බබා ලැබුණු අම්මට තැම්බුම් හොද්දෙන් ලැබෙන ගුණ

දරුවකු ප‍්‍රසූත කළ මවක් සිටින නිවසක මුළුතැන් ගෙයි සෑදෙන තැම්බුම් හොද්ද නොහොත් කායම් හොද්ද ගැන පැරැන්ණන් හොඳින් දනී. අදටත් ශ‍්‍රී ලංකාවේ ග‍්‍රාමීය පෙදෙස්වල ජීවත් වන ජනයාට මෙය අලුත් දෙයක් නොවේ. දරුවකු බිහි කළ මවගේ ඇගේ පතේ වේදනාව දුරු වීමට මේ කායම් හොද්ද උපකාරී වන බව නොරහසකි. එමෙන්ම කායම් හොද්ද පානයෙන් මවකගේ අරුචිය තුරන් කර කුසගින්න ඇති කරයි. මීට අමතරව දේශීය වෛද්‍ය විද්‍යානුකූලව විශේෂයෙන්ම එය ගර්භාෂය පිරිසිදු වී අපවිත‍්‍ර කොටස් පිට කිරීමටත් උපකාරී වේ.

මෙම ලිපිය මගින් සාකච්ඡා කිරීමට බලාපොරොත්තු වනුයේ මෙකී තැම්බුම් හොද්ද සාදාගැනීමට අවශ්‍ය දේ, සාදන ක‍්‍රමය සමග ප‍්‍රධානවම එමගින් ලැබෙන සුවිශේෂී ගුණ පිළිබඳවයි.

කාන්තාවක් ගර්භණී මවක් ලෙස දරුවකු පිළිසිඳ ගැනීමේ සිට මාස 10 කට ආසන්න කාලයක් හොඳින් පෝෂණය වී සෑම විටම නිරෝගීව සිටීමට උත්සහ කරයි. එලෙසම දරු ප‍්‍රසූතියෙන් පසු කාලය හෙවත් සූතීකා සමයේදී තම කිරි කැටි බිළිදුට අවධානය දෙන අතරතුර තම නිරෝගී බව පිළිබඳව ද සැලකිලිමත් විය යුතුය. මෙසේ සූතිකා සමයේ මවගේ නිරෝගීතාවය වර්ධනය කිරීමට කායම් හොද්ද මහත් සේ උපකාරී වේ.

දරුවකු ප‍්‍රසූත කළ පසු නොහොත් සූතිකා සමයේ මවකට මුහුණදීමට සිදුවන සෞඛ්‍ය ගැටලු පොදුවේ ආයුර්වේද වෛද්‍ය විද්‍යානුකූලව ”සූතිකා ව්‍යාපත්” ලෙස දක්වන අතර මෙම සංකූලතා බෙහෝමයක් ඇතිවීම වැලැක්වීමට භාවිත කළ හැකි විශේෂ ඖෂධයක් ලෙස මෙම කායම් හොද්ද ද දේශීය වෛද්‍ය ක‍්‍රමයේ දක්වා ඇත. කායම් හොද්ද ඖෂධීය ගුණ ඇති හෙයින් එය ඖෂධයක් ලෙස මෙන්ම දියරමය ආහාරයක් ලෙසද දැක්වීම වැරදි නැත.

ලංකාවේ ඇති විවිධ දේශීය වෙද පරම්පරා හා පළාත් ප‍්‍රදේශ අනුව මෙම කායම් හොද්දට යොදන ද්‍රව්‍ය එකිනෙකට වෙනස් විය හැකි නමුත් පොදුවේ ඒ සඳහා අනිවාර්යයෙන්ම යොදන ද්‍රව්‍යයන් දැක්විය හැක.

වියළි ඉඟුරු, සුදු ලූණු, පෙරුම්කායම්, ගම්මිරිස්, එනසහල්, කරාබු නැටි, මුරුංගා පොතු, ගොරකා, කුරුඳු පොතු, කොත්තමල්ලි, සූදුරු, සියඹලා ඊට උදාහරණයි.

ඉපැරණි කල්හි සූතිකාවකට දරු ප‍්‍රසූතියෙන් පසු මාසයක් හෝ දෙකක් දිනපතා ආහාර වේලකට එක් වන මෙම තැම්බුම් හොද්ද වර්තමානයට යොදා ගැනීම තර්කානූකූල බැවින් එය ක‍්‍රමවත්ව සාදා ගන්නා ආකාරය පහත පරිදි වේ.

 

ඒ සඳහා අවශ්‍ය ද්‍රව්‍ය වනුයේ,

  • ගම්මිරිස් ඇට 10-15
  • සුදු ලූණූ බික් 5
  • බැදින ලද කොත්තමල්ලි තේ හැඳි 1
  • බැදින ලද සූදුරු තේ හැදි 1
  • බැදින ලද උළුහාල් ස්වල්පයක්
  • පිට සුඹුල හැර සෝදාගත් මුරුංගා පොතු කැබැල්ලක් (අඟල් 2 ක පමණ)
  • පිට පොත්ත හැරගත් අමු ඉඟුරු අඟලක පමණ කැබැල්ලක්
  • ගොරකා කැබලි 2
  • කරපිංචා ඉති 2
  • අමු කහ කැබැල්ලක්
  • අවශ්‍ය පමණ දිය ලුණු
  • පෙරුම්කායම් ස්වල්පයක්
  • වතුර කොප්ප 4 ක්

පිරිසිදු මැටි භාජනයකට වතුර කෝප්ප 4 දමා ඊට ඉහත ද්‍රව්‍ය යොදා එය මද රස්නයෙන් පිසෙන්නට හැර කෝප්ප 2 ක් දක්වා සිඳවා ගත යුතුය.

ඉහත යොදා ගත් ද්‍රව්‍ය පොදුවේ ගත් කළ ඒවායින් ලබා දෙන ගුණය කායම් හොද්දේ විශේෂ ගුණ ලෙස අත්විය හැක. සාමාන්‍ය දරු ප‍්‍රසූතියෙන් පසුව ගර්භාෂය තුළ ඉතිරි වී පවතින අපද්‍රව්‍ය කොටස් යෝනි මාර්ගය හරහා ඉවත් කිරීමට අවශ්‍ය ගර්භ සංකෝචන ගුණය ඇති කිරීමේ හැකියාව මෙය සතුය. ප‍්‍රසූතියේදී ඇතිවන අස්ථි, සන්ධි හා මාංශ පේශී වේදනාව, ප‍්‍රජනන පද්ධතිය ආශ‍්‍රිතව ඇති පටකවලට සිදුවන හානි වීම් නිසා ඇති වන වේදනාව නැති කිරීමට හැක.

සාමාන්‍ය ප‍්‍රසූතියේදී මෙන්ම සිසේරියන් සැත්කම්වලදී ඇති වන තුවාල ආසාදනයට ලක් විය හැක. නමුත් මෙහි ඇති ඖෂධීය ගුණ මගින් එම තුවාල වේගවත්ව සුව කිරීමේ ගුණය හා ප‍්‍රතිජීවක ගුණය ලබාදීමේ හැකියාව ඇත.

ප‍්‍රතිශක්තීකරණය ඉහළ මට්ටමක පවත්වා ගත හැකි අතර එමගින් පොදුවේ රෝග සියල්ලටම ඔරොත්තු දීමේ හැකියාව වැඩි වේ. මෙහි මද විරේචන හැකියාවක් ඇති බැවින් මල බද්ධය දුරලන අතර අරුචිය නැති කර අග්නිය වර්ධනය කර පෝෂණය නිසි ලෙස උරාගැනීමට අවශ්‍ය කරන වටපිටාව නිර්මාණය කරන අතර එමගින් මනා සෞඛ්‍යයක් හිමි සූතිකාවක් නිර්මාණය කරයි. එය වක‍්‍රානුකූලව අලුත උපන් බිළිදාටද සෞඛ්‍ය සම්පන්න ලෙස බලපානු ඇත.

 

ලිපිය සකස් කළේ

මාතර විශ්ව විද්‍යාල විද්‍යායතනයේ බාහිර කථිකාචාර්ය,
ආයුර්වේද වෛද්‍ය කේ. අචලා ද සිල්වා.
B.A.M.S (ගෞරව ) (කොළඹ)
අශ්වින් ආයුර්වේද වෛද්‍ය මධ්‍යස්ථානය, අම්බලන්ගොඩ, හික්කඩුව.

 

අධ්‍යාපනික අතින් කොයිතරම් උසස් මට්ටමක හිටියත් අම්මෙක් වුණාම ඇති වන ගැටලූවලට අපි ළඟ පිළිතුරු නෑ. මව්පදවියත් එක්ක දහසකුත් එකක් ප්‍රශ්න මටත් ඇති වුණා. ඔය අතරෙදියි මව්වරුන් වෙනුවෙන්ම වෙන්වුණු පුවත්පතක සංස්කාරකවරිය විදියට සේවය කරන්න මට අවස්ථාව ලැබුණේ. අම්මා කෙනෙක් විදියට මට ඇති වෙන ගැටලූ අධ්‍යාපනය අතින්, මිල මුදල් අතින් ඉහළ, පහළ ඕනෑම තරාතිරමක හැම අම්මා කෙනෙක්ටම පොදුයි කියලා ඔය අතරෙදි මම තේරුම් ගත්තා. මගේ අත්දැකීම්, දරුවන් ගැන මට තියෙන ගැටලූ ගැන වෘත්තීමය සුදුසුකම් සහිත පුද්ගලයන් එක්ක සාකච්ඡ කරලා, සටහන් කරන්න මම හිතුවේ දහස් ගණනක් මව්වරුන්ට නිවැරදිම මගපෙන්වීම අවශ්‍ය බව දැණුනු නිසා.

LEAVE A REPLY

Please enter your comment!
Please enter your name here