දරුවාගේ දඟකම් පාලනය කරන්න අම්මලාට උපදෙස් 6ක්

සෑම කුඩා දරුවෙක් තුළම ස්වභාවික දඟකාරකමක් ඇත. එහෙත් සමහර දරුවන් අධික ක‍්‍රියාකාරී හා දඟකාර බවක් දක්වයි. මොහොතක් හෝ එකතැන නොසිටී. යමක් කී විට ඇහුම්කන් නොදෙයි. ක්‍ෂණිකව ක‍්‍රියා කරයි. ඉක්මණින් කෝපයට පත් වේ. එසේ වූ විට පාලනයක් රහිතව කෑකෝ ගැසීමටත් අනික් අයට හිරිහැර කිරීමටත් පෙළඹේ. එසේම බඩු බාහිරාදිය කඩා බිඳ දැමීමට පෙළඹේ. යම් කටයුත්තක අවධානය දීමට හැකි බව ඉතා කෙටි කාලීන නිසා විශේෂයෙන් පාසැල් වැඩ අතපසු කරයි.

ඔබේ දරුවා හිතාමතාම ඔබට හිරිහැර කිරීමට මෙසේ හැසිරෙනවාදැයි බොහෝ විට දෙමාපියන්ට සිතිය හැක. නෑදැයින්, අසල්වැසියන්, ගුරුවරුන් දරුවා විනයානුකූල නොවීම ඔබේ වරද යැයි චෝදනා කළ අවස්ථා තිබිය හැක. මෙය කාගේවත් වරදක් නොව දරුවාගේ වර්ධනයේ ප‍්‍රශ්නයක් පමණි. 

  1. දඟකාරකම වැඩි විය හැකි අවස්ථා හැකි තරම් මග හරින්න.

බොහෝ දුර ගමන් යාම, අධික වෙහෙසට පත්වීම, බඩගින්නේ සිටීම, ශබ්ද අධික ප‍්‍රිය සම්භාෂණයක් වැනි කලබල සහිත පරිසරය මින් සමහරකි. මෙවැනි අවස්ථා මගහැරිය නොහැකි නම් හැකි පමණ සීමා කරන්න.

2.දඟ කිරීමට අවස්ථාව සලසා දෙන්න

දරුවාට හානියක් වීමට ඉඩකඩ නැති එළිමහන් පරිසරයේ දිවීම, ක‍්‍රීඩා කිරීම ආදියට ඉඩ දෙන්න. ළමයා පිටුපස එළවීමෙන් හා කරන හැමදේම එපා කීමෙන් වළකින්න.

3.විවිධ අවස්ථාවලට මුහුණදීමට දරුවාට උදව් කරන්න.

සරල නියෝග භාවිත කර දරුවා හසුරුවා ගන්න. දරුවාගේ අවධානය නිරතුරුව ඔබ කෙරෙහි රඳවා තබන්න. දරුවා මනා සේ හැසිරීම ගැන සතුට පල කරන්න. දරුවා සමග බසයකින් යාම, සාප්පු යාම වැනි අවස්ථාවලදී මේ පිළිවෙත අනුගමනය කරන්න.

4.ගෙදර දින චර්යාව සැලසුම් කරන්න.

කෑම වේලාවන්, නින්දට යන වේලාවන් ආදිය සෑම විටම එකම පිළිවෙළකට හා වේලාවකට වන්නේ නම් එයට හැඩගැසීම දරුවාට පහසුය. බලාපොරොත්තු රහිත සිදුවීම් නැතිනම් පිළිවෙළක් නැතිව නොයෙක් වේලාවන්හි වන සිදුවීම්වලින් දරුවා කැළඹීමට ඉඩ ඇත.

5.විනයානුකූල බව රැකීම

මෙවැනි දරුවන්ට දඬුවම් කිරීමට බොහෝ දෙමාපියන් මැලි වේ. දඬුවම් කළ විට දරුවාගේ හැසිරීම තවත් උත්සන්න වේ යැයි ඔවුහු සිතති. තවත් සමහරු දරුවා පාලනය කිරීමට යයි සිතා තදින් පහරදීම වැනි දඬුවම් දෙයි. මෙම අන්ත දෙකම සුදුසු නැත. දරුවාගේ හැසිරීම ගැන අසතුටට පත් වූ බව කෙලින්ම ප‍්‍රකාශ කර සිටින අතර එය සාමකාමීව කළ යුතුය. දඬුවම වශයෙන් ටික වේලාවක් තනිව තැබීම හෝ රූපවාහිනිය බැලීම වැනි වරප‍්‍රසාදයන් අහිමි කිරීම ඊට වඩාත් සුදුසුය.

6.දරුවාගේ අවධානය දියුණු කිරීමට උදව් කරන්න.

දරුවා සමග ක‍්‍රීඩා කරන්න. පින්තූර පොත් බැලීම, කැපීම, ඇලවීම, චිත‍්‍ර ඇඳීම වැනි දෑ කරන්න.

දෙමාපියන් එකිනෙකා සමග සහයෝගයෙන් ළමයා පිළිබඳව ක‍්‍රියා කිරීම ඉතා වැදගත්ය. ඒ දෙදෙනා අසමගි නම් දරුවා පිළිබඳ සුදුසු පියවරක් ගැනීම අඩපණ වේ. 

 

අනුරාධපුර ශික්‍ෂණ රෝහලේ ළමා රෝග අංශයේ වෛද්‍ය නිර්මලී ඒකනායක මහත්මිය සමග සකසන ලද ලිපියකි.

 

අධ්‍යාපනික අතින් කොයිතරම් උසස් මට්ටමක හිටියත් අම්මෙක් වුණාම ඇති වන ගැටලූවලට අපි ළඟ පිළිතුරු නෑ. මව්පදවියත් එක්ක දහසකුත් එකක් ප්‍රශ්න මටත් ඇති වුණා. ඔය අතරෙදියි මව්වරුන් වෙනුවෙන්ම වෙන්වුණු පුවත්පතක සංස්කාරකවරිය විදියට සේවය කරන්න මට අවස්ථාව ලැබුණේ. අම්මා කෙනෙක් විදියට මට ඇති වෙන ගැටලූ අධ්‍යාපනය අතින්, මිල මුදල් අතින් ඉහළ, පහළ ඕනෑම තරාතිරමක හැම අම්මා කෙනෙක්ටම පොදුයි කියලා ඔය අතරෙදි මම තේරුම් ගත්තා. මගේ අත්දැකීම්, දරුවන් ගැන මට තියෙන ගැටලූ ගැන වෘත්තීමය සුදුසුකම් සහිත පුද්ගලයන් එක්ක සාකච්ඡ කරලා, සටහන් කරන්න මම හිතුවේ දහස් ගණනක් මව්වරුන්ට නිවැරදිම මගපෙන්වීම අවශ්‍ය බව දැණුනු නිසා.

LEAVE A REPLY

Please enter your comment!
Please enter your name here