රත බිබිළි ඇති වෙන්නේ ඇයි…?

බිලිඳු දරුවන්ගේ සම බොහොම සංවේදියි. ඒ නිසාම දහඩියෙන් පවා ඔවුන්ගේ සමට යම් යම් ආසාදන ඇති වෙන්න පුලුවනි. ළදරුවන්ගේ සමේ ඇති වෙන රතු පැහැති බිබිලි විශේෂය අපි “රත බිබිලි ” විදිහට හඳුන්වනවා.

සමේ තැනින් තැන පැලැස්සක් වගේ ඇති වෙන මේ රතු පැහැති බිබිලි නිසා ඇති වෙන කැසිම, දැවිල්ල පුංචි පැටියාට දරා ගන්න අපහසුයි. නමුත් ඒ අපහසුව ඔවුන්ට ප්‍රකාශ කිරීමටත් බැහැ. ඒ නිසා ඔවුන්ගේ අපහසුව අපට කියන එකම මාධ්‍ය බවට ඇඬිම පත් වෙනවා. ඒ නිසා අපි ළදරු අවස්ථාවේදී දරුවාට “ රත බිබිලි ” ඇති වීම වලක්වා ගැනීම ඉතාම වැදගත්.

රත බිබිළි ඇති වෙන්නේ ඇයි…?

රත බිබිළි ඇති වීමට ප්‍රධාන හේතු කීපයක් තිබෙනවා. ඒ අතර අපි බොහෝ දෙනෙක් හිතන්නේ දරුවා ගැබ් දරණ කාලයේදී මව උෂ්ණාධික ආහාර ගැනීම  නිසා මවගේ  සිරුරේ දාහ ගතිය වැඩි වීම දරුවාට රත බිබිළි ඇති වීමට හේතුවක්  බවයි. එය එක් හේතුවක් පමණයි.

දොළ දුකක් ලෙස උෂ්ණාධික ආහාර වෙනුවෙන් කැමැත්තක් ඇති වුනොත්…?

දරුවෙක් ගැබ දරණ කාලයේදී මවට ඇති වෙන දොළ දුක නොසලකා හැරීමත් අපේ සමාජයේ අනුමත කරන්නේ නැහැ. එය කෙසේ හෝ ඉටු කර ගැනීමට ගැබිණි මව්වරුන් කැමැත්තක් දක්වනවා. තවත් පැත්තකින් මවගේ දොළ දුක ලෙසින් අපට සන්නිවේදනය වෙන්නේ ගැබ තුළ සිටින දරුවාගේ ආශාවන්  බවට තිබෙන පිලිගැනීම නිසා දොළ දුක සමයේ ඇති වෙන ආහාර වෙනුවෙන් ගැබිණි මව වගේම ඇගේ ඥාතීන් පවා උනන්දු වෙනවා.

නමුත් මෙතැනදී අපට යම් සීමාවන් පනවා ගන්න පුලුවනි. දොළ දුකක් ලෙසින් උෂ්ණ ආහාරයක් ගැන ආසාවක් ඇති වුනොත් ඒ ආහාරය සමග තවත් උෂ්ණ ආහාර ගැනීම ගැන සීමාවන් පනවා ගන්න පුලුවනි.තවත් විදිහකට කිව්වොත් දොළ දුකට වුනත් ඇති වෙන ආසාව නිසා උෂ්ණ ආහාර ලබා ගැනීමේ ප්‍රමාණය අඩු කරන්න පුලුවනි. එවැනි පුංචි පුංචි සීමාවන් පනවා ගැනීමෙන් ළදරුවාගේ සමේ රත බිබිලි ඇති වීම වලක්වා ගන්න පුලුවනි.

දරුවා  පමනට වඩා උණුසුම් කිරීම

නව ජන්ම දරුවෙකුට ගර්භාෂයේ පරිසරයට වඩා පිටත පරිසරයේ ඇති ආගන්තුක බව දරා ගැනීමට අපහසුයි. ඒ නිසා දරුවෙකු උපත ලබා සතියක් පමණ කාලයක් උණුසුම්ව තබා ගැනීම වරදක් නැහැ. ඒත් සතියකින් පසුවත් දරුවාගේ අත් , පය, හිස වගේම සිරුර සම්පූර්නයෙන්ම ආවරණය වන විදිහට මේස්, තොප්පි සහ සීත කබා ආදිය අන්දවා තැබීමත් සුදුසු නැහැ. එහෙම වුනාම දරුවාගේ සිරුරේ ඇති වෙන දහඩිය නිසාම බිබිලි ඇති වෙන්න පුලුවනි.

ඊටත් වඩා අපි ජීවත් වෙන්නේ ඝර්ම කලාපීය පරිසර තත්වයක නිසා  පමනට වඩා ආවරනය කිරීමත් රත බිබිලි ඇති වීමට හේතුවක් වෙන්න පුලුවනි.

දරුවාගේ ඇඳුම්…

අද දරුවාගේ ඇඳුම් සෝදා වියලා ගැනීමේ පහසුකම් ඕනෑ තරම් තිබෙනවා. අතීතයේදී දරුවන්ගේ ඇඳුම් හිරු එළියේ වියලා ගත්තා. ඒ වගේම හවස් වීමට පෙරාතුව ගෙට ගැනීමත් සිදු වුණා. අද ඒ වෙනුවෙන් පහසුකම් තිබෙන නිසා දරුවාගේ ඇඳුම් ගැන වැඩි සැලකිල්ලක් දැක්වීම ඉතාමත් වැදගත්. හොඳින් වියලා ගත් ඇඳුම් උණුසුම් ස්ත්‍රික්කයකින් මැද ගැනීම නිසා ඇඳුම්වල තිබෙන දිලීර සහ පුස් වැනි දේ ඉවත් වෙනවා.විශේෂයෙන් වැසි සහිත කාලගුණ තත්වයක් පවතින විට මේ ගැන අම්මාගේ වැඩි අවධානයක් දැක්වීම වැදගත්.

රත බිබිළි වෙනුවෙන් ප්‍රතිකාර ….

  • දරුවා නාවන විට..

පුංචි දරුවා අපහසුතාවයට පත් වෙනවාට අපි කවුරුත් කැමැති නැහැ. ඒ නිසා දරුවා රත බිබිලි තත්වයෙන් ආරක්ෂා කර ගැනීමට නම් ඉතාම සරල වගේම ප්‍රත්‍යක්ෂ පිළිවෙත් තිබෙනවා.

අපි දරුවා නාවන ජලයට වෙනිවැල්ගැට, අමුකහ, කොහොඹ වැනි විෂබීජ නාශක ද්‍රව්‍ය එකතු කරන්න පුලුවනි.අතීතයේදී බිලිඳු දරුවන් නාවන ජලයට වෙනිවැල්ගැට, අමුකහ, කොහොඹ එකතු කිරීම නිසා දරුවාගේ සම පැහැපත් වෙනවා. ඒ වගේම මෙම ද්‍රව්‍ය විෂබීජ නාශකයක් විදිහටත් ක්‍රියාකරනවා. මේවා ඉතාම සුලබ ඖෂධ නිසා කිසිදු අපහසුවකින් තොරව ගමේ හෝ නගරයේ ඖෂධ වෙළඳසැල් වලින් ලබා ගන්න පුලුවනි.

  • දුම් ඇල්ලීම…

පසුගිය කොරෝනා කාලයේදී අපි දුම් ඇල්ලීම ගැන බහුලව කතාබහ කළා.සෑම නිවසකම වාගේ දුම් ඇල්ලීම ගැන වැඩි උනන්දුවක් ඇති වුණා.ආයුර්වේදයට අනුව දුම් ඇල්ලීම අනාදිමත් කාලයක පටන් සිදු වී තිබෙනවා.විශේෂයෙන් දරු ප්‍රසුතියෙන් පසුවත් මවගේ තුවාල ඉක්මනින් වියලීමට වගේම විෂබීජහරණය වෙනුවෙන් දුම් ඇල්ලීම සිදු කලා.

රත බිබිලි වලින් දරුවා ආරක්ෂා කර ගැනීමටත් දුම් ඇල්ලීම පහසුම ක්‍රමයක්. දරුවා නාවන්න කාමරයෙන් පිටතට ගත් පසුව දුම් ඇල්ලීම සුදුසුයි. දරුවා කාමරයේ තබා දුම් ඇල්ලීම වගේම දුම් ඇල්ලීමෙන් විනාඩි 30 ක් පමණ ගත වෙන තුරු දරුවා කාමරයේ තැබීමත් සුදුසු නැහැ.

පොල් කටු පුළුස්සා ගත්  ගින්දර මතට ගුගුල් , දේවදාර, සුවඳ කොට්ටං වැනි සුවඳ ද්‍රව්‍ය මාරුවෙන් මාරුවට  ( එක්වරට එක් සුවඳ ද්‍රව්‍ය බැගින් ) යොදා ගෙන දුම් අල්ලන්න  පුලුවනි. ආයුර්වේදයේ මේවා “රාක්ෂෝශ්න ද්‍රව්‍ය ” යනුවෙන් හැඳින්වෙනවා.

දරුවාගේ ඇඳුම් අල්මාරියටත් මේ දුම්  ඇල්ලමෙන්  ඇඳුම්වල තිබෙන දිලීර, පුස් සහ වෙනත් විෂබිජ ඉවත් වීම සිදු වෙනවා. 

දරුවාට මව්කිරි ලබා දෙන කාලයේදී මවගේ සිරුර අධික ලෙස උණුසුම් බව දැනෙනවා නම් උෂ්ණ ආහාරවලින් වැලකෙන්න. ඒ වගේම ඉරමුසු , කොත්තමල්ලි , නීරමුල්ලිය තම්බා ගත් ජලයට රත කල්කය තේ හැඳි බාගයක් එක් කර පානය කරන්න. කොත්තමල්ලි සමග රත කල්කය බොනවා නම් කොත්තමල්ලි කබලේ බැද කුඩු කර ගන්න. කිරි දෙන මව රත කල්කය භාවිතා කිරීමෙන් සිරුරේ ලේ පිරිසිදු වෙනවා වගේම මව්කිරි පිරිසිදු වෙනවා.

දරුවන්ට රත කල්කය සුදුසුද…?

අපේ රටේ අනාදිමත් කාලයක පටන් දරුවන්ට රත කල්කය(දෙසඳුන් කල්කය )   ලබා දුන්නා. රත කල්කය බොහොම සුරක්ෂිතයි. අතීතයේදී රත කල්කය ලබා දුන් දරුවන් අද වැඩිහිටියන් බවට පත්ව සිටින අතර ඔවුන් බොහොම නිරෝගියි. පාරම්පරික අත්දැකීම් අනුව “ රත කල්කය ” ඉතාම සාර්ථක ඖෂධයක්.

දරුවෙක් උපත ලබා දෙසතියකින් පසුව රත කල්කය ලබා දෙන්න පුලුවනි. රත කල්කය කොත්තමල්ලි ඇටයක ප්‍රමාණයක් ගෙන එය මව්කිරිවල දිය කර දරුවාගේ දිවේ තවරන්න. මෙය දිනකට දෙවතාවක් දෙන්න පුලුවනි. ආයුර්වේදයට අනුව මෙය “ ලේහ කිරීම ” යනුවෙන් හැඳින්වෙනවා.

කොපමණ කාලයක් රත කල්කය දීම සුදුසුද..?

දරුවාට වයස අවුරුදු දෙකක් පමණ වෙන තෙක් රත කල්කය ලබා දීම සුදුසුයි. රත කල්කය ආයුර්වේදයට අනුව ලෝකයේ තිබෙන හොඳම ප්‍රතිශක්තිකරණ වර්ධන ඖෂධයක් නිසා මෙය දරුවන් වෙනුවෙන් වගේම ඕනෑම වයසක අයට ලබා ගැනීමට කිසිම බියක් ඇති කර ගත යුතු නැහැ.මෙය ක්‍රමයෙන් මුංඇටය සිට කව්පි ඇටයක ප්‍රමාණය දක්වා මාත්‍රාව වැඩි කරමින් ලබා දෙන්න පුලුවනි. 

ඒ වගේම රත කල්කයටත් අඩු නොවන කුෂ්ට සහිත තත්වයක් ඇත්නම් ළමා රෝග පිලිබඳ  විශේෂඥ වෛද්‍යවරයෙකුගේ උපදෙස් ලබා ගැනිමත් වැදගත්.

ආයුර්වේද වෛද්‍ය නිළධාරිනි අයෝමි ශානිකා ගමගේ මහත්මිය BAMS ( කොළඹ ) සමග සාකච්ඡාවක් ඇසුරින්.

 

හිතට එන අදහසක් පත්තරයකින් පළ වුනාම ලැබෙන සතුට දන්නේ ඒ අත්දැකීම ලබන කෙනෙක් පමනයි. මේ නිසාම දන්නා කාලයේ පටන්ම ලියන්න ලැබෙන හැම මොහොතකම යමක් ලිව්වා. ඒවා පළ වුනා.දැනට මහවැලි ජාතික අධ්‍යාපන විද්‍යා පීඨයේ පුස්තකාලයාධිපතිනිය ලෙස සේවය කරන අතර ලේඛනය අමතක කරන්නේ නැහැ.කැළනිය විශ්ව විද්‍යාලයේ ශාස්ත්‍රපති උපාධිය සහ පේරාදෙණිය විශ්ව විද්‍යාලයේ කලා උපාධිය වෙනුවෙන් කිසිම අපහසුතාවයක් ඇති නොවුනේද ලිවීමේ කලාවට පිං සිදු වෙන්නයි.නිවස , රැකියාව සහ පවුල සමග වූ ගණුදෙණුව ලිවීමේ කලාවට හරස් නොවන සේ පවත්වා ගෙන යන අතර මගේ ජීවිතයට ලේඛනයත් නොදැනම බද්ධව තිබෙනවා විය හැකියි.

LEAVE A REPLY

Please enter your comment!
Please enter your name here