ඔබ කුඩා කාලයේදි ඇලිස්ගේ විස්මලන්තය හෝ හැරි පොටර් කියවා තිබේද? ( සංඛ්‍යා ලේඛන වලට අනුව හැරි පොටර් යනු දෙමාපියන් මෙන්ම දරුවන් එකසේ කියවූ ප්‍රසිද්ධ පොත් මාලාවකි. ඔබ පොත කියවා ඇත්නම් මෙම පොත් මත පදනම් වූ චිත්‍රපට වල ඇති Rabbit Hole, Hogawarts, Bill the Lizard හෝ Dumbledore ඔබ මනසෙහි මවා ගත් රූපයට හාත් පසින් වෙනස් බව ඔබට හැඟෙනු ඇත. පොත් කියවූ බොහෝ උදවිය එකඟ වන කරුණක් නම් පොත් කියවීමෙහි තරම් තෘප්තියක් එම චිත්‍රපටය නැරඹීමෙන් නොලැබෙන බවයි. හැරී පොටර් චිත්‍රපටය එම පොත් මාලාවේ එන චරිත වලට නිසියාකර සාධාරණයක් ඉටු කර නැත. චිත්‍රපටය නැරඹීමට පෙර පොත කියවන ලෙස මට අවවාද කල මාගේ මිතුරියට මම මෙම අවස්ථාවේදි ස්තූතිවන්ත වෙමි.
ලෝක ප්‍රාසාදායට හා සම්මාන වලට පාත්‍ර වූ බොහෝ චිත්‍රපට උසස් ලෙස නිර්මාණය කර ඇතත්, එය, ඊට පදනම් වූ පොත් මාලාවට සම කල නොහැක. ඊට හේතුව, පොතක් කියවීමෙන් අප ලබන ඒ තෘප්තිය හා අප සිත් තුල නිර්මාණය කර ගන්නා වු ලෝකය, නවීන තාක්ෂණයකින් නිපදවන උසස් Universal Studios චිත්‍රපටයකින් ලබා ගත නොහැකි බැවිනි.
කෙසේ වෙතත්, තාක්ෂණයේ වර්ධනය අප වෙත පිරි නැමූ පැතලි තිර දසුන් රූපවාහිනි, iPad හා ස්මාට් ෆෝන් කෙමෙන් කෙමෙන් අපව කියවීමෙන් ඈත් කොට ඇත. දරුවන් මෙන්ම වැඩිහිටියන්ද කාටූන් නැරඹීමට කැමැත්තක් දක්වයි. අද කාලයේ රොබින් හුඩ්, ටොම් සෝයර් වැනි වීර චරිත පමණක් නොව ජේසු තුමා, සිදුහත් කුමරු ගේ ජීවිත කතා පදනම් කොට ගෙන නිමවූ වැඩසටහන් දක්නට ලැබේ. නවීන තාක්ෂණය කෙතරම් විනෝදජනක හා සිත්ගන්නාසුලු වූවත් එය අපගේ නිර්මාණාත්මක හා පරිකල්පන ශක්තිය හීන කරවයි. ලමාක් ගේ සිද්ධාන්තයට අනුව අපගේ නිර්මාණාත්මක හා පරිකල්පන ශක්තිය පවතින්නේ යටිකුරු සර්පිලයකට අනුවය. එනම් අප ඉදිරි පරම්පරාව සඳහා ලබා දෙන්නේ අපගේ නිර්මාණාත්මක හැකියාවෙන් ඉතා කුඩා ප්‍රතිශතයකි. එසේම අප විවිධ පරිසරයන් අනුව හැඩ ගැහෙන ආකාරය පවා අපගේ දරුවන් වෙත ගමන් කර බව ලමාක් පවසන ලදී.
අප පාසල් යන කාලයේ බිත්තියේ, දැන්වීම් පුවරුවේ ප්‍රදර්ශනය කට තිබූ ෆ්‍රැන්සිස් බීකන්ගේ ප්‍රසිද්ධ කියමන ඔබට මතක ඇති. “කියවීම මිනිසා සම්පූර්ණ කරයි” අපව කුඩා කාලයේ පටන් කියවීම සඳහා පොළඹවන ලදී. අප පාසල් යන කාලයේදි වෙනම පුස්තකාල පරිච්ඡේදයක් තිබුණු අතර පොත්පත් එදා සැලකුණේ දැනුම් සම්භාරයක් ලබා දෙන උතුම් සම්පතක් ලෙසය. කෙසේ වෙතත් මා උසස් අධ්‍යාපනය ලැබූ කාලයේදි මාගේ කියවීමේ හා නිර්මාණාත්මක හැකියාවන් මට මහත් සේ උපකාරි වුණි. Benzene චක්‍රයේ සිට, පරමාණු හා එහි ඉලෙක්ට්‍රෝන වල හැසිරීම, සත්ත්ව සෛල වල ක්‍රියාකාරිත්වය, Bernouilli නියමයට අනුව අහස් යාත්‍රයක් ගමන් කරන්නේ කෙසේද යන්න මා ඉගෙන ගත්තේ මාගෙ පරිකල්පන ශක්තිය උපයෝගි කර ගනිමිනි. අන්තර්ජාලය වගේම නවීන තිමාණ දසුන් තාක්ෂණයට, මිනිසි පරිකල්පන හා නිර්මාණත්මක ශක්තිය අභිබවා යා නොහැකි බව මගේ අදහසයි. පර්යේෂණ හා ප්‍රවර්ධන (Research & Develpoment) මත ව්‍යාපාරයක සාර්ථකත්වය තීරණය වන ක්ෂේත්‍රයක කටයුතු කරන මා හට නිරන්තරයෙන්ම නිර්මාණාත්මක හැකියාවන් සහිත උදවිය මුණ ගැසීම අභියෝගයක් වී ඇත. අවසාන වශයෙන්, නව නිපැයුම් හා නිර්මාණාත්මක නිමවුම් සඳහා මූලික වන්නේ පුද්ගලයෙකුගේ පරිකල්පන ශක්තියයි. ඉතිහාසයේ නොමැකෙන උසස් නිර්මාණ බිහි කල වෝල් ඩිස්නි, හෙන්‍රි ෆෝඩ්, රයිට් සහෝදරයින් මෙන්ම ෆේස්බුක් හි නිර්මාතෲ මාක් සකර්බග් වැනි කෝටිපතියන් ගේ සාර්ථකත්වය පිටුපස සිටියේ ඔවුන්ගේ පරිකල්පන ශක්තියයි. මිනිසාගේ පරිකල්පන ශක්තිය ප්‍රගුණ කල හැකි එකම ආම්පන්නය කියවීමයි.
එම නිසා තාක්ෂණයේ දි‍යුණුව හා එහි අනර්ඝ ප්‍රතිඵල භාවිතා කරන අතරේම අපි කියවීමේ පුරුද්ද ජීවිතයට එකතු කර ගනිමු.
අපගේ දරුවන්ටත් කියවිමේ ප්‍රතිලාභ උගන්වා පෙර නොවූ විරූ අයුරින් ලෝකය දෙස බලන්නට ඔවුන්ට අපි උපකාර කරමු. එසේම කියවීමේ අතුරු ප්‍රතිඵල වන ව්‍යාකරණ දැනුම වර්ධනය කිරීම හා පුළුල් වාග් මාලාවක් ලබා ගැනීම ගෙන දැක්විය හැක.
දරුවන් තුල කියවීමේ ආසාව ඇති කරන්න. ඔවුන් නින්දට යාමට පෙර පොතක් කියවන්න. මෙය ඔබට සාමකාමීව දරුවා සමඟ එකට කාලය ගත කල හැකි මොහොතකි. මාගේ පියා ලවා එකම කතාව කියවීමට සැලැස්වීමෙන් ඔහු තුරුලට වී නින්දට වැටුණු ඒ සුන්දර ළමා කාලය මට අද වගේ මතකයි.
චිත්‍රපටය නැරඹීමට පෙර දරුවන්ට පොත කියවන ලෙස අභියෝග කරන්න.ඔවුන් කියවන පොත් වල ලැයිස්තුවක් සකස් කරන ලෙස පවසන්න. කියවා සම්පූර්ණ කරන සෑම පොතකටම ඔබ ඔවුන්ට යම් දීමනාවක් ලබා දීම දිගු කාලයේදි වැදගත් වේ. මන්ද ඔවුන් කියවීමේ ඔවුන්ගේ දෛනික ජීවිතයේ පුරුද්දක් කර ගන්නා බැවිනි.
ලෝකයේ තවත් වෝල්ට් ඩිස්නි හා හෙන්‍රි ෆෝඩ් කෙනෙක් බිහිවීමට ඉඩක් ඇති බව අමතක නොකරන්න. ඔහු/ඇය ඔබේ දරුවා විය හැකියි.
