පසුගිය දින කිහිපයේ රට තුළ උද්ගත වූ තත්ත්වය මත එක් එක් පාර්ශවයන් එක් එක් අදහස් දරන්නටත් ඒ අදහස් ගැටුම් ඇති කරගැනීම දක්වා දුර දිග ගෙන යන්නටත් පෙළඹුණු ආකාරය ඔබ දකින්න ඇති. තත්ත්වය කෙසේ වුවත් අනාගතයේ අපේ දරුවන්ට සාමකාමී රටක් නම් අත්‍යවශ්‍යමය. ඒ නිසාම රටේ අනාගතය වන අපේ දරුවන්ගේ මානසිකත්වය යහපත් කිරීමට අද සිටම දෙමාපියන් වශයෙන් අපි ක්‍රියාත්මක විය යුතුමයි . ඒ වෙනුවෙන් අපේ වගකීම වන්නේ අන්තවාදී, දැඩි මතධාරී අදහස් දරැවන්ගෙන් බැහැර කිරීමයි. අන්තවාදී, දැඩි මතධාරී අදහස් දරුවන් තුළින් ඉවත් කිරීම/අවම මෙහිදී වැඩිහිටි අපේ පළමු රාජකාරියයි.
මොකද්ද මේ අන්තවාදය කියන්නේ
පුද්ගලයෙකු හෝ කණ්ඩායමක්, වෙනත් කණ්ඩායමක් පහත් කරමින්, ඔවුන්ගේ මත ප්‍රතික්ෂේප කරමින් ප්‍රචණ්ඩකාරී හෝ අර්බුදකාරී තත්ත්ව ඇති කිරීම හෝ එයට උත්සාහ කිරීම තමයි අන්තවාදය කියන්නේ.
අන්තවාදී මනෝභාවය ඇති වන්නේ පියවරෙන් පියවරයි. ඒ පියවර මේ ලෙස දැක්විය හැකියි.
- සමාජ පරිසරය මැන බලමින් තමාගේ ඉගෙනීමට, හැකියාවට සමාජයෙන් ලැබිය යුතු දේ ගැන සිතීම
- අසාධාරණයක් වූවා යන සිතිවිල්ල සමගින් ඊට කළ යුතු දේ සිතීම, අවශ්‍ය දේ සෙවීම
- ක්‍රෝධය ඇති වීම සහ මූලික ප්‍රචණ්ඩකාරී අදහස් ඇති වීම
- ගැඹුරු චින්තනට නැඹුරු වීම සහ හිංසාවට අරමුණක් ගොඩනගා ගැනීම
- අපිට එරෙහිව ඔවුන් යන සංකල්පය සහ ප්‍රචණ්ඩත්වයට සන්දර්භය ලබා ගැනීම
- ත්‍රස්තවාදී ක්‍රියාවට අවතීර්ණ වීම
යොවුන් අන්තවාදී දැඩි මතධාරී පුද්ගලයින් වර්ග
- අනන්‍යතාවය සොයාන්නා
එනම් ස්වඅභිමානය දුර්වල නිසා කණ්ඩායමක අනන්‍යතාවය ආරෝපණය කරගන්න පුද්ගලයන්ය.
- සාධාරණය (වැරදි) සොයාන්නා
එනම් තමාට හෝ තම ජන කොටසට ආසාධාරණයක් වූ බව සිතන පුද්ගලයන්ය
- වීරත්වය (අනිසි) සොයාන්නා
එනම් හීනමානය සහ පුද්ගලික ගැටලු නිසා වීරයෙකු වීමට උත්සාහ කරන පුද්ගලයන්ය
- ත්‍රාසය සොයාන්නා
එනම් පුරුෂ අධිපත්‍ය මතින් උද්වේගකාරී සහ වික්‍රමාන්විත ක්‍රියාවලට පෙළඹෙන පුද්ගලයන්ය.
යොවුන් සිතේ අන්තවාදය ඇතිවීම වළක්වා ගන්නේ කොහොමද?
- දරුවන් තුළ ආත්ම – විශ්වාසය ගොඩනඟන්න
තමා පිළිබඳ විශ්වාසය සහ ආත්ම අභිමානය ගොඩනැගෙන ලෙස කටයුතු කළ යුතු අතරම දරුවන්ගේ සුළු ජයග්‍රහණ පවා අගය කරමින් දිරිමත් කළ යුතුය. පොතක ලිය වුණු දෙයකට එහාගිය සැබැ ලෝකයේ තතු නිදසුන් සමගින් දරුවාගේ හදවතට කා වැදෙන සේ කියා දිය යුතුය.
- විවිධ ජනකොටස් සමඟ සම්බන්ධතාවලට ඉඩ දෙන්න
කුඩා කල සහ යොවුන් වියේ දී වෙනත් ජාතීන් සහ වෙනත් ආගම්වල දරුවන් සමඟ කාලය ගත කිරීමට ලැබීමෙන් අනෙක් විශ්වාස සහ චාරිත්‍ර ගැන දරුවන් තුළ ගෞරවයක් ඇති වේ. ඒ අතරම බහුවාර්ගික පාසැල් පරිසරයක ගුරුවරුන්ගේ අධීක්ෂණය දරුවන්ට හිමි විය යුතු අතරම සමාජය තුළ දරුවා කොන්වීම් වළක්වා ගත යුතුය.
- සැබෑ සමානාත්මතාවය කියාදෙන්න
තමාගේ විශ්වාසය සහ ඇදහිලි නිසා තමන් අනෙක් අයට වඩා උසස් නොවන බවත්, වෙනස් මත දරන්නන් වැරදිකරුවන් නොවන බවත් දරුවාට ඒත්තු ගන්වන්න. දක්ෂතාවය සහ සමාජ තත්ත්වය තීරණය වන්නේ පිරිමි ගැහැනු බව නිසා නොව තම හැකියාව නිසා බවත් සතුන්ට පවා ශාරීරිකව හිරිහැර කිරීම මිනිසත්කමට නුසුදුසු බවත් කියා දිය යුතුය. කිසිදු විටෙක ප්‍රචණ්ඩත්වය අගය කිරීම නොකළ යුත්තක් බව මතකයේ රඳවා ගන්න
- නම්‍යශීලී සිතුවිලි ජනනයට සහය වෙන්න
තමාගේ මතය 100% ක් නිවැරදි කියා සිතුන ද අනෙක් අයගේ අදහස්වලට සවන් දී ඒවා නුවණින් විමසීමට ද දරුවන් හුරු කරවන්න. එසේම දිනෙන් දින ලැබෙන නව දැනුම සමගින් අදහස් වෙනස් වන බව සමාජ අත්දැකීම් යොදා ගනිමින් දරුවාට අවබෝධ කරවන්න. තමුන්ගේත් අනෙක් අයගේත් හැඟීම් පිළිබඳ බුද්ධිය සහ සහකම්පනය ගැන කියාදෙන්න.
ඔබ සැමවිටම
ඔබේ දරුවා කතාබහ කරන අය, කතා බහ කරන දේ, අන්තර්ජාලයෙන් සම්බන්ධ වන දේ පිළිබඳව මනා අවධානයකින් සිටීම දරුවන් මෙවැනි කාලයකදී නොමගට යාම වළක්වා ගැනීමට බොහෝ සෙයින් වැදගත් වනු ඇත. සමාජ විරෝධී අන්තවාදී අදහස් දරණ යොවුන් දරුවන් අවශ්‍යා මනෝ වෛද්‍ය පරීක්ෂණ සහ අවධානම අධ්‍යයනයට යොමු කිරීමට වගබලාගන්න.
විශේෂඥ මතය, අදහස සහ මූලික සටහන:
විශේෂඥ වෛද්‍ය මියුරු චන්ද්‍රදාස
ළමා සහ යොවුන් මනස පිළිබඳ විශේෂඥ වෛද්‍ය – රාගම ශික්ෂණ රෝහල / ජ්‍යෙෂ්ඨ කථිකාචාර්ය – කැලණිය විශ්වවිද්‍යාලය
