ලොකු කුඩා භේදයකින් තොරව සමේ ඇති වන චර්ම රෝග තත්ත්වයක් වන මෙම තත්ත්වයේදී සම රතු පැහැවන අතර කැසීම ද දැකිය හැක. බහුලව ළමුන් අතර පවතින නමුත් ඕනෑම වයසකදී ඇති විය හැකි තත්ත්වයකි. මෙම රෝග තත්ත්වය දිගුකාලීනව පවතින ඇදුම සහ පීනස් රෝගය හා බැඳී පවතී.
Eczeema තත්ත්වයේ ලක්ෂණ
මෙහි ලක්ෂණ බොහෝවිට රෝගියාගෙන් රෝගියාට වෙනස් වේ.
- වියළි සම (Dry Skin)
- තදබල ලෙස රාත‍්‍රියට ඇති වන කැසීම
- රතු පැහැති පැල්ලම් (විශේෂයෙන් අත්, පාදය, වළලුකර, මැණික් කටුව, බෙල්ල, පපුවේ ඉහළ කොටස, ඇහිබැම, වැලමිට, දණහිස වැනි නැවෙන ස්ථාන සහ ළදරුවන්ගේ මුහුණ හා හිස මතුපිට සමෙහි)
- කුඩා ඉහළට මතු වූ නෙරීම් (මේවා කැඩී ගියහොත් තරලය පිට වීමක් දැකිය හැක)
- ඝනවීම් සහිත, පිපිරුණු, කැලල් සහිත සම
- කැසීමේදී අලුත් වන අතර සංවේදී හා ඉදිමීම දැකිය හැක.
Eczeema තත්ත්වයට අවධානම් සාධක
- පවුල් ඉතිහාසය
- ආසත්මිකතා
- පීනස් රෝගය
- ඇදුම
Eczeema තත්ත්වයෙන් ඇති විය හැකි සංකූලතා
- කාලීනව කැලලි සහිත කැසීම් සහිත සම – මෙම තත්ත්වය Neurodermatitis ලෙස හඳුන්වයි. සමේ පැල්ලම් ඇති වේ. සම කැසීමේදී කැසීමේ අවශ්‍යතාවය වැඩිවේ.
- සමේ ආසාධන – නැවත නැවත කැසීම නිසා සම කැඩී යයි. එය විවෘත වණයක් හෝ පිපිරීමක් බවට පත් වේ. මේ නිසා බැක්ටීරියා හා වයිරස් මගින් ආසාධන ඇතිවීමේ හැකියාව වැඩිවේ.
- මෙම කැසීම හේතු කොටගෙන හොඳ නින්දක් ලබාගැනීමට නොහැකි වේ.
- කැසීම හේතුවෙන් ඇති වන අඅපහසුතාවයත් පිරිසක් ඉදිරියට යාමට ඇති අකමැත්ත නිසාත් මානසිකව අසහනකාරී තත්ත්වයක් ඇති විය හැකිය
Eczeema තත්ත්වය වළක්වා ගැනීමට
පහත උපදෙස් මත යම්තාක් දුරකට පාලනය කරගත හැක.
- හැකි හැම විටම සිරුරේ තෙතමනය පවත්වා ගැනීම (Moisture)
ක‍්‍රීම්, ආලේපන, දියර වර්ගවලින් අතේ තෙතමනය ආරක්‍ෂා වේ. පෙට්‍රෝලියම් ජෙලි දරුවාගේ සමේ ආලේප කිරීමෙන් Eczeem වර්ධනය වළක්වාගත හැක.
- මෙම තත්ත්වය වැඩි කරන හේතු වලින් වැළකීම
දහදිය, ආතතිය, තරබාරු බව, සබන්, සේදුම්කාරක, දුවිලි, මල් රේණු ආදිය මෙම තත්ත්වය වැඩි කිරීමට හේතු වේ. මේවාට නිරාවරණය වීම අඩු කරගන්න.
- ස්නානයේදී උණුසුම් ජලය උණුකර නිවා ගත් ජලය වඩා සුදුසුය.
- කැසීම ඇති කරන ද්‍රව්‍යවලින් ඉවත් වීම. උදාහරණ ලෙස wool දැක්විය හැකිය
- මෘදු (සුමුදුකාරක) සබන් පමණක් භාවිතය
- ස්නානයෙන් පසු සුමුදු තුවායක් භාවිත කර සම වියළි කර තෙතමනයට ක‍්‍රීම් වර්ග ආලේපනය
- උෂ්ණත්ව හෝ ආර්ද්‍රතාවයේ හදිසි වෙනස්කම් වලට බඳුන් වීමෙන් වැළකීම.
- නිදන කාමරය ආර්ද්‍රතාවයකින් (වායුසමනය කළ හැකි නම් වඩාත් සුදුසුයි) යුතුව තබාගැනීම.
බහුලව දැකිය හැකි Eczeema වර්ග
- Atopic Dermatitis – Eczeema ලෙස හඳුන්වයි.
- Contact Dermatitis – සමේ යමක් නිතර නිතර ගැටේ නම් එම ස්ථානයේ දදයක් වැනි තත්ත්වයක් ඇති වීම.
Atopic Dermatitis
මේ තත්ත්වයේ ලක්ෂණ ලෙස,
- වැලමිට, දණහිස වැනි නැවෙන ස්ථානවල දදයක් ලෙස හෝ ලා පැහැයේ සිට අඳුරු පැහැවීම හෝ ඝනවීම
- කැසීමේදී තරලය පිටතට පැමැණීමත් කුඩා ඉහළට මතුවූ පැල්ලමක් ලෙසත් දැකිය හැක.
- දරුවන්ගේ හිසේ සම මතුපිට, කම්මුල් වල සම කැසීමේදී ආසාධනය වේ.
මේ තත්ත්වයට හේතු ලෙස ජාන බලපෑම්, වියළි සම, ප‍්‍රතිශක්තීකරණ පද්ධතියේ ගැටලු මෙන්ම මේ තත්ත්වය වැඩි කරවන සාධක ලෙස පාරිසරික සාධක ද දැක්විය හැකිය.
Contact Dermatitis
මේ තත්ත්වයේ ලක්ෂණ ලෙස,
- සම කැසීම, රතු පැහැවීම, පිළිස්සුනු ආකාරයක් ගැනීම
- සම මත ඉලිප්පුනු ස්ථාන තිබීම
- කබොල්ලකින් වැසී ඇති තරලය පිරුණු දිය බිබිලි
- සමෙහි ඝන වීම්
Contact Dermatitis තත්ත්වයට හේතූ
- සේදුම් කාරක
- විරංජක
- රත්තරං ආභරණ
- නිකල්
- තීන්ත වර්ග
- විෂ පැලෑටි
- සබන්/සුවඳ විලවුන්
- ආලේපන
- දුම්කොල දුම
ඉහත තත්ත්වවලට ප‍්‍රතිකාර ලෙස,
- Antihistamine
- Corticosteroid cream/ ointment ගැල්වීම.
- Calcineurin inhibitors
- ආසාධන ඇත්නම් ප‍්‍රතිජීවක ඖෂධ ලබාදේ
- ආලෝක ප‍්‍රතිකාර – Ultra violet කිරණවලට නිරාවරණය කරයි
- ක‍්‍රීම් ආලේප කිරීමට (Corticosteroid) පෙර සිසිල් රඳන ගැල්වීමෙන් ඖෂධ ඉක්මණින් අවශෝෂණය වේ.
විශේෂඥ මතය, අදහස සහ මූලික සටහන:
මහරගම අපේක්ෂා රෝහලේ විශේෂඥ වෛද්‍ය (ළමා රෝග) රුක්මල් ගුණතිලක මහතා
