මුල්‍ය කළමනාකරණයටත්, දරුවන්ට ඉතුරු කරන්නත්, වැඩිහිටියන්ට සහය ගෙනෙන ”අය වැය ලේඛණය”

saving-money
  මගේ ජීවිතය සාර්ථක කරගන්නට හේතු වුණු එක් කාරණයක් තමයි මට ලැබෙන ආදායම හරි හැටි කළමනාකරණය කළ එක. ඇත්තටම ඒ සඳහා මට මගේ බිරිඳගෙන් ලොකු සහයෝගයක් ලැබුණා. අපි දෙන්නා විතරක් නෙවෙයි, අපේ පුංචි දුවලා දෙන්නත් මේ කාර්යයට අපි සම්බන්ධ කරගත්තා. අපිට ලැබෙන ආදායම වගේම   වියදම සඳහන් කරලා අය වැය ලේඛණයක් සකස් කරන්න ඕනේ කියන අදහස ආවේ මගේ බිරිඳට. මාසික වැටුප අරගෙන ඒ පැත්ත හැරිලා මේ පැත්ත බලද්දි අතේ සතයක්වත් නැතිවෙන මාස ඉස්සර අපිටත් තිබුණා. ඇත්තටම  සල්ලි ඉවර වුණේ කොහොමද කියලවත් අපි දැනගෙන හිටියේ නෑ. ඒත් අද වෙද්දි, බොහොම ලස්සනට අපේ දවස් ගෙවිලා යනවා. එදා වගේ ආර්ථීක ප්‍රශ්න අද නම් මට නෑ. දරුවන්ගේ අනාගතය වෙනුවෙන් යම් මුදලක් හැම මාසයකම ඉතුරු කරන්නත් හැකියාව ලැබෙනවා. ඇත්තටම අපි අපට ලැඛෙන පුංචි මුදල හරි කළමනාකරණය කරනවා නම් හිතේ හැටියට වියදම් කරනවාට වඩා වැඩි ප්‍රයෝජනයක් ඒ මුදලෙන් අපට ලබාගත හැකියි. මම ඒක දන්නේ අත්දැකීමෙන්මයි. මේ හරහා මට ලැබුණු විටිනාම අවස්ථාව වෙන්නේ මගේ දරුවන්ගේ අනාගතය වෙනුවෙන් යම් මුදලක් ඉතුරු කරන්නට මට ලැබුණු හැකියාවයි. ” 

ඉහත දැක්වූ පෙරේරා මහතාගේ අදහස එක්ක එකඟ වෙන බොහෝ දෙනෙක් අපි අතර ඉන්නවා. ඒ, අද වෙන විට වෙනදාට වඩා වැඩි පිරිසක් මුදල් කළමනාකරණය ගැන අවධානය යොමුකරන නිසයි. නිවසක ලැබෙන ආදායම නිසි ලෙස කළමනාකරණය තුළින් සැමවිටම ආර්ථීකමය ගැටලු ඇතිවීමද කළමනාකරණය කරගත හැකි බව මේ ලිපිය අවසානයේදී ඔබට පැහැදිලි වනු නිසැකය. වැඩිහිටියන් හා දරුවන්ට එක්ව කළ හැකි මේ කාර්යය තුළින් ආදායම කළමනාකරණය කළ හැකි වනවා සේම දරුවන්ගේ අනාගතය වෙනුවෙන් යම් මුදලක් ඉතිරි කිරීමට ද අවස්ථාව සැලසෙනු නොඅනුමානය. එපමණක් නොව, ඔබේ දරුවන් වැඩිහිටියන් වන හෙට දිනයේදී ඔවුන්ට ද මුල්‍යමය කළමනාකරණය පිළිබඳව නිසි අවබෝධයක් කුඩා අවධියේ සිටම හිමි වේ.

අය වැය ලේඛණය සකසන්න දරුවනුත් එක්කරගන්න

අය වැය ලේඛණය යනු ඔබට ලැඛෙන සහ වියදම් වන මුදල පමණක් නොව ඉතුරු වෙන මුදල පිළිබඳව ඔබව දැනුවත් කෙරෙන ලේඛණයයි. දරුවන් සමග මෙය ඉතා විනෝදාත්මක අංගයක් ලෙස සිදුකිරීමට ඔබට හැකියි.

ආදායම, පිළිබඳව දරුවන්ට යම් දළ අදහසක් ලබාදෙන්න. ඒ වගේම වියදම එනම් ආහාර, නිවාස, විදුලි බිල, ජල බිල, දුරකථන බිල්පත්, ගෑස්, දරුවන්ගේ අධ්‍යාපන වියදම්, ප්‍රවාහන වියදම්, ඉන්ධන වියදම්, වෛද්‍ය ප්‍රතිකාර, ඉතිරි   කිරීම, විනෝද ගමන්, රූපලාවන්‍ය ආදී වියදම් ලැයිස්තුව ද ඔවුන්ට ලබාදෙන්න. ආහාර හා අනෙකුත් ගේ දොර වියදම්වල දල වටිනාකම්ද ලබාදෙන්න. වියදම් වන මුදල් කොටස සම්පූර්ණ කර එකතුව ලබාගත් පසු ආදායම හා වියදම අතර වෙනස දරුවාට ද අවබෝධ වේ. එය හිඟයක් නම් සියලු දෙනා එකතු වී කුමන වියදම් කපා හරින්නේද යන්න සාකච්ඡා කරන්න. කුමන බිල් සම්පූර්ණයෙන් ගෙවනවාද, කොටසක් පමණක් ගෙවිය හැකි බිල් මොනවාදැයි තෝරන්න. ඔබ වියදම් තෝරා බේරාගෙන ආදායමට අනුව වියදම් කළමනාකරණය කරන ආකාරය දරුවාට වටිනා අත්දැකීමකි. ඒ අතරට පවුලේ සියලු දෙනා වියදම් කළමනාකරණය කිරීම සඳහා ක්‍රියා කළ යුතු ආකාරය සාකච්ඡා කිරීමද සිදු කළ යුතුය.

සමහර විට ඔබේ ආදායම වියදමට වඩා වැඩි නම් අතිරික්ත මුදල් දකින දරුවා එයින් ප්‍රතිලාභ ලබන්නට සැලසුම් කළ හැකිය. එහිදී මෙම ඉතිරිය දරුවන්ගේ අනාගතය වෙනුවෙන් ඒ ඒ අරමුණු සඳහා වැය කරන්නට නියමිත බව දරුවන්ට අවබෝධ කරවන්න. එසේම නැති බැරි පිරිස් වෙත පිහිට වීමටත් යම් මුදලක් වෙන් කළ යුතු බව දරුවන්ට අවබෝධ කරවන්න.

බොහෝ නිවෙස්වල වියපැහැදම් කාර්යය භාරව සිටින්නේ මව්වරුන්. මාසික වැටුප ලැබී සති දෙකක් පමණ ගතවන විට නැවත පසුම්බිය හිස්ව යන බවට මේ කවුරුත් මැසිවිල නගනවා. නමුත් නිසි ලෙස මුදල් කළමනාකරණය සිදු වනවා නම් මේ තත්ත්වයෙන් මිදෙන්නට අපි කාටත් හැකියාව ලැබෙන බව දැන් ඔබට පැහැදිලි වනු ඇත.

අධ්‍යාපනික අතින් කොයිතරම් උසස් මට්ටමක හිටියත් අම්මෙක් වුණාම ඇති වන ගැටලූවලට අපි ළඟ පිළිතුරු නෑ. මව්පදවියත් එක්ක දහසකුත් එකක් ප්‍රශ්න මටත් ඇති වුණා. ඔය අතරෙදියි මව්වරුන් වෙනුවෙන්ම වෙන්වුණු පුවත්පතක සංස්කාරකවරිය විදියට සේවය කරන්න මට අවස්ථාව ලැබුණේ. අම්මා කෙනෙක් විදියට මට ඇති වෙන ගැටලූ අධ්‍යාපනය අතින්, මිල මුදල් අතින් ඉහළ, පහළ ඕනෑම තරාතිරමක හැම අම්මා කෙනෙක්ටම පොදුයි කියලා ඔය අතරෙදි මම තේරුම් ගත්තා. මගේ අත්දැකීම්, දරුවන් ගැන මට තියෙන ගැටලූ ගැන වෘත්තීමය සුදුසුකම් සහිත පුද්ගලයන් එක්ක සාකච්ඡ කරලා, සටහන් කරන්න මම හිතුවේ දහස් ගණනක් මව්වරුන්ට නිවැරදිම මගපෙන්වීම අවශ්‍ය බව දැණුනු නිසා.

LEAVE A REPLY

Please enter your comment!
Please enter your name here