පුංචි පැටියට ඉදිකටුවක් නූලක් අල්ලන්න දෙන්න

මීට දශක කීපයකට පෙරාතුව නම් අපේ රටේ පංති පාඩමට මැහුම් වෙනුවෙන් වෙන් කළ කාලපරිච්ඡේදයක් තිබුණා. ඒ නිසා සෑම දරුවෙක්ම ඉදිකටුව,නූල අල්ලන්න බයක් දැක්වූයේ නැහැ. ඒත් අද දවසේ පුංචි පැටියට ඉදිකටුවක් නූලක් අල්ලන්න දෙන්න අපේ අම්මලා බයයි. 

දැන් ඉතිං මහන්න අවශ්‍ය නැහැ…

ඉස්සර වගේ දැන් ගැහැණු දරුවන්ට ඇදුම් මහන්න ඉගෙන ගන්න ඕන නැහැ. ඊටත් දැන් කවුද ඇඳුම් මහගෙන අඳින්නේ..ඔබ මේ විදිහට හිතුවත් දරුවෙකු විසින් යමක් මැසීමෙන් ලැබෙන වාසි බොහොමයක් තිබෙනවා.

අත හුරුවීම

දරුවන්ගේ සියුම් ඇගිලිවල ක්‍රියාකාරිත්වයට ඉදිකටුවක් සමග ගණුදෙණුව ඉතාම වැදගත්. දරුවාට ඉදිකටුවෙන් කටයුතු කරන පරිස්සම ගැන අම්මාගෙන් ලැබෙන දැණුවත් වීම සමග ඇයට ඒ කටයුතු කිරීමේ හැකියාව ලැබෙනවා.ඉදිකටුව අතේ ඇන ගන්නේ නැතුව මහන සංයමය පවා දරුවා එතැනදී ඉගෙන ගන්නවා. ඒ නිසා දරුවෙකුගේ සංයමට අලුත් පාඩමක් අවශ්‍ය වෙන්නෙත් නැහැ.

ඉවසීම

දරුවක් යමක් මසන විට එය බොහොම ඉවසීමෙන් කරන දෙයක්.හදිසියේ කිරීම ඉතාම අපහසුයි. ඒ වගේම අවධානය දැක්වීමත් ඉතාම වැදගත්. ඉදිකටුව සහ මැස්ම අතර අවධානය රදවා ගැනීමට දරුවාට ලැබෙන පාඩම අපට සරලව හිතන්න බැහැ.විනාඩ 40 ක් එකතැන ඉන්න බැරි දරුවා සමහර විට මහන්න දෙයක් අතට ගත්තොත් අවධානයෙන් කටයුතු කරන රටාව ඉගෙන ගනීවි.

නිර්මාණශීලිත්වය වැඩි වෙනවා..

මැහුමක් කියන්නේ බොහොම නිර්මානශීලී කටයුත්තක්. අතීතයේදී දරුවන් කඩදාසි බෝනික්කන්ට කඩදාසි වලින් විවිධ ඇඳුම් සකස් කළා. එය බොහොම අහිංසක ක්‍රිඩාවක්. කඩදාසි බෝනික්කන්ට තමන්ගේ හිතේ මැවෙන අන්දමින් ඇඳුම් සකස් කිරීම එදා ගැහැණු දරුවන්ගේ විනෝදාංශයක්.ඊටත් අමතරව අත් කකුල් ඇති ප්ලාස්ටික් බෝනික්කන්ට නිවසේ ඉතුරු රෙදි කැබැලිවලින් ලස්ස ගවුම් සකස් කිරීම ඔවුන්ගේ විනෝදාංශය වුණා. ඒ නිසාමදෝ අපුරු අන්දමේ නිර්මානශීලී කටයුතු ඔවුන් වෙතින් නිර්මානය වුණා.

ඇස් අතර  සම්බන්ධීකරණය වැඩි වීම

අද කාලයේ දරුවන් විද්‍යුත් මෙවලම් සමග සිදු කරන ගනුදෙනුව නිසා ඇස් දුර්වල වීම සහ ස්නායු පිලිබඳ ගැටළු ඇති වුනත් මැහීමේ කටයුතුවලදී ඇස් අතර මනා සම්බන්ධතාවයක් ගොඩ නගනවා. වේදනාව සමනය කිරීමට සහ මොළයේ වර්ධනය ප්‍රවර්ධනය කිරීමට උපකාරී වෙනවා.

බුද්ධියට ව්‍යායාමයක්.

සාමාන්‍ය මැස්මක් මහන විට වුනත් එය කපන, මූට්ටු කරන අන්දම ගැන දරුවා යම් වයසකදී හිතන්න පටන් ගන්නවා. නමුත් කතිර මැස්ම වැනි බුද්ධිය සහ අවධානය දක්වන මැහුම් ක්‍රම නිසා දරුවාගේ බුද්ධියට ලැබෙන වයායාමය ඉතාම වැදගත්. කතිර ගනන් කිරීම සහ ඒ අනුව මැස්මට දක්වන අවධානය ඉතා වැදගත්.

විවේකය යහපත් පරිදි ගත කරන්න පුලුවනි..

තමන්ගේ විවේක කාලයේදී මැහුමක් ගෙතුමක් කිරීම නිසා විවේක කාලය ඉතා යහපත් අන්දමින් ගෙවන්න හැකියාව ලැබෙනවා. ඒ වගේම මැහුමක් හෝ ගෙතුමක් අවසානයේදී තමන්ගේ අතින් මැවුන නිර්මානය ගැනත් ලැබෙන සතුට මුදලින් තක්සේරු කිරීමට බැරි තරම් වටිනවා.

මැහුම් මගින් ආතතිය හා කාංසාව සමනය කරන්නේ කෙසේද?

ඔන්න සේරටම වඩා වැදගත් දේ…මැහුමක් මැසීමෙන් අප ලබන සතුට නිසාමදෝ සතුටට හේතු වන ඩොපමයින් රසායනය නිපදවීමට උපකාරී වෙනවා.  ඒ නිසා  දිගු කාලීනව ඔබේ දරුවා සතුටින් තබා ගැනීම ඉතා පහසුයි.

දරුවන්ට පමණක් නොවෙයි ඕනෑම කෙනෙක් නිදන්ගත ආතතියෙන් හා කාංසාවෙන් පීඩා විඳින්නේ නම් මැහුමක් වැනි කටයුත්තක් වෙත යොමු වීමෙන් ඔවුන්ගේ සෘනාත්මක සිතුවිලිවලින් මුදවා ගත හැකියි.

ඇගයීමක් දෙන්න..

දැනටත් තාක්ෂණ කුසලතා විෂය වෙනුවෙන් ඇතැම් දරුවන් කතිර මැස්මෙන් සිදු කරන නිර්මාන ඇතැම් දෙමව්පියන් විසින් පින්තුර රාමුවක් යොදා නිවසේ එල්ලා තබනවා. මෙය ඉතාම වැදගත්. එයින් දරුවාගේ හැකියාවට ලැබෙන ඇගයීම නිසා ඔවුන් තව තවත් විසිතුරු මැහුම් රටා වෙත යොමු වෙනවා. සැබැවින්ම ගැටපිස්මේන්තුව, ප්‍රංශ ගැටය වැනි විසිතුරු මැහුම්වලින් දරුවන්ගේ හැකියාව හැඩ ගැන්වීමත් ඉතාම වැදගත්.

අනාගත ආයෝජනයක්..

දරුවෙකුට තමන්ගේ ඇඳුමක් සකස් කර ගැනීමට ලැබෙන දැණුම නිසා අනාගතයේදී ඇදුම් වෙනුවෙන් සිදු වෙන වැය බර අඩු කර ගත හැකියි.උදාහරණයක් විදිහට කොට්ටඋරයක්, ඇද ඇතිරිල්ලක් වැනි දෙයක් ඉතා අලංකාරව තමන්ගේ දෑතින් නිර්මානය වීමෙන් ලබන ඇගයුම තක්සේරු කිරීමට පවා අපහසුයි.

ආදායම් මාර්ගයක්

ඔබේ පුංචි පැටියා හැමදාම ඔය විදිහට ඉන්නේ නැහැ.යම් දවසක ඔවුන් තමන්ගේම ජීවිතයක් ගොඩ නගා ගන්නවා. අන්න එවැනි දිනකදී නිවසේ ඉදන්ම අතිරේක ආදායමක් ලබා ගැනීමටත් ඔවුන් අද දවසේ ලබන මේ ඉගෙනුම වැදගත් වේවි.සමහර විට ඔවුන් නොදැනීම විහාල ව්‍යවසායකයින් බවට පත් වීමට පවා මේ පන්නරය උපකාරී වෙන්න පුලුවනි.

මැහුම මිතුරා කරගන්න..

ඔබේ දරුවාට මේ වාසි ලබා ගත හැක්කේ මැහුම මිතුරා වුනොත් පමණයි. ඒ වගේම මැහුම සමග මිතුරු වුනොත් උක්ත වාසි ලැබෙනවා වගේම විද්‍යුත් මෙවලම්ව නිල් ආලෝකයෙන් වගේ අහිතකර තත්වයන් ඇති වෙන්නෙත් නැහැ.ඒ නිසා පුංචි හිතට සතුට ඇති වෙන අන්දමින් පුංචි වයසේ පටන්ම මැහුම් ගෙතුම් සමග දරුවා මිතුරු කළොත් දෙමව්පියන් විදිහට ඔබ දිනුම්.

 

හිතට එන අදහසක් පත්තරයකින් පළ වුනාම ලැබෙන සතුට දන්නේ ඒ අත්දැකීම ලබන කෙනෙක් පමනයි. මේ නිසාම දන්නා කාලයේ පටන්ම ලියන්න ලැබෙන හැම මොහොතකම යමක් ලිව්වා. ඒවා පළ වුනා.දැනට මහවැලි ජාතික අධ්‍යාපන විද්‍යා පීඨයේ පුස්තකාලයාධිපතිනිය ලෙස සේවය කරන අතර ලේඛනය අමතක කරන්නේ නැහැ.කැළනිය විශ්ව විද්‍යාලයේ ශාස්ත්‍රපති උපාධිය සහ පේරාදෙණිය විශ්ව විද්‍යාලයේ කලා උපාධිය වෙනුවෙන් කිසිම අපහසුතාවයක් ඇති නොවුනේද ලිවීමේ කලාවට පිං සිදු වෙන්නයි.නිවස , රැකියාව සහ පවුල සමග වූ ගණුදෙණුව ලිවීමේ කලාවට හරස් නොවන සේ පවත්වා ගෙන යන අතර මගේ ජීවිතයට ලේඛනයත් නොදැනම බද්ධව තිබෙනවා විය හැකියි.

LEAVE A REPLY

Please enter your comment!
Please enter your name here