දරුවා කේන්තිකාරයෙක් නම් මව්පිය ආරය කියා සිත නිදහස් කර ගන්න එපා..

පුංචි දරුවන්ටත් කේන්ති යනවා. ඒ තත්වය සාමාන්‍යයි.නමුත් ඊට සමානව දෙමව්පියන්ටත් තරහ ගියොත් නම් මේ තත්වයට විසදුමක් ලැබෙන්නේ නැහැ.

ඒත් දරුවන්ට බය වෙලා ඉන්න පුලුවන්යැ..

සමහර විට ඔබටත් මේ විදිහට හිතෙන්න පුලුවනි.ඒත් ඔබ දරුවාට කේන්ති යන්නේ ඇයි වගේම කේන්තියේ ස්වභාවය ගැනත් හිතන්න අවශ්‍යයි. සමහර විට දරුවන්ගේ මානසික රෝග තත්වයන් නිසාත් මේ විදිහට කේන්ති යන අවස්ථා තිබෙනවා…

ඒත් කේන්ති ගන්න හැම දරුවෙක්මත් මානසික රෝග තත්වයකින් පෙලෙනවාත් නොවෙයි.දරුවන් කේන්තිය පෙන්වන විවිධ ආකර තිබෙනවා..

  • කෑ ගසනවා
  • වාචිකව දොස් නගනවා
  • නිහඬ අමනාපයක් පෙන්වනවා.
  • කථා නොකර සිටිනවා.
  • අතින් පයින් ගැසීම වැනි කායික ප්‍රචණ්ඩත්වය
  • භාණ්ඩවලට හානි කිරීම

මේ මොන ආකාරයකින් වුනත් දරුවා කේන්තිය පෙන්වනවා නම් ඔබත් ඊට සමගාමිව කේන්තිකාරයෙක් වෙන්න එපා. දෙමව්පියන්ගේ මානසික තත්වය අනුවත් ඔවුන්ගේ දෛනික වැඩ කටයුතු සමගත් තිබෙන හැල හැප්පීමත් සමග මේ තත්වය දරා ගැනීමටත් අපහසුයි.ඒ වුනත් අපි දොගෙිල්ලන්ම කැත්තට පොල්ල වගේ සිටියොත් නම් වැඩේ දුර දිග යාවි.

කේන්තියත් දරුවන්ගේ ප්‍රයෝගයක්…

දරුවන් අතරත් විවිධ ප්‍රයෝග තිබෙනවා. ඒ නිසා තමන්ට අවශ්‍ය දේ ලබා ගැනීමට අවශ්‍ය වුනොත් කේන්තියකින් ඒ බව ප්‍රදර්ශනය කරන්න දරුවන් සූදානම්. සමහර අවස්ථාවලදී දෙමව්පියනුත් තමන්ගේ පහසුවට වගේම දරුවාගේ කේන්තිය නිසා ඔවුන්ගේ ඉල්ලීම් ඉටු කරනවා ඒත් මෙය නොකළ යුත්තක්..

දරුවන් ඉල්ලන හැම දෙයම ඔබට දෙන්න පුලුවනිද…?

දරුවාගේ කේන්තිය නිවන්න පිලියමක් ලෙස ඔබට දරුවා ඉල්ලන ඉල්ලීම් ඉටු කරන්න පුලුවන් සීමාවක් තිබෙනවා.ඒත් එය දරුවා ආයුධයක් කර ගත් දිනට ඔබ අපහසුතාවයට පත් වෙනවා. උදාහරණයක් විදිහට දරුවා ඉර, හඳ ඉල්ලා සිටියොත් අපට ඒ ඉල්ලීම ඉටු කරන්න බැහැ.ඒ නිසා කේන්තියම දරුවාට ආයුධයක් කර ගැනීමට ඉඩ දිය යුතු නැහැ.

කේන්ති ගන්නේ ඇයි…?

ඔබ දරුවා කේන්තිකාරයෙක් යැයි පසුතැවිලි වෙනවාට වඩා දරුවා කේන්ති ගන්නේ ඇයිදැයි යන්න ගැනත් අවධානයක් දැක්විය යුතුයි. සමහර විට එය ඔබගේ ප්‍රමාදය නිසා වෙන්නත් පුලුවනි.දරුවාට බඩගිනි වේලාවට අවශ්‍ය ආහාර නොලැබුන විටෙක කේන්ති ගන්න පුලුවනි. එය දරුවාගේ පැත්තෙන් සාධාරණයි. තවත් විටෙක ඔබ දරුවා ගැන අවධානයක් නොදක්වන විටත් තමා වෙතට අවධානය ගබා ගැනීමටත් කේන්තිකාර ගති පැවැතුම් පෙන්වන්න පුලුවනි.

දුර්වලතාවයෙන් ප්‍රයෝජන ගැනීමටත් දරුවන් දන්නවා…

දරුවන් පවුලේ හැම දෙනාගේම ගති පැවැතුම් දන්නවා. සමහර විට කේන්තියෙන් අම්මාගෙන් යමක් ඉටු කර ගන්න ලැබුනත් තාත්තාගෙන් නම් කේන්තිය පෙන්වලා තමාගේ අරමුණු ඉටු කර ගැනීමට නොහැකි බව ඔවුන් දන්නවා. ඒ නිසා මව ඉදිරියේ දැඩි කේන්තිකාරි ගති පැවැතුම් පෙන්වන දරුවා පියා ඉදිරියේ බොහොම හික්මුන අයෙකු වෙන්න පුලුවනි.ඊට හේතුව දරුවාගේ කේනිතය ඉදිරියේ මවගේ වගේම පියාගේ ප්‍රතිචාර ඔවුන් ඉතාම හොදින් දන්නා නිසයි.

දරුවාගේ කේනිතියට ඔබ ප්‍රතිචාර දක්වන්නේනේ කොහොමද…?

ඔබේ දරුවා කේන්තියෙන් සිටින විට ඒ ගැන එතරම් සැලකිල්ලක් දක්වන්න එපා.නමුත් ඔවුන්ගේ අවශ්‍යතාවය සෙමෙන් ඉටු කර දෙන්න. සමහර විට දරුවා ආහාර ඉල්ලමින් කේනිතායෙන් සිටිනවා නම් එය ලබා නොදි නොහැකි බැව් ඇත්ත. ඒත් ආහාරය ලබා දේනනේ කේන්තියට ප්‍රතිචාරයක් නිසා නොවන බැව් පෙන්වන්න.

කේන්තියෙන් සිටින විට අවවාද නිෂ්ඵලයි…

දරුවන් කේන්තියෙන් සිටින විට ඒ ගැන අවවාද කිරීම එතරම් ඵලදායී නොවේ.එයින් සිදු වෙන්නේ දරුවාගේ කේන්තිය තව තවත් වර්ධනය වීම පමණි.එවැනි අවස්ථාවලදී අවවාද දීමට වඩා නිහඩව සිටීම වඩාත් වැදගත්.

අදහස් ප්‍රකාශ කරන ආකාරය කියා දෙන්න..

දරුවන්ට තමන්ගේ ඉල්ලීම් ඉදිරිපත් කරන විනීත ආකරය ගැන කියා දෙන්න. තරහ, ද්වේශය සහිතව කථා කරන දරුවන්ට මෙන් නොව තමන්ගේ අවශ්‍යතාවයන් විනීතව ඉදිරිපත් කරන දරුවන්ට ලෝකයම ආදරය කරන බැව් ඔවුන්ගේ හදවතට ඒත්තු ගන්වන්න. අනවශය අන්දමින් කෝප වීමෙන් ඉල්ලීම් ඉටු වෙනවාට වඩා හැම දෙනාගේම අප්‍රසන්නතාවය ඇති වෙන බවත් දරුවාට දැනෙන සේ තේරුම් කර දෙන්න.

අම්මා…තාත්තාගේ ආදර්ශයත් වැදගත්

බොහෝ දරුවන් තම දෙමව්පියන් ආදර්ශයට ගෙන හැසිරෙනවා. එය ඔබත් මේ විදිහට සාධාරණ කරනවා. තාත්තා වගේම කේන්තිකාරයෙක්..දරුවන් ඉදිරියේ කේන්තිය ඒ අන්දමින් සාධාරණ නොකළ යුතුයි.ඒ වගේම ඔබ ආවේගශීලි චරිතයක් වුනත් දරුවන් ඉදිරියේ ඔබේ හැසිරීම් රටාව පාලනය කර ගැනීම ඉතා වැදගත්එවිට දරුවන්ද සමකාමී චරිත ලෙසින් ගොඩ නගා ගැනීම එතරම් අපහසු කාර්යක් නොවේ.

පවුල තුළත් යම් නීති මාලාවක් පවත්වා ගන්න…

ඔබේ නිවස පුංචි සමාජ ඒකකයක්. මේ සමාජ ඒකකය තුළත් යම් කිසි විනයක් අවශ්‍යයි. නිවස තුළ ගොඩ නැගෙන විනය අනාගතයේදී සමාජයටත් ඉතාම සුබවාදි ලෙසින් ගලපා ගැනීමට දරුවාට හැකියාව ලැබෙනවා. ඒ නිසා නිවස තුළ යම් යම් නීති මාලාවක් පනවා ගන්න. දරුවන් නිතර ගැටෙන කටයුතු වෙනුවෙන් නීති රීති ඇති විට ඔවුන්ට දෙමව්පියන් සමග ගැටීම් බොහෝ දුරට අවම වෙනු ඇත. ආහාර ගැනීමේදී වේලාවක්….රූපවාහිනිය නරඔන්න යම් කාලයක්..සෙල්ලමට  කාලයක් ලෙසින් ඔබ විසින් පනවන නීති රීතිවලට අනුගතව වීමෙන් පවුලක් තුළ අනවශ්‍ය අන්දමින් කෝප වීමට තිබෙන අවස්ථාවන් බොහෝ සෙයින් සීමා වෙනු ඇත.

දරුවා අගය කරන්න

දෙමව්පියන් ලෙස ඔබ දරුවාගේ යහපත් දෙය අගය කරන්න. අයහපත් දරුවන් අනාගතයේදී ලබන විපාක ගැන සමකාමී මනසකින් සිටින අවස්ථාවන්හිදී කියා දෙන්න. අවවාද දරුවන්ට කර්කශ වුනත් සැබෑ සෙනෙහසින් දරුවන්ගේ මන ආමන්ත්‍රණය කිරීමෙන් වඩාත් සාර්ථක ප්‍රතිඵල ලබා ගත හැකියි.

දරුවන් සමග කාලය ගත කරන්න

අද බොහෝ දරුවන් ගෙවන හුදෙකලා ජීවිතය නිසාම ඔවුන් නොදැනුවත්ව හෝ දෙමව්පියන්ගේ අවධානය ලබා ගැනීමට දැඩි වෙහෙසක් දරනු ඇත.ඔවුන් එය කේන්තියෙන් පෙන්නුම් කරන අවස්තාවන්ද බොහෝය. දිවා කාලයේදී වෙනත් අයගේ රැකවරණයේ වැඩෙන දරුවා සවස් කාලයේ දෙමව්පියන් ඉදිරියේ චන්ඩියන් බවට පත් වන්නේත් ඒ නිසාය. දිවා කාලයේදී ගෙවු හුදෙකලා ජීවිතය සමග ලද පීඩනය දරුවන් සිය දෙමව්පියන් ඉදිරියේ නිදහස් කරන්නේ ඒ අන්දමින්ය. ඒ නිසා ඔබට හැකි හැම විටම දරුවන් සමග කාලය ගෙවන්න.

 

හිතට එන අදහසක් පත්තරයකින් පළ වුනාම ලැබෙන සතුට දන්නේ ඒ අත්දැකීම ලබන කෙනෙක් පමනයි. මේ නිසාම දන්නා කාලයේ පටන්ම ලියන්න ලැබෙන හැම මොහොතකම යමක් ලිව්වා. ඒවා පළ වුනා.දැනට මහවැලි ජාතික අධ්‍යාපන විද්‍යා පීඨයේ පුස්තකාලයාධිපතිනිය ලෙස සේවය කරන අතර ලේඛනය අමතක කරන්නේ නැහැ.කැළනිය විශ්ව විද්‍යාලයේ ශාස්ත්‍රපති උපාධිය සහ පේරාදෙණිය විශ්ව විද්‍යාලයේ කලා උපාධිය වෙනුවෙන් කිසිම අපහසුතාවයක් ඇති නොවුනේද ලිවීමේ කලාවට පිං සිදු වෙන්නයි.නිවස , රැකියාව සහ පවුල සමග වූ ගණුදෙණුව ලිවීමේ කලාවට හරස් නොවන සේ පවත්වා ගෙන යන අතර මගේ ජීවිතයට ලේඛනයත් නොදැනම බද්ධව තිබෙනවා විය හැකියි.

LEAVE A REPLY

Please enter your comment!
Please enter your name here