- Advertisement -

ගැබිනි සමයේ යෝනි පෙදෙසේ ඇති වන කැසීම කුමක් නිසාද?

-

ගැබිනි සමයේ ඇතිවන බොහෝ තත්ත්වවලට හේතුව ශරීරයේ සිදුවන හෝමෝනමය ක‍්‍රියාවලියයි. මේ කරුණු පිළිබඳව අපි දැනුවත් වීම වැදගත් වන්නේ ඒවාට මුහුණ දීමට සූදානම් වීම, මුහුණ දීම හා එම අභියෝගවලට සුදුසු ලෙස ප‍්‍රතිචාර දැක්වීමට අප තුළ හැකියාව දියුණු කරගැනීමටයි.

ජීවිතයේ අන් කාලවලදීට වඩා ගර්භනී සමය කාන්තාවකගේ යෝනි ස‍්‍රාව වැඩි කාල සීමාවකි. මෙහිදී අප විසින් එම කාලයේ පිරිසිදු භාවය පිළිබඳව ඉතාමත් හොඳ සැලකිල්ලක් යොමු කළ යුතු අතරම තෙතමනය උරා ගන්නා කපුරෙදිවලින් මැසූ යට ඇඳුම් භාවිත කළ  යුතු අතරම එම ඇඳුම්ද දිනපතා පිරිසිදු කරගැනීමත් නිසි ලෙස මාරු කිරීමත් කළ යුතුය. මේ නිසා මේ මව්වරු දිනපතා ස්නානය කිරීමට යොමු විය යුතුයි. ශාරීරික ක‍්‍රියාවලි අන් අයට වඩා වැඩිපුර සිදුවන හෙයින් මේ කාලයේ දහදිය දැමීම වැඩිවීමද මෙයට බලපායි. මේ නිසා ගර්භනී කාලයේ පුද්ගලික පවිත‍්‍රතාවය පිළිබඳ වැඩි අවධානයක් යොමු කළ යුතුයි.

- Advertisement -

සාමාන්‍ය යෝනි ස‍්‍රාව ආම්ලික බවකින් යුක්තය. මෙසේ ආම්ලික මාධ්‍යයක් පැවතීමෙන් ක්‍ෂුද්‍ර ජීවි ආසාදනවලට ලක්වීමේ හැකියාව අවම වේ. එහෙත් පිරිසිදුකම ලෙස සලකා නිතර නිතර සබන් යොදා එම ප‍්‍රදේශය සේදුවහොත් සබන්වල ඇති භාෂ්මිකතාවය හේතුවෙන් ආම්ලික බව විනාශ වීම සිදුවන නිසා ආසාදනවලට ගොදුරුවීමේ හැකියාව ඇතිවේ. බොහෝ විට හැන්ඩිවා වැනි දිලීර ආසාදනවලට මව්වරු ගොදුරු වීම මෙවන් හේතු නිසා වැඩිවේ. දියවැඩියා මව්වරු අතර මෙම තත්ත්වය තවත් වැඩිවේ.

මෙවන් දිලීර ආසාදන හෝ වෙනත් ආසාදන තත්ත්ව (සමාජ රෝග අසාදන) හේතුවෙන් යෝනි ප‍්‍රදේශයේ කැසීම ඇතිවේ. දහදිය හා තෙතමනය දිගටම පැවතීමෙන්ද මෙම තත්ත්වය ඇති විය හැකියි. එසේම කැසීම නිසා තුවාල ඇති විය හැකි නිසා මව්වරු බොහෝ අපහසුතාවලට පත්වේ. මෙවිට පිරිසිදුව සිටීම, පිරිසිදුව යට ඇඳුම් ඇදීම, යට ඇඳුම් තෙත්ව පවතින විට මාරු කිරීම ආදිය කළ යුතු අතරම කැසීම ඇතිවිට වෛද්‍ය උපදෙස් සඳහා යොමුවිය යුත්තේ එය දීර්ඝකාලීනව පැවතීමෙන් මවට ඇතිවන අපහසුතා පමණක් නොවේ ප‍්‍රසූතියේදී දරුවාට ද බලපෑම් ඇති කළ හැකිසේම මෙම දිලීර ආසාදන මවගෙන් තම සැමියාටද බෝවිය හැකි හෙයිනි. ඖෂධ ප‍්‍රතිකාර ලබාදුන්නේ නම් එය නියමිත පරිදි නියමිත කාල සීමාවටම භාවිත කළ යුතුයි.

සාමාන්‍ය යෝනි ස‍්‍රාව අවර්ණ වූ සුදු පැහැයක් ගන්නා අතර අසාමාන්‍ය ගන්ධයක් රහිතයි. එසේ නොවී පැහැය වෙනස් වී, ගන්ධයකින්ද යුක්ත නම් එය අසාමාන්‍ය තත්ත්වයක් හෙයින් වෛද්‍ය උපදෙස් සඳහා යොමු වීමට තරයේ සිතට ගන්න. ආසාදන තත්ත්වයක් ඇති සෑම විටකම ප‍්‍රතිකාර අවශ්‍ය වනවා සේම එය බෝවීම වළක්වාලීමට ලිංගික කාර්යයන්වලදී කොපු (කොන්ඩම්) පාවිච්චි කිරීමද වැදගත් වේ. ආසාදන තත්ත්වවලට ප‍්‍රතිකාර නොකළහොත් ඒවා දිගටම පැවතීමෙන් අනෙකුත් ඉන්ද්‍රියයන්වලට හානිකර තත්ත්ව ඇතිවිය හැකි බව අප සිතට ගත යුතුයි.

අයිරාංගනී ගගලමුව
පවුල් සෞඛ්‍ය සේවා නිළධාරිනි
සෞඛ්‍ය වෛද්‍ය නිළධාරී කාර්යාලය
බුලත්සිංහල

 

LEAVE A REPLY

SUBSCRIBE කරන්න ⇢

165,796FansLike
12,900SubscribersSubscribe
- Advertisement -
- Advertisement -

More article