පැටියෝ…අම්මා හෙට ඔෆිස් යනවා.

පුංචි පැටියා ලැබිලා දැන් මාතෘ නිවාඩු උපරිමයෙන්ම අරගෙනත් අවසානයි. දන්නේම නැතුව මුල් මාස හයත් ගෙවී ගියා. දැන් ඉතින් ආපසු කන්තෝරු යන්නත් ඕන.ඉගෙනගෙන අමාරුවෙන් උපයා ගත්තු රැකියාව අහිමි කර ගෙනත් බැහැ.ඒත් පුංචි කිරිකැටියා නිවසේ දාලා රාජකාරියට යන්නේ කොහොමද කියල හිතන්නත් බැහැ..

ඒත් යන්නම එපායැ..

ඔව් මවක් ලෙස ඔබ දරුවා වගේම රැකියාවත් ආරක්ෂා කර ගන්න ඕන.ඒත් පුංචි පැටියා මානසිකව වැටෙයිද..? අම්මාව හොයයිද..? අම්මාගේ අඩුව කාගෙන් පිරිමසා ගන්නද..? ඉතින් ප්‍රශ්න වැලක් තියෙනවා. මේ සේරම ඇත්ත. නමුත්..දැන් මොකද කරන්නේ…

අද නැති වුනත් හෙට අම්මා නැවත සුපුරුදු රාජකාරියට යන්නම ඕන. ඉතින් ටිකෙන්ටික දරුවා හුරු කරන්න ඕනමයි.එය ගහෙන් ගෙඩි එනවා වගේ සිදු වුනොත් නම් දරුවා කඩා වැටෙන්න පුලුවනි. ඒ නිසා ඔබ සෙමෙන් සෙමෙන් දරුවා අලුත් පරිසරයට හුරු කරන්නම ඕන.

අතිරේක ආහාර පුරුදු කරන්න.

වාසනාවකට වගේ දැන් සෑම මවක් වෙනුවෙන්ම මාතෘ නිවාඩු අයිතිය තියෙන නිසා දරුවාගේ මුල් මාස හය වෙන තෙක් අම්මා නිවසේ සිටිනවා. වැටුප් රහිත නිවාඩු හෝ ලබා ගෙන සෑම අම්මා කෙනෙක්ම වගේ මුල් මාස හය පුරා දරුවාට මව්කිරි ලබා දෙන්න සූදානම්.

හැබැයි රාජකාරියට යන විට මව්කිරි දීමේ කාලය වෙනස් වෙන නිසාත්,දරුවාට ඝන ආහාර ලබා දෙන කාලය සම්පූර්ණ නිසාත් ඒ වෙනුවෙන් දරුවා හුරු කරන්න. එහෙම නැති වුනොත් බඩගිනි පැටියා කිරට අඬාවි. ඒ බව සිහිවෙන අම්මාට කන්තෝරුවේදීම කිරි එරෙන්න පටන් ගනීවි. ඒ වගේම මව්කිරි දෙන විට අම්මා පැටියා සමීපයේම සිටියත් හෙට අනිද්දා දරුවා රැක බලා ගන්නා අයට දරුවාගේ ආහාර කවන පිළිවෙලත් කියා දෙන්න.ටිකෙන් ටික දරුවා අලුත් මුහුණට පුරුදු වෙන්න අවශ්‍ය වෙනවා.

එහෙමනම් දැන් පටන් ගනිමු.

ඔව් ඔබට නැවත රාජකාරියට යන දිනය නියමිතයි. ඒ නිසා පැටියා අලුත් පරිසරයට හුරු කරන්න. වෙනදා වගේ පැටියා අඬන සැනින්ම ළගට යන්න එපා. දැන් පැටියා නිවසේ අය හොදින් අදුනනවා. අඩන හැම වාරයකදීම අම්මා ළගට යනවා නම් පැටියා හෙට දවසේදීත් අම්මා තමා වෙතට එතැයි බලාපොරොත්තු වෙනවා. ඒ නිසා මල මුත්‍රා කර ගෙන අඩන දරුවා වෙතට පවුලේ වෙන කෙනකු යවන්න. එහෙම නැත්නම් හෙට අනිද්දා ඔබ සේවයට කැඳවන්න සිටින සේවිකාව හෝ ඥාතියා  පැටියා සමීපයට යවන්න. එහෙම වුනාම අම්මා නැතුව තමාගේ සමීපයේ තවත් රැකවරණයක් තිබෙන බැව් පැටියා තේරුම් ගනීවි.

අම්මා පැය දෙක තුනක් දුරස්ව ඉන්න

මෙලොව එලිය දුටුව දා පටන්ම දරුවා සමග සිටියත් දැන් අම්මා දවසේ පැය නවයක් හෝ දහයක් දරුවාගෙන් දුරස්ව සිටින්න වෙනවා. මෙය දරුවා දරා ගන්නේ කොහොමද කියන එක් ගැටලුවක්. ඒ වගේම අම්මාටත් පැටියා නිවසේ තනි කරල ඉන්න අපහසුයි. ඉතින් අම්මාගේ මානසිත්වයත් දරුවාගෙන් තාවකාලිකව දුරස් වීමට ගැලපෙන අන්දමින් සූදානම් විය යුතුයි. අවුරුද්දක් විතර කාලයක් පැටියා සමග නිවසේ සිටියා. ගියොත් ගියේ සායනයට විතරයි.මම කොහොමද පැටියා නිවසේ තනි කරලා පැය දහයක් ගෙවන්නේ…

මෙහෙම කළොත්..

ඔබ සෙමෙන් සෙමෙන් කාලය දුරස් කරන්න. මුලින් පැය බායක් පමණ දරුවාගෙන් දුරස්ව සිටින්න. මෙය ක්‍රමයෙන් පැයක් දෙකක් වගේ කාලයක් කරන්න. දැන් පැටියාටත් යම් අදහසක් ඇති. අම්මා දැන් නැති වුනත් තව ටික වේලාවකින් ගෙදර එනවා.. මේ ශක්තිය නිසා දරුවාගේ හිතේ බිය සහ පාළුව නැති වේවි.

සන්නිවේදනය තබා ගන්න.

පැටියා නිවසේ තබා කන්තෝරු යන ඔබ නිවස සමග සන්නිවේදනය තබා ගන්න. දරුවා රැකබලා ගන්නා අය සමග සම්බන්ධතාවය තබා ගන්න. දැන් ජංගම දුරකථන නිසා එය කිසිම අපහසුවක් නැහැ.ජංගම දුරකථනයක් නිවසේ අයට නැත්නම් අනාගතයේදී හෝ දුරකථන පහසුකමක් ලබා ගන්න. දැනට අසල්වැසි නිවසක් සමග හෝ සම්බන්ධතාවය පවත්වා ගෙන දරුවා ගැන සොයා බලන්න.

විටින් විට නොදන්වා එන්න

පවුලේ අයෙකු දරුවා රැක බලා ගන්නවා නම් මෙය ගැටලුවක් නොවෙයි. ඒ වුනත් බාහිර පුද්ගලයෙකුගේ සේවය ලබා ගනන්වා නම් ටිකක් විමසිලිමත් වෙන්න. කෙටි නිවාඩුවක් හෝ වරු නිවාඩුවක් සමග නොදන්වා නිවසට එන්න. එසේ නොමැති වුනොත් සේවයේ යෙදී සිටින අය දරුවා රැක බලා ගැනීමේදී යම් යම් වංචා සහගතව කටයුතු කරන්න පටන් ගනීවි.

තරුණ වයසේ සේවිකාවක් නම් ඇගේ පෙම්වතා නිවසට ගෙන්වා ගන්න පුලුවනි. මැදි වයසේ අයෙකු නම් දරුවා නිදි කරවා අසල්වැසියන්ගේ සේවාවන් සපයමින් අමතර ආදායම් ලබන්න පුලුවනි. සෑම සේවිකාවක්ම මේ විදිහට නොවුනත් මෙවැනි සිදුවීම් නොවෙනවාම නොවෙයි.

ඔබේ මව හෝ වැඩිහිටියෙකුගේ රැකවරණයේ සිටිනවා නම්..

මට නම් අපේ අම්මා පැටියා බලාගන්න නිසා කිසිම බයක් නැහැ. ඒක සම්පුර්ණ ඇත්ත. නමුත් මේ අවධිය වෙන විට ඔබේ මවත් වැඩිහිටි නිසා ඇය යම් යම් රෝගාබාධයන්ගේ ගොදුරක් වෙන්න පුලුවනි. ඒ නිසා හදිසියේ හෝ ඇය අසනීප වුනොත් පැටියාටත් ගැටළුවක් නිසා ඹබේ දරුවා රැකබලාගන්නා අය ගැනත් සැලකිලිමත් වෙන්න.

ඉතින්…ඔබ රැකියාවක නිරත මවක් නම් අනාගතයේදී රැකියාවට යන දිනය හෙවත් මාතෘ නිවාඩු අවසාන වෙන දිනය දන්නා නිසා ඒ ගැනත් සැලකිලිමත් වෙන්න. හදිසියේම නිවාඩු අවසාන වූ දිනයේ ඔබට දරුවා බාර දීම පහසුවක් නොවෙයි. එවිට දරුවාටත් ගැටලුවක්. දරුවා අලුත් මුහුණට බියක් දක්වන්න පුලුවනි.හැබැයි ක්‍රමයෙන් පුරුදු කලොත් ඔබටත් නිදහසේ රැකියාව කරන්න පුලුවනි. දරුවාත් ඔබ නැවත නිවසට එන තෙක් සුවසේ හිදීවි. එහෙම වුනොත් අම්මා එන තෙක් පැටියා නාඬා ඉඳීවි.

 

හිතට එන අදහසක් පත්තරයකින් පළ වුනාම ලැබෙන සතුට දන්නේ ඒ අත්දැකීම ලබන කෙනෙක් පමනයි. මේ නිසාම දන්නා කාලයේ පටන්ම ලියන්න ලැබෙන හැම මොහොතකම යමක් ලිව්වා. ඒවා පළ වුනා.දැනට මහවැලි ජාතික අධ්‍යාපන විද්‍යා පීඨයේ පුස්තකාලයාධිපතිනිය ලෙස සේවය කරන අතර ලේඛනය අමතක කරන්නේ නැහැ.කැළනිය විශ්ව විද්‍යාලයේ ශාස්ත්‍රපති උපාධිය සහ පේරාදෙණිය විශ්ව විද්‍යාලයේ කලා උපාධිය වෙනුවෙන් කිසිම අපහසුතාවයක් ඇති නොවුනේද ලිවීමේ කලාවට පිං සිදු වෙන්නයි.නිවස , රැකියාව සහ පවුල සමග වූ ගණුදෙණුව ලිවීමේ කලාවට හරස් නොවන සේ පවත්වා ගෙන යන අතර මගේ ජීවිතයට ලේඛනයත් නොදැනම බද්ධව තිබෙනවා විය හැකියි.

LEAVE A REPLY

Please enter your comment!
Please enter your name here