දරුවෙකු ලෝකයට සම්ප්‍රාප්ත වෙන්නේ හිස් දෑතින් නොවේ. ඔවුන්ගේ අත මිට මොළවාගෙන එන කුසලතාවයන් බොහොමයක් තිබෙනවා. මේවා එකවර දිගහැරෙන්නේ නැත. මලක් බොහොම සෙමින් පෙත්තෙන් පෙත්ත විකසිත වන්නා සේ දරුවන්ගේ නිර්මානශීලීත්වයත් සීරුවට අවදි විය හැකියි.
මොනවද මේ කුසලතා..
දරුවෙකු තුළ සැගවුන කුසලතාවයන් බොහොමයක් තිබෙන්න පුලුවනි.ඒවා චිත්‍ර,නැටුම්, සංගීතය , නිවේදන හෝ වෙන ඕනෑම ආකාරයක විශේෂ හැකියාවක් විය හැකියි.සමහර දරුවන් තුළ බොහෝ හැකියාවන් සැඟවී තිබෙන්න පුළුවනි. ඒත් සමහර දරුවන් තුළ කුමන හෝ එක් හැකියාවක් සැගවී තිබෙන්න පුලුවනි.
වැදගත් වෙන්නේ කුසලතාවයන් මිස ප්‍රමාණය නොවේ..
මව්පියන් විදිහට ඔබ දරුවාගේ සැඟවුන කුසලතාවයන් හඳුනා ගැනීම මිස ඒවායේ සංඛ්‍යාව ගැන ප්‍රමුඛතාවය ලබා දිය යුතු නැත.ඔබේ දරුවාට නැටුම්, චිත්‍ර ,සංගීතය ගැන කිසිදු හැකියාවක් නොමැති වුනත් නිවේදන කටයුතු ගැන යම් හැකියාවක් ඇති.ඔබ නැවතිය යුත්තේ එතැනයි.
- “අපේ පුතාට කිසිම හැකියාවක් නැහැ..” කියනවා වෙනුවට පුතාගේ හැකියාව ඔබ වටහා ගත යුතුයි.
කුසලතාවය දරුවාට අනන්‍ය වෙන්න පුලුවනි..
ඔබේ දරුවාගේ හැකියාව අසල්වැසි දරුවාට හෝ ඔබේ සහෝදරයන්ගේ දරුවාට හෝ සමාන වෙන්නේ නැත.ඒ වගේම ඔබට ඇවැසි දක්ෂතාවය දරුවාට පිහිටන්නේත් නැහැ.දරුවෙකුට කුසලතාවයන් කීපයක් හෝ එකක් තිබිය හැකියි. ඒවා ඔවුන්ට අනන්‍යයි.ඒ නිසා දරුවා සතුව පවතින මෙම ශක්තීන් එකක් හෝ කීපය දෙමව්පියන් ලෙස ඔබ හදුනා ගන්න. එය ඔබේ වාරයයි.
කුසලතාවයන් සංවර්ධනයේ වාසි මොනවාද..?
විද්‍යාව ,ගනිතය,ඉංග්‍රිසි මිසක හෙට දවස ජයගන්න නටලා සින්දු කියලා බැහැ… සමහර විට මේ ඔබේ තර්කය විය හැකියි.ඒත් පාසල් අධ්‍යාපනයේදී ලබන හර විෂයන් සමග දරුවන්ට සෞන්දර්ය විෂයන් එකතු කර තිබෙන්නේ ඇයිදැයි ඔබ සිතුවාද..? වෙහෙසකර අධ්‍යාපන රටාවේදී මෙම සෞන්දර්ය විෂයන් ඉගෙනීම මගින් දරුවා යම් විනෝදයක් හා සතුටක් ලබනු ඇත.සතුට කිසිදු දිනක මුදලින් ලබා ගැනීමට බැහැ. දරුවන්ගේ සියුම් සංවේදනයන් අවදි කිරීමට සෞන්දර්යාත්මක රස වින්දනය ඉතා වැදගත් නිසා නිතරම ඔවුන්ගේ කුසලතාවයන් දිග හැරෙන්න ඉඩ දෙන්න.
චිත්තවේග පාලනය..
දරුවන්ට මොන පීඩනයක්දැයි ඔබ හිතුවත් ඔවුන්ගේ හිතේ පිඩනයක් නැත්තේම නැහැ. ඒවා පිට කරන අවස්ථාවන් සමහර විට දරුණු විය හැකියි. ඒ නිසා දරුවන්ගේ සිතට සතුටක් ලබා දෙන අන්දමේ සෞන්දර්යාත්මක පැත්තට ඔවුන් යොමු කරන්න.මේ වෙනුවෙන් උදාහරණ ඔබේ ජීවිතයේදීම ඇති..
දරුවෙකුට පාට පැන්සල් කුරක් ලබා දෙන්න..ඔහු ඒ මත විටෙක වේගයෙන් කුරුටු ගාන්න පුලුවනි. සමහර විට කඩදාසිය ඉරී යන තරම් එහි වේගය දරුණු වෙන්න පුලුවනි.ඒ දරුවා තමාගේ චිත්තවේගය පිට කළ අන්දමයි.
තවත් අවස්ථාවක ඔබ දරුවාට කඩදාසියක් සහ පාට පැන්සලක් ලබා දුන් විට ඔහු කුමන හෝ සිතුවමක් අදින්න පටන් ගනීවි. එතැනදී දරුවාගේ ඇත්තේ බොහොම සංයමයකි. හැම දරුවෙකුම සිතුවමෙන් සෑහීමට පත් නොවන්න පුලුවනි. ඒත් දෙමව්පියන් ලෙස දරුවා වඩාත් කැමැත්ත දක්වන අංශය සොයා ගන්න.ඒ වෙනුවෙන් නිතර වෙන්න ඉඩ දෙන්න.
හැකියාවන් ප්‍රදර්ශනයට අවස්ථාව දෙන්න..
ඔබේ දරුවාට හැකියාව තිබුනත් ඒවා කැලයේ පිපුන මල් මෙන් කැලයේම පරවෙන්න ඉඩ දෙන්න එපා.ඒවා සංවර්ධනය කර ගැනීමට ඉඩ දෙන්න.දරුවා වාදනයට දක්ෂ නම් ඒ වෙනුවෙන් අවශ්‍ය සංගීත භාණ්ඩ ලබා දීම වැනි කටයුතුවලින් ඔවුන් දිරිමත් කළ හැකියි.වාදනයට අවශ්‍ය සංගීත ප්‍රස්ථාර වැනි දේ දැන් අන්තර්ජාලය ඔස්සේ පවා බාගත කර ගැනීමේ අවස්ථාවන් තිබෙනවා. එවැනි පහසු අවස්තාවන් මග හරින්න එපා.
නිර්මාන එළි දක්වන්නට අවස්ථාවන්..
දරුවාගේ කුසලතාවයන් හොඳින් හඳුනන්නේ ඔබයි. ඒ නිසා දරුවන්ට ඒවා එලි දක්වන වේදිකාව සකස් කර දෙන්න. ඔබේ නිවාස සංකීර්ණයේ දරුවන් වෙනුවෙන් ළමා සමාජයක් ආරම්භ කරන්න. අසල්වැසි දරුවන්ගේ හැකියාවන් එළි දක්වන විවිධ ප්‍රසංගයක්…චිත්‍ර ප්‍රදර්ශනයක්..නව නිර්මාන එලි දැක්මක් වැනි ඉසව් සංවිධානය කිරීමට අවස්ථාවන් තිබේ.මහජන පුස්තකාලයක ළමා සමාජයට දරුවා සම්බන්ධ කරන්න.එහිදී සංවිධානය කරන විවිධ වැඩසටහන් ඔස්සේ දරුවාට තමාගේ හැකියාවන් සංවර්ධනය කර ගැනීමට අවස්ථාව ලැබෙනු ඇත.ඔබ ජීවිතය ජයගත් පුද්ගලයන්ගේ චරිතකතා කියවන්න.ඔවුන්ට ජාත්‍යන්තර තලයේ ආලෝකය ලැබුනේ එක්රැයකින් නොවේ.බාලකාලයේ පටන් තමන්ගේ හැකියාවන් දියුණු කර ගැනීමට බොහෝ සෙයින් වෙහෙසීමේ ප්‍රතිඵලයක් ලෙසින් බැව් ඔවුන්ගේ ආත්ම ප්‍රකාශනයන්හි පවා සඳහන් වී තිබේ.
විවේක වේලාවක ඔබගේ සහයෝගය ලබා දෙන්න..
ඔබ දරුවාගේ කුසලතාවයන් හදුනා ගත් පසුව එතැනින් ඒ පරිච්ඡේදය අවසාන නැත.කුසලතාවය සමග ඉදිරියට යෑමට ධෛර්ය ලබා දෙන්න.ඔබටත් දරුවාට යම් දායකත්වයක් ලබා දීමේ හැකියාව ඇති.මවක් ලෙස ඔබ ඉවුම් පිහුම් කලාවට දක්ෂ නම්,ඔබේ දරුවන්ටත් ඒ හැකියාව ඇත්නම් විවේක වේලාවන්හිදී දරුවන්ට ඒ වෙනුවෙන් යම් සහයෝගයක් ලබා දෙන්න.එය දරුවාගේ කුසලතා සංර්ධනයට මහත් ශක්තියක් සපයනු ඇත.
එහෙමනම්…දරුවන්ගේ කුසලතාවයන් මුලින්ම හඳුනාගත යුත්තේ දෙමව්පියන් වන ඔබය. එතැන් පටන් කුසලතා සංවර්ධනයට අත හිත ලැබෙන්නේද ඔබගෙන්ය.මේ සියල්ල සංකලනය වී රටට ලෝකයට වැඩදායක දරුවෙකු ලෙසින් ඔවුන්ගේ අනාගතය ජය ගැනීමට නම් ඔවුන් තුළ සැගවුන යෝධයා ඔබ අවදි කළ යුතුය.
