දරුවෙකු වෙනුවෙන් පංචායුධයක් පැළදවීම දරුවා උපන් දිනයේ සිට දින පහක් එසේත් නැත්නම් ඉදුල් කට ගාන දිනයේදී පැළදවීම සාමාන්‍ය සම්ප්‍රදායයි. පංචායුධයක් නිර්මානය කිරීමේදී නියමිත දිගක්, පලලක් හෝ බරක් නොමැති නිසා තම තමන්ගේ හැකි පමනින් බොහෝ විට රත්රන් වලින් මේ ආබරණය සකස් කරනවා.
පංචායුධයේ ඉතිහාසය…
ළදරුවන්ට පළදවන පංචායුධය පිලිබඳව දිගු ඉතිහාසයක් තිබේ. අතීතයේදී ‘‘පංචායුධ “ නැමැති කුමාරයෙක් සිප් සතර හදාරා අවසානයේදී තමන් උපන් රාජ්‍ය වෙත යමින් සිටියේය.ගමන්මග වෙහෙස නිසා කුමරු විශාල ගසක් යටට වී නිදා ගත්තේය.ඒ අවස්ථාවේ ගසට අධිගෘහිතව සිටි යක්ෂයෙක් පැමිණ කුමරු මරා මස් කෑමට සැරසෙත්ම පංචායුධ කුමාරයා යක්ෂයාගෙන් එක් ඉල්ලීමක් කරන්නට අවසර ඉල්ලා සිටියේය.පංචායුධ කුමාරයා යක්ෂයා අමතා මෙසේ කීවේය.
ඔබ මා මරා මස් කෑවාට කමක් නැමැ. නමුත් එක් දෙයක් ඔබට කිව යුතුයි. මගේ සිරුරේ ආයුධ පහක් තිබෙනවා. යම් හෙයකින් ඔබ මා මරා මස් අනුභව කළොත් ඒ ආයුධ පහ එබේ සිරුරේ ඇනී නිසැකයෙන්ම ඔබ මරණයට පත් විය හැකියි. එයින් බියට පත් යක්ෂයා පළා ගියෙන් කුමාරයාගේ ජීවිතයට හානියක් සිදු වුයේ නැත. එතැන් පටන් මේ සිද්ධිය පාදක කර ගෙන ළදරුවන්ගේ ආරක්ෂාව වෙනුවෙන් පංචායුධයක් පැළදවීමේ සම්ප්‍රදාය ඇති වී තිබේ.
පංචායුධයේ සංකේත මොනවාද…?
පංචායුධයක ඇතුගත්ව තිබෙන ආයුධ පහක් තිබෙනවා. ඒ නිසාම සෙය පංචායුධය යනුවෙන් හැදින්වෙනවා. මෙම ආයුධ නම්
ජයසංඛය හෙවත් හක්ගෙඩිය
හක්ගෙඩිය සශ්‍රිකත්වයේ සංකේතයක් විදිහට සලකන නිසාම දෙවියන්ට ආරාධනා කිරීමේදී හක්ගෙඩිය පිඹීම සිදු වෙනවා. දේවකතාවන්ට අනුව විෂ්නු දෙවියන් කිරිසයුර කළඹන විට හමුවුන අනර්ඝ වස්තුන් අතරින් හක්ගෙඩියත් එකක් සේ සැලකෙනවා.
චක්‍රය
සටනකදී ආරක්ෂාව ලැබීමට මෙන්ම ප්‍රතිප්‍රහාරයන් වැලැක්වීමට ඇති ආයුධයයි.
මුගුර
ආරක්ෂාව වෙනුවෙන් වැදගත් ආයුධයකි.
දුන්න
සතුන් දඩයමට මෙන්ම ආරක්ෂාවට ඇති ආයුධයක්.
කඩුව
සටන් බිම ප්‍රධාන ආයුධයක්. රාජ්‍යත්වයේදී කඩු ශිල්පය පිලිබඳව ලබා ඇති හැකියාව රජතුමාගේ වටිනාකම ගොඩ නැගේ.
පංචායුධය පළඳවන්නේ කොහොමද….?
පංචායුධයක් පළදවන විට දරුවාගේ උපත් වේලාවට අනුව සුබ නැකැත් වේලාවක් බලනවා. පංචායුධය සුවද පැනින් සෝදා ආශිර්වාද කරමින් ගෙල හෝ ඉනෙහි පළදවනු ලබනවා.
පංචායුධයක් පළඳවන විට මේ ගැනත් හිතන්න…
පංචායුධයක් මගින් අපි දරුවාට ආරක්ෂාව ලබා දීම ගැන වඩාත් ආරක්ෂිතව වූ සිතුවිල්ලකින් කරන බව සැබෑය. ඒ සමග තවත් අතුරු කරුණු ගැනත් ටිකක් හිතනවා නම් වඩාත් අගෙයි. හොඳ යැයි සම්මත දෙයක් හොද සිතින්ම පවත්වා ගෙන යෑම වරදක් නැති වුනත් මේ විදිහට පුංචි අවදානම් ගැනත් හිත යොමු කිරීම වැදගත්.
පංචායුධය නිසා දරුවාගේ සුමුදු හමට තුවාල වීමට පුලුවනි. ඇතැම් විට පංචායුධයේ අයින් දරුවා හැපිම නිසාම කඩතොලු වී තිබුනොත් ඒවා හමේ වැදී තුවාල විය හැකියි.
පංචායුධය පළඳවන කළු පැහැති නූල දරුවාගේ වර්ධනය සමග ගෙලට හිර ගතියක් ඇති වුනොත් එය දරුවාට අපහසුවක් විය හැකියි.ඒ වගේම දහඩිය සමග මෙම නූල ගැටීම නිසා ගෙල ප්‍රෙද්හයේ දහඩිය බිබිලි සහ කුෂ්ට ඇති විය හැකියි.
පංචායුධය දරුවාගේ කටට ගත හැකි මානයේ තිබීමෙන් නිතරම එය හැපීමත් අවදානමක්.
පංචායුධය වගේම ඇතැම් විට එය රත්රන් දම්වැලක බහා පැළදවීම නිසා සොරකම් කිරීමටත් පුලුවනි.
