දරුවන් අවතක්සේරු කිරීම වගේම අධිතක්සේරුවෙන් ඇගයීමත් නොකළ යුතුයි

දරුවන් ඉදිරියේ අපේ කතා බහ බොහොම පරිස්සමින් සිදු විය යුතුයි. ”හැදෙන ගහ දෙපෙත්තෙන් පෙනේ” කිව්වත් සමහර අවස්ථාවලදී බාල කාලයේ බොහොම හේ බාලා සිටින දරුවන් වුනත් නොදැනම අළු ගසා දාලා නැගිටිනවා. ඉතින් ඒ වගේ සිද්ධියක් තමයි  මේ…

ටයිටැනික් චිත්‍රපටයේ රෝස්ගේ චරිතය අපේ හදවතේම මවපු ”කේට් වින්ස්ලට්” ඔබට මතකයි නේද…? අද ඇය සිටින තැනත් නැවත කිමට අවශ්‍ය නැහැ. ඒත් ඇය තමාගේ අතීතය නැවත ආවර්ජනය කරමින් පසුගියා දා පැවැති  British Acadamy of Film & television art සම්මාන උත්සවයේදී කළ සඳහන අපේ දෙමව්පියන්ට ඉතාම වැදගත් පාඩමක් කිව්වොත් නිවරැදියි.

”මං ඉස්කෝලෙ යද්දී රංගනයන් කරන වේලාවක මගේ ගුරුතුමිය කිව්ව සඳහනක් මට තවම අමතක නැහැ..කේට්…ඔයාට නම් කවදාවත් ඇක්ට් කරනන් බැහැ. යාන්තමින් හරි ඔයාට ගැලපෙන්නේ මහත චරිතයක් විතරයි…”

ඒත් කේට් එදා ගුරුතුමියගේ කතාවෙන් සැලුණේ නැහැ. ඇය කෙසේ හෝ ඉදිරියටම ගියා. ඒ නිසා අද ඇය සිටින තැන ගැන අපිටත් ආඩම්බරයි.

  • ඒත් මේ වගේ වුණා නම්…

කේට්ගේ හිතේ තිබුන ශක්තිය නිසා ඇය ඉදිරියට ආවා. සමහර විට  ගුරුතුමියගේ අදහසටම එකතු වෙලා ඇය එතැනින් ඉදිරියට නාවා නම්…අද ටයිටැනික් චිත්‍රපටයේ රෝස්ගේ චරිතය මවන්නේ ඇය නොවන්න තිබුණා.

දරුවන්ගේ හයියත් එක් එක් දරුවාට වෙනස්. ඊටත් ගුරුතුමියක් කියන දේ දරුවන්ට බොහොම හොඳින් ගැලපෙන්නේ දරුවාගේ ලෝකයේ සිටින දැවැන්ත චරිතයක් විදිහට ගුරුතුමා ජීවත් වෙන නිසයි. ඒ නිසා ගුරුතුමිය එහෙම කිව්වාම සමහර විට එතැනින් ඉදිරියට නොයන දරුවන් ඉන්නත් පුළුවනි.

ඉතින් මේ සිදුවීම අපේ දෙමව්පියන්ටත් ඉතාම වැදගත්. සමහර අම්මලා තාත්තලා දරුවන්ටත් ඔය විදිහට කියන වෙලාවල් තියෙනවා. වෙලාවකට ඒ අය මේ වගේ දේවල් කියන්නේ හිතින් නොවන්නත් පුළුවනි. නමුත් දරුවාගේ මනසට ඇති වෙන සංකල්පය අනුව ඔහු එතැනින් ඉදිරියට යන්නේ නැහැ.

ඒ නිසා මේ වගේ ප්‍රකාශ කිරීමේදී බොහොම පරිස්සම් විය යුතුයි. දරුවෙකුගේ හිතේ තමන් ගැන විශ්වාසයක් නොමැති විට ඔවුන්ට ඉදිරියට යෑමට තිබෙන හැකියාව නොදැනීම නැති වෙනවා. ඒ වගේම අපිට බාල කාලයේදීම දරුවන් ගැන ඒ විදිහට තක්සේරු කරන්න බැහැ. ඇතැම් දරුවන් පුංචි කාලයේදී විශිෂ්ට විදිහට හැකියාවන් පෙන්නුම් කළත් අනාගතයේදී ඒ තරමටම පැහැදිලි හැකියාවන් පෙන්නුම් නොකරන්න පුළුවනි. තවත් පිරිසක් බාල කාලයේදී දුර්වල චරිත වුනත් ඔවුන් පසුකාලයකදී කැපී පෙනෙන චරිත බවට පත් වීමට පුළුවන්.

ඒ නිසා කිසිම අවස්ථාවක දරුවන් වෙනුවෙන් පූර්ව විනිශ්චයන් ලබා නොදෙන්න. ඒ වගේම මේ විනිශ්චයන් කිසිම දිනක සෘනාත්මක නොවිය යුතුයි.

  • දක්ෂ දරුවෙකු වුනත් පමණට වඩා තක්සේරු කිරීමත් ඒ තරම් හොද නැහැ.

”ඔව්…ඔබට පුළුවනි.. ඒත් ඉදිරියේදී තිබෙන්නේ තරගයක්…” ඔබ තරගය ඉදිරියේදී උනන්දු නොවුනොත් සමහර විට හාවා රේස් එකෙන් පැරදුණා වගේ වෙන්නත් ඉඩ තිබෙන බැව් කියා දෙන්න. සමහර දෙමව්පියන් තමාගේ දරුවා පංතියේ ඉදිරියෙන් සිටියොත් ඒ ගැන තබන තක්සේරුවෙන්ම දරුවාගේ හිතටත් ඇති කරන්නේ අධිතක්සේරුවක්. ඒ වුනත් මේ පුංචි වපසරියෙන් ඔබ්බට අධ්‍යාපනය වෙනුවෙන් තිබෙන්නේ  දැඩි තරගයක් බව ඒත්තු යන සේ කටයුතු කරන්න.

එහෙනම්…දෙමව්පියන් විදිහට ඔබ දරුවාට ”බැහැ” යන ආකල්පය හිතේ වගා කරල ඔවුන් බිඳ වැටීම නොකළ යුතු සේම, අනවශ්‍ය විදිහට අධි තක්සේරුවක් මවමින් දරුවාගේ අභියෝග වෙනුවෙන් හැකියාවන් මන්දගාමී කිරීමත් නොකළ යුතුයි.

හිතට එන අදහසක් පත්තරයකින් පළ වුනාම ලැබෙන සතුට දන්නේ ඒ අත්දැකීම ලබන කෙනෙක් පමනයි. මේ නිසාම දන්නා කාලයේ පටන්ම ලියන්න ලැබෙන හැම මොහොතකම යමක් ලිව්වා. ඒවා පළ වුනා.දැනට මහවැලි ජාතික අධ්‍යාපන විද්‍යා පීඨයේ පුස්තකාලයාධිපතිනිය ලෙස සේවය කරන අතර ලේඛනය අමතක කරන්නේ නැහැ.කැළනිය විශ්ව විද්‍යාලයේ ශාස්ත්‍රපති උපාධිය සහ පේරාදෙණිය විශ්ව විද්‍යාලයේ කලා උපාධිය වෙනුවෙන් කිසිම අපහසුතාවයක් ඇති නොවුනේද ලිවීමේ කලාවට පිං සිදු වෙන්නයි.නිවස , රැකියාව සහ පවුල සමග වූ ගණුදෙණුව ලිවීමේ කලාවට හරස් නොවන සේ පවත්වා ගෙන යන අතර මගේ ජීවිතයට ලේඛනයත් නොදැනම බද්ධව තිබෙනවා විය හැකියි.

LEAVE A REPLY

Please enter your comment!
Please enter your name here