දෙමාපියෙකු බවට පත්වන සෑම අම්මා, තාත්තා කෙනෙකුටම සුවිශේෂි වූ වගකීම් සමුදායක් පවතී. තම දරුවන් නිසිමග යැවීම, නිසි අධ්‍යාපනයක් ලබාදීම, නිසි වර්ධන අවදීන් පසුකරවීම ආදී බොහෝ ඒ අතර වේ.
සෑම දෙමාපියෙකුගේම වගකීම හා කාර්යය භාර්යය වචනයෙන් විස්තර කිරීම අපහසු වුවත් එය ඇතැම් විට තවත් අභියෝගාත්මක වීමට ඉඩ කඩ පවතී. තම දරුවා විශේෂ අවශ්‍යතා සහිතව ඉපදීම එවන් එක් අවස්තාවක් ලෙස හදුන්වා දිය හැකිය.
සාමාන්‍ය දරුවෙකු හෝ විශේෂ අවශ්‍යතා සහිත දරුවෙකු වුවද ඔවුන් දරුවන් වශයෙන් දෙමාපියන්ට ලැබෙන වගකීම හා කාර්යය භාර්යය එලෙසම පවතී. නමුත් විශේෂ අවශ්‍යතා සහිත දරුවෙකුගේ දෙමාපියෙකු යනු තරමක් අභියොගාත්මක හා විශේෂ කාර්යය භාර්යය යන් අතර සුවිශේෂි කාර්යය භාර්යය යක් පැවරෙන පිරිසක් බව කිව යුතුමය. එම නිසා එවන් දෙමාපියන්ට අවශ්‍ය වන්නා වූ Parenting tips කිහිපයක් සාකච්ඡා කිරීම සමාජ අවශ්‍යතාවයකී.
1. ඔබ තනිවී ඇතැයි නොසිතන්න. තමන්ටම දොස් නගා ගැනීමෙන් වලකින්න.
විශේෂ අවශ්‍යතා සහිත දරුවෙකු තම දරුවා ලෙස මෙලොව එලිය දුටු විට කලයුත්තේ කුමක්දැයි සිතමින්, තැවෙමින්, තමන්ටම දොස් පවරා ගනිමින්, මෙය සිදුවූයේ කාගේ වරදකින්ද සිතමින් කල්ගත කිරීම අප සුලභව දකින දෙයකි. තමා මෙලොව තනිවී ඇතැයි සිතමින් සමාජගත නොවී හුදකලාව කල් ගත කිරීම අනුවණ කමක් ලෙස පෙන්වාදිය යුතුය. මෙවන් ප්‍රශ්ණ ගැන සිතීමට ගතකරන කාලය තම ආදරනීය දරුවා සමඟ ප්‍රයොජනවත් ලෙස ගතකිරීමට උත්සහ කිරීම ඉතා වැදගත් වේ.
02. ඔබේ වගකීම හරිහැටි අවබෝධ කර ගන්න.
දරුවන්ට තම දෙමාපියන් යනු ඔවුන්ගේ ලොවේ වීරයන්ය. එම නිසා විශේෂ අවශ්‍යතා සහිත දරුවන් හට ඔවුන්ගේ දෙමාපියන් වීරයන්ගෙත් වීරයන් විය යුතුමය. එම නිසා තම දරුවාගේ අනාගතය ගොඩ නැගීම උදෙසා ඔබගේ වගකීම හා කාර්යය භාර්යය නිසිපරිදි අවබෝධකර ගැනීම ඉතා වැදගත් වේ. වර්තමානය වන විට රජයේ රෝහල් වලින් හා අනෙකුත් චිකිත්සකවරු විසින් ඔබට නිසි මගපෙන්වීමක් කිරීම සිදුවේ.
03. දරුවාගේ වර්ධනය උදේසා අවශ්‍ය චිකිත්සාවන් හා අනෙකුත් වෛද්‍ය ප්‍රතිකාර කෙරෙහි යොමුවන්න.
දරුවෙකුගේ උපතේ සිට මුල් අවුරුදු තුන සහ පහ දක්වා කාලය ඉතාමත් වැදගත් කාලපරාසයක් බව කිව යුතුමය. එම කාලය තුලදී දරුවාගේ මොලයේ ක්‍රියාකාරීත්වය වේගයෙන් සිදුවේ. එම නිසා තම දරුවා විශේෂ අවශ්‍යතා සහිත දරුවෙකු බව හඳුනාගත් මොහොතේ සිට දරුවාගේ කුසලතා වර්ධනයට අදාල චිකිත්සාවන් සහ අනෙකුත් වෛද්‍යමය ප්‍රතිකාර අවශ්‍යනම් ඒ සදහා ක්ෂණිකව යොමුවීම ඉතා වැදගත් වේ.
- ඔබේ දරුවා සමග ගතකිරීමට කාලය වෙන් කරන්න.
වර්තමානයේ දෙමාපියන් බොහෝ කාර්යය බහුල වේ. මන්ද ඔවුන්ගේ රැකියා සමඟ, නිවසේ කටයුතු සමඟ , අනෙකුත් වගකීම් සමඟ කාර්ය බහුල නිසා දරුවන් සමග ගතකිරීමට අවශ්‍ය තරම් කාලය සොයා ගැනීම අපහසු විය හැකිය. නමුත් සාමාන්‍ය දරුවන් මෙන් නොව විශේෂ අවශ්‍යතා සහිත දරුවන් සමඟ වැඩි වෙලාවක් ගත කිරීමට දෙමාපියන්ට සිදු වේ. ඔවුන්ගේ කුසලතා වර්ධනයට චිකිත්සාවන් හරහා දෙනු ලබන නිවැස් ක්‍රියාකාරකම් සිදුකිරීමට, ඔවුන්ට අවශ්‍ය කරන රැකවරණය සැපයීමට දෙමාපියන්ට සාමාන්‍ය දරුවෙකුට වඩා වැඩි කාලයක් තම දරුවා සදහා වැය කිරීමට සිදුවන බැවින් එම කාලය විනොද ජනක සහ ප්‍රසන්න අයුුරින් ගතකිරීමට සැලසුම් කරන්න.
05. උත්සහය අත් නොහරින්න.
සාමාන්‍ය දරුවන් මෙන් නොව විශේෂ අවශ්‍යතා සහිත දරුවන්ගේ වර්ධනයේ වෙනස්කම් පවතී. එමනිසා ඔවුන් නිතර ඇතැම් කුසලතා වර්ධනය කර ගැනීමට ඉතා දිගු කාලයක් ගැනීමට ඉඩ ඇත. එනිසා ඔබ ඉක්මන් වී තීරණ නොගෙන නොපසු බටව උත්සහයෙන් කටයුතු කිරීම ඉතා වැදගත් වේ.
06. දරුවා සම්බන්ධයෙන් සුලු දෙයක් වුවද සමරන්න. එය ධනාත්මකව අගයන්න.
ඔබේ දරුවා කරණු ලබන දේවල් නිතර අගයන්න. ඒ සඳහා ඔවුන්ට තවත් දිරි දෙන්න. උදාහරන ලෙස දරුවා හට කුඩා තිලිණයක් දීම, දරුවා ප්‍රිය කරන ආහාරයක් ලබාදීම, නිවසින් පිටතට රැගෙනයාම මෙන්ම දරුවාහට අත්පොලසන් දීම, සිප වැලද ගැනීම, අගයකිරීම් සටහන් (Reward chart) යාවත් කාලීන කිරීම ඔබට සිදුකළ හැකි දේ අතර වේ.
07. සන්සන්දනය කිරීමෙන් වලකින්න.
සන්සන්දනය කිරීම ඇතැම් විට හොද දෙයක් වුවද ඔබ වටහා ගත යුත්තේ සැම දරුවෙකුම තවත් දරුවෙකුගෙන් වෙනස් වන බවයි. එම නිසා ඔබ තවත් දරුවෙකු දෙස බලමින් ඔබේ දරුවා ගැන තීරණ ගැනීම නුවනට හුරු නොවනු ඇත.
08. සමාජීය බලපෑම් සහ අපවාද පිළිබඳ නොසිතන්න.
ඇතැම් දෙමාපියන් සමාජයෙන් අසනු ලබන ප්‍රශ්න වලට පිළිතුරු දීම මගහැර සමාජගත නෙවී තම නිවෙස් වලට වී කල්ගත කිරීම සිදුකරනු ලබයි. නමුත් සමාජීය අපවාද සහ බලපෑම් ගැන නොසිතන්න. සමාජයේ ආකල්පමය වෙනසක් අවශ්‍ය බව අප සිතුවත් ඒවා පිළිබඳ නොසිතා කටයුතු කිරීම ඉතා වැදගත් වේ.
කථන හා භාෂා චිකිත්සක සජිනී පෙරේරා මහත්මිය විසිනි.
