පුංචි කාලයේදී නම් දරුවන් තමන්ගේ පාලනය යටතේ තබා ගෙන , ගුණ විදිහට ආහාරපාන සපයා දෙමින් රැක බලා ගන්න පුලුවන්. ඒ වුනත් සාමාන්‍ය පෙළ අවසානයෙන් පසුව එනම් වයස අවුරුදු 16 ක් විතර ගෙවුනාම දෙමව්පියන්ට මේ පාලනය සහ රැකබලා ගැනීම කිරීම අපහසුයි. ඒ වුනත් දරුවන් මේ කාලයේදී ගොඩ නගා ගන්නා ජීවන රටාව නිසා ඔවුන්ගේ අනාගතයට දැඩි විදිහට බලපෑම් එක් වෙන බැව් බ්‍රිතාන්‍යෙය් සිදු කරන ලද අධ්‍යනයක් මගින් පෙන්වා දෙනවා.අපේ රටේ නම් මේ බලපෑම බොහොම දරුණු වෙන්න පුලුවනි. ඊට හේතුව උසස් පෙළ විභාගය ඉලක්ක කර ගත් දරුවන් අතිරේක සහ උපකාරක පංතිවලට සහභාගී වීම කාටවත්ම පාලනය කළ නොහැකි යුගයේ අවශ්‍යතාවයක් බවට පත් වී තිබෙනවා. ඉතින් තමන්ගේ ඇස් දෙක වගේ ඇති දැඩි කරන දරුවන් අනාගතයේදී විවිධ ලෙඩ රෝගවලට ගොදුරු වෙනවා දකින්න මොන අම්මා තාත්තාවත් කැමැත්තක් නැහැ. ඒ වුනත් එක්තරා වෛද්‍යවරයෙක් පසුගිය දා දේශනයකදී සදහන් කළේ වර්තමානයේදී දෙමව්පියන් ඉතාම අවාසනාවන්ත විදිහට තමන්ගේ දරුවන්ගේ මළගමට සහභාගී වීමට තරම් අවාසනාවන්ත වී ඇති බවයි. ඒ තත්වය ඇති වී තිබෙන්නේත් දරුවන්ගේ ජීවන රටාව දෙමව්පියන්ට පාලනය කළ නොහැකි තරම් බරපතල තත්වයකට පත්ව ඇති බවයි.එහෙමනම් මේ අවාසනාවන්ත තත්වයෙන් දරුවන් මුදවා ගන්නේ කොහොමද…?
- ආහාර
අතීතයේදී නම් දරුවන්ට පාසල් වේලාවෙන් පසුව කිසිම අතිරේක හෝ උපකාරක පංති තිබුනේ නැහැ. ඒ නිසාම ඔවුන් පාසල අවසාන වීමත් සමග එක පිම්මේම ගෙදරට දුවගෙන ඇවිත් දවල් ආහාරය ලබා ගත්තා. ඒ වුනත් අද දරුවන් පාසල අවසානයෙන් පසුව උපකාරක පංතිවලටත් සහභාගී වෙලා නිවසට යන්නේ රාත්‍රි ආහාරයට බව රහසක් නොවේ. නැවත පසුවදා උදෙන්ම පාසලට යා යුතු නිසා ඔවුන් වෙනුවෙන් බොහෝ විට නිසි පෝෂණයක් ඇති දිවා ආහාරයක් පිළියෙළ වෙන්නේ නැහැ. ඒ හින්දා අහිතකර රස කාරකයන් සහිත කුමක් හෝ පුංචි දෙයකින් බඩ රවටා ගන්නවා. මේ ආහාරයෙන් දරුවාට පෝෂණයක් නොලැබෙනවා වගේ අහිතකර රසායනයන් සිරුරට එක් වෙනවා. ඒ හින්දා දරුවන්ගේ තරබාරුව ඇති වීම සමග අහිතකර විදිහට මේද ගබඩා වීම වයස අවුරුදු 25 ක් පමණ වෙන විට කොලස්ටරෝල් තැන්පත්වීමෙන් හදවත සහ අක්මාව රෝගී වීමේ තත්වයන් ඇති වීමේ අවදානම ඉතාම ඉහලයි.
- ආතතිය
පුංචි දරුවන්ගේ මනස සමනළ තටුවක් වගේ සැහැල්ලුයි. ඔවුන් ජීවත්වෙන්නේ බොහොම සුන්දර ලෝකයක කිව්වත් සාමාන්‍ය පෙළ අවසානයේදී මේ තත්වය බොහොම දුරට වෙනස් වෙනවා.ඊට හේතුව උසස් පෙළ කඩඉම ඉතාම දරුණු විදිහට දරුවන්ට බලපානවා. ඉසෙඩ් අගයෙන් ජීවිතයේ ඉරණම තීන්දු තීරණය වෙතැයි හිතන නිසාම දරුවන්ගේ හිතේ දැඩි විදිහට ආතතිය ගොඩ නැගෙනවා. උසස් පෙළ ජීවිතය නොවුනත් අද දෙමව්පියන් පවා දරුවන්ට ලබා දෙන අවවාදය නම් ‘‘උසස් පෙළ නැත්නම් ජීවිතයක් නැහැ“ යන පණිවිඩයයි. ඒ හින්දා සාමාන්‍ය පෙළත් සමග ඇති වෙන මානසික ආතතිය නිසා දරුවන් මනසින් රෝගි වීමේ ප්‍රවනතාවයත් ඉතාම ඉහළ බැව් අමතක කළ යුතු නැහැ.
- අන්තර්ජාල පාලනය
අන්තර්ජාලය , යූ ටියුබ් අද අධ්‍යාපණික මෙවලම් විදිහට වඩාත් ඵලදායී අන්දමින් භාවිතයට ගත හැකියි. ඒ වුනත් මේවායේ නිසි පාලනයක් නොමැති වීම නිසා දරුවන්ගේ ජීවිත නිකරුනේම නාස්ති වෙන අවදානමක්ද තිබෙනවා. ඒ වුනත් දරුවන්ගේ අධ්‍යාපනයට අවශ්‍ය තොරතුරු ලබා ගැනීමට මෙම මෙවලම් සහ මාධ්‍ය භාවිතයේ කිසිම නරකක් නැහැ. ඒත් යම්කිසි නියාමනයක් අවශ්‍යයි. ඒ නිසාම දෙමව්පියන් විසින් දරුවන්ට මෙම සමාජජාල සහ අන්තර්ජාලය පරිශීලනයේදී නියාමනයක් කිරීම ඉතාම වැදගත්.
- නින්ද
අද දෙමව්පියන් දරුවන්ගේ අධ්‍යාපනයට දරණ වෙහෙස තක්සේරු කරන්නේ නින්දෙන් බව රහසක් නොවෙයි. දරුවා නිදිමරමින් පාඩම් කරන විට සතුටු වෙන දෙමව්පියන් , දරවා නිදාගෙන සිටිනවා දුටුවොත් දැඩි විදිහට ආවේශ වෙනවා. කොච්චරවත් නිදි…ඔහොම නිදා ගත්තොත් හොදට ප්‍රතිඵල තියෙයි..යනුවෙන් තමන්ගේ කෝපය දරුවන්ට කියන අවස්ථා බොහොමයි. උසස් පෙළ කඩඉම ඉදිරියේ දෙමව්පියන් දරුවන් අවදියෙන් පොතටම යොමුව සිටම ගැන සතුටු වුනත් මේ කාලයේ එනම් වයස අවුරුදු 16 න් පසුව හැදෙන වැඩෙන දරුවාට සුවදායක හා ප්‍රමාණවත් නින්දක් අවශ්‍යයි.ඒ නිසාම දරුවා නිදා ගත් විට ඒ ගැන කෝප වෙන්න එපා.
එහෙමනම්….අපේ දරුවන් වයස අවුරුදු 25 ක් පමණ වෙන විටි විවිධ රෝගාබාධයන්ට ගොදුරු වෙන, එහෙම නිරෝගි ජීවිතයක් වෙනුවෙන් අවශ්‍ය පෝෂණය ලබා දීම ඉතාම වැදගත් බැව් අමතක කරන්න එපා.
