- Advertisement -

දරුවා නිර්මාණශීලී වීමට දෙමව්පිය දායකත්වය අවශ්‍යයි

-

දරුවෙක් නිර්මාණශීලියි කියන්නේ ඔවුන්ට චිත්‍ර , නැටුම්, සංගීතය ඉගෙන ගැනීමට දක්වන හැකියාව පමණක් නොවෙයි. ජීවිතයේ තමන් ඉදිරියේ ඇති වෙන ගැටළු ඒ ඒ අවස්ථාවන්ට ගැලපෙන විදිහට තෝරා බේරා ගෙන විසඳා ගැනීමේ හැකියාව තිබෙනවා නම් ඇත්තටම එය නිර්මාණශීලියි. මේ නිර්මාණශීලීත්වය ගොඩ නගා ගන්නේ කොහොමද…?

නිදහසේ තීරණ ගන්න දරුවාට අවස්ථාව දෙන්න

දෙමව්පියන් හිතන්නේ දරුවන්ට තීන්දු තීරණ ගැනීමට හැකියාවක් නැහැ කියල වුනත් ඔවුන්ගේ තීන්දු ගැනත් යම් මැදිහත් සිතකින් බලන්න. සෘජුවම මේවා අපිට ඕන විදිහට කියනවාට වඩා දරුවාගෙනුත් ඒ ගැන විමසලා ඔවුන්ගේ අදහස් සමග ගලපා බලන්න. එය ක්‍රියාත්මක කිරීමට අපහසු නම් ඒ අපහසුතාවයන් ඔවුන්ට පහදා දෙන්න. යම් ලෙසකින් එහි නොහැකියාවක්ම ඇත්නම් තවත් විකල්ප ගැන දරුවාගෙන් විමසා සිටින්න. ඒ විදිහට දරුවාත් සම්බන්ධ කර ගෙන තීරණ ගැනීමට ගන්නා උත්සාහය නිසා ඔවුන්ගේ මනසේ යම් යම් නිර්මණාත්මක සිතුවිලි ගොඩ නැගෙන අතර එය දරුවාගේ නිර්මාණශීලීත්වයට බෙහෙවින් බලපානවා. ඒ නිසා පවුලේ තීන්දු තීරණත් ඉතාම නිර්මාණශීලී වේවි.

දරුවා ස්වාධීන චරිතයක් බව සිතන්න

- Advertisement -

අපි නිතරම හිතන්නේ දරුවන් ගේ කාර්යන් වෙනුවෙන් අපේ සම්මාදම අනිවාර්යෙන්ම තිබිය යුතයි කියලා. ඒ අදහස වැරැදියි. දරුවන් යම් කාර්යක නිරත විට ඒ මැදට පැන ඔබගේ උපදෙස් අනුව කටයුතු කිරීමට විධාන කරනවාට වඩා ඔවුන්ට ඒ කටයුත්ත නිදහසේ කිරීමට ඉඩ දෙන්න. යම් වැරැද්දක් වූ තැනදී  පමණක් මේ දෙය සිද්ධ වුනේ මෙන්න මේ වැරැද්ද නිසා බව පහදා දෙන්න.

නිර්මාණයක් කිරීමේදී අගය කරන්න

දරුවා යම් නිර්මාණයක් කළ විට එය අගය කරන්න. හැකි විටෙක තැග්ගක් ලබා දීමත් සිදු වුනත් හැම අවස්ථාකදීම තෑග්ගක් ලබා දීම සිදු විය යුතු නැහැ. ඒ හැම  අවස්ථාවකදීම තෑග්ගක් ලබා දීමට උනන්දු වෙන්න එපා. එසේ වුනොත් දරුවා තෑග්ගක් නොමැතිව කිසිම නිර්මාණයක් කිරීමට යොමු නොවන තත්වයකට පත් වෙනවා. ඒ නිසා හැම විටම නොව හැකි සහ අවශ්‍ය විටක පමණක් තෑග්ගක් ලබා දෙන්න.

අවශ්‍ය අමුද්‍රව්‍ය ලබා දෙන්න

වයස අවුරුදු නවයක් සහ දොළහක් පමණ වෙන විට දරුවා තම මිතුරන්ගේද ආභාෂය ලබනු ඇත. වටපිටාව හොදින් හදුනා ගනී. මේ නිසා දැන් ඔහුට යමක් නිවරැදිව කළ හැකියි. ඒ නිසා දරුවාගේ නිර්මාණශීලී කටයුතුවලට අවශ්‍ය අමුද්‍රවය ලබා දෙන්නෙත්. අතීතයේ බොහෝ දරුවන් වෙසක් තොරන්, මිහිදු පෙරහැර වැනි කටයුතු ගමේ වැඩිහිටියන්ගේ සහ දානපතිනගේ සහයෝගයෙන් කළත් අද දරුවන්ට එවන් පරිසරයක් නැහැ. ඊට හේතුව ගම හෝ නගරය සමග දරුවන්ගේ සම්බන්ධතාවය බොහෝ දුරස් නිසා වෙනත් අයගේ සහයෝගය දරුවන්ට ලැබෙන්නේ නැහැ.

ඒ නිසා දෙමව්පියන් විදිහට දරුවන්ගේ නිර්මාණ කාර්යන් වෙනුවෙන් අවශ්‍ය දියසායම්, පදම්කල මැටි, ක්ලේ , වර්ණ ආදිය ලබා දීම ඉතාම වැදගත්.ඒ නිසා ඔවුන් විවිධ නිර්මාණ කාර්යන් වෙනුවෙන් යොමු වීමට අවශ්‍ය උත්තේජනය නොදැනීම ලබා ගන්නවා.

ඒ වගේම දරුවාගේ නිර්මාණ ප්‍රදර්ශනය වන සේ තබන්න. මේවා දරුවාගේම නිර්මාණ වීම වැදගත්. ඒ වගේම විවිධ ප්‍රදර්ශන වෙත දරුවා රැගෙන යන්න. කාලවේලාව නැතැයි කියමින් එම අවස්තාවන් අහිමි කිරීම දෙමව්පියන් විසින් ඔබ කරන අකටයුත්තක්. මෙම අවස්ථාවන්ගෙන් දරුවාට විවිධ මුල බීජ උපයා ගත හැකියි.

ඒ වගේම තරඟ ආදිය ඇති විට ඒවාට දරුවන් සහභාගී කරන්න. “අනේ ඕවායෙන් දිනන්න බැහැ…” කියමින් දරුවා අධෛර්යට පත් කරන්න එපා. ළමා පුවත්පත්, රූපවාහිනියේ ඇති වැඩසටහන් නරඹන්න ඉඩ දෙන්න. ඒ පිටුවලට දරුවාගේ නිර්මාණත් යොමු කරන්න.

පූර්වාදර්ශි චරිත ගැන කියාදෙන්න

නිර්මාණශීලීත්වයෙන් අද ඉහලින් වැජඹෙන චරිත ඒ තත්වයට පත් වීම වෙනුවෙන් පැමිණි ගමන්මග ගැනත් දරුවන්ට දැන ගැනීමට අවස්ථාව ලබා දෙන්න.

LEAVE A REPLY

SUBSCRIBE කරන්න ⇢

165,796FansLike
12,900SubscribersSubscribe
- Advertisement -
- Advertisement -

More article