වීඩියෝ ගේම්ස් කියන්නේ අද වෙද්දි පිස්සුවක්. නව යොවුන් වියේ තරුණ දරුවෝ විතරක් නෙවෙයි විවාහක අවිවාහක වැඩිහිටි වියේ අයත් මේ වීඩියෝ ගේම්ස්වලට පුදුම විදියට ආදරය කරන්න පටන් අරගෙන. ඇත්තටම කිව්වොත් වීඩියෝ ගේම් එකක් කියන්නේ මොකද්ද? ඒකට පුළුවන්ද අපේ ජීවිතවලට හානි කරන්න කියලා හිතන එකත් මේ ගේම්වලට ඇබ්බැහි වූවන්ටම පොදු සිතිවිල්ලක් කිව්වත් වරදක් නැති තරම්. ඒත් ලොව පුරා මනෝ වෛද්‍ය සමීක්ෂණවලට අනුව වීඩියෝ ගේම් කියන්නේ අපේ ජීවිත අපිටත් හොරෙන් වෙනස් කරන්න පුදුම හැකියාවක් තියෙන ඇබ්බැහියක්.
Fortnight, League of Legends, World of Warcraft, pubG , Clash of Clans ලොව පුරා බොහොම ප්‍රචලිත වීඩියෝ ගේම්ස් කිහිපයක්. මෙන්න මේ ගේම්ස් සුළු මොහොතක සතුටක් වින්දනයක් අපේ ජීවිතයට එක් කළත් දිගු කාලීනව අප තුළ ඇති කරන්නේ ගැටලුම පමණයි. එය ඔබ වටහා ගන්නා විට බොහෝ සෙයින් ප්‍රමාද විය හැකියි.
වීඩියෝ ගේම්ස් අපේ මනසට බලපෑම් කරන්නේ කොහොමද?
ඇතැම් වීඩියෝ ගේම්ස්වල ප්‍රචණ්ඩත්වය අන්තර්ගත වනවා සේම ඇතැම් ඒවා බොහොම ආකර්ශණීයව නිර්මාණය වී තිබෙනවා. උදාහරණ විදියට Fortnight, World of Warcraft වැනි වීඩියෝ ගේම්ස්වල තියෙන්නේ ප්‍රචණ්ඩත්වය. නිතර නිතර ප්‍රචණ්ඩත්වය ඇතුළත් මෙවැනි ක්‍රීඩාවක නිරත වීම හිත තුළ තරහව, නුරුස්සා බව වර්ධනය කිරීමට හේතු වන බව මනෝ වෛද්‍ය පර්යේෂණ මගින් පෙන්වා දෙනවා. මෙවැනි වීඩියෝ ගේම්වලට ඇබ්බැහි වන පුද්ගලයා කිසි විටෙකත් තමාගේ එම වෙනස්කම් හඳුනා ගන්නේ නම් නැහැ. ඔහු හිතන්නේ ඔහු බොහොම සාමාන්‍ය අයෙක් විදියට වුණත් ඔවුන්ගේ පවුල් වටපිටාවේ සිටින අයට නම් මේ වෙනස් වීම් හොඳින් නිරීක්ෂණය වෙනවා.
World of Warcraft වැනි වීඩියෝ ගේම්ස් බොහොම ආකර්ෂණීය ආකාරයෙන් නිර්මාණය කර තිබෙනවා. මෙවැනි වීඩියෝ ගේම්වලට ඇබ්බැහි වූවන් තමන්ගේ සිරුරේ හැඩය, පෙනුම වෙනස් කරගත හැකි යැයි සිතමින් සැබෑ ලෝකයේ ස්වභාවයෙන් තොරව සිහින ලෝකයක ජීවත් වීමට පටන් ගන්නවා. මේ තුළම ජීවත් වන අයෙක් යම් කාලයක් තුළදී තමා ගැන ඇති අභිමානය බිඳ වැටී දුකට පත් වෙනවා. මෙවැනි ක්‍රීඩාවල දීර්ග කාලීන ඇබ්බැහියෙකු වීම විෂාදය තෙක් ඔබව රැගෙන යාමට පවා හේතු විය හැකියි. මොකද මෙම විඩියෝ ගේම් නිර්මාණය කර ඇත්තේ ඉතා ආකර්ෂණීය ලෙසටයි. ඉතිං ඕනෑම අයෙක් ඇබ්බැහි වෙන සුලුයි. එහිදී සතුටට පත් වුවත් සැබෑ ලෝකේදී ඒ කියන්නේ සාමාන්‍ය ජීවිතයේදී ඒ ආකාර වූ උද්දීපනයක් නොමැති නිසා එවැනි පුද්ගලයන් තුළ කලකිරීම් ස්වභාවයක් ඇති වෙනවා. සිතේ සතුට පහව යනවා. නව යොවුන් වියේ දරුවන් මෙවැනි වීඩියෝ ගේම්වලට ඇබ්බැහි වීමෙන් ඉගෙනීම පවා කඩා කප්පල් කරගන්නවා.
Fortnight, Clash of Clans, වගේ තරගකාරීත්වය වැඩි වීඩියෝ ගේම් වල නිරත වීම නිසා ඒවා සාමාන්‍ය ජීවිතයට ඇතුළු වී එම පුද්ගලයන් තුළ ආත්මාර්තකාමී අභිමානයක් නිරායසයෙන්ම උපදවනවා. ඒ හරහා සමාජ සම්බන්ධතා ගිලිහී යන අතරම සමාජ සුහදතාවය පවත්වා ගැනීමට එය විශාල බාධවක්. මේ හේතු මත සාර්ථකව රැකියාවට පවා මුහුණ දීමට ඔවුන් අසමත් වේ.
Fortnight, Call of Duty වැනි වීඩියෝ ගේම්ස් පුරා ප්‍රචණ්ඩත්වය ඇති අතරම දිගු කාලීනව මෙම ගේම්ස්වලට ඇබ්බැහි වූවෙක්ගේ පෞරුෂත්ව ගැටලු මතු වෙනවා. එනම් ආවේගශීලී ඒවගේම ආත්මාර්තකාමී පෞරුෂයන් ඇති වෙනවා. ඒ වගේම නව යොවුන් වියේ බොහෝ පිරිස් යොමුව සිටින PubG වැනි වීඩියෝ ගේම්ස් බොහෝ සෙයින් ආකර්ශනීය නිසා නොදැනුවත්වම ටිකෙන් ටික එයට ඇබ්බැහි වෙනවා. එය ඉතා උනන්දුවෙන් ආසාවෙන් එහි එල්බ සිටින තැනැත්තාට නොවැටහුණත් වැඩකටයුතු සියල්ල අඩාල කරගනිමින් වවීඩියෝ ගේම් එකක නිරත වන බව බාහිර පුද්ගලයන්ට අවබෝධ කරගත හැකියි. නමුත් මෙහි නිරතවන්නා මේ හේතුවෙන් තමාගේ අධ්‍යාපන කටයුතු, කාර්යාල වැඩකටයුතු මගහැරෙන බව හෝ තමාට අධික ලෙස කෝප ගැන්වීම වැනි මානසික සංකූලතා ඇති බව වටහා නොගනී. නව යොවුන් වියේ දරුවන් මෙන්ම වැඩිහිටි පිරිස් වුවද මෙවැනි වීඩියෝ ගේම්ස්වලට ඇබ්බැහි වීම ඉතාම ඛේදනීය තත්ත්වයක්. ඇබ්බැහි වීම වැඩි වීඩියෝ ගේම්ස් ජීවිතයේ එකම එක පාරක්වත් උත්සාහ කරන්න පවා එපා යනුවෙන් මනෝ වෛද්‍යවරු උපදෙස් දෙන්නේ එයද හෙරොයින් වැනි මත්ද්‍රව්‍යයකට ඇබ්බැහි වීම හා සමානම නිසයි.
මෙන්න මේ වීඩියෝ ගේම් නම් ජීවිතේට එක පාරක්වත් උත්සාහ කරන්න එපා
- Fortnight
- league of legends
- World of Warcraft
- PubG
- Clash of Clans
මෙම වීඩියෝ ගේම් පහ නිර්මාණය කර ඇති ආකාරයට එහි නිරතවන්නා එයට ඇබ්බැහි වීමේ ප්‍රවණතාවය ඉහළයි.
වීඩියෝ ගේම්වලට ඇබ්බැහි වීම අපේ ජීවිතයට බලපාන්නේ කොහොමද?
- සැබෑ ජීවිතය ඉතා කම්මැලි සහගත එකක් වීම
- අධ්‍යාපනය අතර මග නරත වීම
- ප්‍රචණ්ඩකාරී හැඟීම් ඇතිවීම
- නුරුස්නා ස්වභාවය/ආත්මාර්තකාමී බව
- කනස්සල ඇති වීම පසුව එය විෂාදය තෙක් වර්ධනය වීස
- සමාජශීලී බව අඩු වීම නිසා සමාජීය කුසලතා නොමැති වීම
මෙවැනි තත්ත්ව මත නිකරුණේ ජීවිත විනාශයට පත් වී අනාගතය ගැටලුකාරී වනු ඇත. අන්න ඒ නිසාම ඔබත් මානසික නිරවුල් බව තුළින් සාර්ථක ජීවිතයක් වෙනුවෙන් වෙහෙසෙන්න. දැනුවත් වෙන්න.
විශේෂඥ මතය, අදහස සහ මූලික සටහන:
විශේෂඥ වෛද්‍ය මියුරු චන්ද්‍රදාස
ළමා සහ යොවුන් මනස පිළිබඳ විශේෂඥ වෛද්‍ය – රාගම ශික්ෂණ රෝහල / ජ්‍යෙෂ්ඨ කථිකාචාර්ය – කැලණිය විශ්වවිද්‍යාලය
