වැඩිහිටියෙකු ලෙස ඔබ තවත් වැඩිහිටියකු සමඟ සංවාදයේ යෙදෙන ස්වරූපය ඔබ ළදරුවෙකු සමඟ සන්නිවේදනයේ යෙදීමට වඩා මුළුමනින්ම වෙනස් වේ. ඔබ මෙහි ඇති වෙනස්කම් ඒවායේ ඇති වටිනාකම් පිළිබඳ මොහොතකටවත් සිතුවා ද?
ලොව පුරා සිටින දෙමව්පියන් ළදරුවන් සමඟ වඩාත් වෙනස් වූ ස්වරූපයෙන් කතා කරති. එනම් ඔබ කුඩා දරුවෙකු සමඟ කතා කරන විට ඔබගේ කතා විලාශය බොහෝ ආකර්ෂණීය, ඇද පැද කතා කරන ලයාන්විත ස්වරයෙන් යුතු වන අතර ඔබගේ කතා විලාශය ළදරුවකුගේ කතා විලාශය ට නිතැතින්ම මාරු වීම සිදු වන අතර හා එම ස්වරයෙන් දරුවා සමඟ සන්නිවේදනයේ දීම baby talk ලෙස හඳුන්වයි.
දරුවාගේ උපතේ සිට සිදුවන භාෂා වර්ධනය ට baby talk ඉතා වැදගත් බව අද වන විට පිළිගන්නා මතයකි. මන්ද මේ හරහා ඔවුන්ට භාෂාව පෝසත් පසුබිමක් නිවසේ සකස් කර දිය හැකි අතර ඔවුන් සමඟ මෙම සිදුකරන සුහද සංවාද දරුවා හට ශබ්ද, වචන මෙන්ම වාචික, අවාචික සන්නිවේදනය දියුණුවට ද මංපෙත් විවර කරනු ඇත.
ඇතැම්විට baby talk අවස්ථාවන් අත්‍යවශ්‍ය නොවන බවක් දෙමවුපියන් හට දැනිය හැකි නමුත් එය එසේ නොවේ. මන්ද කුඩා දරුවන් මෙම අතිශයෝක්තියට නැංවූ කතා විලාශය ඇහුම්කන් දීමට වැඩි කැමැත්තක් දක්වනවා පමණක් නොව එමගින් ඔවුන් තම වචන වඩාත් පහසුවෙන් ඉගෙනගනීති. තවද මේ හරහා විවිධ ශබ්ද අනුකරණය, ශබ්ද අතර ඇති වෙනස්කම් හා එම ශබ්ද නිපදවීමට කථන ව්‍යුහය සකසන අයුරු ද ඉස්මතු කිරීම සිදු කිරීම තුළින් දරුවන් හට ශබ්ද ධාරාවන් අර්ථවත් භාෂා ඒකක බවට පරිවර්තනය කර ගැනීමට උපකාරී වේ. උදාහරණ ලෙස ඔබ දරුවා අතට ගෙන නලවන විට /ආ/ /ඕ/ වැනි ශබ්ද නැගීම තුලින් ඔවුන් එම ශබ්ද ඇහුම්කන්දීම, හඬ වෙනස්කම් හඳුනා ගැනීම ආදී කුසලතා ද ශබ්ද පදනම් කරගත් භාෂා පද්ධතියක් ද සකසා ගනු ඇත.
Baby talk වැදගත්කම දෙමව්පියන්ට පැහැදිලි කරන විට ඇතැම් දෙමව්පියන් හට ඇති ගැටළුවක් වන්නේ baby talk කරන්නේ කෙසේද, කුමන අවස්ථාවේදී ද යන්නයි. එහිදී කිව යුතුම දෙයක් වන්නේ දරුවා සමඟ හැකි සෑම විටම සංවාදයේ යෙදීම උචිත බවයි. මේ සඳහා ඔබ දෛනිකව සිදු කරන සෑම ක්‍රියාවලියක් තුළ දීම සංවාදයක් ගොඩනැගිය ගෙනීමට දෙවරක් නොසිතන්න. උදාහරණ ලෙස දරුවා සෝදන විට, දරුවා ඇඳේ සිටින විට , දරුවා ඔබගේ අතේ සිටින විට, සෙල්ලම් කරන විට ආදී බොහෝ දෛනිකව සිදු කරන ක්‍රියාවලියන් මේ සඳහා කදීම අවස්ථා සලසා දෙනු ලබයි. දරුවා සමඟ ඇති කර ගනු ලබන කුඩා සංවාද තුළින් දරුවාගේ භාෂා කුසලතා දියුණු වන වා සේම භාෂාව ට අවශ්‍ය වන පෙර කුසලතා ද එනම් ඇසට ඇස බැලීම, අනුකරණය, අවධානය ලබා දීම ආදී බොහෝ කුසලතා ද දියුණු කරගත හැකිය.
තවද ඇතැම් දෙමව්පියන් තුළ පවතින පෞරුෂමය ලක්ෂණ හේතුවෙන් මෙම අවස්ථාව ගැටළුකාරී වන අවස්ථා ද දක්නට ලැබේ. මන්ද, ඇතැම් දෙමවුපියන් ද වැඩි වශයෙන් වාචික නොවීම, කාලය අවම වීම ආදී ගැටළු තිබිය හැකි නමුත් ඇතැම් දෙමව්පියන් ස්වභාවිකවම ලයාන්විත ස්වරයෙන් යුතු විය හැකියි. නමුත් baby talk සඳහා අවශ්‍ය ලෙස පරිසරය සකසා ගැනීම හා එහි ඇති වැදගත්කම ඔබට දැන් වැටහෙනවා නොඅනුමානයි.
තවද, මෙම කතා කරන අවස්ථාවේදී ඔබේ කතාව ඉතාමත් රිද්මයානුකූල මෙන්ම ලයාන්විත මෘදු ස්වරයකින් යුක්ත විය යුතු අතර ඔබ සරල බස එහිදී භාවිතා කළ යුතුය. එමෙන්ම වාචික භාෂාව එහිදී තවත් සරල වීම තුළ දරුවා හට ඔබ වඩාත් පැහැදිලි වන අතර, නිතර දරුවා හට සිනාමුසු මුහුණෙන් දරුවාගේ මුහුණ දෙස බලමින් කතා කිරීමත්, සුදුසු තැන් වලදී විවිධ සෙල්ලම් බඩු (ශබ්ද නඟන සෙල්ලම් බඩු, සංවේදන අවයව උත්තේජනය වන සෙල්ලම් බඩු) ආදිය මේ සඳහා ඔබට යොදාගත හැකිය.
තවද දරුවා විද්‍යුත් තිර ඉදිරිපිට ගත කරන කාලයට වඩා ඔබ මෙම අවස්ථාවන්ට baby talk time ආදේශ කර ගැනීම තුළින් දරුවා හට නිවැරදි ලෙස කතාව, භාෂාව හා අනෙකුත් ආශ්‍රිත කුසලතා දියුණු කර ගැනීමට උපකාරී වේ.
තවද දෙමවුපියන්ගේ කාර්යබහුලත්වයත් සමඟ baby talk අවස්ථාවන් සඳහා තිබෙන කාලය සීමිත වීමට හා අවම වීමට ඉඩකඩ වැඩි විය හැකිය. නමුත් ඔබ නොමැති අවස්ථා නිවසේ ඇත්නම් දරුවා රැකබලා බලා ගන්නා කෙනෙකු නිතර දරුවා සමඟ රැඳෙනවා නම් ඔහුට/ඇයට මෙහි වැදගත්කම පවසා දීමත් ඔවුන් එය සඳහා උනන්දු කරවීමත්, දෙමව්පියන් වශයෙන් ඔබට කාලය ලැබුණ විට එය උපරිම වශයෙන් දරුවා සමඟ ගත කිරීමත් තුළින් baby talk සඳහා ඇති ගැටළු අවම කරගත හැකිය. එමනිසා ඔබේ දරුවාගේ ළදරු කාලය දරුවාගේ කුසලතා දියුණු කිරීම කෙරෙහි මහත් සේ බලපාන අතර ඒ සඳහා ඔබගේ මැදිහත් කම ද ඉතාමත් අවශ්‍ය වේ.
කථන හා භාෂා චිකිත්සක සජිනි පෙරේරා මහත්මිය විසිනි.
