මම , මගේ පුතුන්ට ඉගැන්වීමට බලාපොරොත්තු වන දේවල් 10

මම , මගේ පුතුන්ට ඉගැන්වීමට බලාපොරොත්තු වන දේවල් 10

ඔබේ නිවසේ ” අවුරුදු ” සමරන්නේ නම්, මෙම කාලය පුරාවටම නිවස පිරිසිදු කිරීම සහ කැවිලි සූදානම් කිරීම සඳහා ඔබ ඉතා කාර්‍ය බහුලව  සිටින්නට ඇති බවට කිසිදු සැකයක් නම් නැත​. මව්වරුන් ලෙස,  යහපත් සාරධර්ම,සම්ප්‍රදාය සහ සංස්කෘතිය  අපේ ළමා පරපුරට ඉගැන්වීමට අප හැකි තරම් උත්සහ දරන්නේ, අපගේ ගතට හා සිතට දැනෙන වෙහෙස මහන්සිය නොතකාය​.

මේ කාලයේ පමණක් නොව​, සෑම දිනම නිවස පිරිසිදු කිරීමේ වගකීම ඔබ මත පමණක් පැටවී තියෙනවා විය හැකියි. ඔබ එක දිගටම මහන්සි වන වෙලේ, යම් මොහොතක, ඔබට මෙසේ නොසිතෙන්නේද​? “අනේ මගේ සැමියාත්, මා සමඟ එකතු වෙලා මේක කරනවනම් කොතරම් අගනේද​?”

ඔබ, ගෙදරදී තම සැමියාගේ හැසිරීම ගැන කළකිරෙන බොහෝ භාර්‍යාවන් අතර තවත් එක් අයෙකු විය හැක. ඔබ වැඩ ගොඩක නිරත වන අතරතුර , ඔබේ සැමියා සතුටින් රූපවාහිනී නරඹනවා , පොත් / පුවත්පත් කියවනවා හෝ ඔහුගේ ස්මාර්ට් දුරකථනයේ ගේම් එකකට ඇලී ගැලී සිටිනවා  විය හැකිය.සමහර විට, ඔහු ඔබ තනියම කරන සියලු වැඩ නොසලකා හරින ආකාරය කෙතරම් අමානුෂික දැයි හැඟෙන්න ඇති. සමහර විට, ඔබ ඔබටම ” කට වහගෙන කරන්න – මෙය භාර්‍යාව කරන යුතුකමක් ” යැයි පවසා ගෙන නිහඬවම වැඩපල කරනවා විය හැකිය.

මව්වරුන් සෑම විටම තම දියණියන්ට සියලු ගෙදර දොරේ වැඩ , සහ ආහාර පිසින අයුුරු ඉගැන්වීමට නැඹුරු වේ.දියණියන් , ඔවුන්ගේ මව්වරුන් ගෙන් ඉගෙන නොගත්තද , විවාහ වූ පසු  කෙසේ හෝ අවශ්‍ය මූලික කරුණු දැන ගැනීමට පෙලඹෙන්නේ, ප්‍රීතිමත් පවුල් ජීවිතයක් පවත්වාගෙන යාම සඳහා , මේ දේවල් අවශ්‍ය වන බැවිනි. නමුත්, මව්වරුන් මේ දේවල් ඔවුන්ගේ පුත්‍රයන් ට ඉගැන්වීම දැකගත හැක්කේ, ඉතා කලාතුරකිනි.තම පුතුන්ට ගෙදර දොරේ වැඩ , සහ ආහාර පිසින වැඩ කටයුතු, පවුලේ සියලුම දෙනා අතරේ බෙදා ගැනීම කොතරම් අගනේදැයි වටහා නොදෙයි. තරු හෝටල්වල වේටර්වරු , ඔවුන්ගේ පාරිභෝගිකයන්ට දක්වන සැලකිල්ල මෙන් බොහෝ මව්වරුන් සිය පුතුන්ගේ සෑම අවශ්‍යතාවයක්ම ඔවුන්ගේ අත ළඟට කර දීම ඉතා සෝචනීයයි. ඔබගේ ගෙදර දොරේ වැඩ කිරීමට ඔබට සහාය නොකරන ස්වාමිපුරුෂයා සිටී නම්, ඔහු තුළ මා දකින පරිදි කිසි වරදක් නැත. ඔහුගේ මව සමඟ ඔහු හැදී වැඩී ඇත්තේ ඒ ආකාරයට නිසා අපිට සම්පූර්ණයෙන්ම ඔහුට දොස් නැගිය නොහැක. මේ ගැන ඔබ සිතන්නේ කුමක්ද?

මට පුතුන් දෙදෙනෙක් සිටින අතර ඔවුන් තම ගෙදර කළමනාකරණය සහ ආහාර පිසීම ගැන ටිකක්  හෝ දැන ගත යුතු මම තරයේ විශ්වාස කරමි. ඔවුන් ඉදිරියේදී මේදේ අනුගමනය නොකලත් , මේ කුඩා කුඩා දේ පිළිබඳව ඔවුන් දැනුවත් කිරීම මගේ යුතුකම බව මා විශ්වාස කරමි. මගේ මතයට අනුව ආදරණීය මවක් ලෙස සහ අනාගතයේ හොඳ නැන්දම්මා කෙනෙකු බවට පත්වීමට හැකිවන, තම පුතුට ඉගැන්විය යුතු කරුනු 10ක් මෙසේ හුවා දක්වමි.

01. ඇඳ සැකසීම

02. තේ කෝප්ප , වීදුරු, පිඟාන භාවිතයෙන් පසු සේදීම

03. බිම අතු ගෑම

04. බීමට තේ හෝ කෝපි  සාදා ගැනීම

05. සරල පරිප්පු කරි , මාළු කරියක් හා පොල් සම්බෝලය වගේ දෙයක් සාදා ගැනීම

06. රෙදි සෝදන යන්ත්‍රය ක්‍රියා කරවීමට සහ ඔවුන්ගේ ඇඳුම් සෝදා ගැනීම

07. ටී ෂර්ට්, ෂර්ට් , කලිසම් මැද ගැනීම

08. තම අධ්‍යයන මේසය සහ ඇඳ කාමරය පිළිවෙළට තබා ගැනීම

09. කුස්සියේ වැඩවලට උදවු වීම

10. නාන කාමරය සහ කොමඩ් එක සෝදා ගැනීම

සමහරු, ඉහත දේවල් ගෑනු ළමයින්ගේ වැඩ ලෙසත් පිරිමි ළමුන් මේවා කිරීමෙන් ඔවුන්ගේ පෞරුශයට හානි වන බවත් කියා තර්ක කළ හැකිය.ඔවුන් සඳහා, මම කියන එකම දේ නම් මේ දැනුමෙන් ඔවුන් ගේ පෞරුශය ඉහළ යන බවත් කවදා හෝ නිවසින් බැහැරව විසීමට සිදු වුවහොත්  ඔහුව මනා කළමනාකාරී එමෙන්ම ස්වාධීන පුද්ගලයෙකු කරන බවත්‍ ය​. විශේෂයෙන්ම මේ සුලු දැනුම පුතු තවත් කඩවසම් අයෙකු බවට පත් කරන අතර අනාගතයේ අප ලේලිය ලෙස පවුලට සම්බන්ධ වන ඒ දියණියට ආදර සැමියෙකුද තනා දේවි.

ඔබ ඔබේ පුතාට හොඳ සාරධර්ම, නිසි අධ්‍යාපනය මෙන්ම ගෘහණියකගේ වැඩ කොටස පළිඹඳ යම් දැනුමක් ලබා දිය යුතුය. ගෙදර වගකීම් බෙදාහදා ගන්න ඔහුට උගන්වන්න. ඔබේ දෛනික වැඩ කිරීමට ඔවුන් සම්බන්ධ කර ගන්න​. මවකගේ සැබෑ කාර්‍යය කොතරම් අසීරු දැයි ඔහුට තේරුම් කරන්න.කාරුණික ආකාරයෙන් අනිත් අය ගැන හිතන්න ඔහුට උගන්වන්න. එවිට අනාගතයේ ඔබ නොසිටියත් ඔබේ පුතුට ඔහුගේ බිරිඳ සතුටින් තබා ගැනීමට හැකි වේවි.

 කතුවරිය ගැන


Umandaඋමන්දා මුතුකුඩආරච්චි
මොරටු විශ්ව විද්‍යාලයේ ඉංජිනේරු උපාධිධාරිනියක්. බහුජාතික සමාගම් දෙකකම ඉහල රැකියාවන් වල නිරතව අත්දැකීම් පරිපූර්ණව සිටි ඈ, ඊටත් වඩා උතුම් වූ රාජකාරියක් සඳහා ඇගේ වෘතියෙන් සමුගත්තා. ඒ නම්, පූර්ණකාලීන මවක් වීමේ අරමුණෙන්. දැන් ඇය පුතුන් දෙදෙනෙකුගේ මවක්. ඊට අමතරව ඇය නිවසේ සිට පවත්වාගෙන යන ඇගේම ව්‍යාපාරයක හිමිකාරිනියක්. ඇගේ ව්‍යාපාරයේ Facebook පිටුවට මෙතනින් පිවිසෙන්න www.facebook.com/aumjewellery .


අප වෙබ් අඩවියට වරින් වර ලිපි සපයන බාහිර ලියුම්කරුවන්ගේ ලිපි සියල්ල මෙම පොදු profile එක හරහා පල කෙරෙනු ඇත.

LEAVE A REPLY

Please enter your comment!
Please enter your name here