දරුවෙක් පිනට යොමු කිරීම එතරම් පහසු කාර්යක් නොවෙයි. පින්වත් දරුවෙක් එක් රැයකින් බිහි කරන්නත් බැහැ. නමුත් දරුවෙකුගේ ගති පැවැතුම් පිනට දහමට යොමු නොවන පරිදි හැඩ ගැසුනොත් එහි විපාක දරුවාගේ දෙමව්පියන් පමණක් නොව සමස්ත සමාජයටම අත් විදින්න සිදු වෙනවා.
එහෙමනම් මේ වෙසක් සමයේ අපේ දරුවන්ගේ හිත් තුළ මෙත් මල් පුබුදු කරන්නේ කොහොමද බලමු…
අපට දැන් වසර තුනක්ම වෙසක් පිංකම් වෙනුවෙන් කාලය යොමු කරන්න බැරි වුන බව ඇත්ත. ඒවා කාලයටම අපි බාර දෙමු. අපට එළියට බැහැලා වෙනදා වගේ පිංකම් කරන්නත් ඉඩ ලැබෙන දිනයක් කවදා හෝ උදා වේවි. එතෙක් මෙතෙක් අපේ ජීවිතයේ පිනක් දහමක් වෙනුවෙන් යොමු නොවී ඉන්නත් බැහැ.
වෙසක් ගැන දරුවාගේ ආකල්ප ගොඩ නගන්න…
අද බොහෝ විට වෙසක් කී විට දරුවන්ගේ මනසේ ඇති වෙන්නේ සැරසිලි, දන්සැල් ගැන සංකල්ප කිව්වත් වරදක් නැහැ. වසංගත සමයේදී මෙවැනි ආමිෂ පූජාවන් කිරීම අපහසු වුනත් නිවසේ පටන් දරුවාට කළ හැකි ආමිෂ සහ ප්‍රතිපත්ති පූජාවන් ගැනත් අවදානයක් ලබා දෙන්න පුලුවනි.
පුංචි වෙසක් සැරසිල්ලක් කරන්න…
අතීතයේදී හැම නිවසකම වාගේ පුංචියට හෝ වෙසක් සැරසිල්ලක් ඉදි වුණා. අලංකාර අටපට්ටම් කූඩු හැම නිවසකද එල්ලා තිබුණා. අද නම් එවැනි තත්වයක් නැති වුනත් බුදුරජාණන්වහන්සේ වෙනුවෙන් ආමිෂ පූජාවන් පවත්වන දරුවාට වෙසක් සැරසිල්ලක් ඉදි කිරීමට උපදෙස් දෙන්න.
එය දරුවාටම බාර කරන්නත් එපා..
වෙසක් සැරසිලි සිදු කරන විට දරුවාටම පවරා ඔබ පසෙකට වෙන්න එපා. ඒ වෙනුවෙන් අවශ්‍ය අමුද්‍රව්‍ය සපයා දීම පමණක්ම ප්‍රමාණවත් නැහැ. දරුවාට කළ නොහැකි කටයුතු වලදි උදව් වෙන්න. ඒ කණ්ඩායම් හැගීම නිසා දරුවාගේ හිතට යම් උත්තේජනයක් ඇති වෙනවා. ඒ ශක්තිය නිසා තව තවත් මේ සැරසිල්ල ලස්සන කරන්න දරුවාගේ හිතට ප්‍රබෝධයක් ඇති වෙනවා.
අදහස් යෝජනා ලබා ගන්න..
වැඩිමහල් දරුවා සැරසිල්ලක් සිදු කරන විට අදහස් යෝජනා වෙනුවෙන් විවෘත සංවාදයක් ගොඩ නගන්න. පවුලේ වැඩිමහල් අයගෙන්ද එහි හැඩය, වර්ණ ආදිය ගැන අදහස් ලබා ගන්න. බාල දරුවන් සිටිනවා නම් ඔවුන්ටත් යම් කාර්යක් වෙනුවෙන් දායකත්වය ලබා දෙන්න. සමහර විට ඔවුන්ද මේ ආභාෂය අනුව යමින් තවත් නිර්මානයක් කිරීමට අවසර ඉල්ලා සිටියොත් ඒ වෙුනවෙනුත් පුංචි ඉඩක් දෙන්න.
- ඔයාට බැහැ..තවම ඔයා පුංචියි…පැත්තකට වෙලා ඉන්න. ලොකු වුනාම දෙන්නම්
යනුවෙන් බාල දරුවන් ප්‍රතික්ෂෙප කරන්න එපා.
දානය වෙනුවෙන් දායකත්වය ලබා ගන්න..
මේ දිනවල දානමය පිංකම් වෙනුවෙන් අවස්ථාවන් බොහෝ තිබෙනවා.දානය කියන්නේ දන්සැල පමණක් නොවේ.නාගරික ප්‍රදේශයන්හි නිරෝධායනයට පත් නිවසක් වෙනුවෙන් අවශ්‍ය ආහාර අමුද්‍රව්‍ය නිවසට නොගොස් දුරකථනයෙන් ඒ බව දන්වා ගේට්ටුව අසලින් තබා එන්න පුලුවනි. වසංගත සමයේ සමාජ දුරස්ථ බව නිසා අදාල නිවසට යෑමට නොහැකි වුනත් එවැනි සුළු උපකාරයක් කිරීමත් අප නොදන්නා අන්දමින්ම දානමය පිංකමක් බවට පත් වෙනවා.මෙවැනි කටයුතු සංවිධානය කරන විට දරුවන්ගේද අදහස් ලබා ගන්න.
- අපි අල්ලපු ගෙදර නැන්දලාට ගෙනියන්න බඩු පාර්සලයක් හදමු. මොනවාද ඒකට අපි එකතු කරන්නේ..
මෙවැනි සංවාදයකදී ඔබ නොසිතන අන්දමින් යම් යම් අවශ්‍යතාවයන් දරුවාගේ මනසට ඒවි.මෙවැනි කටයුත්තක් සංවිධානය කරන විට එක්තරා දියණියක් මවට රහසින් කියා සිටියේ
- අම්මේ..පෑඩ් පැකට් දෙකක් දාන්න…සුරනියි එයාගේ අක්කයි දෙන්නම ඉන්නවා..අම්මටත් එපායැ…
මෙවැනි අදහස් වලින් දරුවා සම්මාදම් කර ගැනීමත් සමග ඔවුන්ටත් අනාගතයේදී දානමය කටයුතු වෙනුවෙන් යහලත් මානසිකත්වයක් නොදැනීම හිතේ ගොඩ නැගෙනු ඇත.
තවත් පුංචි බණ කතාවක්..
බුදුරජාණන්වහන්සේ ජීවමාන කාලයේදී එක්තරා රජතුමෙකුගේ මිණිපිරියක් බෝනික්කෙක් ඉල්ලා සිටියා. රජ බිසොව පුංචි මිණිපිරියට හාල්පිටි වලින් බෝනික්කෙක් සාදා දුන්නා. ටික වේලාවකින් බෝනික්කා බිදී ගියා. දියණිය අඩන්න වැලපෙන්න පටන් ගත්තා.
තම මිණිපිරියට සියල්ල නැසෙන සුළුය යන සංකල්පය හිතට ඇතුලු කිරීමට පමණක් නොව මියගිය පසුව සිදු කරන වතාවත් පවා පෙන්වා දීමට අවශ්‍ය වුණා.
රජතුමා හාල්පිටි බෝනික්කාට පාංශකූලය ලබා දෙමින් පුංචි මිනිපිරියට ජීවිතයේ අනිත්‍ය බව ඉතාම අපුරු ලෙසින් කියා දුන්නා.
- නිතරම ප්‍රයෝගික වෙන්න..
දරුවන් ගුණයහපත් කිරීමට නම් අනිවාර්යෙන්ම දෙමව්පියන්ගේ ජීවිතය තුළ යහපත් ගති පැවැතුම් ගොඩ නගා ගැනීම ඉතාම වැදගත්.ඔබ අයහපත් ලෙසින් ජීවිතය ගොඩ නගා ගෙන දරුවන්ට පහපත් ලෙසින් හැසිරෙන්නට උපදෙස් ලබා දුන්නොත් මේ කවිය ඔබට හොදින්ම ගැලපේවි.
දුසිරිත දනන් දෙන- ඔවා වැද්දන් දෙසන බණ මෙන..
ඒ නිසා නිතරම දරුවන්ට යහපත කියා දීමේදී ඔබ යහපත් ලෙසින් ජීවිතය ගොඩ නගා ගන්න. එය ඉතාම වැදගත්. එවැනි පරිසරයකදී දරුවන් ඉදිරියේ ඔබ පරමාදර්ශි චරිතයක් වීම යනු ඔබේ දරුවන් අනිවාර්යෙන්ම සුචරිත දරුවන් බවට පත් වෙනු ඇත.
ආගමික වතාවත්වලට දරුවන් සම්බන්ධ කර ගන්න.
ඔබ පන්සල් යන දිනකදී දරුවන්ද කැටුව යන්න. නිවසේ වන්දනා මාන කරනවා නම් දරුවන්ද ඔබ සමග වන්දනා කිරීමට කැඳවා ගන්න. නින්දට පෙරාතුව පිරිත් සජ්ජායනා කිරීම හෝ විනාඩි කීපයක් මෛත්‍රි භාවනාවට යොමු කරන්න.
උදැසන අවදි වීමෙන් පසුව ආනාපානාසති භාවනා කිරීමට හුරු කරන්න. එයින් දරුවාගේ ධාරනය, සිතේ එකගබව පමණක් නොව පෙනහළු වෙනුවෙන්ද යෝග්‍ය ශ්වසන ව්‍යායාමයක් වී තිබේ.
- දහම් අධ්‍යාපනය ලබා දෙන්න..
දෙමව්පියන් ලෙස ඔබ දිනපතා පාසල් අධ්‍යාපනය වෙනුවෙන් දක්වන උනන්දුව දහම් පාසල් අධ්‍යාපනය ලබා දීමට දක්වන්නේ නැත.
- ඉරිදාට විතරයි ගෙදර ඉන්නේ..එදාටත් නැගිටින්න බැහැ..
- එහෙම නැත්නම් අතිරේක පංති සේරම ඉරිදට…
මෙවැනි අන්දමින් නිදහසට කරුනු කිව්වත් දහම් පාසල් අධ්‍යාපනයෙන් දරුවා ලබන ශික්ෂනය, විනය සහ පිනට දහමට යොමු කිරීම වෙනුවෙන් දහම් පාසල් අධයාපනය සමග සිදු වෙන ( දානමය, ශිලමය ) ක්‍රියාකාරකම් දරුවාගේ ජීවිතයට විශාල ආලෝකයක් විය හැකිය.
ඒ නිසා දෙමව්පියන් ලෙස ඔබේ දරුවා සත්පුරුෂ දරුවෙකු ලෙසින් ගොඩ නගා ගැනීමේ මෙහෙවර ඔබ සතුය. නමුත් එය එක් දිනකින් ඉටු කළ හැකි කාර්යක් නොවේ. මේ වෙසක් පිංකම් කාලයේදී ඔබේ සියලු පුණ්‍ය කර්මයන් වෙනුවෙන් දරුවාගේ සහයෝගය ලබා ගනිමින් ඔවුන්ගේ ජීවිතය දහම් ආලෝකයෙන් පෝෂණය කරන්න.
