අකුරු උගන්වන්න කලින් ඔබ දරුවා සමග කලයුතු දේ …

දරුවෙක් ළදරු පාසලකට ඇතුලත් කිරීමේදී වුනත් අම්මලා අහන්නේ…නර්සරියේ අකුරු උගන්වනවද…?අනේ එහෙම නැත්නම් අකුරු උගන්වන එකක් හොයා ගන්න වෙනවා. දරුවාට අකුරු උගන්වන්න අම්මාට තිබෙන්නේ පුදුම ලහියක්.නමුත් දරුවාගේ ශරීර වර්ධනය සහ මොළයේ සංවර්ධනයත් සමග අකුරු ලිවීම කිසිම ගැටලුවක් වෙන්නේ නැහැ.අකුරු නොලීවාට පෙර පාසල් වයසේ දරුවන් වෙනුවෙන් කළ හැකි ක්‍රියාකාරකම්  බොහොමයක් තිබෙනවා.

සෙල්ලම් කරන්න ඉඩ දෙන්න

දරුවන් සෙල්ලම් කරනවාට අම්මලා බොහොම බයයි. සෙල්ලමට වැටුනොත් දිනපතා පාසලේදීත් අකුරුට නොවෙයි..සෙල්ලමට හිත වැටෙයි කියන අනියත බිය අම්මලාට තිබෙනවා.නමුත් ඒ ගැන බියක් ඇති කර ගන්න එපා. සෙල්ලම තුලින් දරුවා ලබන අත්දැකීම් ඔබට හෝ වෙනත් ගුරුවරයෙකු ලවා දරුවාට ලබා දෙන්න ඔබට හැකියාවක් නැහැ.ඒ නිසා පුංචි හිතට සතුට සදන සෙල්ලම් ලෝකයට බාධා කරන්න එපා.

 

පාට කරන්න ඉඩ දෙන්න

පාට කුරක් පැන්සලක් ඇල්ලූ සැනින් දැන් ඉතින් බිත්ති විනාස කරයි කියලා පාට කුර දරුවාගෙන් ඉවත් කරන්න එපා.බිත්තිය අපිරිසිදු කරනවා නම් හිතේ තිබෙන සිතුවිලි නිදහසේ මුදා හරින්න තැනක් හෝ කොළයක්, පොතක් ඔවුන්ට ලබා දෙන්න. අකුරු නොලීවාට චිත්‍රයෙන් සහ එකතු කරන වර්ණ වලින් දරුවා බොහෝ දේ ඔබට කියනු ඇති.

 

රූප අලවන්න සහ කපන්න ඉඩ දෙන්න

පත්තරවලින් හෝ පරණ සගරා ආදියේ ඇති පින්තූර කපන්න වගේම නිදහසේ අලවන්න අවසරය දෙන්න. පින්තුරයක් කපන විට වගේම අලවන විට දරුවා ඒ වෙනුවෙන් අවධානයක්,සැලකිල්ලක් දක්වනු ඇති. ඒ වගේම පින්තුරය අලවා අවසානයේදී එයින් තෘප්තියක් ලබනවා වගේම බොහෝ දේ මේ පින්තූරයෙන් ඉගෙනීමටත් දරුවාට අවස්ථාව ලැබෙනවා. අලියා ගේ රූපයක් කපන විට දරුවා නොදැනීම අලියාගේ කණ්වල විශාලත්වය, සොඬවැලක් ඇති බව සහ තරබාරු සිරුර වැනි සංකල්ප බොහොම නිදහසේ ඉගෙන ගැනීමට යොමු වීම සැබෑම ආශිර්වාදයකි.

 

වතුර අල්ලන්න,මැටි අනන්න

වතුර ඇල්ලුවොත් හෙම්බිරිස්සාව හැදෙයි කියලා ඔවුන් වලක්වන්න එපා. වතුර සහ මැටි සමග සෙල්ලම් කරන විට දරුවාගේ හසුරු කුසලතාවයන් වර්ධනය වෙනවා.ඔවුන්ගේ නිර්මානශීලිත්වය අවදි වෙනවා.ඇඟිලි තුඩු ක්‍රියාකාරී වීමත් මේ සෙල්ලම් ඇසුරින් දරුවාට ලැබෙන වාසි සේ  සලකන්න.

 

නූලකට පබළු අමුනන්න

නූලක් හෝ වෙනත් දෙයකට සිදුරු ඇති ඇට හෝ පබළු ඇමිණීම නිසා දරුවා යම් කාර්යක් ඉවසීමෙන් හා අවධානයෙන් කිරීමට ඉගෙන ගන්නවා. හැබැයි දරුවා ඇට කටේ කනේ දමා ගැනීමට ඉඩ තිබෙන නිසා ඔබේ අවධානයත් වැදගත්.මේ කාර්යය බොහොම සෙමෙන් සිදු වීමත් සමග එය අවධානයේදී දරුවාට තමාගේ කාර්යය අවසානව සතුටට පත් වීමට පුලුවනි.

 

බෝල ඇල්ලීම

බෝල ඇල්ලීම වැනි ක්‍රිඩා නිසා දරුවා යම් දිශාවක් අනුව හැසිරීමට වගේම හාරිරිකව වෙහෙස වීම නිසා ව්‍යායාමයක්ද නොදැනීම උපයා ගන්නවා.

 

ප්‍රහෙලිකා  සවි කිරීම

ප්‍රහෙලිකා පිරවීම වැඩිහටියන්ගේ මානසික ව්‍යායාමයක් වන්නා සේම ප්‍රහෙලිකා සවි කිරීම දරුවන්ගේ මනසට හොඳම ව්‍යායාමයක්. ප්‍රහෙලිකා සකස් කරන විට යම් තාර්තික බවක් වගේම අවධානය දැක්වීම වැනි හැකියාවන් ගොඩ නැගෙනවා.

 

පරිසරය සමග විවිධ දේ අත්හදා බලන්න

දරුවන් කුඩා කාලයේ පටන්ම පරිසරය දකින්න වගේම විඳින්න හුරු කිරීම ඉතා වැදගත්. දකුණු කොරියානු දෙමව්පියන් ඔවුන්ගේ කුඩා දරුවන් පරිසරය විඳිම වෙනුවෙන්ම යම් යම් මධ්‍යස්ථාන වෙත රැගෙන යනවා. එහිදී ඔවුන් සති දෙකක් පමණ දරුවා නේවාසික කරනවා. ඒ කාලයේදී දරුවා ගහ කොළ,මල්,පළතුරු සමග ජීවත්වෙන අතර මෙම පරිසරයෙන් ලබා ගන්නා ආහාරපානවලින්ම කාලය ගෙවන්න සැලසුම් කරනවා. මේ නිසා දරුවන්ට මලක් පිපෙන,පරවෙන,කුරුල්ලෙක් ඉගිලෙන, බළලෙක් ඤාව් කියන පාරිසරික සංසිද්ධීන් ගැන අත්දැකීම් ලබා ගත හැකියි.

 

කුඩා දේවල් අහුලන්න

ඉස්සර කාලයේ නම් අම්මලා දරුවන්ට මිදුලේ තිබෙන වැටුන කොළ අහුලන්න, හාල්වල තිබෙන වී ඇට අහුලන්න වැනි කුඩා දේවල් අහුලන්න පුරුදු කළේ අධ්‍යාපන මනෝවිද්‍යාව දැනගෙන නොවෙයි.නමුත් පෙර පාසල් වයසේ දරුවන්ට කුඩා කුඩා දේ අහුලන්න පුරුදු කිරීම ඔවුන්ගේ හැකියාවන් වැඩි දියුණු කිරීමට යෝග්‍ය තත්වයක්.

 

හිතට එන අදහසක් පත්තරයකින් පළ වුනාම ලැබෙන සතුට දන්නේ ඒ අත්දැකීම ලබන කෙනෙක් පමනයි. මේ නිසාම දන්නා කාලයේ පටන්ම ලියන්න ලැබෙන හැම මොහොතකම යමක් ලිව්වා. ඒවා පළ වුනා.දැනට මහවැලි ජාතික අධ්‍යාපන විද්‍යා පීඨයේ පුස්තකාලයාධිපතිනිය ලෙස සේවය කරන අතර ලේඛනය අමතක කරන්නේ නැහැ.කැළනිය විශ්ව විද්‍යාලයේ ශාස්ත්‍රපති උපාධිය සහ පේරාදෙණිය විශ්ව විද්‍යාලයේ කලා උපාධිය වෙනුවෙන් කිසිම අපහසුතාවයක් ඇති නොවුනේද ලිවීමේ කලාවට පිං සිදු වෙන්නයි.නිවස , රැකියාව සහ පවුල සමග වූ ගණුදෙණුව ලිවීමේ කලාවට හරස් නොවන සේ පවත්වා ගෙන යන අතර මගේ ජීවිතයට ලේඛනයත් නොදැනම බද්ධව තිබෙනවා විය හැකියි.

LEAVE A REPLY

Please enter your comment!
Please enter your name here