හෙමින් ඉගෙන ගන්නා දරුවන් (Slow learners) හඳුනාගන්නේ කෙසේද?

දරුවන්ගේ ඉගෙනීම ගැන බොහෝ දෙමව්පියන් මහත් උනන්දුවකින් යුතුව කටයුතු කරන්නේ දරුවා බහ තෝරන දා පටන්ය. දරුවා භාෂාව අවබෝධ කර ගැනීමට පටන් ගත් පසු දරුවාගේ ඉගෙනුමට ආධාර විය හැකි බොහෝ දේ ඔබ දරුවාට ඉගැන්වීමට පෙළඹේ. පසුව දරුවා විධිමත් ඉගැන්වීම් ක්‍රියාවලියට යොමු කළ විට සම වයසේ අනෙකුත් දරුවන් මෙන් පහසුවෙන් හා ඊට අනුරූපීව ඉගෙනුම් ඉගැන්වීම් ක්‍රියාවලිය යෙදීමට අපහසු ඒ සඳහා තරමක වැඩි කාලයක් ලබා ගන්නා දරුවන් slow learners යනුවෙන් සරලව ම හඳුන්වා දිය හැකිය. 

දෙමාපියන් වශයෙන් තම දරුවා slow learners කෙනෙක් වුවහොත් ඉතාමත් දැඩි මානසික පීඩනයකට ලක් වේ. එපමණක් නොව බොහෝ ප්‍රශ්න හිත තුළ ඇති කරනු ලබයි. මෙම තත්ත්වය හඳුනා ගන්නේ කෙසේද? එයට හේතුව වන්නේ කුමක්ද? දරුවාට වඩාත් යහපත් හෙට දවසක් වෙනුවෙන් ඉගෙනුම් ක්‍රියාවලියට උදව් වන්නේ කෙසේද? ආදි බොහෝ ප්‍රශ්න එම මානසික පීඩනය තීව්‍ර කරවයි. අද අප සාකච්චා කරන්න යන්නේ මෙම slow learning දරුවන් හඳුනා ගන්නේ කෙසේද යන්නයි. 

සාමාන්‍යයෙන් ඉගෙනුම් දුබලතා සහිත හෝ slow learning දරුවන් පෙන්නුම් කරන ලක්ෂණ බොහෝ පවතී. ඒ සඳහා හේතු විය හැකි ප්‍රධානතම හේතු කිහිපයක් පෙන්වා දිය හැකිය. 

  1. ඉගෙනුම් ඉගැන්වීම් ක්‍රියාවලියේ ගැටළු (Learning issues) 

මෙම දරුවන් ඉගැන්වීම් ක්‍රියාවලියේදී ඉගෙන ගනු ලබන දේ ග්‍රහණය කර ගැනීම හෙමින් සිදුවන අතර ඒ සඳහා වැඩි කාලයක් ගත කරනු දැකගත හැකිය. එමෙන්ම ඔවුන් අවධානය පවත්වා ගනු ලබන කාල පරාසය ද කෙටි වන අතර ඉගෙන ගනු ලබන දේ අතර පවතින අන්තර් සබඳතා ගොඩනඟා ගැනීම හා ඉගෙනුම් ක්‍රියාවලියේ පවතින ඇතැම් සංකල්ප අවබෝධ කර ගැනීම හා ග්‍රහණය කර ගැනීමේ ගැටළු ද පවතී. 

  1. ශ්‍රවණ සැකසුම් ගැටළු (Auditory processing issues)

මෙම දරුවන්ට ඇතැම්විට ඇහෙන ශබ්ද හඳුනා ගැනීමේ ගැටළු පවතී. එමනිසා ඇසුණු ශබ්දය ට අදාළ වන අක්ෂර නිවැරදිව ලිවීම ගැටළුකාරී විය හැකිය. එමනිසා මෙම දරුවන් ට අසා ලිවීම බලා ලිවීමට වඩා ගැටළුකාරී විය හැකිය. 

  1. දෘශ්‍ය සැකසුම් ගැටළු (Visual processing issues) 

දෘශ්‍ය ඉන්ද්‍රිය ගැටළුවකින් තොරව දෘශ්‍ය සැකසුම් ක්‍රියාවලියේ ගැටළු මෙහිදී අවධාරණය කරයි. මෙහිදී තමන් දකින දෙය ග්‍රහණය කරගෙන නිවැරැදි ලෙස පිටපත් කර ගැනීම දක්වා ගමන් මඟේ ගැටළු පවතී. එමනිසා එක වගේ දේවල් හඳුනා ගැනීම, පාට, හැඩතල, ප්‍රමාණය පිළිබඳ ගැටළු ද මෙම දරුවන්ට පවතී. තවද දෘශ්‍ය සැකසුම් ගැටළු ඇත්නම් ඔවුන්ට බලා ලිවීමට වඩා අසා ලිවීම පහසු වනු ඇත. 

  1. භාෂා ගැටළු (Language issues)

මෙම දරුවන් තුළ විවිධ වූ භාෂා ගැටළු පවතී. එනම් ඔවුන්ට වාචික ප්‍රකාශනයේ ගැටළු, උච්චාරණ ගැටළු මෙන්ම භාෂා අවබෝධය ගැටළු ද පෙන්නුම් කරයි.

මෙවන් ගැටළු නිසා දරුවාගේ ඉගෙනුම් ක්‍රියාවලියේ දී යම් පසුබෑමක් පෙන්නුම් කිරීම පළමුව දක්නට ලැබේ. තවද එතා සඳහන් ගැටළු හේතුවෙන් දරුවන් හඳුනාගත හැකි ලක්ෂණ පෙන්නුම් කරනු ලබයි. එවිට දෙමව්පියන් මෙම තත්ත්වය පිළිබඳ දැනුවත් වීම හා දරුවාගේ හඳුනාගත් ගැටළුවට කළ හැකි පියවර අනුගමනය කිරිම වඩාත් යෝග්‍ය වේ. තවද මෙම දරුවන් ප්‍රාථමික අධ්‍යාපනයට යොමු වීමෙන් පසු පහත ලක්ෂණ පෙන්නුම් කරනු ලබයි. 

  • අසා ලියන විට, බලා ලියන විට වචන අකුරු පිල්ලම් අඩුවෙන් ලිවිම
  • අකුරු වල ලියන පැත්ත හා ස්ථානය නිවැරදි නොවීම 
  • පිල්ලම් භාවිතයේ ගැටළු 
  • නිවැරදි ශබ්ද වලට අදාල අක්ෂර ලිවීමේ ගැටළු 
  • ද්විතීක භාෂාව ගැනීමේ ගැටළු 
  • ඇතැම් ගණිත සංකල්ප ඉගෙනීමව් ගැටළු 
  • සංවිධානාත්මකව ලිවීමේ ගැටළු 
  • ලිවීමේ වේගය හා කියවීමේ වේගය ගැටළු 
  • ලියන විට නිවැරදි අක්ෂර වින්‍යාසය භාවිතා නොකිරීමේ ගැටළු 
  • කියවන විට වචන, පේලි හා අතහැර මඟහැර කියවීම 
  • ඉගෙන ගත්තේ නැවත මතක් කිරීමේ ගැටළු ආදී බොහෝ දේ ඒ අතර වේ. 

තවද මෙවන් ලක්ෂණ පෙන්නුම් කරන විට දෙමව්පියන් ඉතාමත් කලබලයට පත් වීමත්, දරුවා දැඩි මානසික පීඩනයට ලක් කරමින් කටයුතු කිරීම හා දරුවා තව තවත් අමතර උපකාර පන්ති සඳහා යොමු කිරීමත් බහුලව සිදුවන දෙයකි. නමුත් ඔබ ප්‍රථමයෙන්ම කළ යුත්තේ දරුවා පෙන්නුම් කරන ලක්ෂණ හඳුනා ගැනීමයි. පසුව එම ලක්ෂණ වලට හේතු වන ගැටළුව හඳුනා සොයා ගැනීමයි. ඉන්පසුව ඒ සඳහා දරුවාට වඩාත් උපකාරී වන ලෙස පරිසරය සකසා දීම සිදුකළ යුතුය. මේ සඳහා ඔබට ළමා මනෝ විශේෂඥ වෛද්‍යවරයෙකු,  කථන හා භාෂා චිකිත්සකවරයකු වෙත යොමු වීම සිදු කළ හැකිදෙයකි. ඔවුන් දරුවා වඩාත් ගැඹුරෙන් තක්සේරුකරනයකට  ලක් කර දරුවා පෙන්නුම් කරන ගැටළුව හඳුනා ගනු ලබයි. පසුව එම හඳුනාගත් ගැටළුවට අදාළ ව ඔවුන් සුදුසු උපදෙස්, චිකිත්සක ක්‍රම දෙමව්පියන් හට පැහැදිලි කරදෙනු ලබයි.

තවද ඔබ දරුවා වඩ වඩාත් මානසික පීඩනයට පත්කිරීම, දරුවා හට ලඟා විය නොහැකි අධ්‍යාපන කරුණු හා අරමුණු කරා දරුවා දැඩි වෙහෙසකින් තල්ලු කිරීම තුළින් දරුවා හට ඉගෙනුම් ක්‍රියාවලිය තවතවත් ප්‍රිය නොවන දෙයක් බවට පත්වන අතරම පසුකාලීනව පාසල් යාම ප්‍රතික්ෂේප කිරීම, ඇතැම් විෂයයන් හා විෂය කරුණු හිතා මතා මඟ හැරීම පෞරුෂ වර්ධන ගැටළු ආදී බොහෝ ගැටළුවලට මග පාදනු ලබයි.  

 

කථන හා භාෂා චිකිත්සක සජිනි පෙරේරා මහත්මිය විසිනි.

 

අප වෙබ් අඩවියට වරින් වර ලිපි සපයන බාහිර ලියුම්කරුවන්ගේ ලිපි සියල්ල මෙම පොදු profile එක හරහා පල කෙරෙනු ඇත.

LEAVE A REPLY

Please enter your comment!
Please enter your name here