රටට බරක් නැති දරුවෙක්….

දරුවන් කියන්නේ ලෝකයටම ආශිර්වාදයක්.ඒත් සමහර විට රටට බරක් බවට පත් වුන දරුවන්ද නැතුවාම නොවෙයි. අකමැත්තෙන් වුනත් අපේ රටේ පවා බාලාපරාධකරුවන් විදිහට හදුන්වන දරුවන් පිරිසක් සිටිනවා.ඒ විදිහට දරුවන් වර්ග වෙන්නේ ඔවුන් සමාජයට හිරිහැරකාරී විදිහට හැසිරීම සහ පවත්නා විනය නිති රීති වෙනුවෙන් අනුගත නොවන විටයි.ඒත් මේ දරුවන් රටට බරක් නොවන විදිහට බාල කාලයේ පටන්ම හැඩ ගසා ගත්තොත් ඔවුන් අනාගතයේදී රටටම ආශිර්වාදයක් වේවි.එහෙමනම් අපි අපේ දරුවන් රටට බරක් නොවන විදිහට හදා වඩා ගන්නේ කොහොමද….?

තරහ පාලනය කරන්න

අපේ වැඩිහිටියන් වගේම දරුවන් අතරත් තරහ පාලනය කර ගැනීමට අපොහොසත් දරුවන් සිටිනවා. ඔවුන්ගේ මේ හැසිරීම නිසා විවිධ විදිහට සමාජයට හිරිහැර සිදු වෙන්න පුලුවනි. පාසලක වුනත් ඇතැම් දරුවන්ගේ ආවේග පාලනය කර ගැනීමට ඇති නොහැකියාව නිසා විවිධ අන්දමින් ගැටුම් ගොඩ නගා ගන්නවා. තරහ ආවාම තමන් සිටින තැන, කවුද, මොකක්ද යන වග තේරුම් ගන්න බැරි වුනොත් අනාගතයේ විවිධ අන්දමින් සමාජයට හිරිහැරදායක වෙන්න පුලුවනි. ඒ නිසා බාල කාලයේ පටන්ම දරුවන්ට ආවේග පාලනය කිරීමේ ගුනාංගය ගොඩ නැගීම ඉතාම වැදගත්.

අහිමිවීම් වලදී ශක්තිය ගොඩ නගා ගන්න..

අපේ ජීවිතය කවදාවත්ම අපට අවශ්‍ය විදිහට ගොඩ නගා ගන්න බැහැ. අට ලෝ දහම අපට විවිධ විදිහට බලපෑම් ඇති කරන්න පුලුවන්. ඒ නිසා දරුවන්ටත් යමක් අහිමි වුනාම එතැනින් නැගී සිටින්නට අවශ්‍ය ධෛර්ය ලබා දෙන්න.එහෙම නැති වුනොත් ඔවුන් ජීවිතයේදී ලබන අහිමිවීම් වලදී බොහොම බෙලහීන වීමට වගේම අනාගතය මුලුමනින්ම බිඳ ගැනීමට සිදු වෙනවා. අද කළ යුතු දේ අදම නොකලොත් හෙට දවසට සාර්ථකව මුහුණ දීමට බැහැ. ඒ හින්දා අහිමිවීම් මත තැවෙනවා වෙනුවට ශක්තියෙන් හෙට දවසට සූදානම් වීමේ වැදගත්කම ඔවුන්ට පහදා දෙන්න.

එකඟතාවය ගොඩ නගා ගන්න..

අද දරුවන් බොහෝ සෙයින් හුදෙකලාව සිටින නිසා ඔවුන්ට සමාජයක් නැහැ. ඒත් අතීතයේදී සමූහයක් විදිහට සෙලල්ම් කරද්දී පංචි වුනත් සමාජයක් තිබුනා. එහිදී ක්‍රිඩාව මුල් කර ගෙන ඔවුන් විසින් ගොඩ නගා ගත් එකගතාවයන් පසුකාලයකදී ජීවිතයටත් බොහොම ප්‍රෙයා්ජනවත්  වුනා. අද දරුවන් අතර  විවිධ ගැටුම් ඇති වෙන්නේ යම් දෙයක් වෙනුවෙන් එකඟතාවයක් ගොඩ නගා ගැනීමට නොහැකි වෙනවා. ඒ නිසාම සමාජයේ අය අතර බොහොම අප්‍රසන්න චරිතයක් බවට නොදැනීම පත් වෙනවා. යම් දෙයක් වෙනුවෙන් එකගනොවන නිසා ඇති වෙන ගැටුම් නිසාම නීතියෙන් පවා දඬුවම් ලබන තරමටම තත්වය දරුණු අතට හැරේවි.

තමා ගැන තොරතුරු කියා දෙන්න.

අද ඇතැම් දරුවන් මවගේ නම, පියාගේ නම පවා නොදන්නා තරම් තමාගේ පවුල ගැන තිබෙන දැනුවත්බව අඩුයි. මේ නිසා හදිසියේවත් පාසලේ කටයුත්තකට දුරකථන අංකයවත් දරුවාගෙන් ලබා ගැනීමට අපහසුයි.හැබැයි නොදන්නා අයට මේ තොරතුරු ලබා නොදෙන විදිහටත් දරුවා දැනුවත් කිරීම වැදගත්.ඒ නිසා නොදන්නා අයට නම් තමා ගැන වැඩිමනත් කතා බහ නොකලාට කමක් නැති බවත් දරුවාට කියා දෙන්න.

වගකීම ගැනත් කියා දෙන්න

වගකීමේ සංකල්පය දරුවාට බාල කාලයේ පටන්ම වටහා දිය යුතු සංකල්පයක්. වගකීමකින් තොරව කටයුතු කරන දරුවා අනාගතයේදීත් මේ අන්දමින්ම කටයුතු කරන නිසා සමාජයට ඔහුගෙන් ඇති වෙන්නේ හිරිහැරයක්. ඒ නිසා බාල කාලයේ පටන්ම වගකීම ගැන දරුවාට කියා දෙන්න.

අනුන් මත වරද පවරන්න එපා

අද බොහෝ වැඩිහිටියන් පවා තමාගේ වරද පිලි නොගන්නා තරමටම දුර්වලයි. වරදක් වුනොත් එය නොපැකිලව පිළිගැනීම මහත්මා ගතියක්. එය වෙනත් අයට යොමු කිරීම එතරම් වටිනා ගුණයක් නොවෙයි.ඒ නිසා පුංචිකාලයේ පටන්ම තමන්ගෙන් වරදක් වුනොත් ඒ වරද තමාගෙන් වුන බව පිලිගැනම නින්දාවට කරුණක් නොවන ව දරුවාට කියා දෙන්න. සමහර විට ඔබේ කුඩාදරුවා නිවසේදී ඔහු අතින් සිදු වුන වරද පවා බාල හෝ වැඩිමහල් සහෝදරයන්ට පවරන අවස්ථා තිබෙන්න පුලුවනි. එවන් අවස්ථාවලදී තමන්ගෙන් වුන වරද අනුන්ට පවරනවාට වඩා එය තමා විසින් බාරගැනීම හොද දරුවාගේ හොඳ ගතිගුණයක් බැව් පෙන්වා දෙන්න.

අද ඔබේ සෙවනේ බොහොම කෙලි දෙලෙන් කාලය ගෙවුවත් හෙට මේ පුංචි දරුවා සමාජය සමග ගණුදෙනු කළ යුතුමයි. එවිට පිටුපසින් සිට මේ ම් අන්දමින් හැසිරෙන්න යැයි පෙන්වා දීමට කිසිවෙක් නැහැ. ඒ වගේම දරුවාට හැසිරෙන සම්මත ආකෘතියක් ගොඩ නගන්නත් බැහැ. අවස්ථාවෝචිතව ඔවුන් හැසිරිය යුතුයි. ඒත් ඒ හැසිරීම කිසිම දවසක සමාජයට බරක් නොවන විදිහට ගොඩ නැගී තිබුනොත් දෙමව්පියන් විදිහට ඔබ දිණුම්.

හිතට එන අදහසක් පත්තරයකින් පළ වුනාම ලැබෙන සතුට දන්නේ ඒ අත්දැකීම ලබන කෙනෙක් පමනයි. මේ නිසාම දන්නා කාලයේ පටන්ම ලියන්න ලැබෙන හැම මොහොතකම යමක් ලිව්වා. ඒවා පළ වුනා.දැනට මහවැලි ජාතික අධ්‍යාපන විද්‍යා පීඨයේ පුස්තකාලයාධිපතිනිය ලෙස සේවය කරන අතර ලේඛනය අමතක කරන්නේ නැහැ.කැළනිය විශ්ව විද්‍යාලයේ ශාස්ත්‍රපති උපාධිය සහ පේරාදෙණිය විශ්ව විද්‍යාලයේ කලා උපාධිය වෙනුවෙන් කිසිම අපහසුතාවයක් ඇති නොවුනේද ලිවීමේ කලාවට පිං සිදු වෙන්නයි.නිවස , රැකියාව සහ පවුල සමග වූ ගණුදෙණුව ලිවීමේ කලාවට හරස් නොවන සේ පවත්වා ගෙන යන අතර මගේ ජීවිතයට ලේඛනයත් නොදැනම බද්ධව තිබෙනවා විය හැකියි.

LEAVE A REPLY

Please enter your comment!
Please enter your name here