චූටියට මාස හතරේ සිට හත දක්වා කාලය ගැන අම්මා දන්නවාද?

ඔන්න ටිකෙන් ටික කාලය ගෙවිලා චූටියා හතර වෙනි මාසෙටත් පය තිබ්බා. මොහොතින් මොහොත චූටියාගේ දේවල් අම්මාට අලුත්. මේ වෙද්දී අම්මා සම්පූර්ණයෙන්ම වගේ සාමාන්‍ය ජීවිතය පටන් අරගෙන. ඉතිං චූටියාගේ දේවල් අම්මාට දැන් නිදහසේ විඳින්න පුළුවන්. චූටියා ඇඬුවොත් ඇරෙන්න එයාගෙන් අම්මාගේ මුහුණට එන්නේ හිනාවම විතරයි.

චූටියාගේ කායික/ශාරීරික සංවර්ධනය ගැන අම්මා මේ දේවල දැනගන්න

  • මුනින් අතට සිටින විට හිස හා පපුව ඉහළට ඔසවයි
  • ඇඟිලි එකිනෙක පටලවා ගනිමින් තම අත් සමග සෙල්ලම් කරයි. 
  • යම් ද්‍රව්‍යයක් දෙසට අත් දිගු කර මුලූ අත්ලෙන්ම අල්වා ගනී.
  • ශබ්දය ඇසුනු දෙසට හිස හරවයි.
  • තනි අකුරේ ශබ්ද පිට කරයි. ගා…වා….ඩා….මා….
  • ශබ්ද නඟා සිනාසෙයි.
  • යම් ද්‍රව්‍යයක් සෙලවීමෙන්, ගැනීමෙන් හා බිම දැමීමෙන් හේතු ඵල විමසීමට උත්සහ කරයි.
  • පෙනෙන තෙක් මානයේ නොතිබුණත් සමහර ද්‍රව්‍ය තිබෙන තැන් සොයා ගනී.

චූටියාගේ චිත්තවේගී හා සාමාජීය සංවර්ධනය වැඩිකිරීම සඳහා

  • අන්තර් ක‍්‍රියාකාරකම් වර්ධනය සඳහා සාමාජීය එක් රැස්වීම්වලට දරුවා රැගෙන යන්න.
  • තනිව හිඳ ගැනීමට දරුවාට උදව් කරන්න. ආධාර අතිව හිඳුවා තැබීම ආරම්භ කරන්න.
  • එක්වරම අත් දෙකෙන්ම භාණ්ඩ අල්ලා ගැනීමට අවස්ථාව සලසා දෙන්න.
  • අනුකරණය කළ හැකි සිත් ඇදගන්නා සුළු හඬකින් ඔහුට/ඇයට වචන අනුකරණය කිරීමට අවස්ථාව දෙන්න.
  • ඔබේ මුහුණ රෙද්දකින් අරිමින් වසමින් දරුවා සමග හැංගිමුත්තන් සෙල්ලම් කරන්න.
  • එකිනෙකට වෙනස් වූ ශබ්ද පිටකරන භාණ්ඩ දරුවාට ලබාදෙන්න.
  • ළදරුවා එළිමහනට ගෙන ගොස් වටපිටාව පෙන්වන්න.
  • එදිනෙදා ගෙදර දොර සිදුවන කටයුතු අතරතුරදී දරුවා සමග කතා කරන්න.
  • සන්නිවේදනය සඳහා දරුවා තැත්කරන විට දරුවාට උනන්දුවෙන් ප‍්‍රතිචාර දක්වන්න.
  • ප‍්‍රශංසා කරන්න.

 

චූටියාගේ පෝෂණය

  • දරුවාට මාස 6 සම්පූර්ණ වූ වහාම දින 180 කට පසු වෙනත් අමතර ආහාර ලබාදෙන්න. මවට ප‍්‍රසූත නිවාඩු නැති නම් මව්කිරි දොවා යාමට නොමැති නම් මාස 5 දී වුවද ආහාර ලබාදීම ඇරඹිය හැක.
  • අමතර ආහාර ලබාදීම ආරම්භයේදී හොඳින් මත් ගාගත් බත් තලපයට දොවාගත් මව්කිරි ස්වල්පයක් එකතු කරන්න. දරුවාට බඩගිනි වූ විට කවන්න. ඉන්පසු මව්කිරි ලබාදෙන්න.

චූටියාට කෑම දෙන්න සුදුසු බව හඳුනා ගැනීමේ සාධක ලෙස

  • උදව් නැතිව වාඩි වීම
  • සෙල්ලම් බඩු කටේ දමාගැනීම, සැපීම
  • කටට ඇතුළු කරන දෙයක් එළියට තල්ලු නොකිරීම 

චූටියාට කෑම කවද්දී

සබන් යොදා සෝදාගත් මවගේ ඇඟිල්ල හෝ හැන්ද භාවිත කොට හෝ ආහාර ලබාදිය හැක. පළමුව ඉතා කුඩා ආහාර ප‍්‍රමාණයකින් අරඹා එහි ඇති රසය, හැඩය, ගිලීම වැනි ක‍්‍රියාවන් ඉගෙන ගැනීමට චූටියාට  කාලයක් ලබා දෙන්න. කෑම කට ඇතුළටම නොදා කටේ ඉදිරි කොටසින් තබන්න. කෑම ගැනීම කිරි බීමට වඩා සංකීර්ණ ක‍්‍රියාවලියක් බැවින් එය ඉගෙන ගැනීමට දරුවාට කාලයක් දිය යුතුය. නියමිත ක‍්‍රමය හොඳින් පුහුණු වූ පසු ප‍්‍රමාණය හා පෝෂණය ගැන සිතීම කළ යුතුය. මුල් දිනවල චූටියා කෑම ගැනීම ප‍්‍රතික්ෂේප කළහොත් තව දින 2 – 3 ඒ සඳහා උත්සහ කළ විට එයට දරුවා හුරුවේවී. 

මුල් දිනවල කෑම කවද්දී චූටියා මෙන්න මේ වගේ දේවල් කරාවි 

  • කෑම අමතක කර මවගේ ඇඟිල්ල හෝ හැන්ද ඉරීම. 
  • කෑම එළියට දැමීම. 
  • නැවත කට ඇරීම. 
  • එළියට පිඹ කෑම විසි කිරීම.
  • මුහුණ ඉවතට හරවා එපා කීම.
  • කෑම සියල්ල බිමට දැමීම.

 

ඒත් දින කිහිපයකින්  

  • මුල් කාලයේදී දත් නැති වුවත් මෘදු ආහාර කොටස් සපා කෑමට චූටියාට පුළුවන්
  • මුල් දින හැඳි 2-3 පමණ කවා ක‍්‍රමයෙන් වැඩි කරන්න.
  • දින කිහිපයකට පසු ඇට වර්ගයක් (පරිප්පු වැනි) කෑමට එකතු කරන්න.
  • බෙරි බත ලබාදී සති දෙකකට පසු පළතුරු වර්ග ලබාදීම ආරම්භ කරයි. එක්වරකට එක් පළතුරු වර්ගයක් ලබාදෙන්න. ඒවා දේශීය, අලුත්, වස විෂ නොයෙදු ඒවා වීම වඩා යෝග්‍ය වේ.

උදා: පැපොල්, කෙසෙල්, කෙඳි අඩු අඹ, අලිපේර, දොඩම්

 

චූටියට මාස 6 – 7 පමණ වන විට

  • වරින් වර පහත සඳහන් ආහාර වර්ග එකිනෙකට එකතු කරන්න.

ගොටුකොළ/වට්ටක්කා/තම්පලා/බතල/කැරට්/මුකුණවැන්න/අළුකෙසෙල්/නිවිති

  • වරකට එක් වර්ගයක් හඳුන්වා දෙන්න.
  • එය හුරුවූ පසු (දින 3 පසු) ඊලග වර්ගය එකතු කරන්න.
  • ඉන්පසු මස්/මාළු හෝ හාල්මැස්සන් පොඩි කර ආහාරයට එකතු කරන්න.
  • තෙල් ස්වල්පයක් (පොල්තෙල්, බටර් හෝ මාගරින්) එකතු කළ විට ආහාරයේ රසය හා ගුණය ඉහළ යයි.
  • දිනකට ආහාර වේල් 3 ක් පමණ ලබාදෙන්න.

 

චූටියාට එන්නත් ලබාදීම

  • මාස 4 සම්පූර්ණ වූ විට පෝලියේ මුඛ එන්නත 2 හා පෙන්ටා සංයුජ එන්නත 2 ලබාදේ.
  • මාස 6 සම්පූර්ණ වූ විට පෝලියෝ මුඛ එන්නත 3 හා පෙන්ටා සංයුජ එන්නත 3 ලබාදේ. 
  • දරුවාට මාස 6 සිට මාස 6 කට වරක් විටමින් A අධි මාත‍්‍රාව අවුරුදු 5 දක්වා ලබාදෙන්න. 

 

අනුරාධපුර ශික්‍ෂණ රෝහලේ ළමා රෝග අංශයේ වෛද්‍ය නිර්මලී ඒකනායක මහත්මිය සමග සකසන ලද ලිපියකි.

 

අධ්‍යාපනික අතින් කොයිතරම් උසස් මට්ටමක හිටියත් අම්මෙක් වුණාම ඇති වන ගැටලූවලට අපි ළඟ පිළිතුරු නෑ. මව්පදවියත් එක්ක දහසකුත් එකක් ප්‍රශ්න මටත් ඇති වුණා. ඔය අතරෙදියි මව්වරුන් වෙනුවෙන්ම වෙන්වුණු පුවත්පතක සංස්කාරකවරිය විදියට සේවය කරන්න මට අවස්ථාව ලැබුණේ. අම්මා කෙනෙක් විදියට මට ඇති වෙන ගැටලූ අධ්‍යාපනය අතින්, මිල මුදල් අතින් ඉහළ, පහළ ඕනෑම තරාතිරමක හැම අම්මා කෙනෙක්ටම පොදුයි කියලා ඔය අතරෙදි මම තේරුම් ගත්තා. මගේ අත්දැකීම්, දරුවන් ගැන මට තියෙන ගැටලූ ගැන වෘත්තීමය සුදුසුකම් සහිත පුද්ගලයන් එක්ක සාකච්ඡ කරලා, සටහන් කරන්න මම හිතුවේ දහස් ගණනක් මව්වරුන්ට නිවැරදිම මගපෙන්වීම අවශ්‍ය බව දැණුනු නිසා.

LEAVE A REPLY

Please enter your comment!
Please enter your name here