ඔබේ දරුවාගේ මනස දියුණු කරවන චිත්‍රපට 15ක්

රූපවාහිනියේ යන ඕනෙම චිතුපටයක් බලන්න අපේ පුංචි දරුවෝ පුරුදු වෙලා. මේ නිවාඩු කාලෙත් එක්ක වැඩිහිටි අපේ වගේම පුංචි දරුවන්ගේත් කාලසටහන් ටිකක් වෙනස්. එහෙමයි කියලා බැහැ, වැඩිහිටියන් විදියට අපි අපේ දරුවන්ට ඕනේම දෙයක් නරඹන්න අවස්ථාව ලබා දීලා හරියන්නේ නැහැ. දරුවන් වෙනුවෙන් අපි තෝරා දෙන හැමදේකින්ම වගේම අපේ දරුවාට ප්‍රයෝජනයක් තිබිය යුතුයි. බොහෝ දෙමාපියන් සෞඛ්‍ය සම්පන්න ලෙස ආහාර ලබා දීමෙන් දරුවා ලබන පෝෂණ ගැන සිය දහස් වරක් සිතුවත් දරුවා නිරාවරණය වන අනවශ්‍ය වීඩියෝ පට චිත්‍රපට නිසා දරුවාගේ මනසට සිදුවන හානිය ගැන හිතන්නේ නැහැ. අන්න ඒ නිසාම අපි හිතුවා දරුවන් වෙනුවෙන් නිර්මාණය වන ළමා චිත්‍රපට කිහිපයක් තෝරාගෙන ඒවා දරුවාගේ මානසික දියුණුවට බලාපාන ආකාරය ගැන කතා කරන්න

  1. හෝ ගානා පොකුණ

මෑත කාලයේ බොහොමජනප්‍රිය වූ දරැවන් එක් වතාවකට වඩා බලන්නට ප්‍රිය කරන හෝගානා පොකුණ පරිකල්පනය ගැන හොඳ අධ්‍යාපනයක් අපේ දරුවන්ට ලබා දෙනවා. ජීවිතයේ කිසිම දිනක නොදැකපු දෙයක් ගැන හිතමින් හීන දකිමින් ඒ කරා ලංවීම ඒ දරුවන් තුළ ගොඩ නැගෙන ආසාව උනන්දුව මේ කතාව තුළ ඉතාමත් සුන්දර විදියට කතාවෙනවා. ඉතා කැපවීමෙන් දරුවන්ගේ මේ හීනය සැබෑ කරගන්නට සහය වෙන ඉතාම පරමාදර්ශී චරිතයක් වන ගුරුවරිය මේ දරුවන්ගේ මෙන්ම ගම්වාසීන්ගේ ජීවිතත් වෙනස් කිරීමට පාදක වන ආකාරය මේ තුළින් විස්තර කරනවා.

  1. UP 

මේ කතාවේ ඉන්න ඉතා දැඩි දෘඩ අයෙක් වූ වයෝ වෘද්ධ පුද්ගලයා තම බිරිඳ මිය යාමෙන් පසුව ඇයගේ සිහිනයක්ව තිබුණු සුන්දර ස්ථානයකට යාමට තීරණය කරනවා. ඒ රසල් නම් වූ බාල දක්ෂයෙකු සමග. රසල් ඉතා ඉතා මෘදු අයෙක්. මේ වයෝවෘද්ධ පුද්ගලයා රසල් නම් වූ බාලදක්ෂයා හේතුවෙන් වෙනස් වෙනවා. පවුලක සැනසීමට නම්‍යශීලී බව බොහොම වැදගත් බවත් අලුත් අලුත් දේ පිළිබඳව දැනගන්න ඒ දේවල් බොහෝ සෙයින් වැදගත් වන බවත් මේ කතාව තුළින් කියවෙනවා. සැබෑ ආදරය, සැබෑ සතුට කියන්නේ අපි යන විනෝද ගමන් ගණනවත් අපි ලබාගන්නා ඡායාරූප ගණනවත් නොව බව වගේම එය අප එක්ව ගත කරන සුන්දර අවස්ථා මගින් අපට හිමිවන බව මේ කතාවෙන් පැහැදිලි කෙරෙනවා.

  1. Inside out

චිත්‍රපටයේ පුරාම මනෝ විද්‍යාවේ ලක්ෂණ විහිදී ඇති මේ නිර්මාණයේ වයස අවුරුදු 11ක දියණියකගේ  හිතේ හැගීම් ක්‍රියාත්මක වන ආකාරය පැහැදිලි කරනවා. මේ දියණියගේ හිතේ ඇතිවන හැඟීම් වලට ඇයගේ හිස තුළ එක එක ආකාරයේ චරිත ගොඩනගා ඇති අතරම ඇය තමන්ගේ හැඟීම් අවබෝධ කරගනිමින් ඒවා පාලනය කරන ආකාරය ඉතාමත් රසවත්ව මේ කතාව පුරා දිගහැරෙනවා. මේ නිර්මාණය මගින් දරුවන්ට හැඟීම් පිළිබඳව අවබෝධය වගේම හැඟීම් පිළිබඳ බුද්ධිය වැඩි කරගන්න අදහසක් ලැබෙනවා. ඒ වගේම තමා ගැන සිතන ආකාරයටම තවත් කෙනෙක් ගැන හිතන්න ඒ කියන්නේ සහකම්පනය වර්ධනය වීමටත් මේ චිත්‍රපටය උදව් වෙනවා. 

  1. දංගල්

මෙම ඉන්දියානු චිත්‍රපටය කාන්තාවන් හා පිරිමින් අතර බෙදී ගොස් ඇති හැකියාවන් පිළිබඳ වූ අදහසට අභියෝග කරන්නක්. සමාජ රාමුවෙන් පිටතට යමින් ජීවිතය දිනිය හැකි බව මේ චිත්‍රපටය හරහා කියාදෙනවා. ඒ විතරක් නෙවෙයි අපේ දීර්ඝකාලීන හොඳම ගුරුවරුන් දෙමාපියන් බවත් මේ තුළ මානාව කියවෙනවා. ඒ අත්දැකීම් සමගින් ප්‍රවීණ මල්ලව පොර ශූරයෙක් තමන්ගේ දියණියන් තම ක්‍රීඩාවෙන් ජයග්‍රාහකයන් බවට පත්කරන ආකරය චිත්‍රපටය පුරා ඉතාමත් සිත්ඇදගන්න සුලු අයුරින් පෙන්වනවා.

  1. Paddington

කැලයේ ජීවත් වුණු වලස් පැටියෙක් නගරෙට ඇවිත් සාමාන්‍ය මිනිස් පවුලක් එකක් ජීවත් වෙන කතාවක් ඇතුළත් මේ කතාවෙන් අවංකකම නිසා අමාරුවේ වැටුණත් දීර්ඝ කාලීනව එය ලොකු යහපතක් වන බවත් තමාට යමෙක් යම් උදව්වක් කළහොත් ඒ සඳහා කළගුණ සැලකීම ඉතා වැදගත් යන ආදර්ශයක් දරුවන්ට මේ නිර්මාණය හරහා කියා දෙනවා.

  1. Ratatouille

මේ කතාවේ ඉන්නේ ඉහළ පෙළේ හැකියාවක් ඇති සූපවේදී මීයෙක් ගැන. පැරීසියේ ඉන්න මේ මීයාට කෑම හදන්න පුළුවන්. ලොව ප්‍රසිද්ධ අවන්හලක ප්‍රධාන සුපවේදියා වෙන්නත් මේ මීයාට අවස්ථාව ලැබෙනවා. මෙය සත්‍ය විය හැකි කතාවක් නොවුණත් පරිකල්පනය හරහා විෂමතා පිළිගැනීමට දරුවන් උනන්දු කිරීමත් සුදුස්සාට සුදුසු තැන ලැබිය යුතු බවත් මේ හරහා කියවෙනවා. සත්වයෙක් වුණත් දක්ෂතා වලට තැනක් ලැබීම ගැනත් චිත්‍රපටය තුළින් කියවෙනවා.

  1. The blind side

අකුරු ලියන්න කියන්න අපහසු ඉගෙනගන්න බැරි දුක්ඛිත සමාජ පරිසරයක ජීවත් වුණු දරුවෙක් තමන්නේ වාසනාව නිසා අලුත් පවුලකට එකතු වෙලා එයාගේ සැඟවුණු හැකියාවන් සොයාගන්න බව මේ කතාවේ කියනවා. මේ දරුවාගේ කුඩා විය ගැන මේ චිත්‍රපටයේ පෙන්වන ආකාරය දුක්ඛිත වුවත් අනාගතය ගැන කියද්දි දැනෙන සතුට අපමණයි. ඉලක්කම් අකුරුවලට එහා ගිය බහුවිද දක්ෂතා බහුවිද බුද්ධීන් බවත් සමාජ පරිසරය මත කොයිතරම් දුරට දේවල් වෙනස් වෙනවාද තියාත් මේ චිත්‍රපටයෙන් කියවෙනවා.

  1. සූරිය අරණ

ඉතාමත් විවිධ අරමුණ හැඩතල ඇති පරිසර දෙකක දරුවන් දෙදෙනෙක් මිත්‍රත්වයක් ගොඩනඟා ගන්නා ආකාරයත් මිත්‍රත්වයන් තුළින් අපි අනුකූල විය යුතු සහ නොයුතු දේවලුත් ඇති බවත් මේ නිර්මාණය හරහා මනා ලෙස පෙන්නුම් කරනවා. මේ මගින් ඔබේ දරුවාටත් සැවොම ඇසුරු කළද දමා ගත් යුත්තේ මොනවාද නොගත යුත්තේ මොනවාද ලෙස කොටස් දෙකක් ඇති බව අවබෝද වනවා.

  1. Babe 

පුංචි ඌරු පැටියෙකුගේ කතාවක්. මේ ඌරු පැටියා බැටලුවන් බලාගන්න බල්ලන් සමග එක්ව ඉන්න ගමන් තමන්ට ජානවලින් ලැබී නැති අලුත් හැකියාවක් හොයාගෙන බැටලුවන් පාලනයට ඉගෙන ගන්නා ආකාරය තමයි මේ කතාවේ කියවෙන්නේ. ඒ වගේම තමන් වගේම අනුන්ටත් දුක දැනෙන බවත් අනුකම්පා කළ යුතු බවත් මේ කතාවෙන් දරුවන්ට කියා දෙනවා.

  1. Queen of Katwe

උගන්ඩාවේ ඉතා දරිද්‍ර පවුලක ඉපදිලා තම පියාණන් පවා නැති කාලෙක තමන්ගේ හැකියාව හොයාගෙන ඒ පසු පස ගොස් සාර්ථකත්වය ලබාගන්නා ගැහැනු දරුවෙකුගේ කතාවකමේ චිත්‍රපටය තුළින් කියවෙනවා. ගුරුවරයෙකුට සිය විෂය නිර්දේශයට අදාල අධ්‍යාපනයට එහා යමින් දරුවෙකුගේ ජීවිතය ලස්සනට වෙනස් කළ හැකි බව මේ කතාවේ කියවෙනවා.  මැය පසු කලෙක උගන්ඩාවේ ජාතික චෙස් ශූරියක් පිළිබඳ සත්‍ය කතාවක්.

  1. The Jungle Book

ජනප්‍රිය Jungle Book කෘතිය පාදක කරගනිමින් නිපද වුණ මේ චිත්‍රපටයේ මෝගලි කියන දරුවා තමන්ට වනාන්තරේදී එරෙහි වන කොටියා සමග ගැටී දැඩි ආත්ම විශ්වාසයකින් ජය ගන්න තකාවක් ඇතුළත්. යමක් උපක්‍රම ශීලීව ජය ගත හැකි බව මේ කතාවෙන් කියවෙනවා.

  1. Children Of Heaven

ඉරානයේ සැකසුණු මේ කතාව පුරාම දිවෙන්නේ තමා අතින් නැති වූ තම නැගණියගේ සපත්තු කූට්ටම වෙනුවෙන් සපත්තු දෙකා දිනා ගැනීම වෙනුවෙන් අයියා කෙනෙක් කරන කැපවීමයි. මේ තුළින් සහෝදර බැඳීම වගේම අප සතු පුංචි පුංචි දේවල් රැක ගත යුතු බවත් මේ හරහා දරුවන්ට කියාදෙනවා. 

  1. Finding Nemo

ලෝකය පුරාම ජනප්‍රිය චිත්‍රපටයක්. ව්‍යාපාරයක් ලෙස නිර්මාණය වූවත් මෙවැනි චිත්‍රපට මගිනුත් ලබාගත හැකි ආදර්ශයක් බොහෝයි. තාත්තාගේ ආදරය අම්මාට වඩා වෙනස්. තාත්තාගේ ආදරයෙන් දරුවෙක්ට ලැබිය යුතු ප්‍රවේශම, ආරක්ෂාව බැඳීම ගැන මේ නිර්මාණය තුළින් කියවෙනවා. කිසිම දේකින් නොසැලී ඉදිරියට යා යුතු බවත් මේ කතා මගින් කියා දෙනවා. දෙමාපියන් දරුවන් අතර බැදීම කොයිතරම්ද කියා කියවෙන මෙවැනි චිත්‍රපට හරහා දරුවන්ට එවැනි බැඳීම් වටහා ගැනීමට පහසු කරනවා.

  1. Rabbit Proof Fence

ඕස්ට්‍රේලියානු කතාවක් වන මේ නිර්මාණයේ යුරෝපීයන් ඕස්ට්‍රේලියාවට පැමිණී ඇබොරජීනුවන් සමූල ඝාතනයෙන් පසු සමහර දරුවන් ගම්වලින් ඇත් කර බලහත්කාරයෙන් කදුවුරු රඳවා තබාගැනීමේදී එවුන් ඒ තැන්වලින් පන යාමේ සිද්ධියක් මේ නිර්මාණයට ඇතුළත්. අපි දකින ලස්සන පාරවල් ගොඩනැගිලිවලින් එහා ගිය සැබෑ ලෝකයේ කුරිරුකම් ගැන මේ නිර්මාණයෙන් කියනවා. තමාගේ පැවැත්ම වෙනුවෙන් මේ දරුවන් කළ ඉතා දැඩි සටනක් ගැනතමේ නිර්මාණයේ කියවෙනවා.

  1. තාරේ සමීපර්

සැවොම කොන් කළ, ඉගෙනීමට දුර්වල බවට කියවෙනඅතහැර දැමූ දරුවෙක් තම දක්ෂතාවයක් පරමාදර්ශී ගුරුවරයෙක් නිසා සොයාගනිමින් එය ඉදිරියට ගෙන ගියආකාරය මේ නිර්මාණයෙන් කියවෙනවා. අපි අපේ දරුවන් තුළ ඇති නිර්මාණගීලීත්වය හඳුනාගත යුතුයි. ඒ වගේම අනෙකාට ගරු කළ යුතු බවත් වටහා ගත යුතුයි. මේ සියල්ල අපේ දරුවන්ට අවබෝධ කළ යුතුයි.

විශේෂඥ මතය, අදහස සහ මූලික සටහන:

විශේෂඥ වෛද්‍ය මියුරු චන්ද්‍රදාස
ළමා සහ යොවුන් මනස පිළිබඳ විශේෂඥ වෛද්‍ය – රාගම ශික්ෂණ රෝහල / ජ්‍යෙෂ්ඨ කථිකාචාර්ය – කැලණිය විශ්වවිද්‍යාලය

 

 


අධ්‍යාපනික අතින් කොයිතරම් උසස් මට්ටමක හිටියත් අම්මෙක් වුණාම ඇති වන ගැටලූවලට අපි ළඟ පිළිතුරු නෑ. මව්පදවියත් එක්ක දහසකුත් එකක් ප්‍රශ්න මටත් ඇති වුණා. ඔය අතරෙදියි මව්වරුන් වෙනුවෙන්ම වෙන්වුණු පුවත්පතක සංස්කාරකවරිය විදියට සේවය කරන්න මට අවස්ථාව ලැබුණේ. අම්මා කෙනෙක් විදියට මට ඇති වෙන ගැටලූ අධ්‍යාපනය අතින්, මිල මුදල් අතින් ඉහළ, පහළ ඕනෑම තරාතිරමක හැම අම්මා කෙනෙක්ටම පොදුයි කියලා ඔය අතරෙදි මම තේරුම් ගත්තා. මගේ අත්දැකීම්, දරුවන් ගැන මට තියෙන ගැටලූ ගැන වෘත්තීමය සුදුසුකම් සහිත පුද්ගලයන් එක්ක සාකච්ඡ කරලා, සටහන් කරන්න මම හිතුවේ දහස් ගණනක් මව්වරුන්ට නිවැරදිම මගපෙන්වීම අවශ්‍ය බව දැණුනු නිසා.

LEAVE A REPLY

Please enter your comment!
Please enter your name here