පැණි බීම වල වර්ණ සංකේත (Traffic Light) ගැන මේ දේවල් ඔබ දන්නවාද?

පැණි බීම වල වර්ණ සංකේත (Traffic Light) ගැන මේ දේවල් ඔබ දන්නවාද?

මග තොටට ගිය හැම විටකදීම අම්මලා තාත්තලා සහ දරුවන් අතර අරගලය ඇති වෙන්නේ සීනි සහිත පැනි බීම වෙනුවෙන් බව අපි අත්දැකීමෙන්ම දන්නවා.ඒ වුනත් සීනි සහිත බීම වර්ග (පලතුරු යුෂ සහ සිසිල් බීම ද ඇතුළු පැණි බීම) පානය කිරීම පිළිකා අවදානම ඉහළ දැමීමට හේතුවක් විය හැකි බව ප්‍රංශ විද්‍යාඥ කණ්ඩායමක් පවසති.

ඒ විතරක් නොවෙයි, කිරීටක ධමනී ආහ්‍රිත රෝග, වකුගඩු ගල් සහ ආශ්‍රිත රෝග ඔස්ටියෝපොරෝසිස්,ප්‍රජනන ආබාධ වැනි අතුරු සංකුලතාවයන් බොහොමයක් වෙනුවෙන් පැණි බීම පානය බලපානවා.

පැණි බීමක් යනු කුමක් ද?

සීනි සාන්ද්‍රණය 5% කට වඩා වැඩි නම් එය පැණි බීමක් හෝ සීනි සහිත පානයක් (sugary drinks) ලෙස හඳුන්වන්න පුලුවනි. ඒ අනුව ඔන්න මේ සියල්ලම පැණි බීම ලැයිස්තුවට ඇතුලත් වෙනවා..

  • පළතුරු යුෂ,
  • සිසිල් බීම
  • රස කාරක යෙදූ කිරි
  • ශක්ති ජනක පාන
  • සීනි අඩංගු කළ තේ හෝ කෝපි
  • සීනි මිශ්‍ර නොකළ (no added sugar) පලතුරු බීම ද මීට ඇතුළත්ය.

පැණි බීම සහ එහි අතුරු ප්‍රතිඵල අලලා සිදු කරන ලද මෙම අධ්‍යනයට ලක්ෂයකට අධික පිරිසක් යොදා ගත්තා. පර්යේෂණය මෙහෙය වූ සෝබෝන් විශ්වවිද්‍යාලයට අනුබද්ධ පැරිස්හි උසස් අධ්‍යාපන හා පර්යේෂණ ආයතනයේ විද්‍යාඥයින් විසින්  වසර පහක් පුරා සිදුකළ අධ්‍යයනයක ප්‍රතිඵල මත මෙම නිගමනයට පැමිණ ඇති අතර එම අධ්‍යයනය බ්‍රිතාන්‍ය වෛද්‍ය සඟරාවේ ද (British Medical Journal) පළකර තිබුණා. පර්යේෂණයට යොදා ගත් සමස්ත පිරිස අනුපාතයක් ලෙස ගත් කල සෑම පුද්ගලයන් 1000ක් අතරින් විසි දෙදෙනෙකු (22) පිළිකා තත්ත්වයක් පෙන්නුම් කර තිබුණා..මේ අධ්‍යයනය අතරතුර වාර්තා වූ පිළිකා රෝගීන් අතරින් 693 දෙනෙකුට පියයුරු පිළිකාවත් 291 දෙනෙකුට පුරස්ථි ග්‍රන්ථි ආශ්‍රිත පිළිකා සහ 166 දෙනෙකුට මහා බඩවැල ආශ්‍රිත පිළිකා වැළඳී තිබුණා..

දිනකට අවශ්‍ය ප්‍රමාණය ඉක්මවා, පැණි බීම මිලි ලීටර් 100 ක් අමතරව පානය කිරීම තුළින් පිළිකා වැළඳීමේ අවදානම 18% කින් ඉහළ යා හැකි බව මෙම පර්යේෂණයේ නිගමනය වී තිබේ. සතියකට සිසිල් බීම කෑන් දෙකක් පානය කිරීමෙන් මෙම අවදානමට ගොදුරු විය හැක.

පර්යේෂකයන් පවසන්නේ සමස්ත පිරිස ම දිනකට අවශ්‍ය ප්‍රමාණය ඉක්මවා අමතරව මිලි ලීටර 100ක් පැණි බීම පානය කළේ නම් වසර පහක් තුළ තවත් හතර දෙනෙකුට පිළිකා තත්ත්වයක් ඇති වීමට ඉඩ ඇති බවය. ඒ අනුව මෙම අනුපාතය දහසකට 26 දෙනෙකු දක්වා ඉහළ යාමට ඉඩ ඇති බව ඔවුහු පවසති.

“සීනි සහිත බීම සහ පිළිකා අතර පැහැදිලි සම්බන්ධයක් පවතින බවට මේ අනුව අනුමාන කළ හැකි නමුත් එය සහතික කිරීම සඳහා තවදුරටත් පර්යේෂණ සිදුකිරීමට අවශ්‍යයි,” එක්සත් රාජධානියේ පිළිකා අධ්‍යයන ආයතනයේ දත්ත පිළිබඳ ජ්‍යෙෂ්ඨ නිලධාරියෙකු වන වෛද්‍ය ග්‍රැහැම් වීලර් පවසයි.

ශ්‍රී ලංකාවේ සිසිල් බීම සඳහා වර්ණ සංකේත හෙවත් Trafic- light

1980 අංක 26 දරන ආහාර පනත යටතේ නිකුත් කළ ආහාර ශ්‍රේණි මට්ටම් සදහා වන වර්ණ සංකේතවත් කිරීමේ ක්‍රියාවලියක් හඳුන්වා දීමට සෞඛ්‍ය අමාත්‍යාංශය විසින් 2016 වසරේදී පියවර ගනු ලැබීය.

ඒ අනුව ආහාර පාලන පනතේ විධිවිධාන යටතේ සෑම බීම වර්ගයක ම මිලිලීටර් 100 ක් සදහා ග්‍රෑම් 11 කට වැඩි වැඩි ඉහළ සීනි මට්ටමක් අඩංගු නම් රතු වර්ණයෙන් වර්ණ ගැන්වීම.

ග්‍රෑම් 02 සිට ග්‍රෑම් 11 දක්වා මධ්‍යම සීනි මට්ටමක් අඩංගු නම් කහ වර්ණයෙන් ද, ග්‍රෑම් 02 කට වඩා අඩු සීනි මට්ටමක් අඩංගු කොළ වර්ණයෙන් වර්ණ ගැන්වීම.

මෙසේ වර්ණ සංකේතවත් කිරිම මගින් මහ ජනතාවට බීමවල සීනි මට්ටම් නිරීක්ෂණය කළ හැකි අතර, ඒ අනුව සුදුසු බීම වර්ග තෝරා ගත හැකිය.

එමගින් බෝ නොවන රෝග පාලනය කර ගැනීම සෞඛ්‍ය අමාත්‍යාංශයේ අරමුණ විය .

[මහනුවර දිස්ත්‍රික් රෝහලේ බෝනොවන රෝග අංශයේ දැන්වීම් පත්‍රිකාවක් සහ බීබීසී පුවත් ඇසුරිනි]

*පුන්‍යා චාන්දනී ද සිල්වා*

Previous article අපේ අම්මලා දියවැඩියාවෙන් මිදෙන්න
Next article ඔබ තෝරාගත් ඩයපර් පෑන්ට් වර්ගය නිසා ඔබේ පැටියා අපහසුවෙන්ද?
හිතට එන අදහසක් පත්තරයකින් පළ වුනාම ලැබෙන සතුට දන්නේ ඒ අත්දැකීම ලබන කෙනෙක් පමනයි. මේ නිසාම දන්නා කාලයේ පටන්ම ලියන්න ලැබෙන හැම මොහොතකම යමක් ලිව්වා. ඒවා පළ වුනා.දැනට මහවැලි ජාතික අධ්‍යාපන විද්‍යා පීඨයේ පුස්තකාලයාධිපතිනිය ලෙස සේවය කරන අතර ලේඛනය අමතක කරන්නේ නැහැ.කැළනිය විශ්ව විද්‍යාලයේ ශාස්ත්‍රපති උපාධිය සහ පේරාදෙණිය විශ්ව විද්‍යාලයේ කලා උපාධිය වෙනුවෙන් කිසිම අපහසුතාවයක් ඇති නොවුනේද ලිවීමේ කලාවට පිං සිදු වෙන්නයි.නිවස , රැකියාව සහ පවුල සමග වූ ගණුදෙණුව ලිවීමේ කලාවට හරස් නොවන සේ පවත්වා ගෙන යන අතර මගේ ජීවිතයට ලේඛනයත් නොදැනම බද්ධව තිබෙනවා විය හැකියි.

LEAVE A REPLY

Please enter your comment!
Please enter your name here