දරුවන්ගේ මල මුත්‍ර ආවේග

පුංචි පැටියාගේ ආහාරපාන වගේම මල මුත්‍රා කිරීම් ගැනත් මව්පියන්ගේ අවධානය දැක්විම ඉතාම වැදගත්.තොටිල්ලේ සිටියදී නම් මල මුත්‍ර පිටවීම දරුවාගේ හැඬීමෙන් අපට සන්නිවේදනය වුනත් කාලය සමග දරුවාට මල මුත්‍ර පිලිබඳ ස්වභාවික වාත වේග දරා ගැනීමේ හැකියාව ලැබෙනවා. ඒ නිසාම ඔවුන්ට මල මුත්‍ර පිට කිරීමේ අවශ්‍යතාවය දැනුන විට ඒ ගැන මව්පියන් වෙත සන්නිවේදන කිරීමේ හැකියාව තිබෙනවා. ඒ වුනත් මල මුත්‍ර පිට කිරීමේ අවශ්‍යතාවය ගැන මව්පියන් දැනුවත් නොකරන පුංචි පැටවුන් නැතුවා නොවෙයි.

රාත්‍රි නින්දෙන් ඇද තෙමීම

වයස අවුරුදු පහක් පමණ වෙන විට දරුවාට රාත්‍රි නින්දේදී මුත්‍රා කිරීමේ අවශ්‍යතාවය දැනුනොත් ඒ ගැන දෙමව්පියන්ට කියන්න පුලුවනි.දිවා කාලයේදී වුනත් මේ පනිවිඩය දැනුම් දෙන්න වගේම වැසිකිලියට යන තෙක් අවශ්‍යතාවය පාලනය කර ගැනීමේ හැකියාව දරුවන්ට තිබෙනවා.ඒත් ඇතැම් දරුවන් රාත්‍ර නින්දෙන් ඇද තෙමීම හෙවත් මුත්‍රා පිටකිරීමට බලපාන හේතු කීපයක් තිබෙනවා.

ඇඳ තෙමීමට බලපාන හේතු

  • ඇතැම් දරුවන්ගේ මුත්‍රාශයේ ගෙල නිසි පරිදි පරිණත නොවීම නිසා මුත්‍රා පිටවීම ගැන ස්වයං පාලනයක් ඇති කර ගැනීම අපහසුයි.
  • මානසික ආතතිය
  • මුත්‍රා මාර්ගයේ ආසාදන
  • පාරම්පරික හේතු

පුංචි කාලයේවත් නොකළ දෙයක් මේ..

සමහර දරුවන් පුංචිම සන්දියේදී පවා රාත්‍රි කාලයේදී ඇඳේ මුත්‍රා පිට නොකලත් හොදින්ම දැනුම් තේරුම් ඇති කාලයේදී ඇද තෙමන අවස්ථා තිබෙන්න පුලුවනි. එවැනි අවස්ථාවලදී ඔබ විසින් දරුවාට දඬුවම් කරන්න එපා. මේ හදිසි වෙනස්වීමට හේතුව කුමක්දැයි සොයා බලන්න.

  • ඒ වගේම කිසිම දිනක දරුවා රාත්‍රි නින්දෙන් ඇද තෙමීම ගැන ප්‍රසිද්ධියේ උපහාසයට පත් කිරීමත් නොකල යුතුයි.
  • සමහර විට දරුවා නින්දට ආසන්නයේදී ප්‍රමාණය ඉක්මවා දියර ගැනීහ වැනි හේතුවක් මේ සදහා බලපානවා නම් නින්දට පෙර ලබා දෙන ජලය හෝ දියර පාන මාත්‍රාව අඩු කරන්න.
  • මුත්‍රා කිරීමෙන් පසුව දරුවාට නින්දට යෑම හුරු කරන්න.
  • නින්දෙන් කීප වාරයක් ඇඳ තෙමනවා නම් ඉහත දැක්වෙන පිලියම් ගැලපෙන්නේ නැහැ. එවැනි අවස්ථාවකදී දරුවා වෙනුවෙන් වෛද්‍ය උපදෙස් ලැබීම ඉතා වැදගත්

මලපහ කිරීමේ පුරුදු..

දරුවෙකුට මලපහ පිට වීම පාලනය කිරීමේ හැකියාව ලැබෙන්නේ මුත්‍රා පාලනය කිරීමටත් පෙරාතුවයි. මාස විස්සක් පමණ වෙන තෙක් මලපහ කිරීම පාලනය කළ නොහැකි වුනත් වයස අවුරුදු දෙකක් පමණ වෙන විට දරුවා පොටියට පුරුදු වෙනවා. ඒත් සමහර දරුවන් මේ පොටියෙන් මිදී සාමාන්‍ය වැසිකිලියක් වෙනුවෙන් යොමු කිරීම ඉතාම අපහසුයි. ඒ වුනත්  දෙමව්පියන් විදිහට ඔබ මේ තත්වයෙන් දරුවා මුදවා ගැනීම ඉතාම වැදගත් වෙනවා. ඊට හේතුව දරුවා දිනපතා පාසලට යොමු වුනාට පසුව ඔවුන්ට පොටිය සමග පාසලට යෑමට බැහැ. හදිසියේ නොව සාමාන්‍ය පරිදි මල මුත්‍රා පිටවීමේ අවශ්‍යතාවය ඔවුන්ට ඇති වෙන නිසා වැසිකිලි යෑමේ පුරුද්ද ඇති කිරීම වැදගත්. එය එක රැයකින් ඇති කිරීමට පැහැ මේ නිසා දෙමව්පියන් විදිහට දරුවාගේ වැසිකිළි පුරුදු නිර්මානය වෙනුවෙන් ඔබ අනුගමනය කළ යුතු ක්‍රමවේද තිබෙනවා..

පංතියේදී වුනත් අවශ්‍යතාවය දැනුම් දෙන්න

නිතරම දරුවාට පාසලේදී වුනත් එම අවශ්‍යතාවය ඇති වූ විට වැසිකිලි යෑමේ අවහ්‍යතාවය ගුරුතුමියට දන්වා සිටිමට උපදෙස් දෙන්න. ඇතැම් දරුවන් මෙම අවශ්‍යතාවයන් සිර කර තබා ගෙන පංතිකාමරයේ මලපහ පිට කිරීමෙන් පංතියේම දරුවන්ගේ අපහාසයට ලක් වෙන අවස්ථාවන් ඇත. ඇතැම් ගුරුවරුන් පවා මෙවන් අවස්ථාවන්හිදී දරුවන්ට චෝදනා නගනු ඇත. ඇත්තටම එය ගුරුවරුන්ට පවා කරදරකාරී කටයුත්තකි. මෙවන් කටයුතත්කින් අපහාසයට පත්වුනොත් දරුවාට පාසල පවා අප්‍රිය වෙන අවස්ථාවක් මෙන්ම මානසිකව ඇති වෙන බිඳවැටීම පහසු දෙයක් නොවේ. නැවත දරුවාගේ මානසිකත්වය ගොඩ නැගීමත් ඉතා අපහසුය.

එමෙන්ම නිතරම පාසල් යන දරුවාගේ පොත් බෑගයේ හෝ  පංතිකාමරයේ අතිරේක ඇඳුමක් තබන්න. යම් හෙයකින් වැසිකිලි යෑමේ කටයුත්තකින් හෝ වෙනත් කටයුත්තක් නිසා ඇඳුමට තෙමීම වැනි අනපේක්ෂිත සිදුවීමක් වුවහොත් මෙම ඇඳුම ඔහුට පහසුවක් වෙනු ඇත.

සෝදන්නත් පුරුදු කරන්න

වැසිකිලියයට හුරු කිරීම වගේම වැසිකිලි යෑමෙන් පසුව සෝදා ගැනීමටද දරුවාට හුරු කිරීම වැදගත්. අද පාසල් යන දරුවන්ට දෙක, තුන වසරේ වුනත් වැසිකිලි යෑමෙන් පසුව සෝදා ගැනීමට හුරුවක් නැති අවස්ථාවන් ඇත. ඔවුන්ට එසේ හැකියාවක් ඇතොත් ඒ නිවසේ පිහිටි නවීන පන්නයේ වැසිකිලියෙන් පමණි. එහෙත් සාමාන්‍ය පාඨශාලාවක තිබෙන වැසිකිලියකින්ද මෙම කටයුතු කරන අන්දම ගැන දරුවා දැනුවත් කරන්න. ඔබ දරුවා පිරිසිදු කිරීමෙන් පසුව ඔබ ඉදිරියේ සිටියදී දරුවාට එය කිරීමට අවස්ථාව ලබා දෙන්න. එයින් පසුව ඔබ වතුර වත් කරන විට සෝදා ගැනීමට හුරු කරන්න. මේ අන්දමට අදියරෙන් අදියරට දරුවා වැසිකිලි යෑමෙන් පසුව සෝදා ගැනීමේ කටයුතු ඉගෙන ගනු ඇත.

මලපහ පුරුදු ගොඩ නැගීමට  නම්..

ඩයපර් අවස්ථාව ඉක්මනින්ම නවත්වන්න.දරුවාට ඩයපර් ඇන්දවීමේදී එහිම මලපහ පිටකර ගැනීමේ පුරුද්ද දිගින් දිගටම පවත්වා ගත හැකි නිසා හැකි ඉක්මනින්ම දරුවා පොටියටත් එතැනින් වැසිකිලයටත් හුරු කරන්න.

ඔබේ දරුවාට වැසිකිලි යෑමේ රටාවක් ගොඩ නගන්න. පාසල් යෑමට පෙරාතුව උදේ වැසිකිලි යෑම දවසේ චර්යාවක් බවට පත් කරන්න.

වැසිකිලියෑම මානසික පසුබිම සමග සම්බන්ධ නිසා වැසිකිලියේදී දරුවාට බියක් නැති පරිසරයක් ඇති කරන්න. ඇතැම් දරුවන් වැසිකිලයේ දොර වසා ගැනීමට බියයි. තවත් අය වැසිකිලයේ දකින මකුලුවන් වැනි කෘමින්ට බියක් දක්වති.ඒ නිසා වැසිකිලි යෑම සමග ඇති වෙන මානසික ගැටුම් සමහර විටෙක භීතිකාවක් බවටත් පත් විය හැකියි.

නිතරම දරුවාට පහසුවෙන් ගැලවීමට හැකි යට ඇඳුම් අන්දවන්න. එසේ නොමැති වුනොත් දරුවාට මේවා ගලවා ගැනීමේදී ඇති වෙන අපහසුතාවයන් නිසා ඇදුම්වලම මල පහ පිටවීමට ඉඩ තිබෙනවා.

සෞඛ්‍ය හේතු

මලපහ පුරුදු සමග සෞඛ්‍ය හේතුන්ද සම්බන්ධව තිබෙනවා. දරුවාට ලබා දෙන ආහාර රටාවේ තන්තු ආහාර අඩු වීමත් මලපහ පිට නොවීමට හේතු විය හැකියි. කෝපි වැනි පාන වර්ග බහුලව පානය කිරීම සහ හොදින් ජලය පානය නොකිරීම නිසාත් මලපහ කිරීමේදී මල ඝන වීම වැනි අහසුතාවයන් ඇති විය හැකියි. මේ අපහසුතාවය නිසා දරුවා මලපහ කිරීමට බියක් දැක්වීම තෙක් තත්වය බරපතල විය හැකියි.

උදර සහ ආන්ත්‍රික ගැටළු නිසාත් දරුවාගේ මලපහ පිළිබඳ ප්‍රශ්න ඇති විය හැකියි.

වැසිකිලි  පහසුකම්…

පවුලක් තුළ සෞඛ්‍ය සම්පන්න බව පවත්වා ගැනීමට නම් වැසිකිළි පහසුකම් ඉතාම වැදගත්. දරුවාට පාවිච්චි කළ හැකි අන්දමින් මෙන්ම මනා ජල සැපයුම් සහිත වැසිකිලියක් පවුලක අනිවාර්ය අංගයක් වීම ඉතාම වැදගත්

 

හිතට එන අදහසක් පත්තරයකින් පළ වුනාම ලැබෙන සතුට දන්නේ ඒ අත්දැකීම ලබන කෙනෙක් පමනයි. මේ නිසාම දන්නා කාලයේ පටන්ම ලියන්න ලැබෙන හැම මොහොතකම යමක් ලිව්වා. ඒවා පළ වුනා.දැනට මහවැලි ජාතික අධ්‍යාපන විද්‍යා පීඨයේ පුස්තකාලයාධිපතිනිය ලෙස සේවය කරන අතර ලේඛනය අමතක කරන්නේ නැහැ.කැළනිය විශ්ව විද්‍යාලයේ ශාස්ත්‍රපති උපාධිය සහ පේරාදෙණිය විශ්ව විද්‍යාලයේ කලා උපාධිය වෙනුවෙන් කිසිම අපහසුතාවයක් ඇති නොවුනේද ලිවීමේ කලාවට පිං සිදු වෙන්නයි.නිවස , රැකියාව සහ පවුල සමග වූ ගණුදෙණුව ලිවීමේ කලාවට හරස් නොවන සේ පවත්වා ගෙන යන අතර මගේ ජීවිතයට ලේඛනයත් නොදැනම බද්ධව තිබෙනවා විය හැකියි.

LEAVE A REPLY

Please enter your comment!
Please enter your name here