Covid 19 සහ නිවසේ සිට රාජකාරි කරන අම්මලා

Covid 19 මුළු ලෝකයේම අම්මාවරුන්ගේ හිත් ගිනි අවුලුවා දැන් මාස අටකටත් වඩා වැඩිය.

රෝ බිය, අවිනිශ්චිත ඊළග පැය, දරු පැටවුන්ගේ සුරක්ශිතභාවය සහ සෞබ්‍යාරක්ශාව , පැය විසිහතර මුළුල්ලේම ඔබව දවනා බවද ඔබව පෙළනා බවද දනිමි.

ඒ සියළු නපුරු, දැඩිව  රිදුම් දෙන හැඟීම් මැඩලමින් ජීවන අරගලය ඉදිරියට ගෙනියන කාන්තා ඔබ, තම පැටවා බේරා ගන්නට බිඳෙන් බිඳ සාගර ජලය වලිගයෙන් ගෙන හින්දවන්නට  සිතූ ධෛර්යමත් ලේන් අම්මාගේ කුළයේ යැයි අදහන්නට මම කැමතිය. ඒ මෙළොව අසමසම යමක් ඇත්තම් එය අම්මාගේ ආදරය පමණක්ම  බව මම විශ්වාස කරන නිසාය. 

තොටිල්ල නළවන අත ලොව ආණ්ඩු කරවන බව සත්‍යාපනය කෙරූ….

රැකියාවල යෙදුන, යෙදෙන දහසකුත් එකක් මවුවරුන්ගේ  ජීවිතය covid 19 වසංගතකාලයේ වෙනසකම් වලට භාජනය උනාද? 

ඔවුන් එය කළමණාකරනය කරගත්තේ / කරගන්නේ කොහොමද? 

ඔබ ඒ ගැන හිතුවද?

අද කතාව ඒ ගැන….

නිවසේ සිට රාජකාරී කිරීම ( Work From Home)  දුරස්ථ ඉගැනීම් ( Distance Learning ) පසුගිය දශක දෙක තුනක කාලය තුළ අන්තර්ජාලයේ අඛණ්ඩ විකසනය සමඟ ජනගත වුන සංකල්ප ලෙස හැඳින්විය හැක. මෙය ශ්‍රී ලාංකික අපිට මෑතකදී ඉතාම සමීප කරවන්නට සමත් වූයේ Covid 19 වසංගත තත්ත්වය බවට කිසිදු සැකයක් නැහැ.

දෛනිකව රාජකාරියට ගිය අම්මලාට ගෙදර ඉදන් අම්මා, බිරිඳ , දියණිය කියන භූමිකාවන්ට අමතරව දේවකාරිය වගේ කරපු තමන්ගේ රැකියාවේ වගකීමුත් ගෙදර ඉදන් දරන්න උනාම මොන වගේ මානසික අරගලයක් වෙන්න ඇති කියලද ඔබ හිතන්නේ? 

” මාර්තු මාසේ මැද ඉදලා Work From Home දඬුවමට යටත් වෙලා ඉන්නවා. මට නම් මේක දඬුකදක්.මගේ අවුරුදු හතරේ පොඩි දඟමල්ල. එක්ක ගෙදර ඉදන් වැඩ කරනවා කියන්නේ කරන්න අමාරු වැඩක් නෙමේ කරන්න බැරි වැඩක්” 

සත්‍යා අමරනාථ–පරිඝණක ඉංජිනේරු, ශ්‍රී ලංකාව

” පවුල එකට ඉන්න ලැබුනු Covid නිසා කොම්පියුටර්  තුනකට කොටු වෙච්චි  අපේ ජිවිතේ දරැවන් උදේ ඉදන් zoom එකෙන් ස්කෝලේ යද්දී..මමත් zoom එකෙන්ම ඉස්කෝලෙට ගියා.  පැන්ඩමික් එක ගෙනාපු work from home මට හොද වුනාට මගේ පාසලේ දෙමාපියෝ ඇහුවෙම ස්කෝලේ අරින්නෙ කවද්ද කියලා“

භාග්‍යා බමුණුආරච්චි– ගුරුවෘත්තිය, ඇමරිකා එක්සත් ජනපදය

ලෝක ජනගහනයෙන්  විශාල ප්‍රමාණයක් එකම විටක විරැකියාවට පත් කල, නිවාස වලට කොටුකරමින් work from home හොඳම විකල්පය බවට පත් කල, සමාජ දුරස්ථභාවය වගේම දුරස්ථ ඉගැනීම් වලට දරුවන් යොමු වුන මේ කාලයේ ඕනෑම අම්මා කෙනෙක්ගේ තත්ත්වය මාර්ගෝපදේශනයක් නොමැතිව නොදන්නා දේශසීමාවකට නොදැනුවන්තව ඇතුළු වූ විදේශ සංචාරයෙක්ට වගේ කුතුහලය, ත්‍රාසය, භීතිය ඇතුළු ඕනෑම මිශ්‍ර හැඟීමක් (mixed emotions) දනවන්නක් වෙන්න පුළුවන්. 

ඉතින් Covid 19 එන්න කළින් අපට තිබූ ලස්සන වසන්ත කාලයට කවදා යා හැකිද යන්න නිශ්චිතවම කීමට ලෝක සෞඛ්‍ය සංවිධානය පවා අසමත් මොහොතක, Covid 19න් රැකී, රැකියාවත් රැකගෙන, පුංචි පැටවුනුත් එක්ක ඔබට කරන්න පුලුවන් දේවල් අපි කතා කරමු.

ඔබ ඔබට කාරුණික වෙන්න.

පුංචි පැටවුන්ගේ දාන්ගලේ, එකතැන ඉන්න බැරි එයාලගේ දුරස්ථ ඉගැනීම් , පැවරුම්,  ඉගැනීම් අතරේ එයාල වැසිකිළි දුවන්න හදන බොරු උවමනා, එයාලට එන දුකහිතෙන නිදිමතවල්, වගේම පොඩි බඩගිනිත් නිවන ගමන් සමහර විට ඔබේ ව්‍යවෘද්ධ අම්මා තාත්තා වගේම දැන් දැන් දිගටම රැකියාවට යන සැමියා ගැනත් හැමදෙයක්ම සොයා බලමින් ඔබ කරන මෙහෙය සුළු පටු නෑ.  ඒ අතරේ රාජකාරි කටයුතුත් නියමිත විදිහටම කරන්න උත්සහ කරන ඔබ තරම් විශිෂ්ඨ කළමනාකාරිණියක් වෙන නෑ. ඉතිං පොඩි අතපසු වීම් වලදි ඔබ ඔබට සමාව දෙන්න. කණ්ණාඩිය ඉදිරිපිටට ගිහින් ඔබවම අගය කරන්න. 

මොකද ඔබ,ඔබට කරන්න පුළුවන් උපරිමයටත් වඩා ඉශ්ඨ කරන ආදරණීය අම්මා කෙනෙක්, බිරිඳක් වගේම ඔබ සේවය කරන ආයතනයට සම්පතක්.

ඔබ ඔබට කාලයක් වෙන් කරගන්න

“වැඩ කරලා ඉවර නොමැත දෙවියනේ..” කියල සිතීම සාධාරණයි. බොහෝ කාන්තාවන්ගේ පොදු මැසිවිල්ල නම් ඔවුන්ට දවසේ පැය විසිහතර ප්‍රමාණවත් නොවන බවයි. ඉතිං ඇයි කියල හිතලා බැලුවද? අද කළයුතු දේ අදම කරන්න කිව්වට ඔබ දැඩි ආයාසයක් අරගෙන, ඔබේ මනස නිරවුල් නැති ඉතා පීඩාකාරී මොහොතක ඔබ අද කළයුතු දේ අදම කරන්න යන්න එපා. ඔබේ මනසට කුඩා විවේකයක් දෙන්න. ඔබ කැමතිම මුහුණට කරන සත්කාරයක් ( face pack ) හෝ හිස ගල්වන තෙල් සාත්තුවක් ( head / oil massage) . විනාඩි විස්සක පුංචි නින්දක් (nap) ඔබේ මනස ඉල්ලා සිටිනවා නම් ඇයි ඔබ එය නොදෙන්නෙ. මුළු ලෝකෙටම හුස්ම පිඹින ගෙදර අම්මා ඔබ, ඉතිං ඔබ ඔබටම පුංචි විවේකයක් දෙන්න. 

පොඩි කාලසටහනකට වැඩ කරන්න

එන එන විදිහට ගහ උළුවස්සා (spontaneous) ජීවිතයෙන් ඔබට මේ තරම් කාලයක් අවැඩක් උනේ නැති බව ඇත්ත. ඒත් දැන් පාසැල් කාලසටහනට පාසලේ වැඩකරපු පොඩ්ඩන්ව මෙහෙයවන්න වෙලා තියෙන්නෙත් ඔබට. ඉතින් ඔබට දෛනිකව කරන්නට තිබෙන රැකියා ස්ථානයේ රැස්වීම්, නියමිත දිනට භාර දීමට තිබෙන ව්‍යාපෘති ආදිය ගැන ඔබ කලින්ම දැනුවත් වෙන නිසා ඇයි ඔබ විනාඩි දහයක් අරගෙන පොඩි පිලිවළකට එය පෙළගස්වා ගන්නේ නැත්තේ. එහෙම කලොත් හැමදෙයක්ම නිවැරදි පිළිවලට වෙන බව දැනිලා ඔබේ සිත ප්‍රබෝධයෙන් පිරේවි. ඔබට වෙහෙසබව ඇත්තයි. ඒත් ඔබ තමා ඔබේ නිවසේ සියල්ල දරා සිටින කොඳුනාරටිය. අඩුම තරමේ ඔබ ඊළග පැයේ සිද්ධ කරන්නට යන කාරණා ගැන පැහැදිළි අවබෝධයකින් සිටීම ඔබේ මානසික සමබරතාවයට උදව්වක් වේවි.

ඔබේ දරුවන්ට ඔබේ රාජකාරී ලෝකය ගැන කියලා දෙන්න

වෙනදා ” අම්මා ඔෆිස් ගියා” කිව්ව පුංචිත්තන්ට, දැන් තමන්ගේ අම්මා ගෙදරට වෙලා ඉදගෙන මේ කරන ඔෆිස් යෑම ගැන නම් අපමණ ප්‍රශ්න ඇති. ඉතින් මේ ප්‍රශ්න අසමින් ඉගන ගන්න පොඩ්ඩන්ට ඔබේ රාජකාරියේ ස්භාවය පොඩ්ඩක් කියල දුන්නට වරදක් නෑ. ඒවගේම කියන්න එයාලගේ අනාගතය වෙනුවෙන් අම්මා එයාලත් එක්ක ඉන්න තියන මේ පොඩි පොඩි වෙලාවන් කැප කරගෙන ඒ රාජකාරිය අකුරට ඉෂ්ඨ සිද්ධ කළයුතු බව. අම්මට කරදර නොකරනවා නම් අම්මාට ළඟින් සෙල්ලම් කරමින් සිටිමට ඉඩ දිය හැකි බව.

මේ හැමදෙයක්ම තවමත් කරන්න බෑ කියල ඔබට හිතෙනවා උනත් ඔබ වටහා ගත යුතු එකම එක කාරණාවක් තිබෙනවා. ඒ තමයි ඔබ මේ ලෝකයේ හොඳම අම්මා බව. ඔය හිස දරන් ඉන්න “හොඳම අම්මා” කිරුළ පැහැරගන්න කිසිදු වසංගතයකට, දුක්පීඩාවකට හෝ නපුරු කාලයකට නොහැකි බව. 

අම්මාගේ ආදරය සුවපත් නොකළ තුවාලයක් මිහිමත නැත. අම්මාගේ ආදරය පිරියම් නොකළ බිඳුනු හදවතක් මෙළොව නැත. අම්මාගේ ආදරය තරම් අසමසම සුවදායක මිහිරක් මෙළොව නැත. Covid 19 ද මින් ඉදිරියට එන්නට නියමිත සියළු සුළි, කුණාටු , චණ්ඩ මාරුත සහ සුනාමි මත දරුවෙක්ට විශ්වාස කල හැකි යමක් වේ නම් ඒ ” අම්මා ” පමණය.

රාජකාරියට යන / නොයන සියළු අම්මලාට ආදරයෙනි.