බුද්ධිමත් දරුවෙක් බිහි කරන හැටි

බුද්ධිමත් දරුවෙකුගේ සිහිනය සෑම දෙමව්පියෙකුටම පොදුයි. ඒ වගේම දරුවෙකුගේ බුද්ධියෙන් 80% ක්ම වර්ධනය වෙන්නේ මුල් අවුරුදු පහ තුළ නිසා දෙමව්පියන් විදිහට ඔබ දරුවා ගැන වැඩි සැලකිල්ලක් දැක්වීම ඉතාම වැදගත්.දරුවෙකුගේ බුද්ධිමත්බව තීරණය කරන සාධක කීපයක් තිබෙනවා…

ජාන- බොහෝ විට දරුවෙකුගේ බුද්ධිමත්බව සදහා ජාන වලින් බලපෑමක් ලැබෙනවා.ජාන තිබුන පමනින්ම දරුවා බුද්ධිමතෙකු වෙන්නේ නැහැ. ඒ වෙනුවෙන් දෙමව්පියන්ගේ මග පෙන්වීම ඉතාම වැදගත්.

පෝෂණය

බුද්ධිමත් දරුවෙක් නිර්මානය වීමට පෝෂණයත් ඉතා වැදගත් නිසා දෙමව්පියන් විදිහට දරුවාගේ ශාරිරික පෝෂණය ගැන දක්වන උනන්දුවත් ඉතාම වැදගත්.

ගුණාත්මකබව

 පුංචි කාලයේ පටන්ම දරුවා තුළ ගුණාත්මක ගති පැවැතුම් ඇති කිරීමත් ඉතා වැදගත් බොහෝ විට දරුවා උස් මහත් වෙද්දී ගති පැවැතුම් ගොඩ නගන්න පුලුවන් කියලා හිතුවත් ඒ ආකල්පය වැරදියි. දරුවාගේ බුද්ධිය තහවුරු කරන අන්දමේ ගුණාත්මක පරිසරයක් බාල කාලයේ පටන්ම ගොඩ නැගීමත් වැදගත්.

අධ්‍යාපනය

දරුවාගේ මුල්ම ගුරුවරු වෙන්නේ දෙමව්පියන්. ඒ නිසා දරුවාගේ බාල කාලයේදී අධ්‍යාපනය වෙනුවෙන් ඇවැසි පරිසරයක් ගොඩ නැගීමත් ඉතාම වැදගත්. මුල් අවුරුදු පහක කාලයේදී දරුවාගේ බුද්ධිමත් බව වෙනුවෙන් වූ තීරනාත්මක සාධකයක් විදිහට අධ්‍යාපනයත් වැදගත් නිසා  දෙමව්පියන් විදිහට දරුවාගේ පුංචි කාලයේ පටන් අධ්‍යාපනයක් ලබා දීම වැදගත්. හැබැයි මෙතැනදී අධ්‍යාපනය විදිහට අර්ථවත් වෙන්නේ අකුරු කියවන ලියන හැකියාව නොවෙයි.

පුංචි දරුවාට යම් යම් දේ තේරුම් ගැනීමේ හැකියාව බාල කාලයේ පටන්ම නිවස තුලින් ගොඩ නගන්න පුලුවන්.ඒ වගේම තර්කානුකූලව හිතන අන්දම ගැන රුකුල් දෙමව්පියන් වෙතින් ලබා දුන්නොත් එය සැබෑ අධ්‍යාපනයක් වෙන බවත් අමතක කරන්න එපා.

මව්පියන්ගේ බලපෑම

බුද්ධිමත් දරුවෙකු නිර්මානය කරන තෝතැන්න නිවස කිව්වොත් එය නිවරැදියි. දරුවා ජීවත් වෙන නිවස සැබැවින්ම ප්‍රසන්න විය යුතුයි. ඒ නිවසේ ආකෘතියෙන් හෝ භෞතික සම්පත්වලින් නොවේ. මේ නිවසේ නිවැසි දෙමව්පියන්ගේ බලපෑම බුද්ධිමත් දරුවෙකු නිර්මානය කිරීමට විශාල පිටුවහලක් වෙනවා.බොහෝ දෙමව්පියන් දරුවාගේ මානසිකත්වය ගැන නොසිතා කරන කියන ඇතැම් ක්‍රියාකාරකම් නිසා දරුවාගේ හැකියාවන් උපන්ගෙයිම මොට වී යනවා.බොහෝ දෙමව්පියන් දරුවාගේ බුද්ධිමය හැකියාව තේරුම් ගන්නේ නැහැ. හැදෙන ගහ බාලකාලයේ පටන්ම හොදින් දැන හදුනා ගැනීමට පුලුවන්. ඒ හැකියාව සැබැවින්ම ඇත්තේ දෙමව්පියන්ටයි. ඊට හේතුව දරුවා සමග වැඩියෙන්ම සමීප සම්බන්ධතාවයක් ඇත්තේ දෙමව්පියන්ට නිසා මේ ගැන වැඩි අවධානයක් දැක්වීම ඉතාම වැදගත්.

අද ලෝකය දිනූ බොහෝ දරුවන්ගේ අතීතාවර්ජනයන් ගන බලන විට ඔවුන්ගේ හැකියාවන් හදුනා ගැනීමට දෙමව්පියන්ගෙන් විශාල දායකත්වයක් ලැබී තිබෙනවා. සමහර විට ඔබේ දරුවාටත් මේ අන්දමින් සුවිශේෂී හැකියාවන් තිබෙන්න පුලුවන්. ඒ වුනත් එම හැකියාවන් හදුනා ගැනීමට නම් දෙමව්පියන් විදිහට ඹබ දරුවා සමග වඩාත් සමීපයෙන් සිටීම ඉතාම වැදගත්.

මාධ්‍ය

එදා දරුවන් ඩිජිටල් තිරයට නිරාවරණය නොවුන නිසා ඔවුන් පරිසරයෙන් බොහෝ දේ දැන ඉගෙන ගත්තා. ඒ නිසාම දරුවන්ගේ තර්ක බුද්ධිය හොදින් මුවහත් වුණා. අද දරුවන්ට ඒ වාසනාව ඇත්තෙන්ම ගිලිහී තිබෙන බව ඇතත්. ගහක්, කොලක්, නිලක් නැති පරිසරයක කොන්ක්‍රිට් වනාන්ත අතර සිරවුන නිසාම එය හේතුපාඨයක් කර ගෙන දරුවන් විද්‍යුත් නාලිකාවන් සමග අනවශ්‍ය විදිහට ඇබ්බැහි වෙලා. ඇමරිකා එක්සත් ජනපදයේ සෞඛ්‍ය සංගමය පෙන්වා දෙන අන්දමට වයස අවුරුදු පහට අඩු දරුවන්ට විද්යුත් මෙවලම් සමග ගණුදෙණු කිරීමට අවසර දීම හැකිතාක් සීමා වෙනවා නම් වඩාත් සුදුසු බව සදහන් කර තිබෙනවා. බ්‍රිතාන්‍ය රජපවුලේ දරුවන්ට විද්්‍යුත් මෙවලම් භාවිතා කිරීමට කේට් විසින් අවසරයක් දෙන්නේම නැති බව දැන් ප්‍රසිද්ධ රහසක්. ඒ නිසා එබේ දරුවා අනාගතයේදී බුද්ධිමත් දරුවෙක් ලෙසින් දකින්න රිසි නම් අද දවසේදී ඔවුන්ට සැබෑ ලෝකය අත්විදින්න අවසර දෙන්න.

සෙල්ලමට ඉඩ දෙන්න

බොහෝ දෙමව්පියන් දරුවාට සෙලල්මට නම් ඉඩක් දෙන්න වැඩි කැමැතත්ක් නැහැ. ඊට එක් හේතුවක් විදිහට දෙමව්පියන් හිතන්නේ සෙල්ලමට හිත ගියොත් අනාගතයේදී ඉගෙනුමට තිබෙන උනන්දුව දරුවාගෙන් දුරස් වීමට ඉඩ ඇති බවයි. ඒ හින්දා පුංචි කාලයේ පටන් සෙල්ලමට අවසර දෙන්නේ නැහැ. ඒ වුනත් දරුවෙකු සෙල්ලම් කරන විට මොළයට හොදින් ඔක්සිජන් සැපයුමක් ලැබෙන නිසා ඔවුන්ගේ මොලයේ ඇති වෙන නීරෝගීතාවය බුද්ධිමත් දරුවෙකුගේ පැවැත්මට වඩාත් හොද අත්වැලක් සපයනවා.

රූපවාහිනියටත් සීමාවක් දෙන්න

රූපවාහිනායට දරුවන් ඉතාම කැමැතියි. එයින් දරුවන්ගේ හිත ආකර්ශනය කරන විවිධ වැඩසටහන් නරඹන්න පුලුවන්. තවත් අතකින් රූපවාහිනිය ඉගෙනුම් මාධ්‍යක්. ඒ වුනත් පමණට වඩා රූපවාහිනියට දරුවා යොමු වුනොත් බුද්ධිමත් දරුවෙකුගේ හැඩ තල නැති වීමට පුලුවන්. ඒ නිසා රූපවාහිනය දරුවාට විනෝදය, ඉගෙනුම ලබා දෙන මෙවලමක් ලෙසින් භාවිතයට ඉඩ සලසා දෙන්න.. දරුවාගේ ඇබ්බැහි වීම අනිවාර්යෙන්ම මුදවා ගත යුතුයි.

එසේ නම් ඔබේ දරුවා අනාගතයේදී බුද්ධිමත් දරුවෙකු ලෙසින් නිර්මානය කිරීමට නම් අද දවසේ දරුවාගේ මොලයේ සංවර්ධනයට අවශ්‍ය උත්තේජන ලබා දීම ඉතාම වැදගත්. එසේ නම් ඔබ දරුවා ගෙවෙන පරිසරය වෙතින්ම මේ පහසුකම් ලබා දුන්නොත් හෙට දවසේ ඔබේ දරුවා බුද්ධිමතෙකු ලෙසින් සමාජගත කිරීම හැකියාව නොදැනීම ලැබෙනු ඇති.

 

 

හිතට එන අදහසක් පත්තරයකින් පළ වුනාම ලැබෙන සතුට දන්නේ ඒ අත්දැකීම ලබන කෙනෙක් පමනයි. මේ නිසාම දන්නා කාලයේ පටන්ම ලියන්න ලැබෙන හැම මොහොතකම යමක් ලිව්වා. ඒවා පළ වුනා.දැනට මහවැලි ජාතික අධ්‍යාපන විද්‍යා පීඨයේ පුස්තකාලයාධිපතිනිය ලෙස සේවය කරන අතර ලේඛනය අමතක කරන්නේ නැහැ.කැළනිය විශ්ව විද්‍යාලයේ ශාස්ත්‍රපති උපාධිය සහ පේරාදෙණිය විශ්ව විද්‍යාලයේ කලා උපාධිය වෙනුවෙන් කිසිම අපහසුතාවයක් ඇති නොවුනේද ලිවීමේ කලාවට පිං සිදු වෙන්නයි.නිවස , රැකියාව සහ පවුල සමග වූ ගණුදෙණුව ලිවීමේ කලාවට හරස් නොවන සේ පවත්වා ගෙන යන අතර මගේ ජීවිතයට ලේඛනයත් නොදැනම බද්ධව තිබෙනවා විය හැකියි.

LEAVE A REPLY

Please enter your comment!
Please enter your name here