පුංචි පැටියාට දෙමව්පියන්ගේ නිදියහන එපා…

පුංචි පැටියා අම්මාගේ කුසයෙන් මෙලොව එලිය දුටු දා පටන්ම මවගේ උකුල විතරක් නොවෙයි, නිදි යහනත් ඇගේ අලුත් කිරි සුවඳ වෙනුවෙන් වෙන් වෙනවා. මේ තත්වය බොහොම සාමාන්‍යයි. ඒ වෙනුවෙන් බලපාන හේතුත් තිබෙනවා.

පුංචි පැටියන් රාත්‍රිය පුරාවට වුනත් අඬන්න ලෑස්තියි. මාසයකට වඩා අඩු ළදරුවෙක් ඔවුන්ට ලබා දෙන කිරි ඕනෑම වෙලාවක බොන්න සූදානම්. ඒ වගේම ළදරු ආමාශයත් ඒ වෙනුවෙන් සූදානම්. මේ වේලාවට අම්මා හිතන්නේ බඩගින්නට අඬනවා කියලා ඇගේ දෙතනෙන් කිරි දීලා දරුවාගේ ඇඬිල්ල පරක් කර ගන්නවා. අන්න ඒ වගේ අවස්ථාවන්ට දරුවා තමාගේම යහනේ සිටිනවා නම් අම්මාට බොහොම පහසුයි.

පෙරදිග සංස්කෘතියේ අම්මා සහ දරුවා අතර පවතින බැඳීම නිසා මේ විදිහට එකම යහන බෙදා ගෙන නිදා ගත්තත් බටහිර රටවල නම් කුඩා කාලයේ පටන්ම දරුවා  වෙන්ව තැබීම සාමාන්‍ය තත්වයක් වුනා. ඒත් දැන් දැන් බටහිර රටවලත් අම්මා දරුවා සමගම නිදි කරවා ගැනීමේ පුරුද්ද ඇති වෙලා තිබෙනවා.  ඇමරිකා එක්සත් ජනපදයේ පවා මේ තත්වය 2000 වසරේ පටන් ඉහළ මට්ටමක පවතින බැව් සඟරාවේ සදහන්ව තිබෙනවා.

යහපත් දේ ලෝකයේ කොතැනක වුනත් ආදේශ කර ගත්තාට වරදක් නැති වුනත් මෑතකදී බොහෝ පර්යේෂකයින්ගේ අදහස වී තිබෙන්නේ දෙමව්පියන් සමග දරුවා එකට තබා ගෙන නිදා ගැනීම එතරම් සුදුසු නැති බවයි. ඒ අන්දමින් ඔවුන් කියා ඇත්තේ හේතු කීපයකුත් ඉදිරිපත් කරමිනුයි.

  • දෙමව්පියන් දුම්පානය හෝ මත්පැන් කරනවා නම්.

.දෙමව්පියන් ඉහත අන්දමේ නුසුදුසු කටයුතු වල යෙදෙනවා නම් එයින් දරුවාට ඇති වෙන අහිතකර ප්‍රතිඵල බොහොමයක් තිබෙනවා. ඒ වගේම මේ අපුල ගඳ දරුවාගේ කිරි සුවදට ගැලපෙන්නේ නැහැ. ඒ නිසා දරුවා සමග එකම යහන බෙදා ගැනීම අනුමත කළ නොහැකි බව මේ පර්යේෂකයින් කියා සිටිනවා.

  • ළදරුවා යට වෙන්න පුලුවන්…

හැබැයි තමන්ගේ දරුවා යහනේ සිටිනවා නම් දෙමව්පියන් බොහොම පරිස්සම්. ඒත් ඇතැම් අවස්ථාවලදී දෙමව්පියන් නොදැනීම දරුවා යට වී මියගිය අවස්ථාවන් පෙර ඉතිහාසයේ තිබෙන නිසා ළදරුවන් සමග නිදා ගැනීම ගැන අනුමත කිරීමට බොහොම දෙනෙක් අකමැතියි.

  • මහන්සිය හෝ ඇතැම් ඖෂධ නිසා මේ තත්වය වුනොත්…

ළදරුවෙක් සමග කාලය ගෙවන දෙමව්පියන් සමහර විට දිවා කාලයේ රැකියාවක නිරත වෙන්නත් පුලුවන්. ඒ වගේම උදෑසනින් අවදි වෙන්නත්  වෙනවා.මහන්සිය සහ නිදිමත එකට එක් වුනාම ඔවුන්ට ඇඳට වැටුනාම තදින් නින්ද යන අවස්ථාවන් තියෙන්නත් පුලුවන්. ඒ වගේ නිදියහනේදී තමන්ගේ ළදරුවා යට වී අනතුරට පත් වුන අවස්ථාවන් ගැනත් පාදක කර ගෙන පර්යේෂකයින් විසින් මේ අදහස ඉදිරිපත් කරනවා.

  • නිදා ගන්නා විට පමණ ඉක්මවා ඇඳුම් අන්දවන්න එපා…

ඔබේ පුංචි පැටියා නිදිකරවන විට අනවශ්‍ය විදිහට ඇදුම් ඇන්දවීමට වඩා සැහැල්ලු ඇදුමක් අන්දවන්න. උණුහුම් කාලයදී ඇදුම් වැඩි වුනොත් දරුවාට එය අපහසුවක්. සීත කාලයදි නම් ඒ තත්වයට ඔරොත්තු දෙන විදිහට ඇඳුම් ඇන්දවීමට අවසරය තිබෙනවා.

  • කොට්ට ඈත් කරන්න…

අපේ අම්මලා දරුවා නිදිකරවලා කොට්ට වට කරනවා. ඊට අමතරව තුරුලු කොට්ටයකුත් තියනවා. ඒත් මේ කොට්ටය ළදරුවාට අහිතිකර විදිහට බලපාන්න පුලුවනි. කොට්ටය මුහුණට තබා ගෙන හිර වුනොත් එය ඉවත් කර ගැනීමේ දැනීම ළදරුවාට නැහැ. ඒ නිසා හුස්ම ගැනීමේ අපහසුතාවයන් ඇති වුනොත් තත්වය බරපතල වෙන්න පුලුවනි. ඒ නිසා නිතරම දරුවා නිදිකරවන විට අනවශ්‍ය රෙදි, කොට්ට එතැනින් ඉවත්ව තබන්න.

හිතට එන අදහසක් පත්තරයකින් පළ වුනාම ලැබෙන සතුට දන්නේ ඒ අත්දැකීම ලබන කෙනෙක් පමනයි. මේ නිසාම දන්නා කාලයේ පටන්ම ලියන්න ලැබෙන හැම මොහොතකම යමක් ලිව්වා. ඒවා පළ වුනා.දැනට මහවැලි ජාතික අධ්‍යාපන විද්‍යා පීඨයේ පුස්තකාලයාධිපතිනිය ලෙස සේවය කරන අතර ලේඛනය අමතක කරන්නේ නැහැ.කැළනිය විශ්ව විද්‍යාලයේ ශාස්ත්‍රපති උපාධිය සහ පේරාදෙණිය විශ්ව විද්‍යාලයේ කලා උපාධිය වෙනුවෙන් කිසිම අපහසුතාවයක් ඇති නොවුනේද ලිවීමේ කලාවට පිං සිදු වෙන්නයි.නිවස , රැකියාව සහ පවුල සමග වූ ගණුදෙණුව ලිවීමේ කලාවට හරස් නොවන සේ පවත්වා ගෙන යන අතර මගේ ජීවිතයට ලේඛනයත් නොදැනම බද්ධව තිබෙනවා විය හැකියි.

LEAVE A REPLY

Please enter your comment!
Please enter your name here