මෙන්න අපේ පුතාට තෑග්ගත්…
පුංචි අය විතරක් නොවෙයි, වැඩිහිටි දරුවන් වුනත් කාගෙන් හෝ සුලුවෙන් වුනත් යම් තෑග්ගත් ලබා ගන්න කැමැතියි. තෑග්ගක් කියන්නේ එක්තරා ආකාරයක මානසික අල්ලසක් කිව්වත් වරදක් නැහැ. තෑග්ගක් ලැබෙන අවස්තාවන් අනුව දරුවාගේ හිතේ ඇති වෙන සතුට වචනයෙන් විස්තර කරන්නත් බැහැ. නමුත් නිතරම දරුවන්ට තෑගි දුන්නොත්..තෑගි නැතුව යමක් කර ගන්න බැරි තැනට දරුවන් පත් වෙන්න පුලුවනිද..?
තෑග්ගක් දෙන්න නිමිත්තක් ඕන…
දරුවාට තෑග්ගක් ලබා දීමට නම් ඒ වෙනුවෙන් නිමිත්තක් තබා ගැනීම ඉතාම වැදගත්. සාමාන්‍යයෙන් දරුවන්ට පංතියක වුනත් රතු ලකුණු සහ කලු ලකුනු ලබා දීමෙන් වුනත් සිදු වෙන්නේ ඔවුන්ට ඇගයීමක් ලබා දීමයි. මේ ඇගයීම නිසා දරුවා යම් අභිප්‍රේරණයක් හෙවත් උත්තේජනයක් ලබනවා.
පංතිය අතු ගෑවොත්…පංතියේ ගුරු මේසයේ මල් පෝච්චිය පිළියෙල කලොත්..දරුවාට රතු ලකුණු දැන් කාලයේ නම් ” හිනා මුහුණක් ” ලබා දෙනවා. ඒ වගේම ගෙදරදී කිරීමට ලබා දෙන ගෙදර වැඩ කිරීම , සියළුම ගණන් නිවරැදිව සැදීමත් රතු ලකුණු ලැබීමට අවස්ථාවක්.
ඒ වගේම පංතියේ හැසිරෙන රටාවේ පුංචි වුනත් වරදක් ඇත්නම් රතැනදී දරුවාට කළු ලකුණක් ලැබීමට හේතුවක්. මේ වර්ගකිරීම නිසා දරුවා කලු ලකුනුවලින් දුරස් වෙලා රතු ලකුණු ලැබීමට අවශ්‍ය අන්දමින් තමන්ගේ හැසිරීම ගොඩ නගා ගන්නවා.
නිවසේදීත් මේ රටාව…
ඉතින් නිවසේදී වුනත් දරුවාගේ හොද වැඩක් වෙනුවෙන් පුංචි වුනත් තෑග්ගක් ලබා දෙන්න දෙමව්පියන්ට පුලුවනි. තමන්ගේ කාමරය පිලිවෙලට තබා ගැනීම, පාසල් වැඩ කටයුතු වෙනුවෙන් උනන්දු වීම වැනි කටයුතු නිසා දරුවාට තෑග්ගක් ලබා දීමට දෙමව්පියන්ට පුලුවනි.
තෑග්ගක් වෙනුවෙන් වියදම්…
තෑග්ගක තියෙන්නේ මුදල්මය වටිනාකමක් නොවෙයි.දරුවාගේ හිතට සතුටක් ලැබෙනවා නම් නියම තෑග්ග එයයි. තෑග්ගක් වෙනුවෙන් දෙමව්පියන් විශාල වැයක් දැරුවත් එය දරුවාගේ මනසට උත්තේජනයක් නොවුනොත් සැබැවින්ම එය තෑග්ගක් නොවෙයි. සමහර විට ඔබ රුපියල් දහස් ගණනක් වැය කර මිලට ගන්නා සෙල්ලම් බයිසිකලයට වඩා නිවස අසලින් ගලා ගෙන යන ඇලක දොලක නෑමට දරුවා කැටුව යෑම එවුන්ට විශාල සතුටක් ලැබෙන කටයුත්තක් වේවි. එහෙම නැත්නම් දරුවා ප්‍රිය කරන රස කැවිල්ලක් හෝ වෙනත් අතුරුපසක් පිළියෙල කර දුන්නොත් රතරම් වටිනා තෑග්ගක් දරුවාට තවත් නොමැති වෙන්න පුලුවනි.
තෑග්ගක් දෙන්න පොරොන්දු වුනොත්…?
ඔබ දරුවාට තෑග්ගක් දීමට පොරොන්දු වුනොත් එය හෙටට කල් තබන්න එපා. සමහර විට හෙටටකල් තැබීම සමග එය නොලැබී ඔබට අමතක වෙන්නත් පුලුවනි. වචනයට පමණක් තැග්ගක් ලබා දෙනවාය යන පොරොන්දුව තබන්න එපා. ඔබ දරුවා ඉදිරියේ තෑග්ගක් දෙන බවට පොරොන්දු කර ගෙන යමක් ඉටු කර ගත්තේ නම් ඒ පොරොන්දුව මග හරින්න එපා.එසේ වුනොත් ඔබ ගැන දරුවාගේ හිතේ ඇති විහ්වාසය නොදැනීම බිඳ වැටෙන්න පුලුවනි.
අපේ අම්මා/තාත්තා හරිම බොරු කාරයෝ…තෑග්ගක් දෙනවා කිව්වා දැන් කොච්චර දවසක් වුනාද..? තවම නැහැ..ඔබ මුල් කර ගෙන දරුවාගේ හිතේ මෙවැනි මානසිකත්වයක් ගොඩ නැගුනොත් එය ර් තරමටම සුබවාදී වැහැ.
තෑග්ගක් පොරොන්දු වෙන්න පෙරාතුව..
ඔබ දරුවාට තෑග්ගක් දෙන්න පෙරාතුව ඒ තෑග්ග ලබා දීමට ඔබට හැකියාවක් ඇත්දැයි ඔබෙන් විමසා බලන්න. දෙවනුව දරුවාට පොරොන්දු වෙන්න. ඔබට දරුවා ඉදිරියේ ඉර, හඳ ගෙනත් තැබීමට නොහැකි බව දැන දැන එවැනි ඔබට ලබා දීමට නොහැකි ත්‍යාග ගැන බලාපොරොත්තු ඇති කරන්න එපා.
ඔබට තෑග්ගක් ලබා දීමට ඇති හැකියාව, අවස්ථාව ආදි සියල්ල ඔබ විසින් තක්සේරු කරන්න. ඔබට මෙවර මාසික වැටුපෙන් දරුවාට තෑග්ගක් මිලට ගැනීමට අවස්ථාවක් නොමැති නම්
” මේ මාසයේ මම ඔයාට අහවල් තෑග්ග අරගෙන දෙනවා…” යැයි කියන්න එපා. ඒ නිසා තෑග්ගක් දීමට පෙරාතුව ඔබට ඇති හැකියාව ගැන හිතන්න.
තෑග්ගක් දීමෙන් මොකද වෙන්නේ…
සාමානයයෙන් පුංචි දරුවන්ට තැග්ගක් ලැබුනොත් එය ධනාත්මක ප්‍රතිචාරයක් වෙනවා. වයස අවුරුදු තුන හතරක දරුවන් තුළ ඔවුන්ගේ අකමැතිම කටයුතු තිබෙනවා. දත් මදින්න..නියපොතු කපන්න වගේ දරුවා අකමැති ක්‍රියාවන් වෙනුවෙන් ඔවුන්ගේ හිතේ ධනාත්මක ප්‍රතිචාර ඇති කිරිමට තැග්ගක් ලබා දීමෙන් ඉටු කර ගත හැකියි.
අද ඔයා දත් මැදලා..නියපොතු කපලා..හිටියොත් අපි හැන්දෑවට පාක් එක්ක යනවා.ළමා උදයානය දරුවා වඩාත් ඇළුම් කරන පරිසරයක් නිසා ඒ වෙනුවෙන් ඇති ඔහු අකමැත්තක් දක්වන කටයුතුවලට වුනත් නොදැනීම ධනාත්මක ප්‍රතිචාරයක් ගොඩ නගා ගන්නවා.
දරුවාගේ හිතේ සතුටක්…
පුංචි දරුවන්ගේ හිතේ සතුට ඇති කිරීමට දෙමව්පියන් කැමැතියි. තෑග්ගක් දීම නිසා ඔවුන්ගේ හිතේ අහංසක සතුටක් ඇති වෙනවා.සමහර විට දෙමව්පියන් ලෙස ඔබ මේ අත්දැකීම ලබා ඇති. බොහොම කුතුහලයෙන් තෑග්ග විවෘත කරන විට දරුවාගේ මුහුණේ ඇති වෙන වෙනස දෙමව්පියන්ටම දැක බලා ගැනීමට හැකියාව ලැබෙනවා.
උනන්දුවක්…
සාමාන්‍ය වයස අවුරුදු පහ ඉක්මවු දරුවන්ගේ ඉගෙණුම් කටයුතු සංවර්ධනය කිරීමට තෑග්ග රහස් මෙවලමක් විදිහට භාවිතා කරන්න පුලුවනි. අකුරු ලියන්න, රචනාවක් ලියන්න අකමැති දරුවෙකුට ” ඔයා දවස ගෙවන්න කැමැති විදිහ / එහෙම නැත්නම් ඔයා යන්න කැමැති විනෝද චාරිතාවක් ….ගැන..ලියන්න..දරුවා එය ලිවීමෙන් පසුව තෑග්ගක් ලෙසින් ඔබට ඒ අවස්ථාව දරුවාට ලබා දීමට පුලුවනි.
තෑග්ග ආයුධයක් කර ගන්නා නම්…
දරුවන් වුනත් එකිනෙකා අතර වෙනස් අන්දමේ හැසිරීම් තිබෙනවා. සමහර විට දරුවාට තෑග්ගක් නැත්නම් යමක් ඉටු කර ගැනීමට බැරි තැනට පත් වුනොත් එවැනි අවස්ථාවන්හිදී තෑග්ගක වටිනාකම ගිලිහෙන්න පුලුවනි. ඒ නිසා දෙමව්පියන් ලෙස දරුවා තෑග්ග ආයුධයක් බවට පත් කර ගන්නා තැනට පත් කරන්නත් එපා.
විශේෂඥ මතය, අදහස සහ මූලික සටහන:
මනෝ වෛද්‍ය විශේෂඥ එස්.සී.ඒ අරඹේපොල මහත්මිය
මහනුවර ජාතික රෝහල
