Scoliosis එහෙමත් නැතිනම් පැති කුදය කියන්නේ මොකද්ද?

 සුෂුම්නා පද්ධතියේ ඇති වන වක් වීම හේතුවෙන් ඇති වන Scoliosis එහෙමත් නැතිනම් පැති කුදය ගැන ඇතැම් විට ඔබ අසා නැතිවත් ඇති. කෙසේ වුවත් මේ තත්ත්වය ඔටු කුදය හා සමානවම මව්පියන්ගේ හිතට අසහනකාරී අත්දැකීමකි. බොහෝ අවස්ථා වලදී මෙම තත්ත්වය සුළුවෙන් ඇති වුවත් ඇතැම් අවස්ථාවලදී වක‍්‍රයන් වැඩි වී තීව‍්‍ර පැති කුදය ඇති වීම නිසා ආබාධිත තත්ත්වයට වුවද පත් විය හැකිය. සුෂුම්නාවේ ඇති වන මෙවැනි වක්‍ර සාමාන්‍යයෙන් ජීවිත තර්ජනයක් ඇති නොකලද, පැතු කුදය ඇති වන අවස්ථා වලදී ජීවිත තර්ජනයක් වුවද ඇති විය හැක. තීව‍්‍ර ලෙස ඇති වන වක්වීම හේතුවෙන් උරස් කුහරයට ඉඩ ප‍්‍රමාණය අඩුවීම නිසා පෙනහලු ක‍්‍රියාකාරීත්වයට වුවද බාධා ඇති විය හැක. අන්න ඒ නිසාම කලින් හඳුනා අවශ්‍ය වෛද්‍ය උපදෙස් වෙත යොමු වීම ඉතා වැදගත් වනු ඇත.

Scoliosis (පැති කුදය) ඇති වීමට හේතූ 

මේ සඳහා නිශ්චිත හේතුවක් දැක්විය නොහැකි වුවත්

  • ජානමය හේතූ
  • ඇතැම් ස්නායු/පේශිමය රෝග/පේශී ක්‍ෂය වීම
  • මස්තිෂ්ක ආඝාතය
  • උපත් ආබාධ (අස්ථි හා සුෂුම්නාව වර්ධනයේදී ඇති වන අඩු පාඩු නිසා) 
  • ළමා කාලයේදී උරස් බිත්තිය ආශ‍්‍රිතව සිදු කල ශල්‍යකර්ම
  • සුෂුම්නා රජ්ජුවේ අසාමාන්‍යතා වැනි තත්ත්ව හේතු විය හැකි බවට අනුමාන කරයි.

 

Scoliosis (පැති කුදය) ඇති විට පෙන්නුම් කරන ලක්‍ෂණ

  • ශරීරය විවේකීව පවතින විට හිස ශරීරයේ මධ්‍යයට වන්නට තබාගැනීමට නොහැකි වීම
  • පර්ශූ තල්ලු වීම
  • දරුවා හිටගෙන සිටින විට දෑත් ශරීරයට ආසන්නව කෙලින් එල්ලා සිටීමට නොහැකි වීම. 
  • ඉදිරියට නැවුනු විට උරහිසේ එක් පැත්තක් අනෙක් පැත්තට වඩා උසින් පිහිටීම
  • පිටුපස පැති දෙක උසවල් දෙකකින් යුක්ත වීම. 
  • ඇවිදීමේ අපහසුතා
  • හිරි වැටීම, දුර්වල වීම හෝ පාදයේ වේදනාව
  • කෙලින් හිටගැනීමේ ගැටළු
  • මහන්සිය ඇති වීම
  • කෙටි හුස්ම ගැනීමට
  • බර අඩු වීම
  • උදරය ඉක්මණින් පිරීම (සුෂුම්නාව මගින් උදරයට පීඩනයක් ඇති කරන නිසා) 
  • උකුල සීමාව සමාන නොවීම
  • නිතර එක් පැත්තකට ඇලවී සිටීම
  • උරහිස හා පාද අසාමාන්‍ය දිගකින් යුක්ත වීම. 

 

Scoliosis (පැති කුදය) හේතුවෙන් ඇති විය හැකි සංකූලතා

  • ස්වසන අපහසුතා, පර්ශූ මගින් පෙනහළු තදවීම. 
  • පිට කොන්දේ වේදනාව
  • මලබද්ධය (වක‍්‍රය හේතුවෙන් උදරය, අත් පා තද වීමෙන් චලන, ක‍්‍රියාකාරකම් සීමා වීම හේතුවෙන්)
  • ස්නායු ක‍්‍රියාකාරකම් සෙමින් සිදුවීම
  • හෘදය ආශ‍්‍රිත ගැටළු
  • කාටිලේජ වල කැල්සියම් තැන්පත් වීම

දරුවන් අතර ඇති වන Scoliosis (පැති කුදය) වර්ග

  • Congenital Scoliosis – කලාතුරකින් ඇති වන මේ තත්ත්වය උපතේදී දැකිය හැක. 
  • Idiopathic Scoliosis – වඩාත් බහුලව ඇති වන තත්ත්වයකි. ස්ථිර හේතුවක් නොදන්නා නමුත් ජානමය සාධකයන් හේතු වන ඇතැයි විශ්වාස කරයි. 
  • Neuromuscular Scoliosis – සුෂුම්නාව හා සම්බන්ධව ඇති පේශී වක‍්‍ර ස්නායු මේ සඳහා හේතු වේ. 

මීට අමතරව වැඩිහිටියන් තුල ඇති වන වර්ගයක් ලෙස Degenerative Scoliosis හැඳින්වේ. වයස්ගත වීමත් සමග පිටුපස පහළ කොටසේ වර්ධනය වේ. 

තවද දරුවන්ගේ වයස අනුවද වර්ග කර හැක. 

  • infantile idiopathic scoliosis උපතේ සිට අවු. 3 දක්වා දරුවන්ට ඇති වේ. 
  • Juvenile Idiopathic Scoliosisඅවුරුදු 4 – 9 දක්වා දරුවන්ට ඇති වේ. සුෂුම්නාවේ  ඕනෑම පැත්තකින් 100 වක්වී තිබීම මේ තත්ත්වයයි. මෙම අංශක ප‍්‍රමාණය 200 වැඩි නම් රෝග ලක්‍ෂණ පෙන්වයි. 

Scoliosis (පැති කුදය) හඳුනා ගැනීම 

ඔටු කුදය හෝ පැති කුදය සහිත දරුවෙකු පෙන්නුම් කරන රෝග ලක්‍ෂණ වලින් තත්ත්වය හඳුනාගත් පසුව එය ස්ථිර කරගැනීමට පහත පරීක්‍ෂණ සිදු කරයි. 

  • X කිරණ පරීක්‍ෂණ
  • MRI Scan
  • Bone age Study

Scoliosis (පැති කුදය) සඳහා ප‍්‍රතිකාර

මේ සඳහා ස්ථිර ප‍්‍රතිකාරයක් නැත. නමුත් කලින් හඳුනාගැනීම තුල රෝගය සම්පූර්ණයෙන් සුව කළ නොහැකි වුවද ඇති වන රෝග ලක්‍ෂණ පාලනය කළ හැක. එනම් තවදුරටත් සුෂුම්නාව වක‍්‍ර වීම වළක්වා ගත හැක. ප‍්‍රතිකාර ලබාදීම සඳහා දරුවාගේ වයස/රෝගය පිළිබඳව පවුල් ඉතිහාසය/රෝගයේ වර්ගය මෙන්ම වක‍්‍රයේ පිහිටීම හා අංශක ප‍්‍රමාණය යන කරුණු සලකා බලයි. ප‍්‍රතිකාර ලෙස Braces පැලඳීම/ශල්‍යකර්ම වැනි ක්‍රම වෛද්‍ය නිර්දේශය අනුව සිදු කෙරේ.

 

විශේෂඥ මතය, අදහස සහ මූලික සටහන:

ක්‍රිෂාන්ති ගංගා කුමාරිහාමි මහත්මිය

සූතිකා පුහුණු හෙද නිළධාරිනි (I ශ්‍රේණිය)

නවජ සූති දැඩි සත්කාර ඒකකය

පළාත් මහ රෝහල, කුරුණෑගල

 

 

 

 


අධ්‍යාපනික අතින් කොයිතරම් උසස් මට්ටමක හිටියත් අම්මෙක් වුණාම ඇති වන ගැටලූවලට අපි ළඟ පිළිතුරු නෑ. මව්පදවියත් එක්ක දහසකුත් එකක් ප්‍රශ්න මටත් ඇති වුණා. ඔය අතරෙදියි මව්වරුන් වෙනුවෙන්ම වෙන්වුණු පුවත්පතක සංස්කාරකවරිය විදියට සේවය කරන්න මට අවස්ථාව ලැබුණේ. අම්මා කෙනෙක් විදියට මට ඇති වෙන ගැටලූ අධ්‍යාපනය අතින්, මිල මුදල් අතින් ඉහළ, පහළ ඕනෑම තරාතිරමක හැම අම්මා කෙනෙක්ටම පොදුයි කියලා ඔය අතරෙදි මම තේරුම් ගත්තා. මගේ අත්දැකීම්, දරුවන් ගැන මට තියෙන ගැටලූ ගැන වෘත්තීමය සුදුසුකම් සහිත පුද්ගලයන් එක්ක සාකච්ඡ කරලා, සටහන් කරන්න මම හිතුවේ දහස් ගණනක් මව්වරුන්ට නිවැරදිම මගපෙන්වීම අවශ්‍ය බව දැණුනු නිසා.

LEAVE A REPLY

Please enter your comment!
Please enter your name here