දරුවන්ට පාසල් කාලයෙන් පසුව නිවසේදී ඔවුන්ගේ අධ්‍යාපනයේ අවශ්‍යතාවයන් වෙනුවෙන් ලබා දෙන ‘‘ හෝම් වර්ක් “ ගැන අද ලෝකය පුරා විවිධ කතිකාවත් ගොඩ නැගී තිබෙනවා. පින්ලන්තය වැනි රටවල් විසින් හෝම්වර්ක් ලබා දීම තර ප්‍රතික්ෂෙප කරද්දී දරුවන් වෙනුවෙන් හෝම්වර්ක් ලබා දීම තවමත් තරයේම තහනම් වී නැහැ. ඒ නිසා හෝම්වර්ක් ලබා දීම තවම පර්යේෂණ මට්ටමේ සිදු වෙනවා.
මේ අතර පසුගිය දා එංගලන්තයේ වෙස්ට්මිනිස්ටර් විශ්ව විද්‍යාලය මගින් අධ්‍යනයක් සිදු වුණා. එම අධ්‍යනය වෙනුවෙන් ගැහැණු දරුවන් 514 ක් සහ පිරිමි දරුවන් 406 දෙනෙක් සහභාගී වුණා. අධ්‍යනය අවසානයේදී මෙම පර්යේෂකයන් විසින් හදුනා ගත් අන්දමට මෙහි වරද තිබෙන්නේ ‘‘ හෝම්වර්ක් “ ලබා දීම නොව ඒවා කිරීමේදී දරුවන්ට තනිබර දැරීමට සිදු වීමයි.
ඒ අනුව මෙම පර්යේෂකයින් විසින් පෙන්වා දෙන්නේ දරුවන් හෝම්වරක් කරන විට දෙමව්පියන් හෝ පවුලේ වැඩිහිටියෙක් එසේත් නැත්නම් දරුවාගේ වැඩිමහල් සහෝදරයෙකුගේ සහයෝගය ලබා දීම වැදගත් බවයි. ඒ අන්දමින් හෝම්වර්ක් කරන අතරවාරයේදී ලැබෙන සහයෝගය නිසා ලැබෙන වාසි කීපයක් ගැන මේ පර්යේෂණය මගින් පෙන්වා දෙනවා.
සතුට.පුංචි හිතට බොහොම සුලු දෙයකින් සතුට ලැබෙනවා. ඒ ඔවුන්ගේ හිත් අහිංසක නිසයි. හෝම්වර්ක් කරන විට තමා අසල කවුරුන් හෝ සිටිනවා නම් එය දරුවාගේ හිතට සතුුට ගෙන දෙන සිදුවීමක් බැව් මේ පර්යේෂකයින් විසින් පෙන්වා දෙනවා.
ශක්තිය.තමන් හුදෙකලාව හෝම්වර්ක් කරන විට නැති හයියක් කවුරුන් හෝ ඔවුන් අසල සිටියදී ලැබෙන බැව් මේ අධ්‍යනය මගින් පෙන්වා දෙනවා.ඒ තත්වය ඉතින් පොඩ්ඩන්ට විතරක් නොවෙයි සාමාන්‍ය අපි කාටත් පොදු තත්වයක්.
අවබෝධය-දරුවන් හෝම්වර්ක් කරන විට ලැබෙන සහයෝගය නිසා එවුන්ට යම් අවබෝධයකින් මේ කටයුත්ත කිරීමට හැකියාව ලැබෙන බැව් වෙස්ට්මිනිස්ටර් විශ්ව විද්‍යාලය මගින් සිදු කරන ලද අද්‍යනයට අනුව පෙන්වා දෙනවා. එය ඇත්ත. දරුවාට යම් පැවරුමක් ලබා දුන්නොත් මග පෙන්වන අයෙකු ඔවුන් අසල සිටිනවා නම් තමාට පාසලෙන් නියම කරන ලද නිවසේදී සිදු කිරීමට ලබා දුන් පැවරුම යම් අවබෝධයකින් කිරීමේ හැකියාව ලැබෙනවා.
නිවරැදිබව– පුංචි අයට හැම දෙයක් ගැනම ලොකු අවබෝධයක් නැහැ.ඒ නිසා තනිපංගලමේ හෝම්වර්ක් කරද්දී වැරදීම් බොහෝ සේ වෙන්න පුලුවනි. නමුත් තමා අසල වැඩිහියෙක් සිටිනවා නම් ඔවුන්ගේ උදව්ව නිසා වැරදීම් අවම වීමට පුලුවනි. පුංචි අය එකම දේ නැවත නැවත කරන්න අදි මදි කරනවා. ඒ නිසා ඔවුන් කරන කියන දේ ගැන වැඩිහිටියන් අවදානයකින් සිටිනවා නම් බොහොම අගෙයි.
- හැබැයි මේ කියන්නේ දරුවාගේ හෝම්වර්ක් වැඩිහිටියන් කරන්න ඕන කියනවා නොවෙයි…..
සමහර වැඩිහිටියන් තමන්ගේ පහසුවට දරුවන්ට මේ විදිහට කියනවා ඔබටත් ඇහිලා ඇති.මේ ඕක තියන්න..මං කරල දෙන්නම් .ඕක වරද්දා ගන්නවාට වඩා මං කරලා දෙන එක ලේසියි.
ඒත් මෙතැනදී ඔබේ තීරණය වැරදියි. දරුවන්ගේ හෝම්වර්ක් ඔවුන්ට කර ගැනීමට ඉඩ දෙන්න. හැබැයි ඔබ සහයෝගය දෙන්න. මේ ගැන පුංචි උදාහරණයක් කිව්වොත්..ඔබ සරුංගලයක් හදලා එය උඩට නැගුවාට පසුව සරුංගලය නිදහසේ අහසේ සැරිසරනවා. හැබැයි යම් විදිහකින් සරුංගලය පැටලෙන්න ගියොත් ඔබ ඒ තත්වයේදී පැටළුම ඇරලා නැවත නිවරැදි මාර්ගයට ගන්නවා.
දරුවන් ගැනත් මේ සංකල්පය බොහාම සාධාරණයි. ඔබ දරුවාට නිවරැදිව ඔවුන්ගේ හෝම්වර්ක් කර ගැනීමට ඉඩ දෙන්න. ඒත් යම් තැනකදී ඔවුන්ට වරදින බැව් දකින විට නිවරැදි කරන්න..එවිට දරුවා හෝම්වර්ක් කිරීම සමග යම් දැණුවත් වීමක් ලබා ගනු ඇත.ඒ නිසා හෝම්වර්ක් එපා කියන උද්ඝෝෂණය නැගුනත් දරුවාට පාසලෙන් යම් පැවරූ කොටසක් පසුදිනට හෝ අදාල නියමිත දිනට එය අසම්පූර්ණව පාසලට යෑමට නොහැකියි. ඒ වුනත් ඔවුන්ගේ සහයෝගයට ඉදිරිපත් වෙන කෙනෙකු නැත්නම් දරුවා ඉතාම අසරණ වෙනවා. ඒ නිසා හෝම්වර්ක් එපා කියන රැල්ල ලෝකය පුරා නැගුනත් ඔබේ දරුවා හෝම්වර්ක් කරන විටදී ඔවුන් සමීපයේ සිට උදව් ලබා දීම ඉතාම වැදගත්.
පුන්‍යා චාන්දනී ද සිල්වා
