දරුවන්ට හොඳම දේ දන්නා අම්මාගේ, කිරි වලට හැරවුන අසමසම ලේ ෆෝමියුලාව මේ ලෝකයේ ජීවගුණය පවත්වාගෙන යන මිහිරි අධිකාරය වන්නේය . ප්‍රාණවායුව ඔබට මුලින්ම පිඹින්නේ අම්මාය. ඒ ඔබ ඇය සමඟ මින් ඉදිරියට, දස මසක්ම එකට හුස්ම ගන්නට ගිවිසගත් අසිරිමත් පළවෙනි නිමේශයේ සිටය. ඔබට හඩන්නටද, තැවෙන්නටද, සැනසුමේ නිදන්නටද හැකි අති උණුසුම් ආදරණීය උරහිස ඇත්තේ අම්මා ළඟ පමණය. අම්මා අහස සේ අනන්ත බව ඇගේ කුසෙන් ළමැදටද, ළමැදෙන් උකුලට, උකුලෙන් පොළවට ද බට ඕනෑම දරුවෙකුට සිතෙනු නොඅනුමානය.
අම්මා තම දරුවන් සක්විති රජෙක් කරන්නට, රැජිනක් කරන්නට පතන බව නොදන්නා කෙනෙක් නැත . කිසිදු චිත්ත හෝ ශාරීරික පීඩාවක් තම දරු පැටියාට නොදැනෙන්නට, නොවන්නට ඕනෑම පරිත්‍යාගයක් කළ හැකි අන් අයෙක් වේ නම් මේ මිහිමත, ඒ අම්මා පමණමය. උනහපුලුවා පවා තමන්ගේ පැටියා මැණිකක් සේ රකින බව කියන්නේ ඒ නිසාය.
ඉතින් ඒ අම්මගෙන් සිදුවෙන්නට පුළුවන් පුංචි අත්වැරදීමකින් පවා ඔබේ දරු පැටියාගේ ජීවිතයේ දිශානතිය සම්පූර්ණයෙන්ම වෙනස් කළ හැකි බව ඔබ කවදාවත් සිතුවා ද?
අද කතාව ඒ ගැනයි.
තමන්ගේ පුංචි පැටියා වැටෙයි, තුවාල වෙයි, එයාට කරදරයක් වෙයි කියලා ඕනෙම අම්මා කෙනෙක් ඉන්නේ හිතේ කරදරෙන්. ඒක එහෙම වෙන්නේ, ඔබ ඔබේ දරුවාට දක්වන දැඩි ආදරය නිසා. පුංචි පැටියා ටික ටික ලෝකේ අඳුනගන්න කොට ඔබ ඔහුට හෝ ඇයට මග පෙන්වන්න, හරි දේ කියා දෙන්න උවමනා බව ඇත්තයි. පුංචි පැටියා හැමදේකින්ම දිනන්න ඕනි කියල ඔබ හිතන එකත් සාධාරණයි. ඒත් ඔබ මේ දේ වුවමනාවටත් වැඩිය කළොත්, දිගින් දිගටම කලොත් සිද්ධවෙන්නේ වෙන්නේ මොකක්ද කියල ඔබ හිතුවද?
එතකොට ඔබ නිකම්ම helicopter mom කෙනෙක් බවට පත් වෙනවා.
කවුද මේ helicopter mom කියන්නේ?
තමන්ගේ දරුවන්ට තිබෙන දැඩි ආදරය නිසාම ඔවුන්ගේ ජීවිත වලට වගේම තීරණ වලට දැඩිව බලපෑම් කරන මව්වරුන්ට තමයි helicopter moms කියන්නේ.
Helicopter mom කෙනෙක් නොවී ඉන්නේ කොහොමද?
- ඔබේ දරුවන්ගේ පුංචි පුංචි අරගල ඔබේ අරගල බවට පත්කරගන්න එපා.
හිතන්න ඔබේ පුංචි පුතා හොදම යාලුවා එක්ක බහින්බස්වීමක් වෙලා. දැන් කදුළු පුරවගෙන ඔබට පැමිණිලි කරනවා. දැන් ඔබ ඉක්මනින්ම පුතාගේ යාලුවගේ අම්මට දුරකතනයෙන් කතා කරලා මේ ගැන දන්වන්න හිතනවා නම් ඒක කවදාවත් කරන්න එපා. ඒ වෙනුවට පුංචි පැටියට ආවේග කළමනාකරණයේ පුංචිම පාඩම කියලා දෙන්න. අන් මත දරාගන්න ඉගෙන ගත යුතු බව කියල දෙන්න . ඉවසීමෙන් සැනසීම ලැබෙන බව කියලා දෙන්න.
- දරුවාගේ පාසලෙන් ලැබෙන පැවරුම් කවදාවත් ඔබ කරන්න එපා.
පෙරපාසල් යන පුංචිත්තට ගුරුතුමිය ඇඳලා එවපු දොඩම් ගෙඩියේ උඩ පරිප්පු ඇට ටික හරි තාරාවාගේ උඩ අලවන් එන්න කියපු පුලුන් ටික හරි පොඩිත්තා වෙනුවෙන් කවදාවත් ඔබ අලවන්න එපා. 1 ඉඳන් 500ට ලියන් යන්න ඕනි පොඩිත්තන්ගේ කොටුරූල් පොතේ 375 ඉඳන් 475 වෙනකම් ඔබ අංක ලියන්න එපා. පාසල් පැවරුම් වලින් දරුවෙකුට දැරිය හැකි ප්‍රමාණයේ ඉතා කුඩා පීඩනයක් ලැබීම, ගැටළු විසඳීමේ හැකියාව (problem solving skill) වර්ධනය කරන බව විශේෂඥ මතයයි. ඉතින් ඔවුන්ට ඔවුන්ගේ මාර්ග සොයා ගන්න ඉඩ දෙන්න. අසීරු පැවරුමක් උත්සාහයෙන් අවසන් කළ සෑම විටකම අගය කිරීමක් කරන්න .
- දරුවාගේ පුහුණුකරුවන්ට / ගුරුවරුන්ට ඔබ උගන්නන්නට යන්න එපා.
ඔබේ දරුවා කලාප ක්‍රීඩා උළෙලක අත්පන්දු කණ්ඩායමක ක්‍රීඩා කරනවා කියා සිතන්න. ඔබට අම්මා විදියට හොඳටම අයිතිය තියෙනවා ප්‍රේක්ෂකාගාරයේ ඉඳලා දරුවාට ජය ජය ඝෝෂා නගන්න. නමුත් ඊළගට දරුවා යොමුවිය යුතුයි කියල ඔබ හිතන තාක්ෂණික පහර ගැන කියලා කෑ ගහල දරුවගේ අවධානය බිඳින්න එපා, ඔබ ජාතික තලයේ අත්පන්දු ක්‍රීඩිකාවක් උනත්. මොකද එය සාමූහික ක්‍රීඩාවක්. අනෙක දරුවාට හෝ කණ්ඩායමට උදව් අවශ්‍යය නම් එය පුහුණුකරුවා/ගුරුවරයා විසින් ලබා දේවි. දරුවන්ගේ ගුරුවරුන්ව දරුවන් ඉදිරියේ අවතක්සේරු කිරීමෙන් වළකින්න. ඔබ කොයිතරම් ජගතෙක් උනත්. අනෙක අම්මා අහස තරම් බැනුම් අහනවා කියන කියමන මුසාවක් කරන්න පුළුවනුත් ඔබටම තමයි.
- හැම විටම දරුවාට නීති හෝ සීමා පනවන්න එපා.
ඔබේ දරුවාට ඔබගේ අසල්වැසියන්ගේ දරුවන් සමග සෙල්ලම් කිරීමට අවශ්‍ය බව කියන සෑම සාධාරණ අවස්ථාවකම එය වළක්වන්නට එපා. ඔබේ නිවසෙන් එපිට නමුත් ආරක්ෂිත සීමාවේ දරුවාට කෙලිදෙලෙන් පසුවෙන්නට අවසර ලබා නොදී ඉන්න එක නම් කවදාවත් කරන්න එපා. ඔබේ දරුවාට නිදහසේ වැඩෙන්න ඉඩ දෙන්න. ස්වාධීන මිනිසෙක් වීමට බාහිරතා බලපාන බව ඔබ මවක් ලෙස තේරුම් ගන්න.
- ඔබ ඔබේ නිවසේ මෙහෙකාරිය වෙන්න එපා.
නිවසේ සියලුම රාජකාරි ඔබ විසින් සිදු කළ යුතු බවට නියමයක් නැහැ. ඔබේ පොඩ්ඩා ටික ටික වැඩෙනකොට ඔහුට හෝ ඇයට නිවසේ ඉතා කුඩා කාර්‍යයන් පවරන්න. එය ඉටුකළ විට පසසන්න. තමන්ගේ ඇඳුම් නමා ගැනීම, පාසල් බෑග් ඒ පිළිවෙළට සාදා ගැනීම වගේ පුංචි කාරණාවලදී දිරි දෙන්න. දරුවන් වගකීම් සහගතව සහ ආත්ම විශ්වාසය ඇතුව වර්ධනයට එය මහත් රුකුලක් වේවි.
- ජයග්‍රහණය පමණක්ම සෑමවිටම වැදගත් හා අත්‍යවශ්‍ය බව ඒත්තු ගන්වන්න එපා.
පන්තියේ පළමුවැනියා වීමට හැම දරුවෙක්ටම හැකියාවක් නෑ. දුර දිවීමේ තරගයක වුණත් ත්‍යාග හා කුසලාන ලබාදෙන්නේ පළමු දෙවන හා තෙවන ස්ථාන වලට පමණයි. ජයග්‍රහණය කළ වගේම නොකළ නමුත් සහභාගීවූ සියලුම දෙනාම වැදගත් බව ඒත්තු ගන්වන්න. පැරදෙන්න ඉඩ අරින්න. වැරදෙන, පැරදෙන වාරයක් වාරයක් පාසා නැවත නැගී සිටිය යුතු බවට ධෛර්යය දෙන්න.
අපේ දරුවන්ගේ ජීවිත වලට අනවශ්‍ය තරම් වන මේ මැදිහත්වීම් දරුවන්ගේ ආත්ම විශ්වාසය සහ ආත්ම අභිමානය පිළිබඳව ගැටලු ඇති කරවන්නක් බව දැන් ඔබට තේරෙන්නට ඕන. අනාගතයේ තීරණ ගැනීමේදී හෝ ජීවිතයේ මුහුණ පාන්නට වෙන යම් කිසි ගැටළුකාරී තත්ත්ව වලදී පිළිතුරු සොයා ගන්නට බැරුව දරුවන් අසරණ වෙන විට ඒ සහය දෙන්න, ඔබ මේ ලෝකේ නොසිටින්නත් පුළුවන්. දරුවන් ස්වාධීන පෞරුෂ ලෙස ගොඩනැඟිය යුතු බව අපි යෝජනා කරන්නේ ඒ නිසයි. දරුවන්ගේ පෞරුෂ වර්ධනයට කුඩා කාලයේ දෙමාපියන්ගෙන් සිද්ධ වෙන බලපෑම ප්‍රාමාණික ව ගත්තොත් ඉතාම විශාලයි. ඒ නිසාම දරුවන්ගේ කායික වගේම මානසික සංවර්ධනයටත් අපි වගකීමෙන් බැඳී සිටිනවා. Helicopter mom සංකල්පය මවගේ පැත්තෙන් ඇතැම් විට මවට යම් සහනයක් ගෙන දෙන්න පුළුවන් . “හැමදේම හොඳින් සිද්ධ වෙනවා” වගේ තාවකාලික සහනදායීභාවයට පත් වෙන්න ඔබට හැකි උනත් දිගුකාලීනව ඔබේ දරුවාට එය හානිදායක වන බවත් ඒ හානිය කිසිදා පූරණය කළ නොහැකි බවත් ඔබ තේරුම් ගත යුතුයි.
ඉතින් ලස්සනම මල් පුබුදුවන අම්මා ඔබ වෙන්න. මල් පිපෙන්න ඕනෑම කරන හිරු එළියත්, ජලයත් , පෙරලූ නැවුම් පසත්, සරු පොහොරත් සම්පාදනය ඔබට අයිති නමුදු, මල්වත්තේ සදාතනික පරිපාලනය ඔබට අයිති නැති බව තේරුම් ගන්න. මන්ද නිදහසේ හැදෙන ඒ හැම මලක්ම එයට අනන්‍ය සුවඳවත් භාවයෙන් ලෝකය ආනන්දය කරා ගෙන යන බවද ලෝකය වඩා සුන්දර තැනක් කරනු ඇති බවද අපි විශ්වාස කරන නිසාය.
අම්මලාට ආදරයෙනි…
