ලොකු පොඩි කවුරුත් ආස කරන , තිබහට කන්න කියාපු පළතුරක් තමයි පැණි කොමඩු කියන්නේ. ඒ වගේම මේක ලංකාවේ සුලභ පළතුරක්..නමුත් සමහර අම්මලා එච්චර සැලකිල්ලක් නොදක්වන පළතුරක් කියල කියන්නත් පුලුවන්. සමහරු මේවා බබාට සීතලයි කියමින් නොදී ඉන්න පෙළඹෙනවා. බලන්න, එවන් අම්මලා කොච්චර ගුණ සහ වටින පළතුරක් ද මේ අත් හරින්නේ කියල මේ ලිපිය කියවල ඉවර වුනාම ඔයාලට තේරෙයි.
සමහර අය තවමත් විශ්වාස කරන්නේ කොමඩු කියන්නේ වතුර හා සීනි මිශ්‍රණයක් කියලයි. නමුත් කොමඩු ඔබ සිතනවාට වඩා වඩා සෞඛ්‍ය සම්පන්න, විටමින් වර්ග, ඛණිජ ලවණ, ප්‍රථිඔක්සිකාරක බහුල පළතුරක්. කොමඩු වල වැඩි වශයෙන් තියෙන්නේ විටමින් ඒ, සී සහ කැල්සියම්. බීටා කැරොටින් වලින් පිරුණු, කොමඩු ළදරුවන්ගේ ප්‍රියතම ආහාර වලින් එකක් බවට පත්ව තිබෙන බව මේවා දෙන අම්මලා මේ වෙනකොටත් හඳුනාගෙන ඇති. අපේ ඇස්, හෘදය හා සමස්ත ප්‍රතිශක්තිකරණ පද්ධතිය සඳහාම හොඳ මේ පළතුර හෙඹිරිස්සාව, කැස්ස, උණ වගේ අසනීප හැදුනු දව්ස්වලට බබාට දෙනවනම් හොදයි කියල මම අත්දැකීමෙන් දන්න දෙයක්. ඒ විටමින් C හා ඔක්සිහාරක කොමඩු වල අඩංගු නිසයි. මම කියන නිසා ඔබ පිළිගන්න අවශ්‍ය නැහැ. ඔබට මේ පිළිඹඳව ඔබේ වෛද්‍යවරයාගෙන් අසා දැන ගන්න පුලුවන්. මෙය සුදුසු නම් ඔවුන් නිර්දේශ කරාවි. මම බෙදා ගන්නේ මගේ අත්දැකීම් නිසා මෙය මගේ දරුවන් සුවපත් කරන පළතුරක් ලෙස මම හඳුන්වා දෙන්න කැමතියි.
කොමඩු සාමාන්‍යයෙන් බබාලට හදුන්වා දෙන්න කියන්නේ මාස 8 සිට ඉහලටයි. සමහර බබාලට කොමඩු වල තියෙන ආම්ලිකතාවය නිසා ආසාත්මිකතා අතිවීමට ඉඩ කඩ ඇති නිසයි එහෙම කියල තියෙන්නේ. නමුත් සමහර අම්මලා මාස 6 සිට කොමඩු දෙන අවස්තා තියෙනවා. කොහොම වුනත් කොමඩු මුල් වරට හඳුන්වා දෙද්දී දරුවාව හොදින් නිරීක්ශණය කරන එක වැදගත්.
දැන් මම කියන්නම් කොමඩු බබාලට කෑමට හදල දෙන්න පුලුවන් ක්‍රම කීපයක්. මේවා දැනටමත් හදල දෙන අම්මලා ඉන්නවනම් ඔයාලගෙ අදහසුත් අපිත් එක්ක බෙදා ගන්න කියලා ඉල්ලනවා.
කොමඩු දෙන්න පුලුවන් මූලික ක්‍රම 2යි.
- කොමඩු යුශ
- පොඩියට කපා ගත් කොමඩු කෑලි
කොමඩු යුශ කෙලින්ම කොමඩු කෑලි පොඩි කරල අරගන්න පුලුවන්. ඇට ඉවත් කර බ්ලෙන්ඩ් කරන්නත් පුලුවන්. ඒ වගේම කොමඩු පොඩි බබාලට අතින් අල්ලගෙන පහසුවෙන් කන්න පුලුවන් දෙයක්. ඒ නිස චූටි කොටු වගේ කෑලි කපල බබාට අල්ලගෙන කන්න පුරුදු කරන්න. මතක තියාගන්න, අම්මලා ලඟින්ම ඉන්න ඕන මේ වෙලාවෙදි.
කොමඩු දෙන්න පුලුවන් වෙනත් අලුත් ක්‍රම :-
මේවා නම් ඕන තරම් මට කියන්න පුලුවන්. නමුත් සරලව පහත ආකාරයට මම සඳහන් කරන්නම් ඔයාලට ටිකක් හිතන්න.
- බත් සමග අනා කවන්න පුලුවන්
මගේ බබාගේ බත් එක ගොඩක් තද ගතියක් සහිත නම් මම සාමාන්‍යයෙන් උණු වතුර ටිකක් එකතු කර පදම සාදා ගන්නවා. නමුත් කොමඩු ගෙදර තියෙනවානම් අනිවාර්‍යෙන් කොමඩු යුශ තමයි මේ වැඩේට මම යොදා ගන්නෙ. රසයත් වෙනසක් වෙන නිසා මගේ බබා නම් ආසාවෙන් බත් ටික කනවා. බබා බත් කන්න හොරයි කියන අම්මලට මේක හොඳ ටිප් එකක් වෙයි.
- තවත් පළතුරු එකක් හෝ කීපයක් සමග මිශ්‍ර කර සාදා ගන්නා කෑම ජාති
කොමඩු වල වතුර ගතිය නිසා වෙනත් පළතුරු එක්ක මිශ්‍ර කරාම හොඳයිද කියල හිතන අය ඉන්නවනම් මේක අත් හදා බලන්න කියල මම ඉල්ලා සිටිනවා. කෙසෙල්, අඹ, අලිගැටපේර වගේ පළතුරු එකක් හෝ කීපයක් එක්ක කොමඩු එක් කලාම රසම රස පළතුරු ස්නැක් එකක් හදලා ඔයාලගේ බබාට කවන්න පුලුවන් වෙයි.
- කිරි, යෝගට් හෝ මුදවපු කිරි සමග එකතු කර සාදාගන්නා කෑම ජාති
මේ දේවල් එක්ක කොමඩු එකතු කලාම රසම රස පුරී (තලපයක්) එකක් හෝ ස්මූතී බීම එකක් හදා ගන්න පුලුවන්. ඒක අපි හිතනවට වඩා ගොඩක් රසවත්. මගේ ඤාති සොහොයුරියකුත් කොමඩු සහ රසකල උකු කිරි (condensed milk ) සමග රසම රස බීම එකක් හදනවා..ඒ නම් ලොකු බබාලට..
- මස් සහ මාලු සමග මිශ්‍ර කර සාදාගන්නා කෑම ජාති
තම්බගත්ත මස් මාලු එක්ක කොමඩු එකතු කලාම රසවත් කෑමක් බබාට හදා ගන්න පුලුවන්. ඒ ආහාරයට යෝගට්, මුදවපු කිරි එකතු කලාම තවත් රසයි.
- පොප්සිකල් / අයිස් පැකට්
මේ නම් අපේ අයිස් ක්‍ර්‍රිම් කන්න පුලුවන් වයසේ බබාලට කදිම ක්‍රමයක්. අයිස් පැකට් සහ පොප්සිකල් ඉතා පහසුවෙන් ගෙදර හදා ගන්න පුලුවන්.
ඉහත කිවූ ආහාර ජාති කීපයක්ම මම හදල පෙන්වපු වීඩියෝ දෙකක ලින්ක්ස් දෙකක් පහත දක්වා තිබෙනවා. ඔයාලත් ඒවා බලලා අදහසක් අරගෙන බබාලට රසට කෑම හදල දෙයි කියල මම හිතනවා. මේ ලින්ක් වලින් ක්‍රම 7ක් ඔයාලට බලා ගන්න පුලුවන්.
පැණි කොමඩු වලින් බබාට කෑම – Part 1
පැණි කොමඩු වලින් බබාට කෑම – Part 2
තවත් පොඩි දෙයක් සදහන් කරන්නම්. කොමඩු කපද්දී එහි පිට පොත්ත ඉවත් කරන විට ඇතුලේ ඇති සුදු පැහැති මද කොටසත් සමගම ඉවත් කරන්න එපා. සුදු මද කොටසේත් වැඩි විශේශ ගුණ අන්තර්ගත නිසා ඒ කොටසත් රතු පාට මදය සමගම එකතු කර ගන්න උත්සහ කරන්න.
බබාට කෑම හදලා ඉතිරිවුන කොමඩු වල මාංශමය කොටස හොදින් වැසෙන සේ ආවරණය කර ශීතකරණයේ තැබීමෙන් වැඩි කලක් කොමඩු කල් තබා ගන්නත් පුලුවන්.
මේ ලිපිය සම්භන්ධයෙන් ඔයාලට නැගෙන ප්‍රශ්ණ අපිට දන්වන්න. අපි හැකි පමණින් ඔබට නිවැරදි තොරතුරු සපයා දෙන්න උත්සහ කරන්නම්. නැවත ඔබ සැම ඉක්මනින්ම මුණ ගැසීමට බලාපොරොත්තුවෙන් මේ ලිපිය අවසන් කරන්නම්.
