දරුවන්ගේ පොඩි බඩගින්නට

kid-eating-unhealthy-foods

දරුවන්ට ඇති වෙන පොඩි බඩගිනි මට්ටු කිරීමත් එතරම් පසු කාර්යක් නොවෙයි. අද දෙමව්පියන් මේ වෙනුවෙන් ගොඩ නගා ගෙන තිබෙන එකම විකල්පය වන්නේ බිස්කට් වලින් දරුවන්ගේ කුසපිරවීමයි. එහෙම නැත්නම් ජංගම පාන් බනිස් රථය අපි අද හඳුන්වන” චූන් පාන් ” රථයෙන් මොනවා හෝ අරගෙන දී දරුවා ගේ ඇවිටිල්ලෙන් මිදීමයි.මේ කටයුතු නිසාම අද දරුවන් අතර දියවැඩියා රෝග තත්වය ඉතාම බහුලයි. දරුවන්ගේ බඩගින්න ගැන ඇවිටිල්ල වැඩි වෙන විට මව්පියන්ට මේ සෞඛ්‍ය හුරු පුරුදු නොදැනම අමතක වෙනවා. ඒත් දරුවන්ගේ බඩගින්න මට්ටු කරන්න මව්පියන් විදිහට ඔබ සූදානමෙන් ඉන්නවා නම් එය එතරම් අපහසු කාර්යක් නොවෙයි.

ඉස්සර කාලයේ නිවෙස්වල නිතරම අළුවා අග්ගලා හදන්න පිටි සකස් කර ගෙන තිබුණා. මේ වෙනුවෙන් ඔවුන් අමතර හාල් පිටි වෙනුවෙන් මුදලක් වැය කළේ නැහැ. නිවසේ ඉතිරිවෙන සුන්සහල් කොටා ගෙන බැදගත්තා. සමහර අවස්ථාවලදී නිවසේ ඉතිරිවෙන බත් වියලාගෙන බැද අඹරාගත් පිටි අග්ගලා වෙනුවෙන් නිතරම නිවසේ තිබුණා. හදිසියේ ආගන්තුකයෙක් පැමිණියත් කේක් බිස්කට් ගේන්න කඩපිලට ගියේ නැහැ. පත්පැණි වෙන්න උණුකර ගත් පැණිවලට පොල් සහ අග්ගලා පිටි එක්කරගෙන සාදා ගත් පැණි අග්ගලා කිසිම විදිහකට අගුණ වුනේ නැහැ.

අද දරුවන් ගැන අපිට නිරන්තරව අසන්නට ලැබෙන ආහාර විෂ වීම් වගේම ආසාත්මිකතාවයන් ගැන අහන්න නොලැබුනේ නිවසේ පිලියෙළ කර ගත් පිරිසිදු සහ ආරක්ෂිත ආහාරවලින් ඔවුන්ට සංග්‍රහ කළ නිසයි.තවත් අවස්ථාවලදී වාරයට ලැබෙන කොස් , දෙල් තෙලෙන් බැද එය උණුකර ගත් සීනි ද්‍රාවනයක දමා ගෙන පිලියෙළ කර ගත් රසකැවිලිවලින් දරුවන්ට හවස තේ පැන් වෙනුවෙන් රසවත් කැවිලි පිළියෙල කර ගත්තා. වත්තේ පිටියේ බතල, මඤ්ඤොක්කා තම්බලා පොල් සම්බෝලයක් සමග දරුවන්ට අතිරේක වෙලාවට ආහාරයට ලබා දුන්නා.කොටා ගෙන බැද ගත් හාල්පිටි සුලං නොවදින සේ අසුරාගෙන තබා ගෙන ඉදිආප්ප තනා ගත්තා. ඒ වගේම උදේ ඉතිරි වුන ඉදිආප්ප තිබුනොත් ඒවා වියලා ගෙන තෙලෙන් බැද උනුකර ගත් සීනි පැණි යොදා ගෙන රසකැවිල්ලක් සාදා ගත්තා. ඉතිරි පිට්ටු තිබුනොත් ඒවායින් වැලිතලප හදා ගෙන කෙසෙල් ගෙඩි සමග ආහාරයට ගත්තාම දරුවන්ට බඩගින්න නොදැනම මට්ටු වුණා.

ඉස්සර කාලයේ රාත්‍රිය ගෙවෙන විට පවුල් පිටින්ම තම්බා ගත් කඩල ආහාරයට ගත්තා. අද වගේ විවිධ පාන්පිටි බයිට් වලින් සිරුරට ඇති වෙන අහිතකර තත්වයෙන් දරුවන් නොදැනම මිදෙන්නට මෙම තත්වය හේතු වුනා.මේ අන්දමේ තෙලෙන් බදින ලද ආහාර සිරුරට බෙහෙවින් අහිතරක බවට මාධ්‍ය මගින් ප්‍රචාරණ ලබා දුන්නත් ඒ ගැන දෙමව්පියන් එතරම් සැලකිල්ලක් දක්වන්නේ නැහැ. මඤ්ඤොක්කා පෙති බදින විට රත්වුන තෙලට ප්ලාස්ටික් බෝතල් එක් කරන බව සමාජාල මගින් ප්‍රකාශයට පත් කරනු ලැබුවා. සුළං නොවදින තත්වය වෙනුවෙන් ඔවුන් අනුගමනය කරන මෙම කටයුතු මහජන සෞඛ්‍යට ඉතාම අහිතකරයි.නිවසේදී දරුවෙකුට බතල මඤ්ඤොක්කා අලයක් තම්බා දීම එතරම්  අසීරු කරුණක් නොවෙයි. පිට්ටු තම්බන විටත් ඒ පිටිවලට ලියා ගත් පලා වර්ග එක් කර ගෙන සමබල පිට්ටු හදා ගත්තා.

වර්ණක අඩංගු ආහාර වෙනුවට කිතුල්පිටි තලප, සව් , පළතුරු සලාද වලින් දරුවන්ගේ පොඩි බඩගිනි මට්ටු කරන්න පුලුවන්. සිරුරට අහිතකර වර්ණක වෙනුවට පැපොල්, අඹ, දිවුල් වලින් හොඳ යුෂ පානයක් සකස් කර දීමට මහ කාලයක් වැය වෙන්නේ නැහැ.

නිතරම බඩගිනි කියන දරුවන් අස්වසන අපූරු ක්‍රමයක් පිලිබඳව ලෝමා විශ්ව විද්‍යාලයේ පර්යේෂකයන් විසින් ඉදිරිපත් කරන ලද අධ්‍යන වාර්තාවක් මගින් පෙන්වා දෙනවා. ඔවුන් කියන්නේ දරුවාගේ ප්‍රධාන ආහාර වේලට පසුව අලිපේර බෑයක් ආහාරයට ලබා දෙන්න කියලා. අලිගැට‍පේර බෑයක් ආහාරයට ගත්තාම පැය තුනක් පමණ ගෙවෙන තෙක් බඩගින්න ගැන දරුවන්ගෙන් පැමිණිලි ලැබෙන එකක් නැහැ.

ඔවුන් විසින් කරන ලද මෙම අධ්‍යනයට තරබාරු දරුවන් විසි හය දෙනෙක් තෝරා ගත්තා. මෙහි අධ්‍යනයේ ප්‍රධානී ජෝන් සැබෙට් පෙන්වා දෙන්නේ අලිගැටපේර බෑයක ශක්තිය කැලරි 150 ක් අඩංගු බවයි. ඒ වගේම තන්තු සහ මේද බහුලයි. ඒ නිසා දවල් ආහාරයෙන් පසුව අලිගැටපේර බෑයක් ආහාරයට ගත් පසුව නැවත ආහාර වෙනුවෙන් උත්තේජනයක් ඇති වීම අඩු මට්ටමක පවතිනවා.

අද මව්පියන් තමන්ගේ දරුවන්ට පළතුරු ලබා දෙන්න කිසිම උත්සාහයක් ගන්නේ නැහැ. ඒත් දොඩම් වැනි පානයන් මගින් දරුවන්ගේ මතක ශක්තිය මුවහත් කරන බව ඩැනියෙල් ලැම්පෝර්ටි විසින් සිදු කරන ලද අධ්‍යන වාර්තාවක සදහන් වෙනවා.

එදා දෙමව්පියෝ දරුවන්ට ගෙවත්තේ තැඹිලි කුරුම්බා වග්ම දොඩම් වැනි යුෂ නිතරම ලබා දුන්නා. මේවා වස විස නැති ස්වභාවික පානයන් බව අපි නොදන්නවා නොවෙයි.ඒ වුනාට පැණි බීම වලින් තොර ලෝකයක් දැන් දරුවන්ට නැහැ. වෙහෙසකර බවක් , පිපාසයක් හෝ කුසගින්නක් දැනුන විට දොඩම් යුෂ පානය කිරීමෙන් මතක ශක්තිය වර්ධනය වෙන බැව් මෙම අධ්‍යනය මගින් පෙන්වා දුන්නා.

ඔවුන්ගේ අධ්‍යනය වෙනුවෙන් නවයොවුන් වියේ දරුවන් විසි හතර දෙනෙක් තෝැා ගෙන එයින් එක් කණ්ඩමකට කෘතිම දොඩම් රසකාරක සහිත පානයක් එක් දිනකත් අනෙක් දිනයේදී ස්වභාවික දොඩම් යුෂත් ලබා දුන්නා. දින දෙකේදීම මෙම පානයෙන් මොලය දක්වන ප්‍රතිචාර අධ්‍යනය කරනු ලැබුවා.ශාරිරික නිරෝගිතාවය වෙනුවෙන් ශාඛ රසායනයන්ගේ ක්‍රියාකාරිත්වය නිසා මොලයේ සෛල උත්තේජනය වෙන අතර රුධිර සැපයුම යහපත් පරිදි සිද්ධ වෙනවා.මේ අනුව ඩැනියෙල් ලැම්පෝර්ට්ගේ අධ්‍යන වාර්තාව සඳහා ට්‍රොපිකානා පළතුරු නිෂ්පාදන සමාගමේ පුරෝගාමී ආයතනයක් වූ Pepsico මගින් දායකත්වය ලබා දුන්නා පමණක් නොව මෙම වාර්තාව European Journal of මගින් ප්‍රකාශයටත් පත් කරනු ලැබුවා.

මේ විදිහට සලකා බලන විට දරුවන්ගේ බඩගින්නට තිබෙන එකම පිහිට ඔබ හිතන පේස්ට්‍රි කඩයවත්, ජංගම පාන්පිටි නිස්පාදන රථයවත් නොව අම්මෙක් විදිහට හොඳම දේ දරුවන්ට ලබා දීමට ඔබේ හිතෙන් ඇති වෙන උනන්දුව නොවේද….?

හිතට එන අදහසක් පත්තරයකින් පළ වුනාම ලැබෙන සතුට දන්නේ ඒ අත්දැකීම ලබන කෙනෙක් පමනයි. මේ නිසාම දන්නා කාලයේ පටන්ම ලියන්න ලැබෙන හැම මොහොතකම යමක් ලිව්වා. ඒවා පළ වුනා.දැනට මහවැලි ජාතික අධ්‍යාපන විද්‍යා පීඨයේ පුස්තකාලයාධිපතිනිය ලෙස සේවය කරන අතර ලේඛනය අමතක කරන්නේ නැහැ.කැළනිය විශ්ව විද්‍යාලයේ ශාස්ත්‍රපති උපාධිය සහ පේරාදෙණිය විශ්ව විද්‍යාලයේ කලා උපාධිය වෙනුවෙන් කිසිම අපහසුතාවයක් ඇති නොවුනේද ලිවීමේ කලාවට පිං සිදු වෙන්නයි.නිවස , රැකියාව සහ පවුල සමග වූ ගණුදෙණුව ලිවීමේ කලාවට හරස් නොවන සේ පවත්වා ගෙන යන අතර මගේ ජීවිතයට ලේඛනයත් නොදැනම බද්ධව තිබෙනවා විය හැකියි.

LEAVE A REPLY

Please enter your comment!
Please enter your name here