පවුලේ අම්මා වුනොත් තමන්ගේ නිවසේ සිටින අයට ප්‍රමාණවත් විදිහට බත් , ව්‍යංජන පිළියෙල කර ගැනීමට දැන ගෙන ඉන්නවා නම් බොහොම අරපිරිමැසුම්දායකයි. ඒත් සමහර අයට අමුද්‍රව්‍ය සහ කලමනාවන් හරියට ගණනක් මිමිමක් නැති නිසා අපතේ යෑම් වැඩියි.එහෙමනම් අපතේ යෑමක් නැතුව මුලුතැන්ගෙයි වැඩ කටයුතු කර ගන්නේ කොහොමද…?
නිවසේ සංඛ්‍යාව
නිවසේ සිටින සංඛ්‍යාව අනුව ඔබ වේලට ගන්නා හාල් ටික ගැන දැණුවත්ව සිටීම ඉතාම වැදගත්.උදාහරණයක් විදිහහට දැනට නම් අනුමතව තිබෙන්නේ හාල් කිලෝවක් හය දෙනෙකුටයි. හැබැයි ඒ ප්‍රමාණවත්ව වැඩුන පුද්ගලයන් සිටින තැනකටයි.ඔබේ නිවසේ සිටින්නේ කුඩා දරුවන් නම් ඔය කියන මිම්ම වෙනස් වෙන්න පුලුවන්. ඊටත් දැන් ඉස්සර වගේ නොවෙයි, බොහෝ නිවෙස්වල රයිස් කුකරයෙන් බත පිසින නිසා මිම්ම ගැනීමත් පහසුයි. හාල් කෝප්ප තුනකින් ඉතිරි වෙනවා නම් අනිත් දවසට කෝප්ප දෙකක් හෝ දෙකහමාරක් ගන්න.ඒ වගේම සමහර විට මේ ප්‍රමාණය මදි හෝ වැඩි වෙනවා නම් තව මිටක් අඩු කරන්න හෝ මිටක් එකතු කරන්න පුලුවනි.
ඉතිරි වුනොත්…
හරියටම හාල් ඇටයක්වත් නැතුව නම් බත් ටික පිසින්න බැරි වෙන්න පුලුවනි.එහෙම වුනොත් ඒ බත් ටික අනවශ්‍ය විදිහට එළියේ තියන්න එපා.ආහාර අරගෙන අවසාන වූ පසුව ශිතකරණයට දාන බත් ටික පහුවදා පිසින මත උඩින් තියන්න. එහෙම නැත්නම් වෙනම ස්ටීම් කර ගෙන මුලින්ම ආහාරයට ගන්නත් පුලුවන්. මේ විදිහට කලවම් කරනවා නම් මුලින්ම එකතු කරන බත් පාවිච්චියට ගැනීම වැදගත්.
තවත් ක්‍රමයක්
ඉතිරි බත් ටික වෙනම ස්ටීම් කරන්නග දැන් කැරට් අලයක්, බෝංචි කරල් දෙකක්, ලික්ස් ගසක කොළ පැහැති කොටස ආදිය හීනිවට කපා ගෙන, බටර් ටිකකින් මේ දේවල් තෙම්පරාදු කරන්න. දැන් බත් ටිකත් මේ එළවලු මිශ්‍රණයට දාලා බිත්තරයක් ගසා ගෙන එයට එක් කරන්න. රසවත් බතක් සකස් කර ගන්න පුලුවනි.
අනපේක්ෂිත විදිහට ඉතිරි වුනොත්…
මොනතරම් ගණන් මිම්මක් ඇතුව කළත් අනවශ්‍ය විදිහට බත් ඉතිරි වුනොත් කරන්නත් දෙයක් තිබෙන්න එපායැ. එහෙම වුනොත් මේ බත් ටික හොඳින් තුනී වෙන විදිහට වට්ටියක අතුරලා වේලා ගන්න. බත් වේලුනාට පසුව සුළං නොවදින සේ වීදුරු බෝතලයක අසුරා තබන්න. එතැනින් පසුව තේ වේලාවට වියලා ගත් බත් ටික බදින්න.දැන් මෙය සිහින්ව අඹරා ගන්න. සීනි උනුකරලා එයට පොල් සහ පිටි කළ බත් එකතුකරගෙන අග්ගලා හදා ගන්න පුලුවන්.
ඉදිආප්ප ඉතිරි වුනාමත් හොදින් වහලා ශීතකරණයේ තබා ගත් විට පසුදා උදේට ස්ටීම් කර ගෙන ආහාරයට ගන්න. ඒ වගේම ඉදිආප්ප වුනත් වියලා ගෙන එයින් පසුව තෙලෙන් බැදලා උනු පැණි දවටා ආහාරයට ගැනීමට පුලුවනි.
එළවළු වුනත් අපතේ එපා..
හාල් වලට නම් මිම්මක් හදා ගන්න පුලුවනි. එළවලුවලට..? පුංචි ප්‍රශ්නයක්ඇති වේවි. ඉතින් එකම උත්තරයයි..අතේ මිම්ම..
- අතේ මිම්ම කොහොමද ගන්නේ…?බලමු
එක එක එලවළුවට නිවසේ අයගේ කැමැත්ත වෙනස්. බෝංචි වගේ එළවලුවක් තෝරා ගනිද්දී එක් අයෙකුට බෝංචි කරල් ගණනක් විදිහට මිම්මක් හදා ගන්න පුලුවනි.
අල ගෙඩියකින් වුනත් ගෙඩියේ ප්‍රමාණයට අවශ්‍ යගෙඩි ගණන තෝරා ගන්න අපහසුවක් නැහැ.
සමහර එලවලු වර්ග පිස අවසාන වුනාම අස්වැන්න අඩු වෙනවා. උදාහරණයක් විදිහට ,ලීක්ස්, කතුරුමුරංගා මල් පිස ගත් විට අස්වැන්න අඩු වෙනවා. ඒ නිසා ගෘහනියක් විදිහට තින්දු තීරණ තමන්ට අයිතියි.ඉවුම් පිහුම් කර ගෙන යද්දී මේ හැකියාව නොදැනීම ඔබටම දැනේවි. හැබැයි ඒ අත්දැකීම ඔබම උපයා ගන්නත් ඕන.
ඉතුරු කලමනා මිශ්‍ර කරන්න…
සමහර විට ඔබේ නිවසේ ගෙනා එළවලුවලින් යම් යම් දේ ඉතුරුව තිබෙන්න පුළුවනි. උදාහරණයක් විදිහට බෝංචි කරල් දෙක තුනක්, කැරට් අලයක් වැනි ප්‍රමාණයක් එක වේලක් වෙනුවෙන් ප්‍රමාණවත් නොවන්න පුලුවනි. එවැනි අවස්ථාවක සුප් හෝ නූඩ්ල්ස් වැනි ආහාරයක් සදහා මේ ඉතුරු එලවලු යොදා ගැනීමට හැකියාව තිබෙනවා. එහෙම නැත්නම් අල, කැරටි සහ බෝංචි වැනි එළවලු එකට මිහ්‍ර කර ගෙන සකස් කරන්න පුලුවන්.ඒ පිරිමැස්ම නිසා ආහාරයේ රසය, විවිධත්වය යන දෙකම ඔබට ලැබෙනවා.
උදේ ආහාරයෙන් ඉතුරුව ඇත්නම්…
සූදානම් කළ උදේ ආහාරය ඉතිරිව ඇත්නම් එය එදින රාත්‍රි ආහාරය වෙනුවෙන් සැලසුම් කරන්න. උදාහරණයක් ලෙස උදේ ආහාරයට ගත් පාන් වැඩි කොටසක් ඉතිරිව ඇත්නම් එදින රාත්‍රි ආහාර වේලත් පාන්වලින් සකස් කරන්න. වෙනසක් වීම සදහා උදේ ආහාරයට නොතිබුන සුප් එකක් රාත්‍රියට සූදානම් කර ගන්න. ඒ වගේම ආප්ප වෙනුවෙන් සකස් කළ මිහ්‍රණය ඉතිරිව තිබෙනවා නම් එදින රාත්‍රියටත් ආප්ප සූදානම් කරන්න. දැන් ශීතකරණයක් හැම නිවසකම ඇති නිසා මිශ්‍රනයේ ඉතිරි කොටස එහි තබන්න.
බොහෝ දෙනාගෙන් සිදු වෙන එක් වරදක් තබනවා. ඔවුන් ඉතිරි යමක් වේ නම් එය ශීතකරනයේ තබා දින ගණනාවකින් පසුව ඉවත දමනවා. ශීතකරනයේ වුනත් තබා ගත හැකි කාලයක් තිබෙනවා. අනවශය ලෙසින් ශීතකරනයේ තැබීමෙන් ගුනාත්මක බවටත් හානි වෙන්න පුලුවන් නිසා එදින රාත්‍රියට ආහාරය වෙනුවෙන් උදේ ඉතිරි කොටස සමග ගලපා මදි ප්‍රමාණය සූදානම් කර ගන්න.
