්ද? මෙය බොහෝ දෙමාපියන් හට පැන නැඟෙන ප්‍රශ්නයකි. මීට දිය හැකි හොඳම පිළිතුර නම් ඉතිරි කිරීමේ පුරුද්ද හැකි තාක් කුඩා කාලයේම දරුවා තුල වර්ධනය කිරීම යෝග්‍ය බවයි. ඔබගේ දරුවා සුපිරි වෙළඳසලට ගොස් “අම්මේ, මට මේකත් අරන් දෙන්න පුලුවන්ද?” ‍යැයි පවසමින් ඔබට කරදර කරන අවස්ථාව අපි ගනිමු. මෙම සිදුවීම දරුවාට ඉතිරි කිරීමේ පුරුද්ද ආරම්භ කිරීමටත් එහි වැදගත්කම පිලිබඳ ඉගෙන ගැනීමටත් හොඳ කාලයක් බව ඔබට අඟවන අවස්ථාවකි.

අවශ්‍යතා හා වුවමනා අතර ඇති වෙනස දරුවා කුඩා කලදීම ඉගෙන ගත යුතුය. තමන්ගේ මූලික අවශ්‍යතා පලමුවත් අනෙකුත් වුවමනා සපුරා ගැනීම සඳහා තමා කිසියම් කාලයක් බලා සිටිය යුතු බවත් දරුවන් තේරුම් ගැනීම අනිවාර්ය වේ. අවශ්‍යතා හා වුවමනා අතර ඇති වෙනස පහදා දීම මගින් ඉදිරි අනාගත අවශ්‍යතා සඳහා ඉතිරි කිරීමේ වැදගත්කම ගැන පාඩම දරුවාට කියා දීම ආරම්භ කල හැකිය. ඔබට මෙසේ විස්තර කල හැකිය. “හාල් හා එළවලු මිලදී ගැනීම අවශ්‍යතාවයකි. ඇඳුම් පැලඳුම් මිලදී ගැනීම අවශ්‍යතාවයකි. නමුත් සුපිරි වෙළඳසලේ ඇති අනෙකුත් දෑ වුවමනා වන අතර ඒවා ඔබට පසු කාලයකදී මිලදී ගත හැකිය. ඉන්පසු ඔබට දරුවාට “අපි ශොපිං යන සල්ලි ඉතුරු කරලා ඒක ඔයාගේ කැටේට දාමු” යනුවෙන් පැවසිය හැකිය.

කැටේ පිරුණු පසු, එම මුදල් ඉතිරි කිරීමේ ගිණුමක තැන්පත් කිරීම සඳහා දරුවා කැටුව බැංකුව වෙත යාමට අමතක නොකරන්න. දරුවෝ වැඩිහිටියන් ලෙස තමාට සලකනු දැකීමට බොහෝ කැමැත්තෙන් පසුවෙති. තමා කාලයක් තිස්සේ ඉතුරු කල මුදල් ද රැගෙන බැංකුව වෙත ගොස් එය ගිණුමක තැන්පත් කිරීම, ඔවුන්ට චොක්ලට එකකට එම මුදල් වියදම් කරනවාට වඩා තෘප්තියක් ලබා දෙනු නියතය. මුදල් ගණුදෙනු කිරීමට බැංකුව වෙත පැමිණෙන අනේක වැඩිහිටියන් මධ්‍යයේ තමාත් ගිණුමක් විවෘත කිරීම දරුවන්ට මහත් කර්තව්‍යයකි. ඔවුන්ට එය පාසලේ මිතුරන් සමඟ බෙදා ගැනීම සඳහා තවත් එක් දිග කතන්දරයකි.

ඉතිරි කිරීම දිරිමත් කිරීම සඳහා ඔබට ලේබල් කරන ලද පෙට්ටි තුනක් දරුවන්ට ලබා දිය හැකිය. ඉතිරි කිරීම, මිලදී ගැනීම හා දාන මාන සඳහා ලෙස ඔබට මෙම පෙට්ටි තුන් ආකාරයකින් වර්ග කල හැක. දරුවාට සල්ලි ලැබෙන සෑම මොහොතකදීම, ඔහුට/ඇයට එම මුදලින් යම් ප්‍රමාණයක් මෙම පෙට්ටි තුනටම දැමීමට පොළඹවන්න. මෙම ක්‍රමය දරුවාට මිල ගණන් (expensive/cheap) වල හා මිලදී ගැනීමේ ශක්තිය (affordability) පිළිබඳ යම් අදහසක් ගැනීමට උපකාරි වේ.

තවද මුදල් එකතු කරනවා සේම මුදල් දාන මාන කිරීමද  එකසේ වැදගත් බව දරුවාට පහදා දෙන්න. මගේ සැමියා හා මා අපගේ පවුලේ වාහනයේ මාරු කාසි දැමීමට යෝගට් කෝප්ප්යක් තබා ඇත. වාහන තදබදයකදී හෝ මාර්ග සංඥා අතර කාලයේදි වාහනය වෙත පැමිණෙන හිඟන්නන් හට එයින් කිහිපයක් ගෙන දීමට අපි පුතාව දිරිමත් කරන්නෙමු. මාගේ අට හැවිරිදි පුතණුවන් පහේ කාසියක් ගෙන හිඟන්නෙකුට දෙන මොහොත ඔහුට ජීවිතයට වැදගත් පාඩම් දෙකක් ඉගෙන ගැනීමට අවස්ථාව ලබා දේ. එනම්, ඔබට හිඟා කෑමට වඩා හොඳ ජීවනෝපායක් සොයා ගැනීම සඳහා හොඳින් ඉගෙන ගත යුතු බවත්, ඉදිරි අනාගතයේදි ඔබට රැකියාවේ මාසික පඩිය අහිමි වූ විට ඒ සඳහා ඉතුරුම් අවශ්‍ය වන බවත් ය.

ඔබ සුපිරි වෙළඳසලකට යන අවස්ථාවේදි දරුවා කිසියම් දෙයක් ඉල්ලා කරදර කල විට, නෑ ඔයාට එක අරන් දෙන්න බෑ” යනුවෙන් නොපවසන්න. ඒ වෙනුවට දරුවාට එම සෙල්ලම් බඩුවේ මිල ලාංචනය දෙස බලන්නට ඉඩ දී “ඔයාගේ “මිලදී ගැනීම” පෙට්ටියේ තියෙන සල්ලි වලට වඩා මේ සෙල්ලමු බඩුව කොච්චර ගණන්ද?” යන්න අසන්න. එම මිල 10 ගුණයකට වඩා වැඩි නම් දරුවා එම සෙල්ලම් බඩුව මිල අධික එකක් බව තේරුම් ගන්නා අතර, එය ඔහුට/ඇයට වර්තමානයේදි මිලදී ගත නොහැකි බවද වටහා ගනියි. මෙහි ප්‍රතිඵලයක් ලෙස දරුවා එම “මිලදී ගැනීමේ” පෙට්ටියට දැමීම සඳහා වැඩි වැඩියෙන් මුදල් ඉතිරි කිරීමට පෙළඹේ. දරුවාගේ උපන් දිනය දා ඔබට මේ මුදලට සමාන මිලක් වටිනා තෑග්ගක් දරුවාට ලබා දී, දරුවා “මිලදී ගැනීමේ” පෙට්ටියේ ඉතිරි කල මුදල බැංකුවේ ඉතිරි කිරීමේ ගිණුමේ තැන්පත් කල හැකිය.

බොහෝ දෙමාපියෝ දරුවන් සමඟ  “සල්ලි වැදගත්” යන මාතෘකාව පිළිබඳ කතා බස් කිරීමට අනවශ්‍ය ලෙස බිය වෙති. මාගේ අදහසට අනුව, ඔබ මුදල් වල වටිනාකම, ඉතිරි කිරීමේ හා දාන මාන කිරීමේ වැදගත්කම ගැන දරුවාට පහදා දීම තුලින් අනාගතයේදි රටට වැඩදායි , වගකිව යුතු පුරවැසියෙක් බිහි කල හැකිය.

ArticleBanner01

LEAVE A REPLY

Please enter your comment!
Please enter your name here