දරුවන් තම සමවයස් දරුවන් සමඟ ඉගෙනුම් ඉගැන්වීම් ක්‍රියාවලියේ යෙදෙන විට එම ක්‍රියාවලිය තුළ පසුබෑමක් පෙන්නුම් කරන දරුවන් ඒ අතර සිටීම සුලභ තත්ත්වයකි. Slow learning දරුවන්ගේ ලක්ෂණ හා එම ලක්ෂණ වලට හේතු වන ගැටළු මින් ඉහත ලිපියක සාකච්ඡා කළ අතර අද අප මෙම ලිපියේ සාකච්ඡා කරනු ලබන්නේ මෙවන් දරුවන්ගේ අධ්‍යාපන ක්‍රියාවලියට උදව් විය හැකි, දෙමාපියන් හට පහසුවෙන් කළ හැකි ක්‍රමවේද කිහිපයක් පිළිබඳවයි.
Slow learning දරුවන්ගේ මානසික තත්වය හා පීඩනය අනිකුත් දරුවන්ගේ මානසික තත්වය හා පීඩනයට වඩා තරමක් වෙනස් වන අතර ඉගෙන ඉගෙනුම් ක්‍රියාවලිය තුළදී ඔවුන් ගේ මානසික පීඩනය තවත් වැඩි වීමට හැකියාව පවතී. එමනිසා පීඩාකාරී මානසික වටපිටාවක සිටින මෙම දරුවන් ඉන් මුදවා ගැනීමටත් පීඩාකාරී බවකින් තොරව ඉගෙනුම් ක්‍රියාවලිය යෙදීමටත් සුදුසු ලෙස පරිසරය සකස් කර දීම සඳහා ඔබට මෙම ක්‍රමවේද අනුගමනය කළ හැකිය.
- දරුවාගේ මේසය පවතින ස්ථානය, ඉගෙනුම් කටයුතු කරන ස්ථානය නිශ්ශබ්ද පරිසරයක් කරන්න.
මන්ද මෙම දරුවන්ගේ අවධානය දීම හා අවධානය පවත්වා ගැනීම ආදී ගැටළු පවතින බව අප සාකච්ඡා කළෙමු. ඒ හේතුවෙන් බාහිර පරිසරයේ ඇතිවන යම් යම් බාධා හේතුවෙන් මෙම දරුවාගේ අධ්‍යාපන කටයුතු සිදු කරමින් සිටින විට තම අවධානය පවත්වාගැනීම ගැටළුකාරී වීම තවත් ගැටළුකාරී තත්වයකට පත් කරනු ලබයි. තවද නිස්කලංක පරිසරය, කාමරයේ බිත්ති සැරසිලි අවම කිරීම, ශබ්ද අවම වීම ආදී සන්සුන් බාහිර පරිසරය මෙම දරුවන්ට වඩාත් පහසුවක් වනු ඇත.
- නිදහස්කාමී ප්‍රශ්න අසන්න.
දරුවා අධ්‍යාපන කටයුතු නිම කළ පසු දරුවා සිදුකර ඇති දේ පිළිබඳ පීඩා ගෙන නොදෙන නිදහස්කාමී ප්‍රශ්න අසන්න. ඒ තුළින් දරුවාට වඩාත් පහසුවෙන් ඔබට පිළිතුරු දීමට හැකිය. උදාහරණ ලෙස දරුවාගේ චිත්‍රයක්, රචනාවක් පිළිබඳ ඔබ ප්‍රශ්න අසන්නේ නම්,
- ඒ මේ කවුද ඇඳල තියෙන්නෙ?
- මොකද්ද මේ ඇඳල තියෙන්නෙ?
- අද ඇන්දේ මලක්ද?
- අද රචනාව ලිව්වෙ මොකක් ගැනද?
ආදී දරුවාට පිළිතුරු දීමට රුකුල් දෙන ප්‍රශ්න නැගීම ඔබට සිදු කළ හැකිය. තවද දරුවා ඇතැම් විට පිළිතුරු දිය හැකි ය. නැතහොත් නොදිය හැකි ය. දෙමාපියන් වශයෙන් ඔබ දරුවා තවදුරටත් ප්‍රශ්න කරමින් කලබල කිරීම විනා ඔහුට ඇයට පිළිතුරු දීමට රුකුල් දෙන ප්‍රශ්න නැගීම ඉතාමත් වැදගත්.
- දරුවාට පහසුවක් වන්න.
දරුවාට පාසලින් දෙන ගෙදර වැඩ කිරීමට මෙම දරුවන් හට ගැටළුකාරී වීම සුලබ තත්වයකි. ඔබ එය තේරුම් ගැනීම ඉතා වැදගත් වේ. බොහෝ දෙමාපියන් දරුවන් වෙනුවට දෙමව්පියන් පාසල් වැඩ සිදු කිරීමට කටයුතු කරන අතර එය මෙම දරුවන්ට පහසුවක් යයි ඔවුන් සිතති. නමුත් එය එසේ නොවේ. ඔබ දරුවාගේ පාසල් වැඩ කිරීම විනා දරුවාට කිරීමට ඉඩ දී ඔබ පිටුපසින් සිටීම ඔවුන්ට පහසුවක් වනු ඇත. තවද දරුවා ඒ සඳහා ගනු ලබන කාලය පිළිබඳ නොසිතන්න. තවද නිතරම දරුවා කාලය කා දමන බවක් හෝ දරුවා ඔබේ කාලය නාස්ති කර දමන බවත් කෙදිනක හෝ දරුවාට නොපවසන්න.
- සරල ක්‍රියාකාරකම් ලබා දෙන්න.
දරුවාගේ අවධානය පවතින කාලසීමාව ඉතාමත් කෙටි බැවින් කෙටි ක්‍රියාකාරකම් වැඩි ප්‍රමාණයක් දීම මෙම දරුවන්ට වඩාත් පහසුවක් වනවා මෙන්ම හොඳින් ක්‍රියාකාරකම් සිදුකිරීමට ද හේතුවක් වනු ඇත. නිතරම යම් අධ්‍යාපනික වැඩ නිමකළ පසුව කෙටි විවේකයක් ලබා දීම, සෙල්ලම් කිරීමට දීම, දරුවා කැමති වැඩක් කිරීමට දීම තුළින් දරුවා මේ සඳහා ඇති අකමැත්ත පහවනු ඇත.
- දරුවාට ග්‍රහණය කරගත හැකි දේ පහසුවෙන් අත හැරීමට ඉඩ නොදෙන්න.
මෙම දරුවන් තම සම වයසේ දරුවන්ට සාපේක්ෂව වැඩි කාලයක් ඉඩ ගත් ගනු ලබන බව අප සාකච්ඡා කළෙමු. ඒ හේතුවෙන් ඇතැම් සංකල්ප අවබෝධ කරගැනීමට හා ග්‍රහණය කර ගැනීමට මෙම දරුවන්ට වැඩි කාලයක්, වැඩි වාර ගානක් හා වෙනස් වූ ඉගැන්වීම් ක්‍රමවේදයක් අවශ්‍ය වනු ඇත. එක් උත්සාහයකින් පසුව ක්ෂණිකව දේවල් අත හැරීමට ඉඩ නොදෙන්න. නමුත් සෑම දෙයක්ම දරුවාට කියා දීමට උනන්දු නොවන්න. නමුත් දරුවාට ග්‍රහණය කර හැකි දේවල් ක්ෂණිකව මගහැරීම වෙනුවට වෙනස් වූ ක්‍රමවේද තුළින් එය දරුවාට තේරුම් කර වීම සුදුසය. නමුත් එය දරුවාට පීඩාකාරී පරිසරයක් බවට පත් නොකිරීමට වග බලා ගන්න.
- දරුවා නාමකරණයට ලක් නොකරන්න. (don’t label them)
නිතරම ඔහු හෝ ඇය,
- Slow learner කෙනෙක්
- ඒ නිසා එයාට මේක කරන්න බෑ
- ඔයාට පන්තියේ අනෙක් ළමයි වගේ මේක කරන්න බැරි වෙයි
යනුවෙන් දරුවා හට සෘණාත්මක චේතනා ලබාදීමෙන් වලකින්න. එය ඔවුන් තවදුරටත් පීඩාවට පත් කරනවා සේම දරුවා මානසික සෞඛ්‍ය හා පෞරුෂ සංවර්ධනයට ගැටළු ඇති වීමට හේතු වනු ඇත.
- නිතර කාරුණික වන්න. ප්‍රශංසා කරන්න.
දරුවා හට දරුවාගේ උපරිමයෙන් පාසල් වැඩ කටයුතු කරගෙන යාමට යහපත් මානසික පසුබිමක් තිබීම ඉතා වැදගත්. එම පසුබිම තැනීම සඳහා ඔබගේ කාරුණික බව ඔවුන්ට මහත් අස්වැසිල්ලකි. ඒ හේතුවෙන් දරුවාගේ මානසික තත්ත්වයට හා ඔබට වඩාත් ගුණාත්මක ප්‍රතිඵලයක් දැකීමට ඔබ ඉවසන්න. එමෙන්ම දරුවාට වඩාත් කාරුණික වන්න. දරුවා කරනු ලබන සුලු දේවල් පවා අගය කරන්න.
- ඔබේ චිකිත්සකවරුන්ගේ සහය නිතර ලබාගන්න.
මෙම දරුවන් හට විශේෂ වූ අධ්‍යාපනික සැලසුම් (IEP) තිබීම ඉතා වැදගත් වන අතර ඒ සඳහා කථන හා භාෂා චිකිත්සකවරුන්ගේ සහය ඔබට ලබා ගත හැකිය. තවද දරුවාගේ භාෂා ගැටළු, ලිවීම, කියවීම, උච්චාරණය ආදී ගැටළු වලට විසඳුම් ද කථන චිකිත්සාවෙන් ඔබට ලබා ගැනීමට හැකියාව තිබේ. එමෙන්ම දරුවාගේ මානසික සෞඛ්‍යය වෙනුවෙන් ඔබට මනෝ උපදේශකවරයෙකු ගේ සහාය ද ලබා ගත හැකි අතර දෙමව්පියන් වශයෙන් වඩාත් දැනුවත් වීම තුළින් මෙම තත්ත්වය පහසුවෙන් ජය ගත හැකි බව කිව යුතුය.
සෑම දරුවකුම එක හා සමාන නොවන අතර දරුවන් දක්ෂතා ද වෙනස් වනු ඇත. තවද ඔටිසම් තත්වය, ඩවුන් සහලක්ෂණ තත්ත්වය, ADHD/ADD තත්ත්ව සහිත දරුවන් තුළද මෙම ගැටළුව පවතින බැවින් දෙමාපියන් වශයෙන් ඔබගේ දැනුවත් වීම ඉතාමත් වැදගත් වනු ඇත.
කථන හා භාෂා චිකිත්සක සජිනි පෙරේරා මහත්මිය විසිනි.
