දෙමව්පියන්ගේ ජීවිතයේ හැන්දෑකාලය ගැන අනාවැකි කියන්න ඉතාම අමාරුයි. අපේ පිලිගැනීමේ හැටියට නම් විවාහයෙන් දරු මුණුපුරන් ලැබුවාට පසුව අම්මා තාත්තාගේ ජීවිතයේ අවසාන කාලය ඔවුන්ගේ රැකවරනය යටතේ ජීවත්වීමට වාසනාව ලැබේවි කියලයි. ඒ වගේම දරුවන් ආර්ථික වශයෙන් ශක්තිමත් වුනොත් ඒ පිහිටත් මව්පියන්ට ලැබෙනවා. දරුවන්ට අත මිට තිබෙනවා නම් යහමින් අම්මා තාත්තාට සලකන්න පුලුවන්.
“මැනලද පුතේ කිරි දුන්නේ මං නුඹට” කිව්වත්…
ආර්ථිකව සවිබල ගැනුන දරුවන්ට දෙමව්පියන් වෙනුවෙන් ලෝබ නැතුවම ඔවුන්ගේ අවශ්‍යතාවයන් ඉෂ්ට කරන්න පුලුවන්. ඒත්.. මේ සිද්ධිය ඒ විදිහටම වෙනවාද..? බොලිවුඩ් තිරයේ දීප්තිමත්ම තාරකාවක් වූ “ගිතා කපූර්” පසුගිය දා අභාවයට පත් වුනේ මුම්බායි රෝහලේදී. ඒ වෙන විට ඇය ජීවත්වුනේ වැඩිහිටි නිවාසයකයි. මියයන විට ගීතාගේ වයස අවුරුදු 67 ක්. ඇය විවාහකව දරුවන් දෙදෙනෙකුගේ මවක වුනා. ඇයගේ පුත් “රාජා” නර්තන ශිල්පියෙක් වූ අතර දියණිය “මීනා” ගුවන් සේවිකාවක්. මේ දරුවන්ට අම්මාට නොසලකා සිටින්න තරම් ආර්ථික ප්‍රශ්න තිබුනේ නැහැ.
ගීතාට වයස අවුරුදු 57 ක් වෙද්දී ඇගේ පුතා විසින් අමුතු ආකාරයේ ඉල්ලීමක් කළා.
“අම්මා… වැඩිහිටි නිවාසයක නවත්වන්නම්..”
ඒත් ගීතා කිසිසේත්ම පුතාගේ ඉල්ලීමට එකඟ වුනේ නැහැ. දරුවන් දෙන්නෙක් ලෝකයට අතපය නොකඩා දායද කරල, ජීවත්වෙන මග කියා දීලා, මම මොකටද වැඩිහිටි නිවාසයකට යන්නේ… සමහර විට ඇය මේ විදිහට හිතන්නත් ඇති. සමහර අම්මලා තාත්තලා දරුවන් තමන්ට හැකි විදිහට සැලකුවත් වැඩිහිටි නිවාස සොයා ගෙන ගිහින් දරුවන් නොසලකන බව ලෝකයට කියා පාන කාලයක ගීතාගේ තීන්දුව ඉතා නිවරැදියි. ඇයට අවශ්‍ය වුනේ දරුවන් සමග ජීවත් වෙන්නයි. ආර්ථික වශයෙන් අම්මාට බලන්න ඔවුන්ට නොහැකියාවක් තිබුනේ නැහැ.
ඒත් පුතා අම්මාව වැඩිහිටි නිවාසයකට ඇතුලු කරන තීරණයේ ඉතාම දැඩිව සිටියා. ගීතාගේ තීරණය ගැන අමනාපයෙන් පසුවුන පුතා ගීතා නිවාස අඩස්සියයේ තබා ඇයට ආහාර දීම පාලනය කරන්න පටන් ගත්තා. මේ නිසා රුධිරපීඩනය අඩු වෙලා ගීතා ක්ලාන්ත වුනාම පුත් රාජා විසින් ඇයව පෞද්ගලික රෝහලකට ඇතුලත් කර යන්න ගියේ රෝහල් බිල පියවන්න මුදල් රැගෙන එන්නම් යනුවෙන් ගීතාට සඳහන් කරමින් වුනත් ආයේ නම් පුතා ඒ රෝහල පැත්ත පළාතට ආවේ නැහැ. මේ අතර ඉන්දියාවේ බොලිවුඩ් තිරයේ උදවියට මේ ගැන ආරංචි වුනා. “අශෝක් පන්ඩිත්” (Ashoke Pandit) විසින් රෝහල් බිළ පියවා ඇය වැඩිහිටි නිවාසයකට ඇතුලත් කරනු ලැබුවා. ගීතාගේ රෝහල් බිල ඉන්දියානු මුදලෙන් රුපියල් ලක්ෂ 1.5 ක් වුණා.
වැඩිහිටි නිවාසයේදි ගීතාට හොදින් සැලකිලි ලැබුණා. පසුගිය උපන්දිනයත් මේ නිවාසයේදී ඉතාම උත්කර්ෂවත් විදිහට සිදු වුනා. ඒත් අම්මා කෙනෙක් විදිහට ඇගේ හිතේ තිබුන පාලුව, ශෝකය සහ ආත්මීය පසුතැවිල්ල දුරු කරන්න වැඩිහිටි නිවාසයේ අයට හැකි වුනේ නැහැ. ඇය හැම දවසක්ම පටන් ගත්තේ අද මගේ දුව හෝ පුතා ඇය බලන්න ඒවි යන බලාපොරොත්තුවෙන් බව එම නිවාසයේ පරිපාලනය සදහන් කරනවා. ඒත් මියයන තෙක්ම ඒ අම්මාගේ ආසාව ඉෂ්ට වුනේ නැහැ.
ගීතා කපූර් කුඩා කාලයේ පටන්ම නර්තනයට ප්‍රිය කළ අතර ඇය තමාගේ හැකියාවන් දියුණු කර ගත්තේ “ෆාරා භාන්” ගේ නැටුම් කණ්ඩායමට සම්බන්ධවයි. එතැනින් පසු ගීතා “කුච් කුච් හෝතා හෑ” චිත්‍රපටයෙන් ප්‍රෙක්ෂකයන් අතර ජීවත්වුනා. ඇය දායක වුන චිත්‍රපට සංඛයාව සියයකට අධිකයි. “පාකිෂා” චිත්‍රපටයේ ගීතා ප්‍රධාන චරිතය රඟපෑම නිසා රසිකයන් අතර ජීවත්වෙන්න පටන් ගත්තා.
ඒත් ජාත්‍යන්තර තලයේ ප්‍රතිභාව ප්‍රදර්ශනය කළ කාන්තාවක් වුනත් මවක් විදිහට ඇයගේ ජීවිතය අවසාන වුනේ ඉතාම අවාසනාවන්ත විදිහටයි. මේ ගැන අපිට පැතිකඩ දෙකක් තිබෙනවා. කොතැනක හෝ වැරදීමක් සිද්ධ වෙලා ඇති. සමහර විට දරුවන් මෙහෙම කියාවි… අම්මා කෙනෙක් විදිහට අපට ඇගෙන් ආදරය, ආරක්ෂාව සහ රැකවරණය ලැබුනේ නැහැ. ඒත් ඇය ඔවුන් මේ ලෝකයට බිහි කළ අම්මා බව නම් අමතක කිරීම කිසිසේත්ම සාධාරණීය කිරීමට බැහැ.
දරුවන් රජුන් කළත් දෙමව්පියන්ගේ ජීවිතයේ සැදෑකාලය මේ විදිහට ගෙවෙන්නත් පුලුවන්.
