දරුවෙකු බිහිකරන ඕනෑම මවකට දරුවාට අවශ්‍ය කිරි ප‍්‍රමාණය නිපදවීමේ හැකියාව සතුය. කිරි ප‍්‍රමාණවත් නොවුණේ නම් මවගේ වයස, දරුවාගේ වයස, ආර්තවය, සිසේරියන් සැත්කමකින් දරුවා බිහි කිරීම, දරුවන් වැඩි ගණනක් ලැබීම, පියයුරුවල ප‍්‍රමාණය යන හේතූන් කිසිසේත්ම කිරි නිපදවීම කෙරේ බලනොපායි. දරුවෙකු වෙනුවෙන් නිපදවෙන කිරි ප‍්‍රමාණවත් නොවීමට බලපාන එකම හේතුව වන්නේ දරුවා නියම ආකාරයෙන් කිරි උරා ගත නොහැකි වීමයි. ඒ රදි ආකාරයට දරුවා පියයුරට සම්බන්ධ කිරීමට වගබලා ගැනීමයි.
දරුවා නිවැරදිව පියයුරට ස්ථාපිත කිරීම :
- දරුවාගේ තට්ටම ප‍්‍රදේශය මවගේ වැලමිටට තබා ආධාර කරගන්න
- දරුවා සම්පූර්ණයෙන්ම මව දෙසට හරවා සමට සම ගැටෙන පරිදි ළයට ළය ස්පර්ෂ වන සේ තබාගන්න. එවිට දරුවාට අවශ්‍ය උණුසුමද ලැබේ
- දරුවාගේ කොඳු නාරටියට මවගේ අත දිගේ අධාරය ලබා දෙන්න
- බෙල්ල සහ පිටේ උරහිස් ප‍්‍රදේශයට ආධාර කර හිස පියයුරට ළගා කරගන්න
- දරුවාගේ නාසය මවගේ තන පුඩුව කෙලින් පිහිටිය යුතුය
- නිවැරදිව පියයුරට ස්ථාපිත කළ ළදරුවාගේ උඩට පිහිටි කන, උරහිස සහ උකුල් ඇටයේ ඉහළ කොටස එකම සරල රේඛාවක පිහිටයි
- සැමවිටම දරුවා එක අතකින් අල්ලා ගන්න
- අනෙක් අතේ මහපට ඇගිල්ල පියයුරට උඩින් ද අනෙත් ඇ`ගිලි හතර පියයුරට යටින් ද වනසේ නොසෙල්වෙන සේ පියයුර අල්ලා ගන්න
නිවැරදිව සම්බන්ධය
දරුවා මව වෙත ළංකර ගෙන නිවැරදි ලෙස දරුවා පියයුරට ස්ථාපිත කොට යටි තොලේ පියයුර ස්පර්ශ කළ විගස මුව විවර කරයි. (මෙහිදී කුඩා දරුවන්ගේ රුටීන් ප‍්‍රතීකය උපයෝගී කරගනිමින් කිරි උරා බීමට දරුවා පොළඹවා ගත හැකිය) සැමවිටම ඇරියෝලාව හෙවත් පියයුරේ කලූ පැහැති කොටසින් වැඩි ප‍්‍රමාණයක් මුව තුළට ඇතුළු වී දැයි පරීක්‍ෂා කරන්න. මව්කිරි ලබාදීමේදී මවට නිදා සිටින ඉරියව්වේ සිට දීම ද නිවැරදි ක‍්‍රමයකි. නමුත් හැකි සෑම අවස්ථාවකදීම වාඩි වී සිටින ඉරියව්ව උපයෝගී කිරීම වඩාත් උචිත වේ.
නිවැරදිව සම්බන්ධ වූ දරුවා කිරි උරා බොනවිට
- දරුවාගේ කම්මුල් පිම්බී තිබේ
- යටි තොල යටට පෙරලී තිබේ
- නිකට පියයුර මත ස්පර්ශ වී තිබේ
- කන ආසන්නයෙන් කිරි උරන බව දිස්වේ
මේ ආකාරය නිවැරදි කිරි උරා බොන දරුවාට විනාඩි 20ක් 30ක් එක් පැත්තකින් කිරි උරා බීමට ඉඩ දෙන්න. ඒ අවස්ථාවේදී දරුවාට නින්ද යන්නේ නම් ඇහැරවමින් කිරි ලබා දිය යුතුය. ඉන් පසු පහත දක්වා ඇති ආකාරයන්ගෙන් පහසු ආකාරයට ගුඩුස් යවා පැත්ත හරවා නිදි කරවන්න.
දැන් බබාට ගුඩුස් යවමු
කිරි උරා බීමේදී වාතය යම් ප‍්‍රමාණයක් දරුවාගේ කුසට ඇතුළු වන අතරම එය පිට කර හැරීමට වගබලා ගතයුතුය. එනම් ගුඩුස් යැවීමයි. මෙය ක‍්‍රම කිහිපයකි.
- දරුවා කෙළින් කර මවගේ ළය පෙදෙසට හේත්තු කොට තබාගැනීම
- දරුවා උකුලේ වාඩි කර පිට සෙමින් තෙරපීම
- දරුවා මුනින් අතට තබා පිට සෙමින් තෙරපීම
කාසල් වීදියේ කාන්තා රෝහලේ සෞඛ්‍ය ප‍්‍රවර්ධන සහ මහජන සෞඛ්‍ය ඒකකයේ බී.එම්.එල්. බස්නායක හෙදි සොයුරිය සමග සකස් කරන ලද ලිපියකි.
